* * *

Енэжсянь шондіыс би моз дзик сотӧ.
Вижӧсь нин кӧдзаяс, косьмӧма шор.
Ыб вылын сёйӧд му косысла потӧ.
Льӧм пулӧн, кыдзьяслӧн нюкыртчис кор.

Шы ни тӧв. Ывлаын уджалысь этша.
Пӧсьысла, онишла личкӧма ун.
Дыр-ӧ пӧ пукалас поводдя татшӧм?
Ставсӧ кор ловзьӧдас зэра бур лун?

Энлы жӧ, роч мусянь муралӧм кылӧ,
Сьӧд кымӧр татчаньӧ матыстӧ тӧв.
Кымӧрсянь чард биыс югнитлӧ ылӧ.
Енэжын дзирдыштлӧ чардыслӧн ньӧв.

Матысмис кымӧр пласт, шондісӧ вевттис.
Швачкӧдчӧ, сяркӧдчӧ, муралӧ гым...
Бушковыс путкыльтӧ, косялӧ вевтъяс.
Полысьӧс повзьӧдлӧ ывлалӧн вын.

Эн полӧй чард биысь, гымысь да бусысь.
Кымӧрсӧ енэжысь нӧбӧдас тӧв.
Гым бӧрын зэрыштас, юкталас мусӧ.
Гым-чардыс, бушковыс быттьӧ эз вӧв.

Югӧр нин тӧдчыштӧ. Лӧньны нин пондіс.
Шондітӧ виччысьны оз ков зэв дыр.
Регыд нин мыччысяс, став мусӧ шонтас.
Выль олӧм пуксяс и радлун оз быр!