ЭНДӦМ МУ

Лидия Ивановна Иванченколы,
Кулӧмдінса агроном-ветеранлы

Сэки эз тӧдлы шойччӧг ни мудзӧм,
Радліс сьӧлӧмыс ныв-агрономлӧн,
Кодыр му вылын шептасьліс рудзӧг,
Кодыр тулыс моз дзордзавліс томлун.

Бордъя кымӧр моз кывтісны вояс..
Пӧдтіс ёг турун муяс да видзьяс.
Мисьтӧм чужӧма кад кыськӧ воис,
Сиктсьыд оз нин сюр китыр сю идзас.

Кылӧ, тӧдӧмысь, ӧтнасӧн Енмыс,
Кыдзи шогысла эндӧм му бӧрдӧ.
Рудзӧг за кодь жӧ косіник сэні
Кокнас лысвасӧ нывбаба кӧвтӧ.

Паськыд ыб вывсӧ кытшовтіс синнас,
Бӧрдіс-ливкйӧдліс юр весьтас пышкай.
Аньыд лысвасӧ малыштіс кинас —
Быттьӧ муыслысь синвасӧ чышкис.