ЭГ И ТӦДЛЫ...
1 Содӧ лун и чинӧ войыс, Но оз мун на татысь тӧв. Лым на енэжсяньыс койӧ. Турӧб, быттьӧ ышмӧм вӧв. Лымсӧ ӧдӧбтӧмӧн гартӧ. Таысь луныс быттьӧ руд. Но, а тувсов тӧлысь мартыс Ӧддзӧма кӧ, оз жӧ дуд. Тайӧ тӧв да тулыс костас Мыйкӧ гӧгӧрвотӧм эм. Олӧм сетас Енмыс? Босьтас?.. Турӧб пыр оз тыдав нем. 2 Ӧтка ӧшиньӧй Гортлань дзоргӧ. Сэні шудаӧн вӧвлі Ме коркӧ. И со нэм джын нин Ола му вылас. Ӧти муслун пыр Сьӧлӧмысь кыла. Чужан горт дорад Оз сійӧ чусмы. Сылы ачымкӧд Сӧмын и кусны. Кымын радейтӧм Олӧмын тӧдлі. Куслі ӧтилы, Вуджлывліс мӧдлы. Кольліс кад, И ме кӧдзавлі бара. Но эг вунӧдлы Гортӧс ме карас. 3 Томсянь дӧва олӧм Вичмывлӧма пӧчлы. Педӧр Митька пӧльлысь Коді керка вӧчліс? Менам челядь дырйи Дзикӧдз киссис сійӧ. Выльмӧдны важ керка Эз нин ӧшйы киӧ. Ӧні на син водзын Кильчӧ вывтӧм ӧдзӧс. Лун бок ӧшинь муын. Ен ув пельӧс «кӧчӧсь». Пӧлать, паччӧр сэрӧг Тӧвнас муса сэтшӧм. Но, а зэран кадӧ Тӧждыс абу этша. Джодж пасьтала тёпкӧ, Тазйӧ ӧкта васӧ. Ывлаыскӧд керка Олӧ ӧтсӧгласӧн. Кӧмтӧг пета йӧрӧ. Ог тӧд, мыйысь долыд. Вижъюр дзоридзьясыс Кыпӧдӧны лолӧс. И ме сэтшӧм шуда, Ворсысь каньпи быттьӧ. А мый вевтным розя, Ог и пукты пыдди. Ой, тэ челядьдырӧй, Асъя качысь шонді. Бурас эскӧмъясӧс Нинӧм на оз конды. 4 Карланьӧ сетчӧмыс Модаӧ пырис. Воысь-во сиктъясысь Том йӧзыс бырис. Унджыкыс мунлісны Сьӧд удж жӧ нырны. Кольӧны гортъяссӧ, Мунӧны пыр на. Мыйсяма олӧм нӧ Олам ми бара?.. Чужам шань сиктъясын, Кулам няйт карын. Веськалі визулас, Томлуныд бордъя. И карса олӧмыс Менӧ эз ордйы. Мыйта ме, кедзовтӧм, Дойяссӧ кылі! Унаысь синва сор Кывбуръяс сьылі. Кокньыда, — шуасны, — Карын пӧ олӧ. Сиктӧ тай долыдӧн, Шудаӧн волӧ. Мый сьӧлӧм вылад, Оз быдӧн ӧд тӧдны. Шуда ме, сиктӧ кор Лӧсьӧдча мӧдны. Чойлӧн бур мывкыдыс, Майбыр на, тырмӧ. Воан кузь туйысь И эм кытчӧ пырны. Корӧсьӧн пывся да, Кокнявлӧ лолӧй. Эм чужан гортыд, Сэн мамыд кӧ олӧ. 5 Нелямын во нин Абу пӧчӧй. А шуліс: некор пӧ ог кув. И пиян бырисны, Мый вӧчан? И ми на колям енэж ув. Ой, сьӧкыд, сьӧкыд Сьӧлӧм вылын. Ас бӧрся некодӧс ог коль. Но, кӧнкӧ, Парма чуркъяс, ылын Ӧд чужӧ нимтӧм ичӧт ёль. И зэра шоръяс Ӧктіг нуӧ, Мед чукыль-мукыль олан визь. И век жӧ петӧ Нима юӧ. И сыысь юр сылӧн оз вись. Мый коркӧ дзикӧдз Косьмас-бырас. А кӧнкӧ чужас ёль дзик мӧд. И сідз жӧ Олӧм рунас тырас. И ассьыс пом воӧм оз тӧд... Эг тӧдлы, Югдыліс-ӧ луныс. Тадз олӧм исковтас и пом. И радлуныс, И шогыс мунас. И тыртӧм коляс менам чом.
Гижысь: 
Гижӧд
Эг и тӧдлы...
Жанр: 

lkejrlkelkrgner klrjnelknfrkl ekjnrjkenfrej

1