ДОРОФЕЙ


Тамара петіс кильчӧ вылас, шонді югӧръяссьыс дыр читкыраліс синъяссӧ. Асылыс вӧлі шоныд да гажа. Ӧшинь увсьыс аддзис ассьыс радейтана петуксӧ да пыр жӧ мӧдіс чуксавны сійӧс.

— Дорофей... Дорофеюшко... Нолтӧ, волы, мый ме тэныд сета, — нывка перйис платтьӧ зепсьыс нянь тор да мӧдіс торйӧдлыны.

Дорофей тшапа локтіс аслас том кӧзяйка дінӧ, гоз-мӧдысь ӧвтыштіс гӧрд сорснас да мӧдіс зіля кокавны нянь крӧшкияс. Кор петуклӧн сёйсис, Тамара кутіс сійӧс, дыр малаліс уна рӧмъясӧн пӧртмасьысь голясӧ, мышкусӧ. Дорофей радейтӧ, кор сійӧс малалӧны, пукалӧ Тамара пидзӧс вылын да жуйвидзӧ.

Куим во сайын сійӧ вӧлі зэв на ичӧт, поліс каньысь и понйысь. Но коли кад, и Дорофей вочасӧн ёнмис да быдмис. Ӧні Мурка кань, коді оліс тані жӧ, ачыс поліс петукысь.

Асывъяснас Дорофей садьмыліс водз, петас сарайысь ывлаӧ, пуксяс потшӧс вылӧ, некымынысь ӧвтыштас ён бордъяснас, сэсся сетас ассьыс гӧлӧссӧ.

— Кука-реку... кука-реку...

Гашкӧ, кызьысь горӧдас, чӧскыда узьысьяссӧ садьмӧдас. А гӧлӧсыс сылӧн лэчыд, лӧнь асывъясӧ вель ылӧ кылӧ.

Первойсӧ Тамаралӧн бать-мамыс весиг дӧзмылісны сы вылӧ, узьны пӧ оз лэдз, морыд. Батьыс весиг юрсӧ кӧсйис керыштны. Но Тамара мӧдіс кевмысьны.

— Он убӧлит Дорофеюшколысь олӧмсӧ босьтны, эм кӧ тэнад сьӧлӧмыд. Со сійӧ кутшӧм мича да тӧлка, быдтор гӧгӧрвоӧ. Йӧрӧ бокӧвӧй каньӧс ни понйӧс пырны оз лэдз. Да и меным сытӧг бӧрдмӧн гажтӧм лоӧ.

Та бӧрын батьыс некор нин эз шуасьлы дӧзмӧдчысь петук вылӧ, корсюрӧ весиг сёян да юан петкӧдлывліс.

Дорофей ӧшинь увсьыс некытчӧ вӧлі оз мун, лун-лун кокасьӧ. Кор пӧтас, дыр куйлас лыа вылын. Асывъяснас, пырджык ӧти кадӧ, быттьӧ сьӧрсьыс часі новлӧдлӧ, садьмӧдліс матігӧгӧрса войтырӧс, кывтӧм пемӧсъясӧс. Сэсся видзӧдіс, медым горт гӧгӧрын ставыс вӧлі лючки-ладнӧ. Кор да дыр-ӧ узьлывліс сійӧ, сьӧкыд вӧлі гӧгӧрвоны.

Мӧд асывнас Тамаралӧн батьыс, коді уджаліс совхозын механизаторӧн, локтіс гортас войся сменаын уджалӧм бӧрын мудз, тшыг, узьтӧм. Пӧрччысис да водіс, весиг сёйны эз мӧд. Нывлы висьталіс, медым лун шӧрӧдз некод сійӧс эз чуксав.

Тамара надзӧникӧн петіс ывлаӧ, шытӧг пӧдлаліс кильчӧ ӧдзӧссӧ. Эз на удит лэччыны пос помӧдз, керка боксьыс кыліс понлысь лявгӧм. Нывка котӧртіс сэтчӧ и аддзис татшӧмтор: петук Дорофей орчча керкаса ичӧтик понйӧс топӧдӧма гид бокас да кучкалӧ бордъяснас, кокъяснас, зільӧ кокыштны кортӧм гӧсьтӧс. Пон туплясьӧ да нора никсӧ, некыдз оз вермы мездысьны скӧр петукысь. Тамаралы ковмис мездыны пикӧ воӧм понйӧс. Ӧдйӧ и аддзис сійӧ ассьыс туйсӧ. Горт дорас воӧм бӧрын некымынысь увтыштіс, грӧзитчис петуклы. Тамара вӧйпис:

— Оз ӧд позь тадзи, Дорофейко! Коньӧрӧс понсӧ нӧйтін да садь быртӧдзыс повзьӧдін.

Петук мыжа морт моз тапиктіс ӧшинь улӧ да, быттьӧ нинӧм эз и вӧв, мӧдіс кокасьны.

Тамара вель дыр весаліс лук град, посводзас пыртіс некымын ведра ва, сэсся босьтіс книга да пуксис пелысь пу дорӧ лыддьысьны. Тані вӧлі ыркыдджык, весиг эз веськавны шонді югӧръяс.

Муртса удитіс лыддьыны некымын лист бок, воссис дзиръя, и моски кузя ӧдйӧ мӧдіс восьлавны ар комына, важӧн нин бритчывтӧм мужичӧй. Дорофей синъяссӧ эз лэдзлы сы вылысь. Тамара матыстчис кильчӧ дорас.

— Батьыд гортад? — ылысянь на юаліс тӧдтӧм морт, коді удитӧма нин юыштны вина.

— Удж вылысь неважӧн сійӧ локтіс, шойччӧ, эз тшӧкты чуксавны.

— Тӧрыт «даръясьыштім». Пырала да батьыдлысь куим шайт удждыла. Эн ӧмӧй тӧд, тайӧ ме, Ыргӧн Ёгор.

— Он ӧмӧй уджав, отпускын али мый?

— Уджала эськӧ да, мӧдӧд лун нин загулял, — рочалыштіс Егор. — Ӧти здук кежлӧ и пырала.

— Оз, мися, позь! — гӧлӧссӧ кыпӧдіс нывка.

— Мый нӧ повзин, немтор ӧд ог гусяв. Пырала и бӧр пета. Батьыд тӧрыт премия босьтӧма, куим шайттӧ удждылас. Лэдзлы пыравны.

Тамаралы син улас уси радейтана петукыс и чукӧстіс сійӧс. Ёгор кӧсйис малыштны мича голясӧ, но Дорофей зутшнитіс нырнас код мортлы киас.

— Вот рӧзбойникыд, косясьны кужӧ, — ӧдйӧ бӧрыньтчис Ёгор. — Бӧрти либӧ пырала, кор батьыд садьмас.

Ёгор тэрыба мӧдіс восьлавны дзиръялань. Эз на удит восьтыны сійӧс, кыдзи сы вылӧ уськӧдчис Дорофей да удитіс гоз-мӧдысь кокыштны мышкас. Волысь морт сэтшӧма повзис, дзиръяас весиг зурасис да ӧдва аддзис петан туй. А Тамара нюклясьӧмӧн сераліс.

Луннас Ёгор сідзи и эз пырав Тамара бать ордӧ. Гашкӧ, поліс петукысь.

Тамара висьталіс тайӧ лоӧмтор йывсьыс батьыслы, да ёна и сералісны.

— Молодеч, зарни сорса Дорофей, кужин дорйыны ассьыд том кӧзяйкатӧ, — ошкыштіс батьыс петукӧс.


Гижӧд
Дорофей
Жанр: 

lkejrlkelkrgner klrjnelknfrkl ekjnrjkenfrej

1