ДАЧАЫН


1.

Асъя шондікӧд ывлаӧ пета,
Черӧн тотшкӧны татӧн и сэн.
Кыла: градвывса ӧмидз и сэтӧр
Кекеначӧны коръяснас мен.

Найӧс юктала дэбыдик ваӧн,
Кыдз быд ловъялӧн — косьмӧ жӧ горш.
Ӧвтӧ татӧні муӧн да маӧн,
Тырмӧ татӧні гажлун и гож.

Быттьӧ мазілӧн пелькиник позъяс —
Лун-лун кыпалӧ выль керка сруб.
Киад черыд кӧ кокниа ворсӧ,
Тайӧ уджыс тай зэв на и люб.

Кодзувкотъяс моз мырксьӧны йӧзыс,
Лунтыр сьӧлӧмыд шонді кодь яр.
Пышкай купайтчӧ енэжса лӧзас,
Быдмӧ Морово — кодзувкоткар.

2.

Енэжа-му костас сэтшӧм чӧв,
Лӧньлунсӧ кӧть босьт да кӧшысь ю.
Шоныд пася шойччӧ кӧдзыд тӧв,
Кӧч бӧж шарпа узьӧ Кылтым ю.

Ыркыдысла чужӧм сотчӧ дон,
Керка нитшкӧн пышкай дӧмлӧ поз.
Йӧрын ӧзйӧ гӧрд бантика жонь —
Мыччысьӧма быттьӧ град выв оз.