ЧУЖАН МУЛЫ КОПЫР


Бара со матыстчӧ ар аслас стрӧглунӧн, мича серпасъясӧн. Павел Павловичлӧн тайӧ квайтымын витӧд ар нин, комынсӧ сы пиысь сійӧ вӧлі ӧти и сійӧ жӧ удж вылын — лесникаліс.

Лыддьыны кӧ, комын вонад эз этша тысяча километр восьлав и Павел Павлович пармаясті, нюръясті, юяс да расъяс пӧлӧн. Татшӧм лесниклӧн уджыс. Тшӧкыда лоӧ кытшлавны аслад ыджыд участокӧд. Гожӧмнас видзӧдны, медым вӧрын эз ыпнит пӧжар, аръяснас да тӧвъяснас торйӧдны вӧр пӧрӧдан делянкаяс, видзӧдны, медым вӧр лэдзысьяс ас кадӧ идралісны пӧрӧдчан местаяссӧ. Сэн жӧ быд тулыс колӧ садитны том пуяс, чукӧртны коль. Тырмӧ, майбыр, уджыд лесникыдлы да сылы отсасьысьяслы.

Таво гожӧм лесникӧс колльӧдісны пенсия вылӧ: пыр тшӧкыдджыка сетіс тӧдны, ас йывсьыс фашистскӧй осколок, кодӧс новлӧдліс кокас нелямын коймӧд восянь.

Да и нывсяньыс, коді уна во олӧ аслас верӧскӧд Ленинградын, воис письмӧ. Корӧ батьсӧ локны ас ордас. «Менӧ верӧскӧд ыстӧны кык во кежлӧ Монголияӧ, а нывным кольӧ татчӧ. Кӧть сійӧ велӧдчӧ нин техникумын, но ӧтнаслы, Людалы лоӧ гажтӧм. Сійӧ тэнӧ зэв ёна радейтӧ. Батьӧ, став надеяыс тэ вылӧ, тэ ӧд зэв шань. Кык воыд он и тӧдлы кольӧ. Дӧзман кӧ ыджыд карад овны, сэки бӧр позяс локны гортад», — гижис медбӧръя письмӧас Маша нылыс. А талун со воӧма телеграмма. Нылыс кевмысьӧ, дас лун мысти пӧ мунам. Виччысьӧ воча кыв. Весиг деньга ыстӧма туй вылас.

«Ме, колӧкӧ, ог кӧсйы эновтны ассьым гортӧс. Квайтымын воысь дырджык тані олӧма. Ставыс ас йӧз, быд понйӧс и мӧскӧс тӧда», — ас кежас мӧвпаліс старик, кор водіс крӧватьӧ.

Оз узьсьы мыйлакӧ талун. Дум вылас унаысь усьлісны нылыс, внучкаыс, зятьыс. «Оз тай, майбыр, пукавсьы геологъясыдлы ӧти местаын. Кымынысь ме шулі Машӧлы, медым велӧдчис врачӧ, но эз кывзысь. И кутшӧм морыс найӧс та ылнаӧдзыс нуӧ. Быттьӧ сэсся Монголияас некодӧс нин ыстынысӧ!»

Асывнас Павел Павлович эз сёй ни эз ю, мӧдӧдчис гӧтырыслӧн гу вылӧ. Матӧ дас во Павел дядь олӧ ӧтнасӧн, а гӧтырсӧ быттьӧ дзик на неважӧн дзебис. Матыстчис гу дорӧ, улӧдз копыртчыліс.

— Чолӧм, Марпида... Ыджыд мог вайӧдіс. Эновтны ковмас чужан сиктӧс: нылыд Ленинградӧ корӧ. Дыр сэсся тэ дорӧ ог волы, эн дивит...

Та бӧрын ещӧ куим поклон чӧвтіс гӧтырыслы и надзӧник мӧдӧдчис сиктлань. Сувтіс Эжва ю нӧрыс вылӧ, дыр видзӧдіс тэрыба шлывгысь паськыд ю вылӧ, кытшовтіс синъяснас видзьяс кузя, видзӧдліс гырысь и посни тыяс вылӧ — ставныслы торйӧн копыртчыліс, быттьӧ нэм кежлас прӧщайтчис накӧд.

Гортас сійӧ тэрмасьӧмӧн паньыштіс тшака шыд, сэсся мӧдӧдчис вӧрӧ. «Внучкалы кӧть гӧснеч пыдди пув вотышта и кос тшак позяс сьӧрысь босьтны. Сэтысь кӧть парма дукӧн кутас ӧвтны», — мӧвпаліс старик.

Павел дядьлы вӧрыс аслас ӧшинь улыс моз тӧдса. Куньса синъясӧн вермас восьлавны вель ылӧдз. Тӧдӧ, кӧні чӧд да пув быдмӧ, кытысь позьӧ корсявны тшакъяс, кӧні кутшӧм звер-пӧтка олӧ.

Паныдасяс веськыд кока джуджыд пожӧм либӧ дзормӧм ус-тошка коз, Павел Павлович надзмӧдлас воськовсӧ, кинас малыштас уна во чӧж сулалысь пуяссӧ.

— Быдмӧй да сӧвмӧй, гажӧдӧй чужан мунымӧс.

Лэбачьяс, быттьӧ гӧгӧрвоисны пӧрысь мортлысь жугыльмӧмсӧ, ӧта-мӧд вежмӧн мӧдісны сьывны уна пӧлӧс гӧлӧсъясӧн. Павел дядь пуксис мыр вылӧ, дыр кывзіс налысь сьылӧм-гажӧдчӧмсӧ.

«Прӧщайтчыны локті. Дыр сэсся ог кывлы тіянлысь гӧлӧсъяснытӧ. Ӧтитор кӧсъя, мед эськӧ выльысь на аддзысьлыны тіянкӧд, тадзи жӧ пукыштны тані», — мӧвпаліс вӧрӧ локтысь.

Кӧнкӧ неылын, шор саяс, чипӧстіс сьӧла, сэсся мӧд, коймӧд. Тыдалӧ, быдса позтыр сэні.

«И тіянысь менам бырас гажӧй. Эг ӧд этшаысь любуйтчывлы, кывзывлы чипсасьӧмнытӧ».

Воис пувъя местаӧ. Павел дядь перйис рюкзаксьыс неыджыд кӧрзина, пыр жӧ босьтчис удж бердӧ. Орчча пуӧ шаркнитіс-кайис ур, аддзис вотчысьӧс, мӧдіс дзоргыны смоль сьӧд ичӧтик синъяснас сы вылӧ. «Пукав, небыд бӧж, пукав. Лэдз меным нимкодясьыштны».

Гортас бӧрсӧ лэччигӧн Павел дядьсянь неылын, тракторнӧй туй вомӧн вуджис йӧра, ыджыд да ён. Оз прӧста сійӧс шуны вӧрса багатырӧн. Окота вӧлі дырджык видзӧдны сы вылӧ, но раскыс регыдӧн сайӧдіс сійӧс.

Кор помасис вӧрыс да тыдовтчисны совхозлӧн муяс, Павел Павлович выльысь сувтіс, бергӧдчис надзӧникӧн шувгысь пармалань, пӧрччис юрсьыс картузсӧ да думнас шуаліс:

— Бара аддзысьлі тэкӧд. Ӧні сэсся позьӧ и туйӧ петны. Эска, выльысь на аддзысьла...


Гижӧд
Чужан мулы копыр
Жанр: 

lkejrlkelkrgner klrjnelknfrkl ekjnrjkenfrej

1