БАРА МӦДӦДЧА ТУЙӦ МЕ, БАРА

Наташалы               
Бара мӧдӧдча туйӧ ме, бара Гижны газетӧ некымын кыв... Уна вежӧса дзордзалысь парма, И быд вежӧсын выль сьыланкыв. А тэ мыйлакӧ жалитан менӧ — Шоныд синъяссьыд казяла пыр. Бӧрын ышловзян: «Ветлы нӧсь, Енмӧн...», Сэсся чӧв олан бара вель дыр. Тӧда: ӧтнадлы гортын оз овсьы, Кузьӧн кажитчӧ кӧка сӧдз вой. Кималасӧн тэ шыльӧдан вольпась, Корсян ун йывсьыд верӧслысь сой. А ме пукала важ тӧдса ордын, Тагъя ырӧшӧн веськӧда горш, Весиг йӧзын — ме быттьӧкӧ гортын, — Чужан муаным некор ог вош. Петук чилӧстас — ывла выв садьмӧ, Сиктын гожӧмнад важӧнсянь сідз. Ситеч платтьӧа нывъяскӧд рад ме Ӧти покосын ытшкыны видз. Сэсся чай кӧрӧн ӧвтӧ кор турун, Ичӧтдырся моз вальмасьны сэн... Нимъяс пыдди тан «сваття» да «шурин» Эжва йиръясӧ вӧйтчӧма вен. Сиктын сьӧлӧмысь радлун оз куслы, Сӧмын вӧлі мед шонді да нянь! Ещӧ вӧлі мед ыпъялысь муслун — Лун-вой тӧждысьысь сьӧлӧма ань. Регыд, регыд нин пӧсь морӧс бердӧ Тэнсьыд топӧда кӧсаа юр. Ветлі гӧснечла Эжвадор эрдӧ, Бурджык козиныс некысь эз сюр. Кильчӧ дорӧдзыд воча мем петав, Вая пармалысь став рӧмсӧ тэд: Ӧшкамӧшкаысь кыи шӧвк лента, Рудов кӧсаад гартовтны мед.

lkejrlkelkrgner klrjnelknfrkl ekjnrjkenfrej