АРСЕНЬ СЁРНИТӦ КОМИӦН


Ласей Вась Арсень

Воӧма карсянь.

Нёбдінса Виттор


Мырйывса колхоз быд во плансӧ тыртӧ срокӧдз. Сэтӧн эм вель уна ударница: Римма Сидорова, Анна Канева да мукӧдъяс. Арсеньӧс ыстӧмаӧсь карсянь чолӧмавны бура уджалысьясӧс, мӧдӧдӧмаӧсь налы неыджыд пӧдарки. Колхозса собранньӧ вылын Арсень кутіс висьтавны «речь».

— Товарищи! Тіян колхозлӧн эм ыджыд достижениеяс, сыкӧд йитӧдын ті вполне заслуживайтанныд поощрение, в особенности тіян ударницаяс. И вот ме вайи неыджыд дар...

— Но-о! Шыд чӧвтан дар али сур пуан дар? — чуймӧм гӧлӧсӧн юалӧ ӧти нывбаба.

— Эн перебивайт!.. Асьныд аддзанныд, кутшӧм дар ме тіянлы преподнесита. Акнитанныд!.. Ме вот нарочно локті сто километров сайӧ, тӧрыт одиннадцать часовын петі... Утомитчи... Тіян колхоз бердад туйыс ужас кутшӧм лёк!..

— Эз ков сэті вӧчны туйсӧ. Мӧдлаті колі. Тэ ӧд ачыд вӧлін нарадщикнас! — шыасис ӧти том колхозник.

— Бара реплика! Менӧ тэ эн велӧд! Ме достаточнӧя понимайта дорожнӧй делӧтӧ. Ме по специальности дорожнӧй техник. Ме тайӧ делӧ вылын понйӧс сёйи... ^ Рочӧн: на этом деле собаку съел. Комиӧн кӧ шуны: ме зэв бура тӧда тайӧ уджсӧ./^

— О господьӧ! Понйӧс сёйӧма! — пӧрысь нывбаба повзьӧмпырысь вашкӧдӧ орччӧн сулалысьыслы.

— Мый нӧ шензян! Пранцузъяс пӧ лягушаӧн чӧсмасьӧны! — вочавидзис орчча тьӧтка.

— Тайӧ ӧд абу жӧ кӧ пранцуз-а?! Мыйкӧ тай быттьӧ коми кодь-а.

— Энӧ шушукайтчӧй! Мешайтанныд... — скӧр гӧлӧсӧн шуис докладчик да водзӧ нуӧдіс сёрни: — Ті вот, тӧварыш, тракт йывсьыд реплика сетін... Делӧсӧ комиссия обследуйтіс. Комиссия быд детальӧ вникнитіс, выяснитіс, коді виноват. Одним словом, аддзисны, кытӧн понйыс вӧлі гуалӧма ^ Рочӧн: где собака была зарыта. Комиӧн кӧ шуны: мый понда тадзи артмӧма (уджыс)./^.

— Со! Абу жӧ ставнас пон тушатӧ вермӧма сёйныс... Коляссӧ гуалӧма муӧ, — ыджыд гӧлӧсӧн нин шуис ӧтик нывбаба мӧдлы.

— Эн перебивайт! Ме тіянлы как будто понятнӧя висьтала. Два месяца тому назад на туйыс вӧлі ничево... Время босьтӧ ^ Рочӧн: время берёт своё. Комиӧн: кад мунӧ — ставыс вежсьӧ./^ ассьыс, воис ар и туй испортитчис...

— Ме эг гӧгӧрво, мый висьталін Римма йывсьыс? Мый Риммаыс босьтіс ассьыс?.. — юалӧ Риммалӧн пӧдругаыс.

— Мый! Мый! Дас пунт вый!.. Вот мый... Перебивайтанныд... Онӧ лэдзӧ доклад вӧчны...

Докладчик дугдіс сёрнитӧмысь да дӧзмӧмӧн муніс собранньӧ вылысь.

— Со сэсся, колӧкӧ! Дарсӧ тай эз и петкӧдлы!


Гижысь: 
Гижӧд
Арсень сёрнитӧ комиӧн
Жанр: 

lkejrlkelkrgner klrjnelknfrkl ekjnrjkenfrej

1