ШУДА КЫСНАН


Дарья тьӧтлӧн керкаыс дзик кыр йылас. Пуксяс Дарья ӧшинь дорас, видзӧдӧ, нимкодясьӧ. Син водзас — лым улӧ дзебсьӧм видзьяс, вӧр діяс, кыр горулас нюжӧдчӧм паськыд ты.

Пӧрысьмис нин нывбаба, пенсионеркаӧн лои, а тыыс пыр на сэтшӧм, важ моз уна мортӧс чериӧн вердӧ-номсӧдлӧ.

Бӧръя воясас татчӧ частӧ кутісны волывлыны карса чери кыйысьяс. Шойччан лунъясӧ, гашкӧ, кызь машина тыр воасны йӧзыс.

Дарья видзӧдӧ кыйсьысьяс вылӧ да ас кежас дивуйтчӧ: «Колӧ жӧ та ылнаӧдз вуграсьны локны, да ещӧ тӧлын». Но аслыс любӧ: со кутшӧм унаӧн радейтӧны налысь тысӧ. Жаль, мужикыс томӧн кадӧн пӧгибнитіс, колӧкӧ, тшӧтш лэччыліс вуграсьны, ассьыс Дарьюшкасӧ свежӧй чериӧн номсӧдліс.

Ӧти татшӧм лунӧ поводдяыс сулаліс торъя кӧдзыд. Петан кӧ ывлаӧ, лэчыд тӧлыс пыр и заводитас чеплявны ныртӧ, пельястӧ, чужӧмтӧ, шоныд пасьыд и то оз видз збоймӧм кӧдзыдсьыс.

Дарья видзӧдліс тӧдса ты вылӧ да шай-паймуніс быдсӧн: «Но и но, вӧтлӧ кӧ кодкӧ найӧс гортсьыныс-а». А чери кыйысьяс быттьӧ оз и казявны чизыр тӧвсӧ, трачкӧдчысь кӧдзыдсӧ, зутшкӧны пыридзьяснас ён йи кузя, кӧчьяс моз котралӧны йӧрдансянь йӧрданӧ, йӧктӧны, шенасьӧны кияснас. Абу жӧ, буракӧ, шоныд.

Дарья пелькӧдыштіс керка пытшкӧссӧ, ломтіс кӧрт пач, сэсся заводитіс пӧсь шомӧн пузьӧдны ыджыд зобъя самӧвар. Сыӧн дояркаӧн уджалігӧн на премируйтлісны. Зэв пӧслукман важиник самӧварыс, ӧдйӧ и пузис.

«Час лэччыла да пӧсь ва юны кӧть корла кыйсьысьяссӧ, дзикӧдз изӧймитасны». Вывті нин найӧ жальӧсь кажитчисны олӧма нывбабалы.

Лэччис ӧд, эз повзьы кӧдзыдсьыс. А йи вылас, гашкӧ, витсё розь вӧчӧмаӧсь. «Видзӧдла, кыдзи кӧть йи пырыс кыйсьӧны, некор на ӧд матысяньыс эг аддзыв».

— Ловъяӧсь на? — серам сорӧн шыасис Дарья тьӧт сьӧд пася олӧма морт дінӧ.

— Мый миянкӧд лоас, — вочавидзис кыйсьысь и лэптіс йӧрданысь вель ыджыд ёкышӧс.

— Шедӧ тай... Но и но... Он весьшӧрӧ та ылнасянь волывлӧй. — Нывбаба казяліс лым вылысь чери чукӧр да ещӧ на кутіс дивуйтчыны. — Видзӧдтӧ, видзӧдтӧ, мыйта кыйӧмыд.

Бокынджык тыдалӧны морт вит-квайт. Дарья тьӧт мӧдӧдчис на дорӧ. Сэні унджыкыс том йӧз, шапка пельяссӧ лэдзалӧмаӧсь, кианыс дженьыдик вугыр шатьяс, вӧрӧдӧны найӧс, то лэптыласны, то бӧр лэдзасны. Нопъяс дорас быдӧнлӧн чери — кодлӧн уна, кодлӧн кымынкӧ на.

— Тьӧтӧ, гашкӧ, тшӧтш кыйсьыны кӧсъян? Вермам сетны вугыр шать, — шыасис нывбаба дорӧ банйӧм чужӧма зон.

— Ме помысь... Со тай, чурки-буди, тіянлы шедӧ, мед кӧть не вомдзавны... Чай юны тіянӧс кора, шонтысянныд, — сэсся Дарья индіс керка вылас. — Дзик со матын и ола, и кӧрт пач ломтысьӧ.

— Самӧварным миян сьӧрысь, термосын пӧсь чай вӧдитам, — шыасис кодкӧ. — Корӧм вылад аттьӧ, но ог эштӧй. Аддзан, кыдзи зілям, а то гӧтыръясным черитӧгыд гортӧ оз сибӧдны.

— Бать-ӧ-ӧ! Меным бара шеді!

Дарья аддзис горзысь детинаӧс, муніс сы дорӧ. Ар дас кыка чангыль ныра Федя буретш кыснансьыс мездіс пань кузя ёкышӧс. Сійӧ аддзис тӧдтӧм нывбабаӧс да пыр и кутіс ошйысьны:

— Батьӧлы оз шед, а ме сӧмын кыскала. Зепъясын быдлаын нин чери. Колӧкӧ, петкӧдла.

— Оз ков, сідз верита, бур пиӧй. Вот кӧдзыд сӧмын, и мыйла мамыд татшӧмнас лэдзӧма тэнӧ?

— Ньӧти абу кӧдзыд.

Дарья дыр видзӧдіс ичӧт кыйсьысь вылӧ. Думнас жалитіс и радліс сы вӧсна. Вывті нин старайтчис зонка, синъяссӧ оз вештыв руалысь розь вылысь. Сэсся детиналы шеді кельчи, сы бӧрын лэптіс ичӧтик ёкышӧс. Аслыс любӧыс. Сэн жӧ нывбаба сійӧс быд ногыс ошкис:

— Ай да, бур пи, кутшӧм шуда. Со кыдзи чериясыд радейтӧны тэнӧ. Вот мамыд лоӧ рад. Менам кӧ эськӧ вӧлі тэ кодь пиыс.

— Кыснаныс бур, любӧй чери кутчысьӧ, менам сэтшӧмъясыс ещӧ на эмӧсь. Ыджыд вокӧй вӧчалӧ.

— Гашкӧ, ӧтикӧс и меным сетан?

Детина эз вермы ӧткажитны меліа сёрнитысь тьӧткалы. Разис мешӧксӧ, кыскис сэтысь дась вӧчӧм вугыр шать, мыччис Дарьялы.

— На, тайӧ кыснан вылас кымӧра лунъясӧ бура шедӧ, — велӧдіс Федя, быттьӧ асьсӧ лыддис нин медся тӧлка кыйсьысьӧн.

— Бӧрти пырав шонтысьныд. Пӧсь йӧлӧн юктала, выя шаньгаӧн гӧститӧда.

Дарья тьӧт муніс, сьӧрсьыс нуис детинаӧн сетӧм кыснана вугыр шатьсӧ.

Пемдыштӧм бӧрас сӧмын тыртӧммис ыджыд ты. Сэтчӧ ӧні бара кӧзяинӧн коли лэчыд тӧв. Куйлӧ Дарья тьӧт шоныд пӧлатяс, а аслас син водзас сера паськӧма ёкышъяс, посньыдик сьӧмъяса кельчияс.

Мӧд луннас ньӧти виччысьтӧг поводдяыс небзис, тыдалӧ, эз тырмы выныс дырсӧ кӧдзыдавны. Сикт весьтӧд уліті ваткыльтісны паськыд кымӧръяс, быттьӧ корсисны му вылӧ пуксян места. Сынӧдас гартчисны-лэбалісны бобувъяс кодь лым чиръяс да кокньыдика лэччывлісны коді кытчӧ вермис.

Дарья тьӧтлы оз пукавсьы гортас, окота видлыны карса детинаӧн пӧдаритӧм кыснансӧ, колӧкӧ, и аслыс шедас пумӧн чери. Тӧрыт со мый дыра видзӧдіс да велӧдчис, кыдзи кыйсьӧны бур йӧзыс. Кыйкнитліс-видзӧдліс ӧшиньӧдыс ты вылӧ. Талун сэні некод абу. Да и ки чышкӧдъяс да юрлӧс эжӧдъяс колӧ пожъявны. Пасьтасис, тазйӧ пуктіс вугыр шатьсӧ, вевттис сійӧс пожъявны лӧсьӧдӧм кӧлуйӧн, босьтіс пыридз, коді мужикыс война вылӧ усьӧмсянь сулаліс посводз пельӧсас, и мӧдӧдчис. Медым сиктсаяс эз казявны сылысь тешитчӧмсӧ, муніс ты помӧдзыс. Татысь некод оз аддзы.

Йи вылӧ писькӧдӧм розьяс ӧти войнад абу на удитӧмаӧсь прамӧя кынмыны, тувкнитас пыридзнас кокньыдика — и бара дась, сӧмын кыйсьы. «Видлам и ми, колӧкӧ, мыйкӧ да и шедас. Детинаыс тай ошйысис, зэв пӧ бур кыснаныс. И кымӧра лунъясӧ пӧ, быттьӧ, сы вылӧ шедӧ».

Дарья видзӧдліс гӧгӧрбок, оз-ӧ кодкӧ видзӧд, сэсся вӧлисти лэдзис югъялан кыснансӧ йи улӧ. Эз на удит нюжавны кӧвйыс, кодкӧ, кылӧ, нетшыштіс. Лэптіс — ёкыш шедӧма, да и абу ичӧт. Босьтіс чукырӧсь кияснас кыйӧмторсӧ, челядь моз радлӧ.

Лэптас ӧти розьысь кык-куим чери, вежас местасӧ, йӧрданъясыс пӧшти дасьӧсь, оз ков пӧсь петтӧдзыд писькӧдчыны. Вунӧдіс пожъясьӧм йывсьыс, тазсӧ вель ылӧ колис. А чери содӧ и содӧ, ковмис нагруниксӧ пӧрччыны, да сэтчӧ тэчны. Быд чери шедӧм бӧрын думнас висьталӧ ошкана кывъяс тӧдтӧм детиналы. «Бӧжӧс кӧ кӧтӧдлі, и юква кута панявны» — шешъялӧ Дарья тьӧт.

Эз и казяв, кыдзи коли луныс. Рӧмдыны нин кутіс, а тысӧ пыр на жаль эновтны. Колӧкӧ, и пемдытӧдзыс кыйсис, да дугдіс дэбӧдчыны чериыд.


Гижӧд
Шуда кыснан
Жанр: 

lkejrlkelkrgner klrjnelknfrkl ekjnrjkenfrej

1