ШОНДІ ЛЭЧЧИГӦН


Сулаліс арся кос поводдя. Сынӧдыс ыркыд, сӧстӧм. Рытъя шонді скупа койис ассьыс югӧръяс пуяс вылӧ, а сэсся дзикӧдз вӧйтчас пармаӧ.

Тракторнӧй паськыд туй вӧрсянь лэччис Эжвалань. Ӧльӧксан дед Коля внукыскӧд восьлалісны туй кузя. Дедыс ыджыд тушаа, неуна гӧрбыльтчыштӧма. Кӧть сылы сизимдас арӧс нин, ус-тошсӧ сійӧ бритӧ. Та вӧсна чужӧм вылас тӧдчисны уна чукыръяс. Сӧмын синъясыс кажитчисны век на томӧсь. Мышкуас ӧшаліс ыджыд пестер, киас — ён бедь. Восьлаліс Ӧльӧксан дед посниа, но тэрыба. Муныштас мыйкӧ мында, сувтыштлас, лӧсьӧдыштас пельпом вывсьыс пищальсӧ — и бара водзӧ.

Колялӧн, кӧть велӧдчӧ коймӧд классын нин, тушаыс ичӧтик, кокъясыс дженьыдӧсь. Дедыс воськовтас ӧтчыд, детинка — кыкысь. Но век жӧ оз кольччы. Сійӧ дженьыдик сьӧд пальтоа, лӧзоват гача, кок сертиыс сапӧга. Сояс сюйӧма пув тыра наберушка. Дедыс вель уна пестер пув лэччӧдіс нин вӧрысь да вузаліс сельпоӧ. Шойччан лунъясӧ Коля отсасьӧ сылы.

Накӧд вӧлі и нёль кока друг: пемыдгӧрд рӧма гӧна, лапъя пельяса Дик. Вӧсньыдик кокъяса гончӧй пон эз нин котрав асъя мозыс зіля. Тыдалӧ, мудзис.

Коля радейтӧ ветлӧдлыны вӧрӧд. Кутшӧм унатор аддзылан сэтысь! Мыйсӧ сӧмын дедыс оз висьтав пӧткаяс да зверьяс йылысь. Нелямын во чӧж ӧд прӧмышляйтлӧма сійӧ. И старик оз вермы овны вӧртӧгыс. Оз кӧ дырджык ветлы сэтчӧ, пыр и гажтӧмчыны кутас.

Недыр муныштӧм бӧрын мыччысис куш мыльк. Ялаысь ӧтдор сэні нинӧм эз быдмы. Старик сувтіс, вель дыр дзоргис кок улас.

— Нолтӧ видзӧдлы, молодеч, коді таті мунӧма?

Коля видзӧдіс-видзӧдіс, но сідзи и некутшӧм кок туй эз аддзы.

— Эк тэ, ещӧ вӧралысьӧн кӧсъян лоны. Йӧра таті гӧнитӧма, и дзик на неважӧн.

Ӧні сӧмын детинка казяліс, мый яла вылын и збыльысь эмӧсь мӧс кок туй кодь гуранъяс.

Пон исалыштіс мусӧ, сэсся кытчӧкӧ пыр жӧ воши. Коля некор на эз аддзыв йӧраӧс и, дерт, окота вӧлі видзӧдлыны вӧрса олысь вылӧ, но кытысь сійӧс аддзан, колӧкӧ, кутшӧм ылӧ удитіс пышйыны.

А дед восьлаліс нин водзӧ, тэрмасис гортас. Кудриа юра пуяс сулалісны ӧта-мӧд бердас топӧдчӧмӧн, кывзісны тӧлыслысь надзӧник сьылӧм-мойдӧмсӧ. Ловпуяс, пипуяс регыд нин кышӧдчасны вижӧдӧм коръяснас, а сэсся дыр кежлӧ ланьтласны шойччыны.

Чунь пом ыджда гӧрд вотӧсъяс личкӧмаӧсь пелысь пулысь нюдз вожъяссӧ. Окота сувтыштлыны да любуйтчыштны мича ывланас, лолыштны чӧскыд сынӧдсӧ, кывзыштны вӧрса лэбачьяслысь гажаа сьылӧмсӧ. Но детинка тэрмасьӧмӧн восьлалӧ дедыс бӧрся да оз эшты любуйтчынысӧ.

Туйыс крута кежис шуйгавылӧ. Пуясыс тані гырысьӧсь, чатӧртчылан — картузыд усьӧ юрсьыд. Дед восьлаліс водзынджык, Коляӧс жӧ ылӧдлісны ки тыра пув розъяс. Кыдзи нӧ он копыртчыв, кор найӧ сэтшӧм чӧскыдӧсь. Дик эз тыдав, кольччис, тыдалӧ, бӧрӧ.

Коля кӧсйис суӧдны дедсӧ, но буретш сэки вӧрын мыйкӧ гораа трачмуні. Старик ӧдйӧ сувтіс пожӧм бокӧ, пищальсӧ чургӧдіс водзлань.

«Мый, бара, аддзис?» — думыштіс детинка. И сійӧ жӧ здукас, воськов кыксё сайын, туй вылӧ петіс йӧра. Сійӧ лэптіс юрсӧ, кыскыштіс нырнас сынӧдсӧ да заводитіс кывзысьны.

Эз виччысь Коля татшӧмторсӧ. Повзьыштіскодь, чуймис, сэсся дзебсис мыр сайӧ да заводитіс сюся видзӧдны вӧрса багатыр бӧрся.

Йӧра вӧлі дзик сэтшӧмӧн, кутшӧмӧн Коля аддзыліс сійӧс картина вылысь: ыджыд юра, кузь кокъяса, мича сюра, пельяссӧ чургӧдӧма водзлань. Ок, кутшӧм сійӧ шыльыд да ён.

Вӧрса олысь, тыдалӧ, кыліс мортъяслысь дуксӧ, кутіс дзоргыны ӧтарӧ-мӧдарӧ. Резыштас кокнас мусӧ, бара кывзыштас. Колялы мыйлакӧ кажитчис, мый вот-вот дедыс гымӧбтас-лыяс, и йӧра пласьткысяс-усьӧ туй вылӧ. Дрӧгнитіс сьӧлӧмыс, тэрыба кыпӧдчис мыр сайысь, кӧсйис видзӧдлыны дедыс вылӧ. Эз удит. Кӧнкӧ зэв матын увтыштіс Дик. Йӧра пыр жӧ зэлӧдчис, йӧткыштчис кокъяснас водзӧ и тӧв ныр моз воши пуяс костын, быттьӧ эз и вӧвлы. Пон — сы бӧрся.

Коля котӧртіс дедыс дорӧ, радысла синъясыс югъялісны, кывйыс эз артмы. Старик нюлыштіс вом дорсӧ, кодкӧ быттьӧ юмов маӧн паньӧдіс сійӧс, сэсся косіник кинас малыштіс внуксӧ.

— Аддзылін?

— Кыдзи нӧ, дерт жӧ, аддзылі, — тэрыба тольгис-висьталіс Коля. — А сюрыс кутшӧм ыджыд, кокъясыс кузьӧсь... Ме первойсӧ быдсӧн повзи.

— Повны сыысь нинӧмла, йӧраыд мортыдлы друг.

Понлӧн гӧлӧсыс ылыстчис и ылыстчис, а недыр мысти дзикӧдз дугдіс кывны.

— Дедӧ, а ме чайті, лыян, мися.

— Шуин жӧ, «лыян». Да мем найӧс гыжъя печикӧн жаль вӧрзьӧдны. Мед гуляйтӧны да гажӧдӧны миянлысь войвывса парманымӧс. Некодлы тай, майбыр, лёксӧ оз вӧчны.

Старик сулаліс юрсӧ пӧлыньтӧмӧн, видзӧдіс сылань, кытчӧ неважӧн вошины йӧра да Дик.

— Вӧтчис ӧд гӧгӧрвотӧмыд. Ачыс мучитчас дай йӧрасӧ, коньӧрӧс, жуйӧдас.

— Вошӧ кӧ Дикыд?

— Эн пов, понйыдлӧн компасыс ныр йылас.

«Эк, мӧдысь на эськӧ паныдасьлыны тэрыб кокъяса йӧракӧд да дырджык кежлӧ», — думайтіс Коля.


Гижӧд
Шонді лэччигӧн
Жанр: 
Пасйӧд: 

лучьяссӧ > югӧръяс (1979ʼ вося редакция серти)

lkejrlkelkrgner klrjnelknfrkl ekjnrjkenfrej

1