* * *


Туй кузя кӧмтӧм,
Лым кузя пасьтӧм,
Котӧртіс да гӧнитіс.
Дядьӧ анькытш вартӧ.
— Бог помеч анькытш вартны!
Лун кежлӧ китырӧн,
Во кежлӧ содз тырӧн!
Дядьӧ сійӧ босьтас да
Крупкӧдас да крапкӧдас,
Мамыс дінӧ мӧдӧдас.
— Мамӧ, менӧ нӧйтісны,
Мамӧ, менӧ виисны.
— Мыйысь пиӧ, нӧйтісны
Мыйысь, пиӧ, виисны?
— Дядьӧ вӧлі анькытш вартӧ,
Ме сылы шуи:
Лун кежлӧ китырӧн,
Во кежлӧ содз тырӧн.
— Мыйла, пиӧ, сідз шуин?
Мыйла, пиӧ, сідз вӧчин?
Тэ ӧд медым шуин:
Лун кежлӧ дас пудйӧн,
Во кежлӧ сё пудйӧн.
— Аски, мамӧ, кужа нин,
Аски, мамӧ, шуа нин.

Туй кузя кӧмтӧм,
Лым кузя пасьтӧм,
Котӧртіс да гӧнитіс.
Дядьӧ горт нуӧ.
— Бог помеч горт нуны,
Лун кежлӧ дас гортйӧн,
Во кежлӧ сё гортйӧн!
Дядьӧ сійӧ босьтас да
Крупкӧдас да крапкӧдас,
Мамыс дінӧ мӧдӧдас.
— Мамӧ, менӧ нӧйтісны,
Мамӧ, менӧ виисны.
— Мыйысь, пиӧ нӧйтісны,
Мыйысь, пиӧ, виисны?
— Дядьӧ вӧлі горт нуӧ да
Ме сылы шуи:
Во кежлӧ сё гортйӧн,
Лун кежлӧ дас гортйӧн.
— Мыйла, пиӧ, сідз шуин,
Мыйла, пиӧ, сідз вӧчин?
Тэ ӧд медым шуин:
Веськыд туй да бур путь
Мӧдар югыдӧдзыс.
— Аски, мамӧ, кужа нин,
Аски, мамӧ, шуа нин.

Туй кузя кӧмтӧм,
Лым кузя пасьтӧм,
Котӧртіс да гӧнитіс.
Свадьба мунӧ.
— Веськыд туй да бур путь
Мӧдар югыдӧдзыс!
Свадьба сійӧ босьтас да
Крупкӧдас да крапкӧдас,
Мамыс дінӧ мӧдӧдас.
— Мамӧ, менӧ нӧйтісны,
Мамӧ, менӧ виисны.
— Мыйысь, пиӧ, нӧйтісны,
Мыйысь, пиӧ, виисны?
— Свадьба вӧлі мунӧ да
Ме налы шуи:
Веськыд туй да бур путь
Мӧдар югыдӧдзыс.
— Мыйла, пиӧ, сідз шуин,
Мыйла, пиӧ, сідз вӧчин?
Тэ ӧд медым шуин:
Радуйся-веселися.
— Аски, мамӧ, кужа нин,
Аски, мамӧ, шуа нин.

Туй кузя кӧмтӧм,
Лым кузя пасьтӧм,
Котӧртіс да гӧнитіс.
Дядьӧ рыныш кусӧдӧ.
— Радуйся-веселися!
Дядьӧ сійӧ босьтіс да
Крупкӧдіс да крапкӧдіс,
Мамыс дінӧ мӧдӧдіс.
— Мамӧ, менӧ нӧйтісны,
Мамӧ, менӧ виисны.
— Мыйысь, пиӧ, нӧйтісны?
Мыйысь, пиӧ, виисны?
— Дядьӧ рыныш кусӧдӧ да
Ме сылы шуи:
Радуйся-веселися.
— Мыйла, пиӧ, сідз шуин,
Мыйла, пиӧ, сідз вӧчин?
Мед тэ зыр тыр лым койин,
Ведра тыр ва койыштін.
— Аски, мамӧ, кужа нин,
Аски, мамӧ, вӧча нин.

Туй кузя кӧмтӧм,
Лым кузя пасьтӧм,
Котӧртіс да гӧнитіс.
Дядьӧ пос чышкалӧ.
— Бог помеч лым чышкавны!
Зыр тыр лым койыштіс,
Ведра тыр ва койыштіс.
Дядьӧ сійӧ босьтіс да
Крупкӧдіс да крапкӧдіс,
Мамыс дінӧ мӧдӧдіс.
— Мамӧ, менӧ нӧйтісны,
Мамӧ, менӧ виисны.
— Мыйысь, пиӧ, нӧйтісны,
Мыйысь, пиӧ, виисны?
Дядьӧ вӧлі пос чышкӧ,
Зыр тыр лым койышті,
Ведра тыр ва койышті.
— Мыйла, пиӧ, сідз керин,
Мыйла, пиӧ, сідз вӧчин?
Тэ ӧд медым шуин:
Во кежлӧ праздник.
— Аски, мамӧ, кужа нин,
Аски, мамӧ, шуа нин.

Туй кузя кӧмтӧм,
Лым кузя пасьтӧм,
Котӧртіс да гӧнитіс.
Дядьӧ асмогасьӧ.
— Бог помеч асмогасьны,
Во кежлӧ праздник!
Дядьӧ сійӧ босьтіс да
Крупкӧдіс да крапкӧдіс,
Мамыс дінӧ мӧдӧдіс.
— Мамӧ, менӧ нӧйтісны,
Мамӧ, менӧ виисны.
— Мыйысь, пиӧ, нӧйтісны,
Мыйысь, пиӧ, виисны?
— Дядьӧ вӧлі асмогасьӧ,
Ме сылы шуи:
Во кежлӧ праздник.
— Мыйла, пиӧ, сідз шуин,
Мыйла, пиӧ, сідз вӧчин?
Тэ ӧд мед сьӧлыштін да пӧльыштін.
— Аски, мамӧ, кужа нин,
Аски, мамӧ, тӧда нин.

Туй кузя кӧмтӧм,
Лым кузя пасьтӧм,
Котӧртіс да гӧнитіс.
Йӧзыс вичкоӧ петӧ,
Сійӧ тшӧтш жӧ петі.
Старӧстаяс ӧктысьӧны,
Блюдъяс сьӧлыштіс да пӧльыштіс,
Гортас и локтіс.