СЬӦЛӦМ ӦЗЙӦ-ЛОМАЛӦ


Ок, дай, тувсов войыс чӧскыд унмӧс,
	Лӧсьыд вӧтӧс садьмӧдіс.
Олӧмӧс том нылыс, муса нылыс,
	Мывкыд нылыс сайкӧдіс.
Ок, дай, оз тай узьсьы. Вольпась вылысь,
	Шебрас улысь чеччыла.
Ворсны льӧм сад улӧ, дзоридз пӧвстӧ
	Гудӧкасьны лэччыла.
Ок, дай, тэрыб чунь помъясӧн гудӧк кизьяс,
	Эзысь кизьяс кыяла.
Сӧстӧм дзоридз дуксӧ, юмов масӧ,
	Сынӧд выйсӧ ньылала.
Ок, дай, ланьтӧм шы ни тӧвсӧ тувсов войлысь.
	Лайкыд войлысь орӧда.
Сьывны вӧр-ва горӧн гудӧк бӧрысь
	Вом тыр горӧн горӧда.
Ой, дай, муса нылӧй, дона нылӧй,
	Сӧдз вежӧрӧй, гулюӧй,
Сьӧлӧм пытшкӧс ӧзтысь зарни борда,
	Биа бордъя пуляӧй.
Муса нылӧй тэ, мывкыд нылӧй,
	Сьӧлӧмшӧрӧй-гулюӧй.
Ой, дай, кылӧ оз нӧ тэныд льӧм сад улысь
	Дзоридз пӧвстысь гӧлӧсӧй?
Инды, вашнит сылы тэ — лӧня кывтысь
	Эзысь чарла тӧлысьӧй.
Ой, дай, кок шы кылӧ тай — локтӧ нылӧй,
	Сьӧлӧм ӧзйӧ зарниӧн...
Вӧля кутӧм йылысь, шуда олӧм йылысь
	Вый моз киссьӧ сёрниӧй.
Ок, дай, чужан муӧй — вӧльнӧй светӧй,
	Рӧднӧй мамӧй, донаӧй!
Радейта сідз тэнӧ, кыдзи муса нылӧс,
	Морӧс пытшкӧс ломалӧ.