СЕВОЛОД ДА АВАНС


Талун Севолод довгис гортланьыс мукӧд лун серти ёна сёрӧнджык, но мортыслы сьӧлӧм вылас вӧлі долыд. Таляссьӧм кирзӧвӧй сапӧга кокыс серпасаліс зэрӧм бӧрын няйтчӧм туй вылын кутшӧмкӧ гӧгӧрвоны позьтӧм серъяс. Артмис Ленинлӧн «воськов водзӧ, кык бӧрӧ» кодь, кӧть эськӧ татшӧмсяма нигаястӧ мортыс некор весиг киас эз босьтлы, непӧштӧ нин лыддьыны.

Сідзсӧ Севолод грамотаа морт, сизим класстӧ эськӧ быть на помаліс, эз кӧ школасьыс дзик нинӧмысьсӧ вӧтлыны. Директорыслы да велӧдысьяслы мыйлакӧ эз во сьӧлӧм выланыс, первой классӧ пырӧмсянь дзескӧдісны, пыр корсисны помка, мед мыйӧнкӧ крукыштны да сконйыштны.

Кымынысь школьникӧс мамыскӧд тшӧтш турки-тарки вайӧдлісны пыдзравны педсӧвет вылӧ. Сэні сувтӧдасны став велӧдысь водзас, пычкасны кыкнанныслысь синва, бурпӧт гогналасны, янӧдасны, да лёка асьсӧ кутӧмысь быд пӧрйӧ грӧзитасны вӧтлыны. Но мамыслӧн криста радиӧн корӧм да пиыслӧн улӧ ӧшӧдӧм сьӧд юрнас гогйӧдлӧм бӧрын бара на жалитасны да колясны школаӧ. Батьыс, дерт, школаад ёнасӧ эз петкӧдчыв. И век жӧ пельӧдыс кӧть, но сизимӧд классӧдз Севолодӧс кыскисны, кутісны лача, мый коркӧ-некоркӧ, быдмыштас-сюсьмыштас да, мортӧн на лоас.

Медбӧръя войтыс директорлӧн да педагогъяслӧн терпенньӧ пельсаӧ усис Выль вося рытӧ, кор Севолод петкӧдчис школаса мичмӧдӧм залӧ вина гагсьыс на кодӧн. Петіс йӧз шӧрас да таджикасис кокъяссӧ паськӧдӧмӧн, мед кутчысьны усьӧмысь, ок и бура морскӧй походкаыд сылӧн артмис. Сэсся крапйӧдліс-висьталіс ставсӧ, мый думайтӧ школаса педколлектив йылысь. Тайӧ лои сылӧн медводдза «речӧн», кодӧс ёна вӧлі суктӧма гижны позьтӧм роч да коми кывъясӧн. Та бӧрын зонка видліс йӧктігтырйи сьылыштны суйӧрсайса сэкся моднӧй ансамбльлысь сьыланкыв, кытысь тӧдіс сӧмын «Хоп! Хей-оп! Хоп! Хей-оп!», но сідзи нин омӧля кывзысьысь кокъясыс дзикӧдз лигышмунісны да Севолод грыпкысис конфеттиӧсь джоджӧ. Аплодисментъяс, дерт, эз вӧвны. Пыр жӧ мӧдӧдісны зонпосниӧс Севолодлӧн бать-мамла, кодъяс воигкежлӧ детинка уяліс нин югъялысь мича чачаясӧн баситӧм коз улын. Тайӧн и помасис Севолодлӧн грамота перйӧмыс. Бать-мамыс водтӧдісны муса писӧ кузь дадь вылӧ, усьӧмсьыс нӧшта гартыштісны гезпомӧн, и гургӧдісны гортӧдзыс. Шняпкисны порогувса джодждӧра вылӧ, кымыньӧдісны, мед воснас оз пӧд, да сэні асылӧдзыс и узис-шкоргис.

Пемыд на вӧлі, кор батьыс садьмӧдіс Севолодӧс да пиыслӧн тӧрытъя кодь кымын жӧ уличвывса сёрниысь босьтӧм кывъясӧн «весаліс» сылысь юр вемсӧ.

— Эн кӧ окотит галстука еджыд дӧрӧмӧн тапъявны аспальт кузя, няйт купайкаӧн кутан скӧт гидысь куйӧд зыртны!

Та бӧрын батьыс некор эз кольлы Севолодӧс гортас, кыскаліс быд удж вылӧ. Регыд и гӧгӧрвоис Севолод, мый чуньнад небӧг кузяыд новлӧдліг коскад эськӧ озджык сюй, но вӧлі нин сёр, олӧмтӧ мӧдарӧ он бергӧд.

Ӧні Севолод ачыс нин нёльысь бать, кыдзи вермӧ, челядьыслы нин тӧлк сюйӧ. Сьӧд уджтӧ нэм чӧжыс мыркӧ, да пырджык чӧв олӧ, сьӧкыд сылысь кывтӧ перйыны. Но мыйӧн сюрлас ырснитыштны да юрас кайыштас коддзӧдан руыс, сэки мужиклӧн быттьӧ кутшӧмкӧ поньӧд воссьӧ. Мунас клуб дорӧ, каяс кильчӧ вылас, чабыртас киас нэмӧвӧйся бусӧссьӧм картузсӧ, да и «йӧткалӧ речь», кыдзи ачыс шуӧ. Сэтшӧм сьӧлӧмсяньыс висьталӧ, кажитчӧ, мый би киньяс сявкйӧны ичӧтик сьӧд синъяссьыс, а сынанъяс важӧн нин аддзывлытӧм сьӧд юрсиыс сідзи и пыркйысьӧ тӧв йылас. Эм кодкӧ кывзысь али абу, та вылӧ Севолод оз видзӧд: страналӧн пытшкӧсса да ортсыса некытчӧ шогмытӧм политикаӧн тӧдмӧдас, эрдӧдас тырмытӧмторъяс, сэсся вуджас ас сиктса власьт кутысьяс вылӧ. Кывзысьясыд сылӧн пыр ӧтияс: вит-ӧ-квайт челядюлов да сы мында жӧ пон, кодъяслӧн таысь кындзи мукӧд мог абу.

Сёр рытнас нин, кор палялыштас да чуймас, мый некод сылы оз клопайт, помалас «речсӧ» «бурные, продолжительные аплодисменты» кывъясӧн. Партияыдлӧн съездъяс бӧрын тай концерт овлӧ, Севолод налӧн визьӧ жӧ кутчысьӧ. Бура дыр на клуб кильчӧ вылас йӧктас да сьылас-горзас. Концертсӧ видзӧдны унджыкӧн нин чукӧртчывлісны, ӧд «петкӧдчӧмыс» муніс сёрӧн, кор йӧзыслӧн лунся уджъяс кызвынсӧ топавлісны. Дерт, бара жӧ тайӧ вӧліны том йӧз, олӧмаясыдлы веськодь Севолодлӧн кимӧститчӧмыс. Уна вонад мортыдлӧн концертасян сямыс пыр ӧтарӧ содіс, озырмис и репертуарыс, ӧти кывйӧн кӧ, дзик нин артистӧн Севолод лоис. Торйӧн ёна видзӧдысьяслы кажитчыліс, кор ас сиктса морт йӧктігтырйи сьывліс томдырйиыс кыськӧ кывлӧм «Сам себя заваривал, сам себя запаривал, сам себя зажа-ри-ва-ал! Хоп! Хей-оп! Хоп! Хей-оп!». Тайӧс сьылӧм бӧрын концерт помланьыс вӧлісны и збыль аплодисментъяс, том йӧзыдлы ӧд — теш.

Талун вель кузь доклад жӧ вӧчис, ёнджыкасӧ личкис гортса пемӧсъясӧс радейтӧм вылӧ, чуксаліс ёнджыка найӧс лелькуйтны, а не чужъявны да лыйлыны быдсяма лӧпнас. «Речь» дырйиыс картуз пыдди сійӧ шошукӧдыс кутіс кычипиӧс, коді Севолодӧн тадзи радейтігад лекция чӧжыс летіс кокъяссӧ да лёкысь лявзіс.

Рытнас зэрмис, и Севолодӧс кывзысьяс разӧдчисны. «Бурнӧй, продолжительнӧй аплодисментъяс» бӧрын ачыс лэччис жӧ клуб кильчӧ вылысь да мӧдӧдчис гортас кокъяснас синусоидаяс серпасалігмоз, весиг концертсӧ эз петкӧдлы. Пырис керкаас, ӧдзӧс дорас чужйис няйт кӧмсӧ, чилгис картузсӧ тув йылӧ да шыасис:

— Наста! Вай сёянтор, другӧс вердыштны колӧ!

— Кодӧс нин бара-й кыскин? — мыччысис пачводз дорын пусьысь, дӧзмӧм чужӧма, сартас кодь кос гӧтырыс. Кӧнкӧ, чайтіс, кодӧскӧ алкаш-другъяс письыс вайӧдӧма верӧсыс. Но некодӧс эз аддзы да бурджыка нин видзӧдліс Севолод вылӧ. — Бара сакӧма! Кӧн нӧ авансыд? Талун ӧд кӧсйин вайны?

— Авансыд — то! — жеркнитліс гежӧдіник, вижӧдӧм пиньяса вомсӧ верӧсыс да чургӧдіс шоныд морӧс бердас ланьтӧм кутюпиӧс.

— Мый нӧ кутюшойтӧ мыччӧдлан? Мен деньга колӧ! Мыйӧн тэнсьыд резина рушкутӧ кута тыртны? Али этайӧс тшӧктан пуны? — индіс понпи вылас гӧтырыс.

— Пон яй сёйӧмӧдз ог на лэдзчысьӧй, — эз дӧзмы Севолод. Мый-мый, а гӧтырыскӧд сійӧ некор эз лёкӧдчыв. Да и йӧзыскӧд тшӧтш. — Быдмас да керка видзысь и кыйсян друг меным лоӧ. Аддзан, кутшӧм мича, татшӧмыд, дерт, бур пӧрӧдаа.

Севолод лэдзис вайӧмторсӧ джоджас, мед ставӧн видзӧдлӧны ичӧт пемӧс вылӧ. Вӧсньыдик кузь ныра, омӧлик, руд гӧна понпи мыйӧнкӧ муніс кӧинпи вылӧ. Кутшӧмкӧ зэв мисьтӧминик, абу мукӧд понпиыс моз пургыль кодь гӧгрӧсіник да муса. Весиг челядьыслы эз кажитчы.

— Кыськӧ нин талӧн пӧрӧда! Тӧда ме татшӧм керка видзысьястӧ! Ӧтчыд оз увтыштлы, кӧть став эмбуртӧ петкӧдасны! Став алкашыс налы первой другъяс! Збыль ӧд юала, аванстӧ сеталісны эз?

— Сеталісны, кысь нӧ эз! Босьтлі эськӧ, да кытчӧ нӧ сійӧ инмылас?! Другъяс кӧ эз содтыштны, весиг водка доз эз шед, — гыжйыштіс Севолод голя боксӧ да паськыда нюммуніс.

— А господьӧй! — шлапкысис лабич вылӧ Наста да уськӧдіс шойччӧг тӧдлытӧм кияссӧ увлань. — Кӧлалі жӧ аслым нэм кежлӧ татшӧм тӧлктӧм верӧсӧс! Йӧзыслӧн то, — нюжӧдліс боклань кисӧ, быттьӧ индіс кодкӧ вылӧ, — ставсӧ гортас кыскӧны. Кыйӧны да вийӧны, деньгатӧ, мый босьтласны, оз небось вина вылӧ коявны. И ставыс налӧн тыр-бур, эмыс и абуыс выйим.

— Бара ассьыс патепонсӧ восьтіс. Дугды вай оллявнытӧ, дыш кывзыны! Ачыд сьылі вылӧ ӧшӧдчин, ог пӧ вермы тэтӧг овны! Ӧні сэсся каитчы кӧть эн. Олам йӧзысь ог лёкджыка, весиг то телевизор эм, — ӧвтыштчис гӧтырсьыс Севолод, ветліс пачводзас, кисьтіс ляпкыд тасьтіӧ йӧв да пуктіс гӧбӧч ӧдзӧсдорса джоджас. Кокньыдика матыстіс понписӧ да личкыштіс юрӧдыс. Мӧдыс шырпи моз чипӧстіс, кӧсйис мынтӧдчыны, но мыйӧн вомас веськалыштіс йӧлыс, пыр жӧ кутіс горша, виньдылӧмӧн лакны мӧс вӧра йӧвсӧ. Здукӧн и куштіс тасьтісӧ. Сэсся мичаа нюліс дозсӧ, бергалыштіс места вылас, лэдзис ичӧтик гӧптор да сэтчӧ жӧ орччӧн и нюжӧдчис, кунис синсӧ.

— Вот мыйтта тэныд и колӧ, Аванс, — меліа видзӧдіс кутю вылӧ Севолод. — А мортыд мыйлакӧ некор оз пӧтлы, пыр унджык и унджык корӧ, сӧмын и кылан: «Вай да вай!» То тай, менам Наста дзик жӧ сэтшӧм.

— Да эг кӧ ме вӧв, важӧн нин эськӧ кыстӧ нюжӧдін! — дӧзмӧм гӧлӧсӧн кӧтшассянь шыасис гӧтырыс.

Тадзи и овмӧдчис Кузьбожевъяс ордын тайӧ кӧин модаа кычаныс, да и нимыс сибдіс — Аванс. Первойсӧ тешкодь вӧлі, но кузяӧн ставӧн велалісны да сідзи быттьӧ и колӧ, ним — ним и эм.

Быдмис Аванс ӧдйӧ, абу ӧд морт, кодӧс кок йыв сувтӧдны кызь во колӧ да нӧшта на та бӧрын сьӧмнад отсыштавны. Лапъя пельясыс сувтісны, нырыс кызыштіс да эз нин и сэтшӧм кузь ло, ачыс гӧгрӧсмыштіс да зэв на мича пон и быдмис. И лоис Севолодлы нёль кока бур ёрт, кодӧс ачыс сӧмын и вердліс, некодӧс эз сибӧдлы. Пыр ӧтлаынӧсь. Насталы лои кык кокни корсьны верӧссӧ, оз нин ков важ моз став сиктсӧ кытшлавны. Петас ывла вылӧ, горӧдас «Аванс!»: кутшӧм керка дорын понйыс шыасяс, сэні и Севолод койтӧ. Медся бур кывзысьӧн на лои, кор Севолод «речсӧ» висьтавліс: Аванс пельяссӧ чошкӧдӧмӧн кывзӧ, кӧзяиныслы веськыда вомас и дзоргӧ. Сӧмын клопайтнысӧ эз велавлы, кор «речь» помас Севолод шуас: «Бурные, продолжительные аплодисменты».

Кӧзяина-понма ӧта-мӧдтӧгыс овны эз вермыны, сэтшӧма велалісны. Кытчӧ Севолод, сэтчӧ и Аванс. Севолод ведраясӧн клёнӧдчигтыр петӧ кильчӧ вылас, и Аванс чепӧсйӧ нин, киас небыдика инмӧдчылӧ, быттьӧ чолӧмалӧ. Кепыся кӧ, кепысяс тшапкысьӧ, нетшкӧ, мед кӧзяиныс пӧрччас кепысьсӧ да шыльӧдыштас гӧн ньылыдсӧ. Увтчигтырйи колльӧдас юкмӧс дорӧдз да сідзи жӧ любӧпырысь бӧр вайӧдас. А керка видзысь, кыдзи и шуліс Наста, збыль эз артмы. Йӧз вылӧ Аванс эз лёкавлы, кӧть коді пырас йӧрад да мый петкӧдас — пыр бӧжсӧ легӧдӧ. Понйыд кӧ тай усьласьӧ ветлысь-мунысьяс вылад, сэки пон вӧснаыс и кӧзяиныс вылӧ скӧралӧны. Кузьбожевъясӧс та боксянь некод эз ёрлы. Радейтіс Аванс налӧн керка бокті ветлысь алкашъясӧс: зэв лӧсьыда водз кокъяснас кутчысяс кодлыкӧ мышкас да бӧр кокъяс вылас тшӧтш тапиктӧ. Этша и серавлісны Севолодлӧн челядьыс та вылӧ. Гожӧмнад Севолод Аванссӧ видзліс дом йылын, мед градъяс эз лой, ыжъясӧс да чипанъясӧс эз повзьӧдлы. А арсяньыс мӧд гожӧмӧдз лэдзліс. Мед пӧ сяркъялас, кыдзи кужас.

Медся ёна Аванслы кажитчыліс шӧйтны вӧрті. Аддзас, мый кӧзяиныс нопъясьӧма да ружьесӧ ӧшӧдӧма пельпом вылас, инас ӧшйытӧг, никсігтырйи чеччалӧ, кытшлалӧ Севолод гӧгӧр. Вурзалӧ, сідзи и сьылӧ, вомас радлуныс оз тӧр. Но кӧзяиныс эз пыр босьтлыв сійӧс вӧрад. Лэч туй кузяыд, кор колӧ гусьӧникӧн мунны, велӧдтӧм понйыд водзвылад котӧртӧ да пӧткаястӧ повзьӧдлӧ. Лыйны некод оз сюр. Та вӧсна лэч туй кыйны мунігӧн Севолод пырджык зілис гусьӧникӧн петны керкасьыс, мед Аванс оз тӧдлы. Кор Севолод ӧтнас ветлас вӧрас, гортас локтӧм бӧрын Аванс оз сёрнит, дузъялӧ. Ветлӧдлӧ, быттьӧ оз аддзы кӧзяинсӧ, бокӧ кытчӧкӧ видзӧдӧ: «Но, вӧрӧ ветлін? Ӧтнад? Мед, меным дзик веськодь! Ньӧти эз вӧв окота».

...Севолод петаліс посводзӧ, ичӧтик ӧшиньясӧд видзӧдліс ывла вывсӧ, тӧдмаліс, кӧні Аванс. Аддзис — карта сай турун зорӧд бокын нюжвидзӧ, дэбыд, арся шонді югӧръяс улӧ кынӧмсӧ лӧсьӧдӧма, бӧръя шоныдсӧ куталӧ. Севолодлӧн гӧбӧч ӧшиньыс ыджыд, да сэті гусьӧникӧн и петіс нопнас и ружьенас, мед Аванс оз тӧдлы. Град бокті борйӧд надзӧника лэччис, эз мукӧд лунся моз дзиръяӧд пет. Вӧрӧ пыригӧн нин кокньыда лолыштіс, слабог пӧ, бара на Авансӧс верми ылӧдлыны. И друг бӧрвылас «Ува-а-а!» кыліс. Бергӧдчис, а сэні понйыс нюжмасьӧ да вом чашкӧдмӧныс чӧскыда очсалӧ. Шпыннялӧ, эн пӧ вермы тайӧ пӧрйӧ менӧ ылӧдлыны. Панйис кӧзяинсӧ да водзвылас зіля тринькйис вӧсньыдик чукля кокъяснас.

«Жбыр-р-р» — кыпӧдчис, кылӧ, сьӧла кельӧб: руз-паз разӧдчисны тавося том сьӧлаяс да пуксялісны матігӧгӧрса коз увъяс вылӧ. «Тюруп-тюруп, тюп-тюруп» сӧмын и кылӧ. Севолод дзирнясьӧ сідзи и тадзи, но сук коз лапъяс костысь некодӧс оз аддзы. Аванслы ставыс син водзас, видзӧдлӧ то сьӧла вылӧ, то Севолод вылӧ. «Мый нӧ кӧзяиныс, дзик синтӧм али мый? Вай лый нин ли мый ли», кӧсйӧ висьтавны, но оз куж морт ногӧнтӧ, сӧмын «ув-ув» артмӧ. Севолод сы вылӧ кулакнас шенасьӧ, гусьӧникӧн «Ланьт!» шуалӧ. Но Аванслӧн оз терпитсьы, бӧжсӧ легӧдышталӧ, некыдзи оз вермы кутчысьны да бара увтыштӧ. Сьӧла лэбзис, Севолод матькыштіс понйыс вылӧ, нетшыштіс кузь ньӧр да мый вынсьыс кӧсйис швачкыны кузь гӧна мыш кузяыс, но Аванс абу жӧ дзик йӧй, оз на лӧсьӧдчы ньӧр улад, ёна тэрыбджык кӧзяинсьыс, сідзи и лыйыштіс вӧрас. И бара нин увтчӧ кӧнкӧ водзынджык, пӧткаясӧс повзьӧдлӧ. Сӧмын кор ылалас кӧч дорӧ да кыткӧ ыліті-бокиті вӧтлысьӧ сы бӧрся, сэки Севолодлы веськавлӧ лыйны гоз-мӧд душ.

Лэчкӧ шедӧм пӧткатӧ Аванс оз вӧрӧд. Коркӧ томдырйиыс, кор йӧй на вӧлі, сёйліс кык сьӧла, но таысь сылы ёна сюрліс Севолодсянь. Сэксянь, аддзас кӧ лэчкӧ шедӧм сьӧлаӧс, виччысьӧ кӧзяинсӧ, пукалӧ орччӧн да бӧжсӧ легӧдӧ. Вӧрзьӧдтӧмсьыс Севолод гӧститӧдӧ понсӧ кутшӧмсюрӧ чӧскыдторйӧн.

Лунтыр вӧрті шӧйтӧм бӧрад кӧзяина-понма воисны рытланьыс вӧр керка дорӧ. Севолод сьӧкыда лэдзис нопсӧ дубалӧм пельпомъяс вывсьыс, ӧшӧдіс тув йылӧ ружье да патронташ, сюйыштіс кер потасӧ черсӧ, восьтіс керка ӧдзӧссӧ да лэдзчысис порог вылас. Аванс нюжӧдчис орччӧн, виччысьӧ, кор кӧзяиныс заводитас «речсӧ йӧткавны» да концертасьны. Но мӧдыслы талун мыйлакӧ ньӧти оз сьывсьы. Недыр пукалыштӧм бӧрын ломтіс пач, лэччыліс вала, пуктіс пач вылӧ пӧрт да чайник. Кыскис нопсьыс кыйдӧссӧ, бӧрйис кык том сьӧла, мед ӧдйӧджык пусясны, пӧрысьыд ӧд, асылӧдз кӧть пу, оз небзьы. Куштіс-весаліс да пӧртйӧ дзумгис, а юр-коксӧ да сювъяссӧ Аванслы шыбитіс... Содтіс весалӧм картупель, солыштіс да бӧрыннас нин, кӧр вылас, душ-мӧд лаврӧвӧй лист чӧвтіс. Тані некод тыра пызан саяд оз виччысь, аслыд лоӧ лӧсьӧдны.

Сёйисны-юисны кӧзяина-понма, а сэні нин ывлаыд пемдӧма, коли сӧмын шойччыны водны, мудз веськӧдыштны.

Кыдзи и век, Аванс кӧлачӧн водіс керкадорса нэмӧвӧйся коз пу улӧ, сылӧн ӧд вольпасьыс и шебрасыс пыр сьӧрсьыс — аслас пасьыс шоныд. Севолодлы жар, ёнджыка пачсӧ ломтӧмыс лоӧма да. Та вӧсна ӧдзӧссӧ неуна костӧн кольыштіс, мед ыркалыштас керкаыс. Пӧрччысис, ӧшліс паськӧмсӧ сёрйӧ да нюжӧдчис нар вылӧ. Лунтыр шӧйтӧм бӧрад, кор кокъясыд дубалӧмаӧсь, оз куснясьны, пельпомъясыд ноп да ружье кыскалӧмсьыд сідзи ыджыд гӧлӧсӧн и ойзӧны, шоныд керкаад пӧт кынӧмӧн куйлыштнытӧ майбыр. Ачыд ас вылад кӧзяин, некод оз дӧсадитчы, сӧмын кывзы керка юр весьтсьыд джуджыд козъяслысь небыда шувгӧмсӧ. А тайӧ шыладыс сідзи и байкӧдӧ вӧралысьӧс... Эз и тӧдлы, кыдзи унмовссьӧма. Пыр на чайтӧ, мый ӧттор-мӧдтор йылысь мӧвпалӧ, а вӧлӧмкӧ, вӧтасьӧ нин.

Садьмыштліс Севолод, унйывсьыс кывзысьыштіс войся шыясас, бергӧдчис мӧд бок вылас, кияссӧ нюжӧдіс водзӧджык и... сьӧлӧмыс сідзи и ыркнитіс, мышку кузяыс котӧртіс кӧдзыд йирмӧг: сыкӧд орччӧн кодкӧ куйліс да сьӧкыда лолаліс. Кӧдзыд... и кӧтасьӧм гӧна! Севолод нетшыштіс кисӧ. Эз-ӧ нин чӧртыс сыкӧд орччӧн вод?.. Куйлӧ, вӧрзьӧдчынысӧ оз лысьт, а мыш кузяыс кӧдзыд пӧсь визувтӧ. Но, мый лоны — ло... Кыдзкӧ веніс полӧмсӧ, нюжӧдчыліс джадж дорӧ, чиркнитіс истӧг тувйӧн. Кор пемыдыс разалыштіс да синъясыс велалыштісны, тӧдіс Авансӧс, коді тшӧтш садьмис, меліа нюлыштіс Севолодлысь кисӧ да бӧр ланьтӧдчис, кӧнкӧ, шуис аслыс, водз пӧ тай на.

Вӧлӧмкӧ, войнас зэрӧма. И мыйӧн паськыд лапъяса козйыс дугдӧма кутны оравлытӧг кисьтысь васӧ, Аванс корсьӧма косджык места. Неуна косталыштӧм ӧдзӧсӧдыс и пырӧма керкаӧ да водӧма кӧзяиныскӧд орччӧн. Эз ӧд думайт, мый Севолод весьӧпӧрмӧныс повзьыны вермас.

— Мун пет татысь, яндысьтӧм син! Этатшӧма повзьӧдін, сюра лешак! Тайкӧ ог йӧймы тэ вӧсна! — Севолод гораа матькигтырйи вӧтліс Авансӧс ывлаӧ. — Кутшӧм чӧскыда унмовсьлі да...

Топыда пӧдлаліс ӧдзӧссӧ, броткигтырйи бӧр водіс, бергалыштіс ӧтар-мӧдар бок вылас, кытчӧдз унмыс сьӧкыд ноп моз выльысь эз личкы.

Колӧ бура шойччыны, ӧд аски асыв югдӧмкӧд тшӧтш бара лысва кӧвтны. Но кӧзяина-понмалы татшӧм олӧмыс медся на ёна и кажитчыліс. Арбыд вӧрын шӧйтлісны, кӧть ёна гырысь нопъясӧн гортас эз жӧ бергӧдчывны-а. Но кӧть нин концертасьӧмъяссӧ тайӧ кадас Севолод вунӧдлывліс.

Тадзи эськӧ лӧня, уджалӧм сорӧн да корсюрӧ даръясьыштӧм бӧрын «речь йӧткалӧмӧн» и муніс Севолодлӧн да Аванслӧн олӧмыс, эз кӧ странаын вермы контрреволюция, кор социализмсянь бӧр вежыньтім капитализмӧ. Совхозыс водзті кыдзкӧ-мыйкӧ кутчысьліс на дотацияяс вылын, а мыйӧн дугдісны сетны, пыр и пазмуніс. Мый позьӧ вӧлі, мужикъяс новлісны да вежлалісны первой водка вылӧ, а кор сиктӧ мӧдісны вайны донтӧм «Троя», вуджисны сы вылӧ. Севолодлӧн удж эз ло, а мый вӧчны уджтӧгыд? И сюри Кузьбожевлы медся кокни удж — бырӧдны «Троя». Кымын пӧ унджык юа тайӧ зелльӧсӧ, сымын этшаджык сійӧ кольӧ, а вочасӧн и дзикӧдз бырас. Ӧні быд лун вӧчаліс клуб дорын отчётнӧй докладъястӧ, а эз воддза моз вежоннас ӧтчыд.

Веськаліс коркӧ сиктсӧветса гӧлӧва Севолодлӧн «речь» улӧ да мортыдлы эз кажитчы, и шыӧдчис участкӧвӧй дорӧ, ныр улад пӧ общественнӧй пӧрадоксӧ торкалӧны, кытчӧ нӧ тэ видзӧдан? А участкӧвӧйлы сійӧ и колӧ, гижис гумага да сельсӧветса машинаӧн и гурӧдіс оратортӧ юрсиктӧ. Аванс, кыдзи и век, вӧлі кӧзяиныскӧд. Кор машинаыс дука сьӧд тшынӧн пӧлясигтырйи ӧдӧбтіс мир туй кузя, Аванс чепӧсйис жӧ сы бӧрся. Первойсӧ орччӧн сяркйис, весиг панйывліс на, но вочасӧн мудзис, кольччыны кутіс. Надзмис и надзмис понлӧн ӧдыс, медбӧрын ы-ылӧ колис, но век жӧ надзӧникӧн пыр вӧтчис, и шоперыс, кодлы жаль лои кывтӧм пемӧсыд, сувтӧдіс туй бокӧ «уазиксӧ», виччысьыштліс боквыв ӧшйӧм кывъя Авансӧс.

— Аванс! На, на, на! Лок пыр, — Севолод восьтіс ӧдзӧссӧ да корис понсӧ машина пытшкас. Но сылӧн нёль кока ёртыс некор на эз пуксьывлы машинаясад да поліс, уйыштіс «уазик» улӧ и некыдзи эз кӧсйы петны сэтысь, сӧмын никӧстлывліс.

Севолодлы ковмис кыскыны Авансӧс бӧр кокъясӧдыс да моздорас босьтӧмӧн сӧлӧдны аскӧдыс.

Дас витнан суткисӧ Аванс куйліс кутузкалӧн решёткаалӧм ӧшинь улын, некытчӧ эз ветлы, пыр нюліс ассьыс доймалӧм кокъяссӧ, ӧд изйӧсь туй кузяыд дыр котӧртӧм вӧсна кок пыдӧссьыс став кучикыс кульсьӧма вӧлі. Дежуритысь милиционеръяс петкӧдлывлісны сылы сёян колясъяс, но Аванс сӧмын аттьӧавліс бӧжсӧ легӧдӧмӧн, да веськодьпырысь бергӧдліс юрсӧ мӧдарӧ, йӧзыдлысь нинӧм эз сёй ни ю. Сэки здук кежлӧ кутісны лэдзлыны Севолодӧс, мед вердыштас понсӧ тшыгла кулӧмысь.

Коркӧ воис и петан лун.

— Вот и аддзысянныд бара Авансыдкӧд. Бур и пон тэнад! Коркӧ тшук ёна важӧн татшӧмӧсь жӧ и йӧзыд вӧліны, а ӧні мый выйӧдз воим... Кодкӧ кутас мӧй тадзи пон моз виччысьны кык вежон чӧж?! Оз бара-й! — варовитіс Севолодӧс дзиръя дорӧдз колльӧдысь милиционер. — Но, волывлы!

— Ен мед видзас! — ӧвтыштчис татшӧм бур кывъяссьыд мӧдыс.

Севолодкӧд аддзысьӧм бӧрын Аванс, гашкӧ, быдса час чеччаліс кӧзяиныслы морӧс вылас, став паськӧмсӧ няйтчӧдіс да чужӧмсӧ дульнас лякис.

— Гажыд бырис? Со ӧд кутшӧм лёк торйӧнтӧ. Но, ладнӧ, ладнӧ, тырмас нин, тырмас сэсся нювсьынытӧ, — бурпырысь шуаліс мужик, кодлы эз ӧмӧй кажитчы татшӧм видзаалӧмыд. Кутшӧм нин быттьӧ чорыд сьӧлӧма, а весиг синваыс дольснитчис.

Дзескыдінас пукалігад Севолодӧс лудікъяс прамӧя дӧсадитісны, ёна, буракӧ, вирыс кажитчӧма, ӧд первой группа, да нӧшта резусыс отрицательнӧй. Кыдзи коркӧ врачьяс шулісны, зэв гежӧд, дона вир пӧ тэнад. Та вӧсна, кӧнкӧ, и уськӧдчисны паразитъясыд сы вылӧ, окота жӧ ӧд «деликатеснад» номсасьыштны. А медся сюсьясыс сідзи и кольччисны паськӧм вурысъясас да вуджисны овны Севолодлӧн важиник керкаас. Быдсяма порошокъяснас киськавліс, гельясӧн Наста гӧгӧрбок мавтавліс — сідзи эз и вермы мынтӧдчыны наысь. Асывнас стен кузяыс быттьӧ посньыдик гӧрд мольяс кыссьӧны, сымӧть дучкасны вой чӧжнад Кузьбожевъяслысь чӧскыд виртӧ.

Совхозлӧн киссьӧм гаражын троешникъяс — Севолод, Терень Миш да Опонь Лёня — пукалісны няйт пызан сайын, мый вылын водзті разьлывлісны да лӧсьӧдавлісны машинаяслысь да тракторъяслысь посни агрегатъяс. А мыйла троешникъяс? Сы вӧсна мый куимӧн, да нӧшта «Троя» юӧны. Вольсыштӧм газет вылын стӧканъяс, шӧрӧм джын нянь, китыр лук турун, полторашкаын кӧдзыд ва, а медся шӧрас, дерт, «Троя» доз. Талун мыйсюрӧ удайтчис шышнитны-вузавны, да ӧти доз со шедіс. Кыдзи и век, сьӧмыс сӧмын юантор вылас тырмис, а курччыштнысӧ кӧть нинӧм эз ло, вермасны на и сідзи, ва сорӧн.

— Ок и добра жӧ тайӧ «Трояыд»! — ошкыштіс Терень Миш. — И донтӧм водкасьыд, и юрад ёнджыка дзенгӧ.

— Да, кутшӧмкӧ сюсь морт думыштӧма жӧ татшӧм зеллясӧ вийӧдны. Ӧні, кӧнкӧ, важӧн нин миллиардер ачыс, — дозсӧ киас бергӧдлігмоз содтыштіс Опонь Лёня. — Крепыд, ватӧг весиг юны он лысьт, сотас гырк пытшкӧстӧ.

— А ме сорлавтӧг верма дзонь доз юны, чистӧйсӧ, — друг шыасис Севолод. — Веськыда дозсьыс.

Ёртъясыс чуймӧмӧн видзӧдлісны сы вылӧ.

— Сотчан! Ватӧгыд?! — петіс ӧтпырйӧ кыкнанныслӧн.

— Нинӧм ог ло! Менам пытшкӧсӧй ӧжигайтчӧма нин, да кӧть царскӧй водка юа, примитас, — ышмыштіс Кузьбожев. — Вай заклад вартам, мый юа ватӧг и нинӧмӧн ог закусит.

— О, кутшӧм сюсь! — дзӧрыштіс Лёня. — Дзоньнас сійӧ юас! А миянлы мый, шиш? Он ылӧд! Ассьыд пайтӧ ю, а миянлысь эн вӧрӧд.

Кисьталісны, тотшнитчисны. Лёня да Миш юисны ваӧн сорлалӧмӧн, а Севолод — сідзи. Сійӧ босьтіс стӧкансӧ, бергӧдліс юрсӧ боквыв, пӧльыштіс тыяссьыс сынӧдсӧ, матыстіс вом дорас да ӧти здукӧн и ректіс. Лэптыштліс кушсӧ нин вывлань да кымыньтліс, синъяссӧ чашкӧдӧмӧн видзӧдысь ёртъясыслы мигнитіс, то пӧ кыдзи ми кужам. И нинӧм вомас эз сюйышт.

Аванс, кыдзи и пыр, куйліс гараж ӧдзӧс водзын да тшапйӧдліс паськыд вомнас лӧдзьясӧс, кодъяс сідзи и ызгисны жарысла ымралысь ывла вылын. Аслас пон вежӧрнас сійӧ некыдз эз гӧгӧрво, мыйла кӧзяиныс пыр корсьӧ аслыс сэтшӧм ёртъясӧс, кодъяс юӧны кутшӧмкӧ чӧскыдтӧм дука ва, да та бӧрын ассяньныс тшӧтш заводитӧ паркйыны сійӧ терпитны позьтӧм дукыс. Водзті татшӧм мича гожся луннад асывсяньыс сы мында йӧз вӧлі чукӧртчасны да ю сайӧ вуджасны ыджыд пыжӧн, паськыд видз вылӧ. Авансӧс Севолод мукӧддырйиыс тшӧтш вӧлі лэдзлас дом йывсьыс, а сійӧ кӧзяинсьыс оз кольччы, лунтыр ризъялас дзоридза веж видз вывті. Пажын дырйи йӧз дорын жӧ бергалӧ, вежалана синъясӧн кыйӧдчӧ панясьысь войтыр бӧрся. Дерт, тшыгйӧн оз кольны, вердасны чӧскыд сёяннад польдымӧныс. Та вӧсна сёйӧм бӧрын дыш котравнысӧ да ёнджыкасӧ гож водзын нюжвидзас. Рытнас ставныскӧд ӧтлаын бӧр... Сэки нин йӧзыс оз тэрмасьны, мудзӧмаӧсь, гортаныс руньгӧны. А ӧні со — татшӧм мича гожся лун, а видзьяс вылын лӧнь, ставыс эндӧ. Некодлы кӧ нинӧм оз ков-а?.. Да, быдсяма мӧвпыс жӧ волӧ и пон вежӧрӧ.

Но эштӧма, буракӧ, стӧканъяснад гольӧдчан уджыс, кӧзяиныс ёртъясыскӧд петісны гаражысь да катласигтырйи кодарланьӧкӧ довгисны. Кыкыс восьлалӧны кокньыда, а Севолодлӧн кокъясыс мыйлакӧ муртса и кыпавлӧны. Да и шатлӧдлӧ сійӧс мукӧд лунся дорысь быттьӧ ёнджыка. Со, ёртъясыс мый ылнаӧ нин мунісны, а Севолодлы воськолыс дугдіс шедны. Катовтӧдіс шуйгавылӧ, сэсся веськыдвылӧ, кызмырдӧн эськӧ видліс на веськӧдчывлыны, но кыдзи тай швачкысис-усис кымыньӧн буса туй вылас, да эз и вӧрзьӧдчыв сэсся.

Аванс нюжӧдчис Севолод дорӧ, паськыда вом тырнас очсыштіс, пуктіс вӧсньыдик нырсӧ воддза лапаяс вылас да мӧдіс виччысьны кӧзяинлысь чеччӧмсӧ. Эз ӧд ӧтчыд нин тадзитӧ вӧв. Шкоргас-шкоргас да коркӧ палялас жӧ, бара клуб дорӧ мунас отчётнӧй доклад вӧчны.

Но тайӧ пӧрйӧ Севолод унмовсьӧма дыр кежлӧ, дзикӧдз садьмывтӧм вылӧ. Кор челядьыс аддзисны батьсӧ понлӧн вурзалӧм кузя, Севолод вӧлі нин кын. Вайисны гортас шойсӧ, мыськалісны, лӧсьӧдісны дзебны. Но рытнас пыраліс участкӧвӧй да чуньнас пызанӧ тотшӧдӧмӧн тшӧктіс быть лэччӧдлыны юрсиктӧ, мед моргын кырлаласны да тӧдмаласны, кутшӧм помка вӧсна шӧр арлыда, дзоньвидза мортлӧн лолыс петӧма.

— Да господи, и сідз нин ставным тӧдам, мыйла, — ымӧстіс Наста. — «Трояыд» виис.

— Тӧдны тӧдам, но колӧ гумага. Сытӧг мортыдлы и кулӧм бӧрас оз позь. Он ӧд, буракӧ, кӧсйы, мед дзебӧм бӧрас выльысь ковмис перйывлыны?

— Ен мед видзас гуысь бӧр лэптылӧмысь! Эз на сэтшӧм лёк морт вӧв, мед сідзи тешитчыны кулӧм бӧрас! — синва сорӧн топӧдліс морӧс бердас медся ичӧт кагасӧ Наста. — Аминьӧй-аминьӧй! Но и олӧм лои! Овнысӧ сьӧкыд, а кулан да — кык сьӧкыд! Ковмас копыртчывлыны Елесь Васьлы, сылӧн кузола машина да, гашкӧ, лэччӧдлас юрсиктӧдзыд.

Чышкыштіс синвасӧ да вазьӧм ныр увсӧ и довгис корсьны машина.

Елесь Вась вӧлі гортас, гаражас буретш машина дорас и ноксис. Збыль вылас эськӧ сійӧс Елесь Иван Митрей Васьӧн шуӧны, но сиктса кокньӧдчисны да дженьдӧдісны мортыдлысь нимсӧ.

— Василий Димитриевич, сё ен могысь, эн ӧткажит, — синва сорӧн заводитіс нывбаба. — Севолодӧй ӧд куліс менам, да милицияыд оз лэдз дзебнысӧ. Колӧ моргӧдз лэччӧдлыны, кырлавны коньӧрӧйӧс. Тэ вылӧ став надеяӧй, некод дорӧ сэсся шыӧдчынысӧ.

Елесь Вась эновтіс уджсӧ, бергӧдіс Насталаньӧ зумыш чужӧмсӧ, чышкыштіс кос рузумӧн маслӧӧн лякӧссьӧм кияссӧ да кыдз позьӧ небыдджыка вочавидзис:

— Кывлі, дерт, шог йывсьыд, сикт пасьтаыс нин сёрнитӧны. Нинӧм он вӧч, ставнымӧс сійӧ жӧ виччысьӧ. Жаль, кадысь водз мӧдісны пӧрнӧй йӧз эновтавны таладор югыдсӧ да, тӧдӧмӧн жӧ эськӧ Севолодыд та вылӧ муніс да... Эз кӧ сак, мый дыра на оліс.

— Мый сэсся керан? Оліс нинӧм думайттӧг, нинӧм думайттӧг и куліс. А меным куим пӧвста шог, кыдзкӧ меститны колӧ, он ӧд косьты, — ышловзис ань.

— Дерт, пикӧ воӧм морттӧ йӧртны некыдзи оз позь, кӧть аслам уджыс юр выв тыр. Мый вӧчан, нула, инӧсь, сӧмын бензинысь да уджсьыс вештысьнытӧ ковмас. Сытӧг ӧд машинаыд оз новлӧдлы.

— Мыйта шуан, сымда и вешта, ог ылӧдлы, сӧмын могмӧд-а, Василий Димитриевич, — быдсӧн югзьыштіс чужӧм вылас Наста. — Ог ӧд вунӧд бур вӧчӧмтӧ некор. Кӧть тай шуӧны, бурыд пӧ вунӧ, а лёкыд некор оз, ме ог вунӧд.

— Да, — вом тырнас паськыда нюмдіс Елесь Вась, — коригад тай сідзи быдӧн шуӧ, а муртса кад кольыштас, видзӧдан да, вунӧдӧмаӧсь нин, бара ме мыйыськӧ мыжа, кулакӧн нимтӧны. Час, гортӧ недыр кежлӧ пырала, нуръясьышта да матыстча керка дорад, а ті лӧсьӧдчӧй пока. Код нӧ лэччылас?

— Терень Миш да Опонь Лёня тай кӧсйысисны-а. Ӧтлаын ӧд бӧръяысьсӧ юӧмаӧсь.

— Кыкнансӧ ог вермы. Лопуковыд кутас да штрапуйтас. Мишыс да ме кыкӧн нин лоам, тырмас.

Ловзьыштӧм сьӧлӧмӧн нин Наста пырис гортас, лӧсьӧдіс Севолодӧс гартыштны важ покрывалӧ, Елесь Васьлы вылӧ сьӧм торйӧдіс да кӧсйис нин идравны коляссӧ, Терень Миш кутыштіс сійӧс киӧдыс.

— А меным?

— Тэныд нин мыйла?

— Кыдзи мыйла? А мый дыра кежлӧ, колӧкӧ, сэтчӧ лэччам. Некод ӧд сэні миянӧс тыра пызаннад оз виччысь, сёйыштны-юыштнытӧ ковмас.

— Ой, эг ӧд и думыштлы сы йылысь, — ӧвтыштіс кинас Наста да пайдыштіс и Мишлы.

Ӧшинь улын, кылӧ, тутӧстіс машина. Эз дыр и нюжмась Елесь Васьыд, кӧнкӧ, сувтсӧн и сёйыштіс. Петкӧдісны кияс вылас дӧранад гартыштӧмӧн Севолодлысь шойсӧ да лэптісны кузолӧ. Кильчӧ дорын куйлысь Аванс весиг пельнас эз легнитлы. Кысь сылы вӧлі тӧдны пон вежӧрнас, мый тайӧ кузьмӧс ёкмыльыс, кодӧс сэтшӧм видзчысьӧмӧн кыпӧдісны машинаӧ, и эм сылӧн кӧзяиныс. Колльӧдіс синъяснас керка дорысь ылыстчысь грузӧвиктӧ, очсыштіс да бӧр нюжӧдчис гож водзӧ, виччысис Севолодлысь петӧм.

Морг ӧдзӧс вӧлі томана.

— Код ордын нӧ ключыс? — гыжйыштіс юрсӧ Миш.

— Сійӧ тшук «Скорӧяд», — шыӧдчис татчӧс пӧрадокъяснас тӧдса нин Елесь Вась. — Ветлам да юалам.

Мужикъяс мунісны больничалӧн ылі кильчӧлань, кӧні меститчис «Скорӧй помощь».

— Ті нӧ кытысь татшӧм мичаясыс? — эз ёна бурысь видзӧдлы на вылӧ гӧрда-лӧза дзоридзьяса дӧраысь вурӧм калата олӧма ань.

— Медся ылі пельӧссьыс... Шой кырлавны вайим, — вочавидзис Миш. — Сибдыліс машинаыс да йӧткавны ковмис, вот и няйтчыштім тӧкӧтьӧ. Моргыд тай игана, да ключ юавны пырим.

— Ключтӧ тіянлы ог сет. Ачым восьтыла, пыртанныд да бӧр томнала.

— А оз ӧмӧй ӧні кырлавны? — шай-паймунісны мужикъяс.

— У-у! Сэні витӧн нин куйлӧны, ӧчеред виччысьӧны.

— Кор нӧ сэсся кырлаласны? — дзикӧдз усьӧм сьӧлӧмӧн юавсис Мишлӧн.

— А тэ ачыд думыштлы. Талун пекнича, уджалан луныс помасис нин, аски-аскомысь выкоднӧйяс. Выльлунсянь и заводитасны. Ставыс кӧ бур, рытнас лоӧ гӧтов. Воторникас сэсся верманныд босьтны.

Мужикъяс шемӧсмӧм чужӧмъясӧн видзӧдлісны ӧта-мӧд вылас, сэсся Миш бара шыасис калата ань дорӧ:

— А кыдзкӧ нӧ ӧдйӧджык оз позь видзӧдлынысӧ?

Нывбаба чӧв олыштіс, гудйыштіс босоножкинас кок увсьыс мусӧ да индіс больнича ӧдзӧсӧд петысь мужичӧй вылӧ:

— То эськӧ паталогоанатомыд да, колӧкӧ, аскӧдыс сёрнитлӧй.

— О-о! Тайӧ мӧд делӧ! Сёрнитлам! Кыдзи нӧ кӧть шуӧны сійӧс?

— Ефим Васильевич.

— Роч? Коми?

— Роч.

Здук-мӧдӧн и суӧдісны врачӧс.

— Ефим Васильевич! Подождите минуточку! — горӧдыштіс Миш.

Ефим Васильевич сувтовкерис, бергӧдчыштіс сійӧс суӧдысьяслань да гӧгӧрвотӧг эз ов, кутшӧм мог суӧма тайӧ няйтчӧм паськӧма тӧдтӧм мужичӧйяссӧ.

— Слушаю вас.

— Ефим Васильевич, дорогой, мы приехали издалека. Умер наш родственник, молодой ещё был, поэтому без вскрытия нельзя хоронить. Не можете ли вы вскрыть сразу, сейчас, пока ещё на работе?

Ефим Васильевич сэтшӧма чукыртчыліс тайӧ кывъяссьыс, быттьӧ сылӧн став пиньыс ӧтпырйӧ висьмис.

— Нет, мужики, к сожалению, не могу. Рабочий день у меня закончился, я и так уже переработал. Всё!

— Ну, Ефим Васильевич, ведь это же минутное дело для вас, привычному человеку.

— Минутное не минутное, но мне за переработку не платят. У меня нормированный рабочий день. Восемь часов уже отбарабанил, устал до чёртиков, еле на ногах держусь. Люди каждый день пачками мрут: стреляют, режут друг друга. Надо мной постоянно висят милиция, прокуратура. Им тоже всегда почему-то надо вскрывать сразу, немедленно, нужен конкретный результат смерти, чтобы следствие вести. Я не могу дни и ночи проводить на работе, понимаете вы меня? — кияснас шенасигтырйи лыддьӧдліс Ефим Васильевич.

Кымын дырджык висьталіс врачыс, сымын этшаджык коли лачаыс. Медбӧрын Елесь Вась полігырйи сюйсис сёрниас:

— А дайте нам бумажку, что вы вскрыли.

— Да вы что?! Мужики! Хотите, чтобы меня посадили? Извините, я ещё на свободе погуляю!

— А мы заплатим вам, Ефим Васильевич, если сейчас вскроете, — збоймыштіс Миш.

Мӧдыс сюся видзӧдліс сы вылӧ да петкӧдліс куим чунь.

— Триста? Хорошо, мы наберём столько, только сделайте сегодня, — ловзьыштіс быдсӧн Терень Миш.

— Три ты-ся-чи! — тӧдчӧдіс паталогоанатом.

— Три ты-ысячи-и?! — ӧттшӧтш паськалісны вомъясыс мужикъяслӧн.

Шогпырысь видзӧдлісны ӧта-мӧд вылас.

— Столько нам не достать, — ӧвтыштіс кинас Миш.

— Ну, тогда до свидания! Ничем не могу вам помочь, — и Ефим Васильевич шавксьӧдіс — тушаыс водзын, а кокъясыс вӧтчисны бӧрвылас.

— Тьпу! — скӧрысла сьӧлыштіс кок улас Елесь Вась. — Та дыра висьталӧм пыддиыд кӧ кырлаліс, важӧн нин эштіс. Дыр-ӧ сэні видзӧдлыны да гумага гижыштны!

Терень Миш гыжйыштіс юрсӧ, мыйкӧ мӧвпалыштіс да аслыс моз надзӧникӧн арталіс:

— Куим сюрсӧн кӧ быдӧнлысь, а моргас ӧні квайт шой нин, лоӧ дас кӧкъямыс. Ӧти лунӧн тайӧ вермӧ нажӧвитны сы мында, мыйта ми куим воӧн огӧ аддзылӧй. Озыра, кӧнкӧ, олӧ.

— Колӧкӧ, кымын во велӧдчис да... — кайтыштіс Елесь Вась. — Ми воклы дыш вӧлі грамотатӧ йирны да сідзи и ковмас нэм чӧжыд ас кӧзяйство вылад надеяӧн овны.

— Каям бӧр, тані сэсся век кӧть шензьы, воторникӧдз нинӧм жӧ оз пусьы.

Мужикъяс чӧла пуксялісны машинаӧ, сӧмын Миш пыр на мӧвпаліс:

— А кодкӧ эськӧ мынтысьлӧ оз?

— Кысь нӧ оз! Озыра олысьясыдлы ӧд куим сюрсыд абу деньга!

— Да-а! Кодлыкӧ, дерт, абу, а миянлы загреки на ыджыд деньга.

Елесь Вась бергӧдіс зажиганньӧ ключсӧ, мотор эрӧстіс, бӧръя кӧлесаяс улысь шердйыштчисны посни изъяс, и машина первой надзӧникӧн, а сэсся пыр ӧдйӧджык и ӧдйӧджык тюрис бӧр гортлань.

Тадзи и эм: олан-олан мортыд нинӧм думайттӧг, чайтан, мый кулан да мортӧс моз дзебасны. А вӧлӧмкӧ, абу на век сідзи. Первой гири-люкиӧн да груна-гранаӧн машина кузолын некымын час чӧж чеччавны ковмас, туплясьны кузов пасьтаыс, кӧтасьны зэр улын. Сэсся некымын сутки куйлыны моргын, виччысьны, кӧть ӧчередъясыд и олігад нин мустӧ прамӧя зыртісны. Та бӧрын бара грузӧвӧй машиналӧн няйт кузолын кузь туяд мый дыра на юртӧ швачӧдас гуранысь гуранӧ лэччиг-кайиг. Эськӧ и абу нин ловъя мортыс, но сьӧлӧм вылад зэв на абу лӧсьыд. Ладнӧ, тӧлын кӧ суас сьмертыд, а жар гожӧмъяснад? Дзикӧдз тшыксяс мортыд да сэки ӧдйӧджык нин мед сӧмын дзебыштны да тыртны шойна вылын пыдӧджык. Кутшӧм нин сэні тӧлкӧн-ладӧн, ен нога прӧститчӧмӧн да бӧрдыштӧмӧн.

Тадзи лои и Севолодкӧд. Кырлаланінсянь вайӧм бӧрын весиг гортас пыртлынысӧ эз шогмы, ывлаас ылӧсас мыськыштісны-пасьтӧдісны, водтӧдісны гортъяс да и нуисны Джуджыд Гӧраӧ, кӧні куйлӧны сиктса став важ йӧзыс.

Наста челядьыскӧд дыр на пукаліс выльӧн тыртӧм гу дорын, бӧрдігтырйи надзӧникӧн лыддьӧдліс:

— Тӧдӧмӧн жӧ эськӧ асьтӧ, Севолодушкоӧй, виин да, чайтін, мый «Троясьыд» крепыдджык? Оз на татшӧмъясӧс сійӧ пӧрӧдлы. Нэм джынтӧ весиг эн вермы овны, кыдзи колӧ. Эз жӧ ӧд та вылӧ тэнӧ, донаӧс, чужтывлыны бать-мамыд да. Совкозыд кӧ эськӧ эз киссьы да уджыд эз быр, колӧкӧ, эн на та выйӧдз во да... Вот сэсся миянӧс и эновтін. Нинӧм сэсся тэныд оз ков, пес ни, ва ни... Но узь, Севолодушко, прӧстит сэсся менӧ, мый эг вермы тэнӧ кутыштны, колӧкӧ, коркӧ мыйкӧ лёктор шулі ли... Меным нёль челядьтӧ колин, да найӧс кок вылӧ сувтӧдны вермыла-ӧ? Та йылысь эн жӧ тай думыштлы... Ой, бара нин тэнӧ пинявны заводиті, эн дӧзмы. Узь лӧсьыда да прӧстит менӧ... Медбӧръяысь.

Чеччис, пернапасасис, кутыштліс челядьсӧ.

— Мунамӧй гортӧ, дитяяс. Миянлы ӧд кыдзкӧ овны на колӧ, батьыдлӧн тай эштісны концертъясыс-а...

Аванс юрсӧ ортсыӧ мыччӧмӧн, вӧрзьӧдчывтӧг куйліс Севолодӧн вӧчӧм чомйын, синъяссьыс кадысь кадӧ войтышталіс синва. «Кымын лун нин со эз петав кӧзяинӧй, мый бара и лоис сыкӧд?» Тадзи, кӧнкӧ, мӧвпаліс аслас пон вежӧрӧн, а колӧкӧ, и эз. Но чомсьыс эз петав.

Севолодӧс дзебӧм бӧрын коймӧд лун асывнас Наста петіс ывлаӧ, мед кӧть васӧ нин вежны нинӧм сёйтӧм понлы, шылькнитіс сійӧс юрӧдыс. Мӧдыс эз вӧрзьӧдчыв — кын нин вӧлі.


Гижысь: 
Гижӧд
Севолод да Аванс
Жанр: 

lkejrlkelkrgner klrjnelknfrkl ekjnrjkenfrej

1