ПӦРЫСЬ МАСТЕР


Мича узоръяса гыӧрӧн вевттьысьӧм ӧшиньӧд комнатаӧ пырӧ рытъя пемыд. Виж краскаӧн мавтӧм важиник будильник, коді сулаліс ичӧтик гӧгрӧс пызан шӧрын, петкӧдліс сизим час.

Варвара Михайловна, висян чужӧма, пелькиник старука, кузь юбкасӧ кутыштіг лэччис паччӧрсьыс, чукырӧсь косіник кияснас ӧзтіс электрическӧй би, ӧшиньяссӧ тупкис еджыд занавескаясӧн, сэсся заводитіс лӧсьӧдны ужын.

Недыр мысти посводзын кыліс тӧдса кок шы. Сійӧ жӧ здукын дзуртыштіс ӧдзӧс, да порог вомӧн воськовтіс Варвара Михайловналӧн верӧсыс, Егор Петрович.

Егор Петрович Шаньгинлы позьӧ вӧлі сетны ар квайтымын. Ветлӧдліс сійӧ тэрмасьтӧг, неуна гӧрбыльтчыштӧмӧн. Паськыд сьӧд тошкыс вӧлі дзугсьӧма. Читкыртчыштӧм синъясыс видзӧдісны зумыша. Варвара Михайловна татшӧм жугыльӧн верӧссӧ важӧн нин эз аддзыв.

Старик пырӧмӧн тшӧтш шыбитіс ас вывсьыс шоныд тужуркасӧ, пӧрччис мазутӧн ляксялӧм лӧз спецовкасӧ, пуджис сосъяссӧ да кутіс мыссьыны муртса шоныштӧм ваӧн. Кор мыссян дозйысь быри ваыс, дӧра ки чышкӧдӧ косӧдіс чужӧмсӧ да кыв шутӧг пуксис пызан сайӧ, кӧні руаліс нин шыд тӧрелка. Вит-ӧ-квайтысь дышиника паньыштӧм бӧрын чышкыштіс вом дорсӧ , вештіс ас дорысь тӧрелкасӧ да пыдісянь ышловзис.

— Но вот, Варварушка, менам и уджавсис сэсся. Пенсия вылӧ индісны.

Варвара Михайловна долыда нюммуніс, пуксис верӧсыслы паныдӧн да небыдика юаліс:

— Збыльысь висьталан? А кутшӧм ме рад, Петрович!

— Мый сэні радлан, курыд гормӧг! — пинь пырыс шуис старик.

— Кыдзи нӧ мый! Татшӧм омӧль здоровйӧнад важӧн колі петны пенсия вылӧ. Ме тай тэныд та йылысь быд лун доля. Нелямын ӧти во уджалін — тырмас.

Егор Петрович вешйис пызан сайысь. Гоз-мӧдысь воськовтіс джоджӧд, сэсся бӧр пуксис улӧс вылӧ.

— Не висьӧмыд кӧ эськӧ, во вит-квайттӧ уджалі на, — юрсӧ гыжйыштіс старик. — Да и верми ӧмӧй ме эновтны завод да мунны коллектив дінысь ӧні, кор страна пасьта мунӧны сэтшӧм стройкаяс.

Варвара Михайловна букыштчыліс верӧсыс вылӧ, фартук помнас вом дорсӧ чышкалігмоз вочавидзис:

— Кувны эськӧ цехад ковмис. Сідзи нин быд вой ревматизм мучитӧ, желудокыд висьӧ, сьӧлӧмнад норасян. Радуйтчыны колӧ, шойччӧг кӧ сетісны.

Петрович быттьӧ эз кыв гӧтырыслысь шуасьӧмсӧ да висьталіс водзӧ:

— Врачьяс вӧсна ставыс лои татшӧм канительыс, курыд гормӧг! Вит лун сайын завкомсянь ыстісны поликлиникаӧ. Видзӧдласны пӧ сэні, сӧвет сетасны здоровйӧ кузяыд. Кывзі налысь ме, пӧрысь йӧй! Локті поликлиникаӧ. Куим врач быдса час видлалісны. «Тэныд, Шаньгин ёрт, — осмотр помасьӧм бӧрын шуӧ главнӧй врачыс, — пырысь-пыр колӧ дыр кадся шойччӧг. Бурджык лоӧ, дзикӧдз кӧ петан удж вывсьыд».

— Вот и бур, — лӧня шуис Варвара Михайловна.

Старик ланьтыштліс, думайтыштіс, сэсся содтіс:

— Мӧд лунас пыри заводса директор ордӧ. Вот, мися, Михаил Васильевич, сідзи и сідз: врачьяс пенсия вылӧ тшӧктӧны петны. Директор, вӧлӧмкӧ, та йылысь тӧдӧ.

«Жаль, шуӧ, меным тэкӧд торйӧдчыны, но врачьяслы паныд сувтны ог вермы. Пӧра нин шойччыны, важӧн пӧра».

Стариклӧн чужӧмыс лои зумышджык, плеш чукыръяс костас мыччысис ньылӧмыс.

— Директор ордсянь кежалі парткомӧ. Муртса восьті ӧдзӧссӧ, а Кузьма Данилович локтӧ меным паныд, нюмъялӧ: «Сиа тэныд, Петрович, бура шойччыны». Вӧлӧмкӧ, директоркӧд ме йылысь сёрнитӧма нин.

— Тэныд жӧ бурӧс кӧсйӧны, — пасйис Варвара Михайловна.

— Тшӧтш и цехын рабочӧйяс на ног сёрнитӧны, — кинас ӧвтыштіс Петрович да видзӧдліс гӧтыр вылас. — Ӧбиднӧ лои... Ставныс тшӧктӧны петны удж вылысь, а некод оз юась, кутшӧмджык Петровичлы эновтны заводсӧ, кӧні тӧдса сылы быд станок, быд гайка. Эк, курыд гормӧг! Рытнас сеті директорлы заявленньӧ удж вылысь мездӧм кузя, — и... мездісны. Аскисянь Егор Петрович, кыдзи шулывлісны, «вӧльнӧй казак».

Рытнас Петрович чӧв ланьтӧмӧн дыр пукаліс ӧшинь дорын. Эз узьсьы сылӧн и войнас. Унаысь чеччыліс крӧвать вылысь, кыза гартыштліс чигарка, ӧтнасӧн пукаліс пызан пельӧсын да ас кежас сёрнитіс: «Ачым мыжа. Босьті да директорлы гижи заявленньӧ, медым пенсия вылӧ лэдзасны. Кутшӧм чӧрт тойлаліс та вылӧ. Эк, Петрович, Петрович, кокниа жӧ эновтін ассьыд цехтӧ».

Пӧрысь мастер кӧть и вӧлі ылын заводсяньыс, но сьӧлӧмнас быттьӧ кыліс сылысь лов шысӧ да тӧдса шумсӧ.

Квайт час асылын будильник сетіс вель кузь звӧнок. Комнатаӧ пырис асъя югӧр. Петрович ас вывсьыс вештыштіс гӧрд сатинӧн эжӧм тӧвся эшкын. Кӧсйис нин чеччыны, но сійӧ жӧ здукын гӧгӧрвоис, мый заводӧ оз нин ков мунны. Сылӧн нюкыртчис сьӧлӧмыс. Сутшкыштіс лопатка улас. Сэсся бӧр пырис эшкын улӧ, шебрасис юр вывтіыс, медым не кывны заводлысь асъя гудӧксӧ, но сійӧ век жӧ вель дыр юргис Петрович пельын, и пӧрысь мастерлӧн усины скупиник синва войтъяс.

Чеччӧмӧн тшӧтш Петрович кухняысь пыртіс ассьыс важиник спецовкасӧ, мыччис сійӧс гӧтырыслы да шуис:

— Кытчӧкӧ пукты тыдаланаджык местаӧ, мед ме быд лун аддза сійӧс.

Варвара Михайловна кыв шутӧг босьтіс верӧс кисьыс спецовка да ӧшӧдіс комната пельӧсӧ.

Луннас старик чукӧртіс ассьыс кутшӧмсюрӧ инструментъяс. Чышкалӧм да мавтӧм бӧрын тэчис найӧс неыджыд ящикӧ.

— Некор нин, тыдалӧ, сэсся меным он ковмылӧй!.. Гашкӧ, кад тшӧтш и тіянлы шойччыштны мӧд киясӧ вуджтӧдз.

Егор Петрович син водзті котӧртіс аслас олӧмыс. Нелямын ӧти во сійӧ уджаліс производство вылын, сы пиысь кызь ӧти во помся тайӧ заводын.

— Гашкӧ, збыльысь абу грек шойччыны. Бур йӧзыс оз дивитны, — такӧдіс асьсӧ старик.

* * *

Войвывса дженьыдик тӧвся лунъяс исковтӧны котӧрӧн. Войясыс кузьӧсь, кӧдзыдӧсь.

Петрович лун-лун пукаліс гортас да важ моз вӧлі зумыш. Киас эз пыр некутшӧм удж. Сьӧлӧм бердас быттьӧ ӧшаліс сьӧкыд из. Чужӧмыс, кажитчӧ, ещӧ нин лоис чукырӧсь.

Врачьяс сӧветуйтӧм серти Варвара Михайловна пуксьӧдіс верӧссӧ диета вылӧ. Лункосмӧсӧн Петрович кутіс ветлывлыны и заводса больничаӧ «шонтыны пӧрысь лысӧ», кыдзи шулывліс ачыс.

Кор стариклы паныдасьлісны удж кузя ёртъясыд сійӧ мыйлакӧ яндысис наысь, синъяссӧ лэдзліс муӧ.

— Кутшӧма нин олан, Егор Петрович? — юасисны рабочӧйяс.

— Лун да вой, мый ещӧ колӧ...

— Уджавтӧгыд, кӧнкӧ, бурджык?

— Позьӧ видлыны, кодлӧн вежныд петӧ, — дӧзмӧмӧн вочавидзліс Петрович.

Пӧрысь мастер мӧвпаліс: «Сералӧны старик вылын, пиньнысӧ жерйӧдлӧны. Найӧ уджалӧны, планъяс содтӧдӧн тыртӧны, завод чесьт вӧсна тышкасьӧны, а ме поликлиникаын зыртча да паччӧрын пӧжся. Тьфу, курыд гормӧг!»

Поликлиникаысь локтігӧн Петрович сувтіс показательяс пасъялан дӧска дорӧ да читкыртчыштӧм синнас дыр лыддис цехъяслысь удж результатъяс.

«Механическӧй цех оз кольччы», — аслас ёртъяс йылысь радпырысь мӧвпыштіс старик да восьлаліс гортас. Рӧднӧй завод йылысь думайтігӧн сьӧлӧмыслы вӧлі кокни. Весиг тшынӧн сьӧдасьӧм заводлӧн корпусыс Петровичлы кажитчис мичаджыкӧн.

Рытъяснас Петрович ордӧ частӧ пыравліс заводса мастер Иван Иванович, кодкӧд дас воысь дырджык уджалісны ӧтлаын.

— Гажтӧмтчан заводысь? — юавлывліс Иван Иванович аслас друглысь да дыр малаліс кушмӧм юр пыдӧссӧ.

— Гажтӧмтча, Иван Иванович. Сьӧлӧмӧй абу местаын, мыйкӧ быттьӧ оз тырмы, — норасис Петрович.

— А заводын тэнӧ пыр казьтылӧны. Торъя нин гажтӧмтчӧны тэысь механическӧй цехын.

— Регыд вунӧдасны.

Варвара Михайловна пузьӧдӧ чай, и кык мастер сьӧлӧмсяньыс варовитӧны самӧвар кӧдзавтӧдз. Иван Иванович висьтавлӧ заводын выльторъяс йылысь: кутшӧм цехъяс да бригадаяс мунӧны воддза радын, кодъяс кольччӧны бӧрӧ.

Петрович кывзӧ чӧв, сӧмын шочиника довкнитлӧ юрнас либӧ сетӧ мастерлы кутшӧмсюрӧ сӧветъяс удж бурмӧдӧм кузя.

Иван Иванович волӧм бӧрын Петровичлы овлӧ уна пӧв кокньыдджык. Сэки и гӧтырсӧ ыдждӧдлӧ Варварушкаӧн, и войнас узьсьӧ чӧскыдджыка.

Кыдзкӧ ӧти рытын завод ворота дорын Петровичлы паныдасис механическӧй цехса токар Нина Власова. Том нывка яндысигтыр чышкыштіс синвасӧ да чирӧм гӧлӧсӧн здоровайтчис вӧвлӧм мастеркӧд. Егор Петрович сувтӧдіс токарӧс.

— Нина, тэ нӧ бӧрдін али мый?

Нывка юрсӧ копыртіс да вель дыр сулаліс мыжа морт моз.

— Мый тэкӧд, Нина?

Власова юрсӧ лэдзис ещӧ на увлань да муртса кылыштан гӧлӧсӧн висьталіс:

— Брак вӧчи, Егор Петрович. Нёль деталь талун бракуйтісны.

Эз на удит нывка шуны бӧръя кывъяссӧ, кыдзи сылӧн выльысь тюрӧбтісны синва войтъяс.

— Брак, дерт, омӧльтор, но бӧрдны оз ков, — нывкаӧс бурӧдіс старик.

Вӧвлӧм мастер да том токар дыр сёрнитісны. Нина висьталӧм серти Петрович пыр жӧ гӧгӧрвоис, мый вӧсна сылӧн артмӧма бракыс.

— Вот мый, Нина, — сьӧлӧмсяньыс висьталіс Петрович, — прӧст кадӧ верман пыравлыны ме ордӧ. Мыйсюрӧ верма отсыштны, а брак вӧчны ог сӧветуйт.

— Аттьӧ, Егор Петрович, аски жӧ пырала.

Тӧлысьысь дырджык шойччӧм бӧрын Петрович ещӧ на ёнджыка кутіс гажтӧмтчыны заводысь. Быд пӧрйӧ, кор гудӧклӧн шыыс чуксавліс удж вылӧ, пӧрысь мастер сувтлывліс ӧшинь дорӧ да видзӧдіс паськыд улича вылӧ, кыті тэрмасигтыр удж вылӧ мунісны рабочӧйяс.

«Ме сӧмын ӧтнам гортын пукала», — ас вылас видчис старик.

Кыкысь нин воліс заводскӧй контораӧ. Кӧсйис пыравны директор дорӧ. Но кыкнанысьсӧ, мыйӧн матыстчыліс сьӧд клеёнкаӧн эжӧм ӧдзӧс дінӧ, полігтыр бергӧдчыліс бӧр.

«Оз жӧ ӧд удж вылад бӧр босьт», — ӧдзӧс дорысь вешйӧм бӧрын думайтіс пӧрысь мастер.

Ӧти шойччан лунӧ Петровичӧс видлыны локтіс парторг. Старик нимкодьысла эз и тӧд, мый вӧчны.

Парторг быдторйӧн интересуйтчис. Юасис: колӧ оз Петровичлы кутшӧмкӧ отсӧг, ас кадӧ-ӧ мынтӧны пенсия, кыдзи лечитӧны.

— Ставыс зэв бур, Кузьма Данилович, аттьӧ мый абу вунӧдӧмныд. Здоровйӧ кузя ӧні ог норась. Ревматизм омӧльджыка кутіс мучитны да и желудоклы бурджык. Со менам гортса «доктор» эм, — гӧтырыс вылӧ индіс старик.

— Прӧста ошйысян здоровйӧнад, — кыліс Варвара Михайловналӧн гӧлӧсыс. — Чайтан, став висьӧмыд нин быри?

— Тэ, Варвара, лишнӧй эн сёрнит, самӧвартӧ видзӧдлы, бурджык лоӧ. Аддзан, кутшӧм гӧсьт воис.

— А ме тэныд, Егор Петрович, пӧдарок вайи, — китель пытшкӧс зепсьыс бумажник кыскигмоз висьталіс парторг. — Санаторийӧ путёвка.

— Яндзим меным шойччынысӧ. Ёртъяс уджалӧны, а ме пӧжся.

Кузьма Данилович пӧрысь мастер ордысь муніс пемдӧм бӧрас нин. Лӧз небесаын чусмасисны да югзисны уна кодзувъяс: ӧтияс на пӧвстысь вӧліны югыдджыкӧсь, мӧдъяс — муртса тыдалісны. Сыктыв ю дорсянь корсюрӧ ӧвтіс кӧдзыд тӧвру. Парторгӧс Петрович колльӧдіс ӧшинь улӧдзыс, тяпкӧдіс паръяссӧ, мыйкӧ кӧсйис юавны.

— Кузьма Данилович, — медбӧрын шыасис старик, — оз-ӧ позь бӧр локны удж вылӧ? Воздухыс оз тырмы. Путёвкатӧ, гашкӧ, позьӧ сетны кодлыкӧ мӧдлы?

Парторг вель дыр видзӧдіс стариклы синъясас, пыдісянь ышловзис.

— Егор Петрович, тэныд колӧ шойччыны. Прамӧя шойччыны.

— Курыд гормӧг! — тӧдлытӧг артмис стариклӧн.

* * *

Механическӧй цех, кӧні уджавліс Егор Петрович пенсия вылӧ петтӧдз, лыддьысьліс заводын водзын мунысь цехӧн. Матӧ кӧкъямыс тӧлысь тані кутісны завкомлысь переходящӧй знамя.

Но лои сідзи, мый бӧръя кадас найӧс ордйис орчча цех, кӧні мастернас вӧлі Иван Иванович — Егор Петровичлӧн уна вося другыс. Тайӧ юӧрсӧ Петрович кывліс курортысь воан мӧд лунас жӧ да примитіс кыдзкӧ аслысногӧн. Первойсӧ весиг дӧзмыліс другыс вылӧ.

— Курыд гормӧг! — ропкакыліс старик. — Ӧні жӧ муна директор дінӧ да кута корны, медым бӧр ыстас цехӧ. Куим тӧлысь шойччи, колӧ и чесьт тӧдны.

Завод ворота дорті ревматизма пӧрысь кокыс Петровичӧс нуис сэтшӧм ӧдйӧ, мый ас вылас ачыс весиг шензис: «Со тай санаторийыд кутшӧма отсаліс». Контора дорӧ воигӧн нин стариклы паныдасис механическӧй цехса токар Нина Власова. Нывка долыда серӧктіс да сывтырнас кутыштіс Петровичӧс.

— Егор Петрович! Донаӧй тэ миян! А ми быд лун казьтылам тэнӧ.

— Сідзкӧ, энӧ на вунӧдӧй пӧрысь Петровичӧс? — нюмъяліс старик.

— Позьӧ ӧмӧй вунӧдны тэнӧ? А тэ ӧні, Петрович, курорт бӧрад ёнмӧмыд, томмӧмыд.

— Томми и эм, Нинук. Ӧд Кавказӧдз волі, дзонь тӧлысь шойччи.

Петрович чӧв сулаліс, нимкодьпырысь видзӧдіс аслас ученица вылӧ.

— Но, а тэ кыдзи уджалан, брак вӧчысь? — сераліс старик.

— Бура, Егор Петрович, бура. Аттьӧ тэныд, велӧдӧмсьыд да сӧветъяссьыд. Пӧдругаясӧс весиг ӧні панйи.

— Омӧля на сідзкӧ велӧдсьӧма, механическӧй цехлысь кӧ знамя сетінныд...

Унатор йылысь на сёрнитісны пӧрысь мастер да том токар, а сэсся Петрович прӧщайтчис Нинакӧд да пырис контораӧ.

Егор Петровичӧс директор примитіс зэв меліа. Тшӧктіс пуксьыны небыд креслӧӧ, мыччис «Казбек» пачка да ачыс ӧзтіс.

— Но, старина, кутшӧма олан-вылан?

— Бура и омӧля, Михаил Васильевич.

— Кыдзи тайӧс гӧгӧрвоны, Егор Петрович?

— Ме и ачым ог тӧд, кыдзи тайӧс гӧгӧрвоны, — мудераліс старик.

— Кывлін, мый вӧчыштіс Иван Ивановичыд механическӧй цехтӧ?

Петрович эз на удит шыасьны, директор вочавидзис ачыс:

— Механическӧй цехлысь знамя мырддис, вот мый. Молодеч, Иван Иванович!

Егор Петрович кинас шыльӧдыштіс паськыд тошсӧ, чукыртчыштӧм синъяснас видзӧдліс директор вылӧ, сэсся кызӧктіс кулакас.

— Михаил Васильевич, ме тэ ордӧ буретш та могысь и вои. Надейтча, гӧгӧрвоан да отсалан меным.

— Ме кывза, Егор Петрович, — креслӧсӧ стариклань вештыштіс директор.

— Ог вермы заводтӧг. Сьӧлӧмӧй коймӧд тӧлысь абу местаын. Позьӧ кӧ, бӧр кора цехӧ ыстыны. Радӧвӧй рабочӧйӧн кӧть кута уджавны.

Старик унатор на кӧсйис висьтавны Михаил Васильевичлы, но воссис кабинет ӧдзӧс, и сэтчӧ пырис Кузьма Данилович. Парторг топыда кутліс Петровичлысь кисӧ да пуксис директоркӧд орччӧн.

— Со тай Егор Петровичлӧн оз шойччыссьы. Удж вылӧ бӧр корӧ ыстыны, — Кузьма Даниловичлань синъяснас мигнитіс директор.

— Удж вылӧ?! — шензис парторг.

— Куим тӧлысь шойччи. Санаторийӧ весиг ветлі. Водзӧ ог вермы овны заводтӧг. Яндзим гортын пукавны. Ме абу на сэтшӧм пӧрысь.

Директор да парторг видзӧдлісны ӧта-мӧд вылас.

— А кыдзи жӧ ревматизмыд, кыдзи желудокыд? — зэв збыльысь юаліс парторг.

— Удж вылын ӧдйӧджык бурдас, Кузьма Данилович. Уджыд — миян кодьлы медбур лекарство.

Кузьма Данилович да Михаил Васильевич сэтшӧма серӧктісны, весиг орчча комнатаын пукалысь секретар чуймӧмпырысь видзӧдліс ӧдзӧс костӧд.

Директор чеччис креслӧысь, веськыд кисӧ пуктіс Петровичлы пельпом вылас да шпыннялігтыр шуис:

— Мед тэ ног лоас, Егор Петрович! Аскисянь тэнӧ инда бӧр механическӧй цехӧ начальникӧн.

— Вот и аттьӧ, Михаил Васильевич! Кӧть прӧстӧй рабочӧйӧ инды, а век жӧ асланым цехӧ. Аттьӧ, Михаил Васильевич...

Стариклӧн чужӧмыс вочасӧн гажмис.

— Но, Иван Иванович, видзчысь! Знамяыд бӧр на кутас дӧлавны механическӧй цехын! — юрсӧ вылӧ лэптӧмӧн грӧзитіс другыслы пӧрысь мастер, сэсся чивкнитіс-чеччис, кык-куимысь и воськовтіс паськыд комнатаӧд.


Гижӧд
Пӧрысь мастер
Жанр: 
Пасйӧд: 

Медводз йӧзӧдӧма 1953ʼ воӧ.
Гижанногсӧ выльмӧдыштӧма.

lkejrlkelkrgner klrjnelknfrkl ekjnrjkenfrej

1