ПӦЛЬЯС ДА ПӦЧЬЯС ЙЫЛЫСЬ



1
Коми войтырӧс вӧр-ваыс вердліс нэмсӧ.
Пув, и чӧд, и мырпом босьтліс — ставсӧ эмсӧ.
Чӧскыд чери сӧстӧм юысь уна шедліс.
Арнас тшакыд ӧшинь уланыс дзик петліс.

Коми му эз кедзовт йӧзӧс пӧтка яйӧн:
Ноп тыръясӧн коми дядьӧ вӧлі вайӧ.
Пармасьыс эз быр мед эськӧ озырлуныс,
Позян кадӧ сӧмын кыйсьысь вӧрӧ мунліс.

Видзис вӧрсӧ коми мортыд, и сы понда
Пачсӧ ломтывнысӧ вайліс вӧрысь конда.
Кӧрт тувъястӧг аслыс керка сійӧ вӧчліс,
Сэтшӧмыс на коркӧ вӧвліс менам пӧчлӧн.

Виддзыд-муыд быдлӧн вӧлі аслас нима;
Тан пӧ коркӧ пӧсьсӧ кисьтліс Ярӧ Тима. 
Весиг нимыс сетсьывліс и шорлы.
Тадзи паметь коми мортыд аслыс дорліс.

Габӧ ёль ми тӧдам, Иван ласта...
А вот мыйлакӧ оз кывсьы Марья, Наста?..
Нывбабалӧн уджыс гортас тырмис,
А кӧзяин туйӧ кысь нин пырны.

Челядьнад сэк керка озыр вӧлі,
Коліс налы, дерт жӧ, чӧскыд йӧлыд.
Видз-мутӧ кӧ эновтан, он кыпӧд,
Сэки вошас семьяыдлӧн пыкӧд.

2
Ичӧтысянь челядь велавлісны уджӧ:
Дас арӧса зонка вӧв доддявны кужӧ.
Квайт арӧса нывка со нин кага видзӧ.
Купайтчыны некор, кӧть и луныс мича.

Идралӧны турун бать-мам видзьяс вылын.
Вадорыд, дерт, юрын, гажтӧм сьӧлӧм вылын.
Верстьӧ морт моз шуас:— Мый нӧ сэсся вӧчан.
Весиг корӧсь вайны талун муніс пӧчным.

Быдмас мед нин ӧдйӧ сылӧн ичӧт вокыс,
Выль ӧд бара чужас, кодыр лоас кока...

3
Йӧзлӧн местаӧ некод некор гортъяд оз вод.
Олам му вылас недыр, сэсся-й бырамӧ вот.
Жаль: оз нимтыны нимӧн керӧс, видзтор и ёль..
Гортса мӧдлапӧв ягӧ ассьым нимӧс ог коль.

Дыр-ӧ казьтасны йӧзыс, сэк ме ог нин и тӧд.
Но ме местаӧ некор татчӧ оз лок нин мӧд.
Ме ас местаын ӧти, гашкӧ, тайӧ и бур,
Мортӧс вежысьыс кодыр бур му вылас оз сюр.

Сідз жӧ, пӧльяс и пӧчьяс, вӧвлід ӧтчыдысь ті.
Колид му вылас йӧзӧс — ассьыд дона ныв-пи.
Найӧ колисны бара, эз мед помасьлы рӧд.
Аттьӧ тэныд, бур Ярӧ, коді сустӧ оз тӧд?

Ярӧ сус пуыс ловъя, сідзкӧ ловъя и тэ.
Тэнад вужйысь жӧ петӧм чальторйыс ме.

4
Ярӧ Педӧр Митька Петыр Саньлӧн —
Татшӧм менам вужйӧй, коми аньлӧн.