* * *

Помӧдз дзугыль менӧ сёяс!
Тӧд вылӧ мем ӧні
Сьӧкыд кадъяс, мунан вояс
Бара воалӧны.

Ывлаын швачӧдчӧ март;
Муна ме, нарт,
Школаӧ кӧмтӧг.
Школа бӧр зонмыслы, дерт,
Некод оз берт
Няньторсӧ сьӧмтӧг.

Аслас, кӧзяинлӧн, зон
Тшыг кыдзи пон,
Нырувсӧ нюлӧ…
«Лунтыр ми эг сёйӧ нур…
Енмӧй, тэ бур —
Тшыгйӧн ог кулӧ!»

Рытын ме кевмывлі сідз:
«Дзоньвидза видз
Менӧ Келеськӧд!
Кодыр ми быдмам, оз сюр
Ми кодьыс бур —
Быдмӧд и веськӧд!»

Помӧдз дзугыль менӧ сёяс!
Вежӧр вылӧ ӧні
Мукӧд лунъяс, мукӧд войяс
Мырдӧн воалӧны.

Тӧді кӧ ме, тӧді
Олӧм сэтшӧм гажӧн,
Эг ме эськӧ кевмы
Быдмӧм йылысь важӧн.

Сӧмын мый нӧ ӧнӧдз
Кувны меным оз ков?
Кыдзи надз морт быд ур,
Лыддя ме быд воськов.

Сылы долыдджык, мый унджык
Лыддьытӧм монета…
А ме эськӧ став сьӧм, став эм
И минутысь сета!

Ӧтарлань сувтӧмны
Сьӧлӧм и олӧм,
Мӧдарлань тувдӧмны
Кулӧм и полӧм.

(1875)