ПАСИБӦ ЛЯПАЛЫ

«Чериыд ассьыс няньсӧ сёйӧ, кор шедӧ, кор и оз», — татшӧм сёрнияссӧ частӧ кывлан чери кыйысьяслысь. Сідзи, буракӧ, и эм.

Сутки джын нин ме пукалі визув Эжва вылын, а пестерӧй тыртӧм. Кыдзи сӧмын и эг ылӧдлы чериясӧс: и приманка мешӧкӧ кӧнтусь вый кисьті, и вугыръясысь частӧ самсӧ вежлалі. Весиг быд нидзулӧ сьӧлыштлі да шуалі: «Нидзулӧй, нидзулӧй, ылӧд ыджыд чериӧс». Сӧмын тай ставыс весьшӧрӧ.

Лэпті подольникӧс — тыртӧм. Нидзувъяссӧ сёйӧмаӧсь, а чериыс абу. Вугыръясын кырсьяс да ёгъяс сӧмын ӧшалӧны. Горш йӧрш и то эз шед.

Сэн жӧ шондіыс сотӧ, лолавны сьӧкыд. Да и пуръясьысьяс сералӧны, дӧзмӧдӧны менӧ. Видзӧдласны тыртӧм пестерӧ, шутитӧны: «Гашкӧ, вузалан черитӧ, а то сісьмас». «Магазинын треска вузалӧны, мун ньӧб, а то мамыд гортад оз сибӧд». Быть лоӧ терпитны, нинӧм он вӧч.

Кӧсйи нин лэптавны кыйсян кӧлуйӧс да гортӧ мунны, но первой подольникӧ жӧ шеді паньысь дженьыдджык ляпапи. Сійӧ сэтшӧм кос да омӧлик, быдса вежон, буракӧ, абу сёйлӧма. Кӧсйи нин бӧр лэдзны да юрӧ воис мӧвп: «А мый, самавны кӧ сійӧс подольникӧ, колӧкӧ, и босьтас кутшӧмкӧ горш чери».

Сідзи и вӧчи. Крукалі ляпапиӧс ён вугырӧ, лэдзи ваӧ.

Рытӧдзыс пукалі, а чери пыр на оз сёй. Дӧзми. Лэпті ӧти подольник, матыстчи мӧд дорӧ. Кыскышті жилкаӧд — оз лок. Сибдӧма, тыдалӧ. Зэлӧді ёнджыка, и сэки ва веркӧсын ызӧбтыліс ыджыд сир. Петкӧдліс ассьыс паськыд плешсӧ да бӧр воши.

«Шедӧма... шедӧма...» — долыда сьыліс сьӧлӧмӧй.

Ме сирӧс кыска аслань, а сійӧ табанитчӧ, оз кӧсйы локны. Вель дыр ковмис венласьны сыкӧд. Медбӧрын мудзис, муртса верми лэптыны керъяс вылӧ. Кок улын песласис метраысь кузьджык, лэчыд пиньяса сир, вомас тыдаліс чери бӧж.

Думӧн кымынкӧ пасибӧ висьталі ичӧтик ляпалы. Уна сё чериӧс мездіс сійӧ горш сирысь. Да и меным бур: быдса вежон позьӧ чӧсмасьны сир чериняньӧн.