НЯРБОРД — ВОЙСЯ ЛЭБАЧ


Кужӧмаӧсь тай сетлыны коми войтырыд тайӧ лэбачыслы нимсӧ. Сылӧн бордъясыс и збыльысь нярӧсь, омӧльӧсь, быттьӧ ӧш гаддьысь зэвтӧмаӧсь. Инмас кӧ нярбордйыд борднас ёсь беддьӧ — ӧти здукӧн и потӧ.

Нярборд ичӧтик, зато, кор шевгӧдӧ бордъяссӧ, кажитчӧ ыджыдӧн. Шыр кодь лэбачӧс бордъясыс и вердӧны, ковмас кӧ, отсаласны пышйыны ас дорсьыс ёнджык лэбачьясысь.

Уналаын тайӧ войся лэбачсӧ шуӧны лэбалысь шырӧн. Оз жӧ прӧста тадзи нимтыны. Сійӧ зэв ёна мунӧ шыр вылӧ.

Кӧні сійӧ медся ёна радейтӧ овны, сьӧкыд висьтавны. Нярбордйӧс позьӧ аддзывны гожӧмнас Сыктывкарын и Печӧраын, Кулӧмдінын и Мозын ю вылын. Сідзкӧ, паськыда олӧ-вылӧ.

Войясыс муртса лоӧны пемыдджыкӧсь, нярборд быттьӧ тайӧс и виччысьӧ. Войбыд лэбалӧ, куталӧ вугралысь номъясӧс да гебъясӧс. Кымыныськӧ сунгысьлас пемыд енэжас. Тэрыба вӧрӧны сылӧн бордъясыс.

Лэптан кӧ зіб йылӧ еджыд чышъян, пыр и казялас, кутас лэбавны сы гӧгӧр. Корсюрӧ весиг пуксьывлӧ чышъян вылӧ. Ичӧт дырйи ми унаысь кутлывлім сійӧс тадзи. А ошйысьӧмыд мыйта, кодлы удайтчас кутны нярбордйӧс.

Кӧть и мисьтӧм сійӧ, а мортлы вӧчӧ уна буртор: гожӧм чӧжӧн бырӧдас пожтыр номъясӧс, гутъясӧс, мукӧдсикас посни гагъясӧс, кодъяс йӧзлы вайӧны уна лёктор.

Луннас сійӧ узьӧ. Оз вольпась вылын да шоныд керкаын, а кӧні веськалӧ, кытчӧ югыдыс суас. Ёнджыкасӧ пу горсъясын, чардакъясын, эновтӧм важ керкаясын. Да и узьӧ сійӧ аслысногӧн: мыджсяс бӧр кокъяснас кутшӧмкӧ сюръя бердӧ, ӧшӧдчас увлань юрӧн и заводитас шойччыны. Воас рыт да, дзик пыр и садьмас. Тӧла кӧ да зэра поводдя пуксьӧма, бӧр заводитас вугравны. Лёк войяснад и номъяс да гутъяс оз лэбавны, найӧ дзебсьӧмаӧсь щельясӧ, пу лапъяс улӧ. Нинӧм вылӧ оз эновтны шоныд местаяссӧ. Сідзкӧ, нинӧм вӧчны татшӧм лёк каднас и нярбордлы. Бурджык узяс кӧ, мӧд лун зільджыка кыйсяс.

Во кык сайын телеграфнӧй проводӧ крукасис ӧти татшӧм нярборд. Ме казялі тайӧс да пыр жӧ котӧрті сэтчӧ. Лэпті кулӧм лэбачӧс и шемӧсмуні. Нёньяс бердас топӧдчӧмаӧсь кык ичӧтик пи.

Дыр мысти нин тӧдмалі: вӧлӧмкӧ, лэбалысь шыр пиянсӧ рӧдитӧм бӧрын мыйкӧ дыра, кор найӧ оз на кужны кыйсьыны, вӧдитӧ сьӧрсьыс, аслас нёньяс бердас.

Со кутшӧм дивӧторъяс эмӧсь лэбачьяс олӧмад.


Гижӧд
Нярборд — войся лэбач

lkejrlkelkrgner klrjnelknfrkl ekjnrjkenfrej

1