МӦДЫСЬ ОЗ ПУР
Менам вӧлі Тузик нима пелькиник кыр пон. Гӧныс дзик еджыд, туша пасьталаыс весиг ни ӧти сьӧд чут абу. Зэв сюсь, ичӧтсяньыс на и петкӧдліс асьсӧ аттӧ бур кыйсян понйӧн. Арӧсыс на эз вӧв, а заводитіс нин ур увтны. Сэки колльыс бура воис да вӧр пасьталаыс урыд чеччаліс. Ме нарӧсьнӧ ур кыйны ичӧт кызь кӧкъямысӧд калибера ружье лӧсьӧдлі, гырысь зарадъясыд ӧд ёна кусӧ тшыкӧдӧны да.
А месянь некымын керка костӧн ӧти мужик видзис ыджыд скӧр Геракл нима понйӧс, некодлы сійӧ спокой эз сетлы, йӧзыс зілисны ыліті кытшлавны, мед сӧмын оз жӧ вӧрзьӧд. Понъяс йылысь нинӧм нин шуны, найӧ, мыйӧн сӧмын казяласны Гераклӧс, пыр жӧ лыйыштасны кытчӧкӧ ылӧджык, медся пыді пельӧсас дзебсясны да сэні тіралӧны.
Но вот ӧтчыд ме сиктӧ петі, мыйкӧ тай магазинӧ ли, мый ли, колӧ вӧлі ветлыны, но и Тузикыд тшӧтш ме бӧрся кӧвъясис, котӧртӧ водзвылын, бӧжсӧ легӧдӧ, увтышталӧ. И тані рӧкыд вылӧ миянлы паныд Гераклыд веськаліс. Аддзис Тузикӧс, синъясыс сувтісны, гӧныс тшӧтясис. И кыдз тай уськӧдчис сійӧ менам дзӧляник понйыд вылӧ, кыдз тай заводитіс варкӧдны-пурны, ӧтарӧ-мӧдарӧ сӧмын гӧныс лэбӧ коньӧрӧйлӧн. Но, мися, виас менсьым Тузиктӧ тайӧ кӧиныд. Гӧгӧрбок видзӧдлі, оз-ӧ бедьтор сюр ли, мый ли, мед мездыны Тузикӧс, жаль ӧд аслад понйыд. Куш киӧн матыстчыны ог лысьт-а. Ӧтарӧ уськӧдчылі, мӧдарӧ, нинӧм оз сюр. Сэсся тай кутшӧмкӧ лёкиник бедьтор аддзи жӧ-а.
Чепӧсйи бедьнад понъяслӧн пурсянінад и мый жӧ ме аддза? Ичӧтик кукань кодь Геракл сулалӧ вӧрзьӧдчытӧг нёльнан кок вылас мыджсьӧмӧн и зэв сьӧкыда дзик морт моз ыджыд гӧлӧсӧн ойзӧ, а кыкнан синсьыс гырысь мольясӧн синваыс шорӧн тюрӧ. Тузик жӧ менам лӧня куйлӧ Геракл улын мыш вылас, а вомас крепыда курччӧма да мый вынсьыс топӧдӧ Геракллысь овмӧссӧ. Да содтӧд кадысь кадӧ ӧтарӧ-мӧдарӧ нетшкӧ-летйӧдлӧ.
Ме шайпаймуні, недыр видзӧдышті тайӧ некор аддзывлытӧм серпас вылас, чуймалышті. Ӧні колӧ вӧлі оз нин Тузикӧс, а Гераклӧс мездыны. Матыстчи, сюйи бедь помсӧ Тузиклӧн пиньяс костас да сьӧкыдпырысь мыйтакӧ кад ноксьӧм бӧрын удайтчис жӧ восьтны тиски моз топалӧм пиньяссӧ.
Геракл жӧ, мыйӧн сӧмын мыніс шедлӧм нальксьыс, ньӧти вугравтӧг чепӧсйис да дзебсис пес чипас костӧ, кытысь сідзи эз и мыччӧдлы нырсӧ. Тузик жӧ вылӧ юрсӧ гоньгӧдӧмӧн недыр скӧрысь увтіс на пес чипас вылас, сэсся кок пӧвсӧ лэптыліс, чилснитыштіс, пуктіс ассьыс пас, быттьӧ кырымасис да вӧтчис ме бӧрся.
Та бӧрын Геракллӧн сямыс вежсис, дугдіс пурсьыны, а мыйӧн аддзывліс Тузикӧс, ылісянь на пышйывліс дзик сідзи, кыдзи водзті пышъявлісны сыысь мукӧд понъяс.
