* * *

Мӧдлапӧлын пожӧмъяс зэв кузьӧсь.
Тӧлысь улын бикинясьӧ Луз.
Гӧрдчой сиктын ставыс важӧн узьӧ,
Сӧмын ӧтнас лӧз синма оз узь.

Сійӧ петіс Гӧрдчой сиктса кырйӧ,
Петіс кырйӧ пальӧдыштны шог.
Муса зонмысь гажыс сылӧн быри.
Муса зонмыс дыр-ӧ нин оз лок?

Мӧйму арнас армияӧ муніс,
Муніс ылӧ еджыд юра зон.
Гашкӧ, сылӧн лӧз синмаыс вуніс?
Гашкӧ, шудлы воас регыд пом?

Кӧнкӧ ылын, тӧдтӧм сопка вылын
Дона муӧс видзӧ муса друг.
Ой, оз вунӧд зонмыс муса нылӧс,
Кад ни верст лыд найӧӧс оз юк.

Мӧйму арнас Гӧрдчой сиктса кырйын
Сійӧ сетіс лӧз синмалы кыв.
Шуис: «Кырйыс вермас, гашкӧ, сывны,
Сӧмын — тэнӧ радейтӧм оз сыв».

Шуис, тэ пӧ сэтшӧм меным муса,
Кутшӧм муса дона чужан му.
Гашкӧ, шуис, шонді коркӧ кусӧ,
Сӧмын тэнӧ радейтӧм оз кус.

Мӧйму арнас Гӧрдчой сиктса кырйын
Сійӧ сетіс лӧз синмалы кыв:
Гашкӧ, шуис, Лузйысь ваыс бырӧ,
Сӧмын тэнӧ радейтӧм оз быр.

Быд лун шонді асыввывсянь петӧ.
Гӧрдчой сиктса кырйыс важкодь кын.
Лузйын ваыс берегъясысь петӧ,
Лузйысь ваыс ньӧти эз на чин.

Ой, эз вунӧд лӧз синмаӧс зонмыс,
Ой, эз вунӧд зонмӧс муса ныв.
Талун сійӧ асылӧдз оз унмовсь,
Талун гортӧ асылӧдз оз пыр.