МЫЙЛА БӦРДАН, МУСА НЫЛӦ?


— Мыйла бӧрдан, муса нылӧ,
Нора горзан гусьӧник?
Мыйла кисьтан чышъян вылӧ
Югыд синва ньӧжйӧник?
— Ылыс туйын менам жӧник.
Мыйла сы дыра оз лок?
Сылӧн ветлӧм вӧсна ӧні
Менӧ суис ыджыд шог.
Дона козин ай-мам дасьтӧ,
Эзысь-зарни... Веж оз пет.
Оз ков меным дона паськӧм,
Эзысь-зарни шуд оз сет.
Тӧлысь мысти Вежа лунӧ
Верӧс сайӧ мунны мен.
Но не сы сайӧ мен мунны,
Мустӧм сайӧ сиис ен...
Со мый вӧсна бӧрда, вийся,
Нора горза гусьӧник.
Со мый вӧсна синва киссьӧ
Чышъян вылӧ ньӧжйӧник.