МЫЙЛА «ПИ»?


Геометрия урок вылын велӧдӧны окружность.

— Ми тіянкӧд кужам нин корсьны квадратлысь либӧ треугольниклысь периметр и площадь. А вот кыдзи эськӧ окружностьлысь кузьтасӧ да площадьсӧ корсьны? Тайӧс весиг мӧвпыштнысӧ сьӧкыд. Линейкаӧн он муртав. Но збыль вылас, вӧлӧмкӧ, быдтор позьӧ. Эм сэтшӧм числӧ, — велӧдысь гижис дӧска вылӧ «3,14». — Тайӧ числӧыс зэв колана. Сы вылӧ кӧ умножитны окружностьлысь диаметрсӧ, а сійӧс ми артавны вермам, артмас буретш гӧгыльлӧн кузьтаыс. Колӧ кӧ корсьны площадь, умножитам радиуслӧн квадрат вылӧ, и пыр жӧ петас корсянторным. Унатор сійӧ числӧ отсӧгыс позьӧ тӧдмавны, и шусьӧ сійӧ «Пи».

— Мыйла «пи»? — эз вермы кутчысьны да вашнитіс Евлог водзын пукалысь Валя.

— Мыйла «пи», сыла и «пи»! — шӧпкӧмӧн жӧ вочавидзис Евлог.

Мария Васильевна тотшкӧдыштіс мелнас дӧскаӧ: «Ноко, лӧням!» — да водзӧ нуӧдіс уроксӧ.

Перемена дырйиыс Валя ставлы кывмӧн нин юасис водзӧ:

— Но мыйла «пи», а абу «ныв»?

— Мыйла пияныс сюсьджыкӧсь!

— Некутшӧм бара абу сюсьджыкӧсь! Ми детинкаяс дорсьыд бурджыка на велӧдчам! И ме кӧсъя, мед вӧлі «ныв»!

— Уна тай кӧсъян! Мед нӧшта и ныв дай! — дэльӧдыштіс Валяӧс Евлог. — Сідз нин тіянлы вӧлясӧ уна сетӧма, быдлаӧ нырнытӧ сюянныд! Со миян классын: старӧста — ныв, звеньевӧйяс — нывъяс жӧ.

— А тіян удачаныд абу, да сійӧн.

— Дерт нин, удача абу!

Дыр на эськӧ кыссис кывйӧн бертчӧмнас, но на костӧ сюйсис Галя:

— Вай дугдылӧй! Бурджык, Мария Васильевналысь юалам.

Сідзи и вӧчисны.

Мария Васильевналӧн весиг серамыс петаліс татшӧм юалӧмсьыд:

— Вӧлі важ грекъяс пӧвстын сэтшӧм математик — Пифагор. Сылӧн ним кузя и шуисны тайӧ числӧсӧ. Дерт, нимсӧ кӧ быд пӧрйӧ дзоньнас гижны, кузь лоӧ, та вӧсна босьтісны медводдза слогсӧ, и артмис «Пи».

— Жаль, мый тайӧ математикыслӧн нимыс эз вӧв Нывфагор, — ышловзис Валя.

Евлог петкӧдліс сылы кывсӧ:

— Йӧйыд, он ӧмӧй гӧгӧрво? Нывфагорыс некыдзи эз вермы лоны. Сідз ӧд, Мария Васильевна? Шуӧма вӧлі, мый грекъяслӧн ӧти семьяын чужис пи, и нимтісны сійӧс Фагорӧн. Со и артмис Пифагор. А ныв кӧ ӧд чужис, Марья либӧ Дарья ним сетісны. Артмӧ: Нывмарья да Нывдарья.


Гижысь: 
Гижӧд
Мыйла «Пи»?
Жанр: 

lkejrlkelkrgner klrjnelknfrkl ekjnrjkenfrej

1