МИЯН ЭМ ГУДӦК


Ті некод он тӧдӧй менсьым пиӧс? Жаль. Микулайӧн шуӧны. Дас куим арӧса. И нырыс, и вомыс, и тшӧкаыс — ставыс менам, быттьӧ кульыштӧмаӧсь да ляскӧмаӧсь сылы. Сӧмын юрсиыс рыжӧй. Ог тӧд, кодлысь сійӧс босьтӧма. Миян рӧдын гӧрд юраыс некод эз вӧв. Зато гожся лунъясӧ челядь чукӧрысь верст сайысь тӧда, некодкӧд ог сорлав.

Эм Микулайлӧн и мӧдтор, коді оз лӧсяв менам оласноглы — вывті радейтӧ гудӧк. Кылас кӧ кӧнкӧ ворсӧм шы, котӧрӧн сэтчӧ, кыдзи чери чӧскыд сам дорӧ. Рытывбыд пукалас да кывзас. Ог гӧгӧрво, мый аддзӧма сэтысь. Весиг гортӧ оз путьмы ас кадӧ локны. Мед нин эськӧ шлёнъялас гудӧкасьысь бӧрсяыс, да ӧд менӧ дӧзмӧдӧ: гудӧк тшӧктӧ ньӧбны. А мый сылы гудӧксьыс, зырымбедьлы? Но, ньӧба, шуам, шыбита комын-нелямын чӧлкӧвӧй, а вежон мысти жугӧдас.

Сэсся ӧд пилитны кутас гудӧк вылас лун и вой, узьны оз лэдз. Ӧти кывйӧн кӧ, нинӧм балуйтны. Ме тай гудӧктӧг нэмӧс коллялі. Овсис сы вӧсна.

Но кӧть кутшӧма эг кӧсйы, ковмис ньӧбны.

Кыдзкӧ ӧти арся лунӧ ме муні вӧравны. Нёль лун кытшлалі-ветлӧдлі паськыд пармаӧд. Рӧкыд вылӧ, куим лунсӧ шлявгис-зэрис. Мудзи, кӧтаси медбӧръя сунисӧдз. Пемыднас нин веськӧдчи гортӧ мунан туй вылӧ. Нопйӧй личкӧ, кокъясӧй оз кывзысьны. Жуялі дзикӧдз, кӧть вод пу улас да узь. Дырӧн мыччысис тӧдса лесопункт. Сэсянь гортӧдз кызь километра на. Бур, мый автобус кутіс мунны миянлань.

Вӧзйыси сэтчӧ. Пыри машинаас, а сэні тырыс йӧз. Ме моз жӧ мудзӧсь, оз варовитны. Ӧтияс ветлӧмаӧсь вотчыны, мӧдъяс — уджавны. А вӧрса туйыд омӧлик. Зӧркӧдлӧ, чеччӧдлӧ, сійӧс и видзӧд — кывтӧ курччан.

Ме водзвылын пукалісны кык зонка. Ӧтиыслӧн пидзӧс вылас гудӧк. Нязгӧ, мотив ни лад, пельтӧ кӧть тупкы. Дум вылӧ уси гӧрд юра пиӧй. И мый, мися, чӧртлы, сылы гудӧксьыс? Кӧсйи нин ӧлӧдны зонкаӧс тӧлктӧм ворсӧмысь, но менӧ пановтіс мӧд морт, брезентӧвӧй курткаа.

— Ёна жӧ тэ мучитан коньӧрӧс, — шуис сійӧ. — Вайлы ме ворсышта, а то гаж бырӧма.

Зонка неокотапырысь сетіс гудӧксӧ.

Мунам водзӧ. Брезентӧвӧй курткаа мортыд варччыштӧм чуньяснас котӧртіс гудӧклӧн еджыд кизьяс кузя, заводитіс ворсны. Гудӧк шыыс первойсӧ быттьӧ кыліс омӧля, сэсся пыр паськаліс, гораммис. Лӧсьыда, морыд, ворсӧ!

Мудзӧм йӧз ловзисны, меліа видзӧдӧны гудӧкасьысь вылӧ, нюмъялӧны. А сійӧ ворсӧ и ворсӧ.

Менам мудзӧй кытчӧкӧ воши жӧ, весиг машиналысь зӧркӧдӧмсӧ эг кут казявны. Кывза, а юрӧ локтӧны ӧти бӧрся мӧд мӧвпъяс. Дум вылӧ усьлі аслам том кадӧй. Сійӧ кадыд тай, майбыр, пыр казьтывсьӧ. Эг и тӧдлӧй, кыдзи мунім кызь километратӧ. Дарӧм важиник гудӧк, со кыдзи бергӧдіс миянлысь сьӧлӧмъяснымӧс. Пукала да шензя, а аслым кажитчӧ — меным абу квайтымын арӧс, а сӧмын на кызь. Кӧть сувт да йӧкты.

Да, тайӧ лунсяньыс ме куті радейтны гудӧктӧ. Мӧд луннас жӧ сундукысь перйи нелямын чӧлкӧвӧй, кодӧс видзи выль ружйӧ ньӧбӧм вылӧ, босьті сьӧрысь пиӧс да мунім сельпоӧ.

Ӧні Микулайлӧн выль гудӧк. Сійӧ велаліс нин ворсны. Удж помасьӧм бӧрын вель тшӧкыда ая-пиа пукалам орччӧн. Пиӧй ворсӧ, ме кывза.

А мый, колӧкӧ и сійӧ коркӧ кутас гажӧдны йӧзӧс? Сы вылӧ ӧд и гудӧкыс. Ог каитчы, мый ньӧби.

Ӧні менам керкаын быд рыт праздник.


Гижӧд
Миян эм гудӧк
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1