МЕДСЯ МУСА

Дневникъясысь юкӧнъяс

 

Наталья. 28.12.1995.

 

Талун бара вӧтаси, мый гортын узя... Вынӧй абу нин синмӧс восьтыны да лунбыд больнича стен вылӧ видзӧдны. Вит часын пальӧдӧны, а сэсся бара ставыс ӧткодь, сьӧрсьӧн-бӧрсьӧн кыссьӧ, и тадз быд лун... Градусник, уколъяс, лекарство, дуб рок, кодӧс некод оз сёй. Локтӧ врач, некымынысь личкыштӧ кынӧмад да нем шутӧг вуджӧ мӧд висьысь дорӧ. Кӧкъямыссянь дас кык бӧрӧдз виччысян пажын: кӧрт тасьтіӧ джынвыйӧдзыс тэчыштӧм шыд да курыд яя картупель. Пажын бӧрын узян кад, но гӧгӧр би ӧзйӧ, шум, а медперсоналлы веськодь. Заводитан унмовсьны — горзӧны, корӧны полдничайтны. Босьтан яблӧг да юны позьтӧм ляз. Кык час мысти, квайтын, ужын — картупель да выя чери. Шог. Жар пӧльтӧ. Душ оз уджав. Куйлан, виччысян дас чассӧ да помтӧг мӧвпалан, мӧвпалан...

Ме пола, сэтшӧма пола, ловъя-ӧ на ме пытшкам олысь кагаӧй, быдмӧ-ӧ. Видзӧда календар вылӧ, быттьӧкӧ верма содтыны кадыслысь ӧдсӧ. Но нинӧм оз артмы менам, кадыс быттьӧкӧ сувтӧма. Нывъяс палатаын бӧрдӧны, кӧсйӧны гортӧ. Регыд Выль во, а ми сюрим татчӧ. Кутчыся на, Олег эскӧ, мый ставыс лоас бур. Сійӧ зэв шуда, мый регыд лоас батьӧн.

И ме тшӧтш эска, кӧсъя эскыны. Но тӧда, мый менӧ виччысьӧ.

 

Олег. 7.05.1996.

 

Кык лун сайын менам чужис ныв. Гижӧма Раисаӧн, кыдзи кӧсйылім. Аски ми нывкӧд лоам гортын. Сӧмын ме да вӧлись чужӧм кага. Ме ог тӧд, мый вӧчны сыкӧд. Ме ог тӧд, кыдз овны водзӧ. Наташа колис каганымӧс больничаын да пышйис ӧшинь пыр. Вылыс паськӧмсӧ эз босьт весиг. Быд здук юася ассьым: «Мыйла сійӧ тадзи вӧчис? Мыйла жугӧдліс меным да кагаыслысь олӧмсӧ?» Ме вӧчи ставсӧ, медым сійӧ вӧлі шуда. Коді виччысис сійӧс сэні, ӧшинь саяс? Кыдзи менам Наташа вермис думайттӧг кедзовтны, чӧвтны миянӧс? Ме некыдз сійӧс ог гӧгӧрво. Ме сэсся ог кӧсйы аддзысьлыны сыкӧд. Рая некор оз тӧдмав, кодӧн вӧлі сылӧн мамыс!

 

Наталья. 4.07.1996.

 

Ме ола грездын пӧшти кык тӧлысь. Ола важ керкаын, кӧні коркӧ овлісны пӧль-пӧчӧ. Ме чайті, меным лоас кокниджык ӧтнамлы, ме чайті, мый тані верма вунӧдны, мый коркӧ менам вӧлі керка, верӧс да ныв. Заводитны выль олӧм некыдз оз артмы. Быд лун вайӧ аскӧд сы мында дой, мый сьӧкыд лолыштнысӧ. Олег оз кӧсйы мекӧд сёрнитны. Рая быдмӧ мамтӧг. Да и мый сылы татшӧм мамсьыс... Тадзи ставыслы лоас бурджык.

 

Олег. 14.08.1996.

 

Наташа важӧн нин оз звӧнит, а ме заводитлі нин эскыны, мый семьянымӧс позяс на мездыны. Ме сэтшӧма скӧралі сы вылӧ, шуи, мый сэсся ог кӧсйы сійӧс тӧдны, мый меным дзик веськодь, кӧні сійӧ да мый сыкӧд... А аслам ӧніӧдз на юрам сылӧн кывъясыс: «Лэдзан кӧ мыжӧс, ас йывсьым вунӧда, ті вӧсна овны кута. Рая лоас медся муса, медся шуда кагаӧн. Эн радейт менӧ, сет прӧста овны ныв бокам. Сэсся нинӧм тэнсьыд ог кор.»

 

Наталья. 10.09.1996.

 

Олег жалитіс менӧ. Ме гортын, гортын! Мыйла коліс мунны сы мында дой пыр, медым гӧгӧрвоны, мый верӧсӧй да нылӧй — тайӧ меным Енсянь медыджыд козин... Медым лоас, мый лоас. А ӧні миянысь шудаджык йӧзсӧ оз кӧ на аддзы-а!

 

Наталья. 31.03.2004.

 

Важӧн нин эг гиж... Тешкодь, ичӧтсянь ӧд гуся дневникӧс кисьым эг чӧвтлы! Олӧм пуӧ, лунъяс кольӧны. Миян ставыс бур. Олег сідз жӧ уджалӧ банкын, неважӧн ньӧбим выль машина. Ме удж вылӧ сідзи эг и пет, пукала гортын. И кӧть Раечка ветлӧдлӧ нин школаӧ, ме век кӧсъя лоны бокас, не воштыны олӧмсьыс ни ӧти здук! Рая быдмӧ зэв вежӧраӧн, сюсьӧн. А кутшӧм нин лӧсьыда йӧктӧ реклама улас, ме синваӧдз пыр серала! Сы мында фото да видео нин снимайтім. Модельӧн вермис эськӧ лоны.

 

Р.S. январ 1999 воын миян чужис мӧд ныв, Анжелика. Рая чойыслы ачыс нимсӧ пуктіс, медрадейтана аканьсӧ тадзи шуӧны да.

 

Олег. 2.02.2011.

 

Сы мында во нин колис менам медбӧр гижӧдсяньым... Дерт жӧ, медъёнасӧ кыскӧ восьтыны важ дневник да кольны сэтчӧ сьӧлӧм кылӧмтӧ, кор друг казялан, мый сёрнитнысӧ некодкӧд. Керка тыр йӧз, а сёрнитны некодкӧд. Ог эськӧ элясь, удж вылын ставыс мунӧ ладӧн, семья эм. А лов вылын сьӧкыдкодь. Вояс босьтӧны жӧ ассьыныс, босьтӧны.

Наташа ёнакодь вежсис, сьӧлӧмыс висьышталӧ. Но бурдӧдчыны ветлыны оз кӧсйы. Котралӧ Рая гӧгӧр, буссӧ весиг сы вылысь оз пӧляв. Да и Рая абу нин важкодь, этша мый колис миян шань, медся муса нывкасьыным. Велӧдчӧ ӧкмысӧд классын, но водзӧ олӧм йывсьыс оз мӧвпав. Да и Наташа, кыдз меным чайтсьӧ, весиг рад талы... Рая вайӧ лёк оценкаяс, сёрӧдз гуляйтӧ, корӧ пыр унджык и унджык сьӧм, а Наташа куньӧ та вылӧ синсӧ, оз сет меным весиг кыв шуны радейтана кагаыслы. Со тай кутшӧмӧн вӧлӧма мамлӧн помасьлытӧм муслуныд. Гӧтырӧ важӧн нин быттьӧкӧ вунӧдчӧма, мый сыкӧд олам и ми Ликакӧд. Слабог, Лика зэв асвыйӧна, пукалӧ жыръяс, лыддьысьӧ, бура велӧдчӧ. Кыв паныд Рая моз оз шулы. Эз кӧ вӧв Лика, ог тӧд, кыдзи эськӧ олі тані. Жаль нывкаыс, ёна жаль. Меысь кындзи, некодлы сійӧ оз и ков.

 

Наталья. 4.05.2012.

 

Аски нин, аски. Помтӧг кевмыся, но отсалас-ӧ?

 

Наталья. 6.05. 2012.

 

Ен кыліс менӧ. Кор тӧрыт Рая пышйис гортысь, ӧшинь пыр, кыдзи ме коркӧ больничасьыс пышйи, чайті, помасис олӧмыс, кусіс быттьӧкӧ ставыс син водзын. Но ӧні Рая гортын, и ме медся шуда! Ӧні, дерт жӧ, ставыс вежсяс бурланьӧ!

 

Лика. 26.11.2014.

 

Ме ёна рад, мый мамӧ кылӧ асьсӧ бурджыка нин. Сійӧ кутіс петавлыны ывлаӧ, ветлыны гӧсти. Некымынысь весиг ветліс салонӧ. Мамукӧ быттьӧкӧ ловзис! Сӧмын майшасьӧ жӧ Рая вӧсна, кӧть и оз кӧсйы петкӧдлыны тайӧс.

Рая вылӧ бать-мамӧ ёна скӧралӧны. Дас кӧкъямыс ар кежлас чойӧ вынӧн корис аслыс торъя патера. И бара ставыс лои сы моз. Сӧмын ӧні Рая оз кӧсйы тӧдны миянӧс. Оз звӧнит, оз кӧсйы, медым ми волывлім сы дорӧ. Раялӧн олӧм йылысь ми тӧдмалам бокӧвӧй йӧзсянь! И юӧръясыс ёна абу бурӧсь. Менам чойӧ — наркоманка. Ме эськӧ ставсӧ сеті, медым отсавны сылы. Но мырдӧн тай весиг бурсӧ мортыдлы вӧчны сьӧкыд.

Меным неуна яндзим гижны та йылысь, но... кор Рая ӧтдортчис миянысь, мамӧ кутіс тшӧкыдджыка пыравлыны ме дорӧ, сёрнитны мекӧд. И видзӧдӧ сійӧ ме вылӧ сэтшӧм меліа, быттьӧ прӧща корӧ. Мамӧ мыйлакӧ полӧ ме вӧсна. Сӧмын ме ог гӧгӧрво, мыйла. Водзджык, ичӧтджыкнам на, вӧліны здукъяс, кор ме кӧсйылі матыстчыны мамӧ бокӧ, сывйыштны сійӧс да шӧпнитны пеляс: «Мамӧ, ме тані, видзӧдлы ме вылам». Рая некор эз нюжӧдчы мамӧлань, сійӧс дӧзмӧдіс мамӧлӧн сы вӧсна тӧралӧмыс.

А ӧні Рая ӧтнас, сылы, кӧнкӧ, бурджык тадзи овнысӧ, миянтӧг. Но ме ёна гажтӧмала, ми ставным ёна гажтӧмалам и виччысям сійӧс гортӧ.

 

Наталья. 8.01.2015.

 

Тӧрыт, дас квайтӧд рӧдитчан лунас, Лика сюрис аварияӧ. Сійӧ больничаын, но врач шуис, мый нывкалы ёна везитӧма, и регыд нин Лика лоас гортын.

Рая вошис дзикӧдз. Вежис замоксӧ, оз лэдз миянӧс патераас.

Олег юӧм вӧснаыс воштіс уджсӧ. Миян ыджыд уджйӧз. Колӧ мынтысьны.

Олӧм жугласис. А мый вӧсна? И коді таын мыжа? А мыжа сӧмын ме, ме ӧтнам.

 

Наталья. 11. 09. 1991.

 

Видза олан, менам дона, менам муса дневник! Ми талун Олька нывъёрткӧд ветлім театрӧ, сэтшӧм тешкодь вӧлі спектакльыс, кык час быдсӧн чиктылім!

А театрсьыс петігӧн чиганка миянӧс сувтӧдіс. Нюжӧдышт пӧ китӧ, дитятко, став збыльсӧ шуа. Ок и бурсиис старукаыд! Шуис: «Регыд нин тэнӧ, нылукӧй, суас ыджыдсьыс-ыджыд муслун! И мича сійӧ лоас, и озыр, а радейтны тэнӧ кутас кыдзи! Керка тіян лоас ыджыд, ставлы завидь вылӧ, пызанныд сёянӧн тыр, машина лоас. Зэв бура овны понданныд. Сӧмын волас жӧ и тіян ӧдзӧс дорӧ неминучаыс: нывныдтӧ ті воштанныд, дас квайт арӧса кымын сійӧ лоас.»

Сідзкӧ, сюрлас на и ме нэм вылам мича, пӧт олӧмыс! Меным весиг чеччавны окота. Ныв йывсьыс эз жӧ эськӧ бура шу да... Но ме пока ог кӧсйы та йылысь мӧвпавны. Регыд нин, гашкӧ, аски, менӧ виччысьӧ мууууслуууун!!!

 

Гижӧд
Медся муса
Гижан кад: 

lkejrlkelkrgner klrjnelknfrkl ekjnrjkenfrej

1