ЛЕСНИК ОРДЫН


Кор ме локті
Кыйсян банька дорӧ,
Кадыс вӧлі
Шонді лэччандор.
Варов дедӧ
Чолӧмасьӧ, корӧ:
— Талань волы,
Волы, кыйсьысь морт.

Рысь кодь еджыд
Дзормӧм тошкыс сылӧн,
Чукырвизя
Сылӧн чужӧмбан.
Быттьӧ дедлӧн
Ыргӧн чужӧм вылын
Лэчыд гыжъяс
Нуӧдӧма сан.

Турипувйӧн
Чӧскыд чай ми юам,
Сёям шыд
Да ошкам пӧтка кӧр.
Парма пиян
(Асьнымӧс тадз шуам)
Радейтӧны
Войвывса веж вӧр.

Дедлы ошка
Выль совхозлысь олӧм.
Дед мен шуӧ,
Ягын мед ог вош,
Ноддя-бияс
Лӧдсавны кыдз колӧ,
Кыдзи корсьны
Пӧтка либӧ ош.

Унатор на
Петкӧдліс мен дедӧ:
Кыдзи юкны
Ӧти истӧг тув,
Кыдзи налькъяс
Октавны, мед шедӧ
Ваын олысь
Анча либӧ чув.

Унзіль вылысь
Зыбкаын моз кыла:
Кӧнкӧ матын
Рукӧстыштіс кӧр.
Потандорса
Ньӧжйӧ-ньӧжйӧ сьылӧ
Ӧдзӧс сайын
Арся пемыд вӧр.