ЛЕНЬӦ

Олісны-вылісны леньӧ гозъя. Леньӧ вӧлі ёна дыш. Вот коркӧ гӧтырыс сійӧс песла ыстӧ.

— Леньӧ, леньӧ, песла кайлы!

— Кӧмӧдан кӧ, кайла.

— Леньӧ, леньӧ, песла кайлы!

— Пасьтӧдан кӧ, кайла.

— Леньӧ, леньӧ, песла кайлы!

— Вӧв кӧ доддялан, кайла.

— Леньӧ, леньӧ, песла кайлы!

— Вӧжжи кӧ киӧ сетан, кайла.

Каяс. Пуӧ тотшвартас. Пуыс горӧдчас:

— Мый нӧ, леньӧ, колӧ? Эн керав менӧ.

— Гӧтыр тшӧктіс ӧшинь ув тыр пес лэччӧдны.

— Мун лэччы гортӧ. Лоӧ пескыд.

Лэччас. Ӧшинь улын тырыс пес. А гӧтыр видӧ. Карта тыр скӧт пӧ мед корин.

Каяс. Пуӧ тотшвартас.

— Мый, леньӧ, колӧ? Эн керав менӧ.

— Гӧтыр тшӧктіс корны карта тыр скӧт.

— Мун лэччы. Лоӧ тіян скӧт.

Лэччас. Видзӧдӧ — карта тыр скӧт налӧн эм. А гӧтыр бара нин шуалӧ: мед пӧ миян сарай тыр турун. Каяс. Пуӧ тотшвартас.

— Мый, леньӧ, колӧ?

— Гӧтыр шуис, мед миян вӧлі сарай тыр турун.

— Мун лэччы.

Лэччас. Налӧн сарай тыр турун. Гӧтыр шуалӧ: мед эськӧ миян жытник тыр нянь. Каяс. Пуӧ тотшвартас.

— Мый, леньӧ, колӧ?

— Гӧтыр тшӧктӧ: мед пӧ миян жытник тыр нянь.

Лэччас. Налӧн жытник тыр нянь. Гӧтыр паныд петӧ: мед пӧ миян зэв уна сьӧм.

Каяс. Пуӧ тотшвартас.

— Мый, леньӧ, колӧ?

— Уна сьӧм ковмӧма.

— Мун лэччы.

Лэччас. Зэв уна деньга налӧн. А гӧтыр инас оз ӧшйыв. Мед эськӧ пӧ тэ купеч лоан, а ме купечика. Каяс. Пуӧ тотшвартас.

— Мый, леньӧ, колӧ?

— Гӧтыр шуӧ, мед пӧ эськӧ ме купечӧн лоа, а сійӧ купечикаӧн.

Лэччас — мужик стойка сайын вузасьӧ, гӧтыр кӧлач сёйӧ, кампет личышталӧ. Мужик водзас жӧдзӧ. Бара шуӧ: леньӧ, кай! Тэ мед сар, ме — сарица. Каяс. Пуӧ тотшвартас.

— Мый, леньӧ, колӧ?

— Гӧтырлы ковмӧма, мед ме сарӧн лоа, а сійӧ сарицаӧн.

— Мун лэччы.

Лэччас — ачыс кыр пон, гӧтырыс энь пон.

Эн горшась!