КӦНІ МЕНАМ ИЧМОНЬПУ?


— Кӧні менам ичмоньпу?
Коді менам гӧтырпу?
— Туска синма Евлампея,
Сьӧкыд пеля Доропея,
Нёнь пӧла Катерина,
Юр пӧла Ӧкулина.
Бӧрйы, пиӧ, ичмоньпу,
Гӧтрась, ме нинӧм ог шу.

— Кӧні менам ичмоньпу?
Коді менам гӧтырпу?
— Истан кока Секлетея,
Шыран кока Мастредея,
Мегыр кока Алептина,
Латка кока Валентина.
Бӧрйы ичмонь, бӧрйы вай,
Сӧмын приданнича вай.

— Кӧні менам ичмоньпу?
Коді менам гӧтырпу?
— Лапъя пеля Степанида,
Порот паръя Платонида,
Тамыш синма Сиверина,
Шердын вома Антонина.
Бӧрйы, пиӧ, ичмоньпу,
Гӧтрась, ме нинӧм ог шу.

— Кӧні менам ичмоньпу?
Коді менам гӧтырпу?
— Савӧ Марья — вывті кызджык,
Кирӧ Дарья — быттьӧ дышджык,
Сопрон Варук — горш да колысь
Демит Парась — вывті полысь.
Бӧрйы ичмонь, бӧрйы вай,
Сӧмын приданнича вай.

— Кӧні менам ичмоньпу?
Коді менам гӧтырпу?
— Ӧгрӧпена эськӧ мича,
Сӧмын мамыс ерӧтнича,
Шогмана ныв Якунь Дуня,
Сӧмын рӧд-вужыс квайт чуня.
Бӧрйы, пиӧ, ичмоньпу,
Гӧтрась, ме нинӧм ог шу.

— Кӧні менам ичмоньпу?
Коді менам гӧтырпу?
— Вывті наян Еропея,
Даньӧ Ӧдюк — чурка пиа,
Давӧ Вера — бӧбылянка,
Роч Вань Зина — пӧселянка.
Бӧрйы, пиӧ, ичмоньпу,
Гӧтрась, ме нинӧм ог шу.

— Кӧні менам ичмоньпу?
Коді менам гӧтырпу?
— Кузьма Васьлӧн — вӧлыс бӧжтӧм,
Закар Васьлӧн — доддьыс вожтӧм,
Сопрон Васьлӧн — муыс кӧдзтӧм,
Мирон Васьлӧн — домыс вӧчтӧм.
Бӧрйы ичмонь, бӧрйы вай,
Сӧмын приданнича вай.

— Оз ков меным ичмоньпу,
Оз ков меным гӧтырпу!
Куль васа мед бӧрйысяс,
Лешакыс мед гӧтрасяс!