КЫВТӦ ВӦР


Гожся шонді улын лӧня
Увлань шлывгӧ Эжва ю.
Юас видзӧдчӧны сиктъяс,
Веж колхознӧй видз и му.

Эжва кузя молльӧн кывтӧ
Уна, уна мича кер.
Сійӧс мӧдӧдӧ страналы
Миян томмӧм коми вӧр.

Лун и вой пыр водзӧ мунӧ
Вӧля вылӧ лэдзӧм моль.
Куръя вомъясӧ оз сетсьы,
Лыа бӧжъясын оз коль.

Лэчыд багыръяса войтыр
Туйсӧ индӧ сылы пыр.
Мудз оз тӧдны зільмӧм ёртъяс,
Кыпыдлунӧн сьӧлӧм тыр.

Лыблӧ налӧн гажа сьылӧм.
Кывлӧ шмонитана кыв:
«Ноко, ноко, зарни керйӧй,
Лючкиджыка водзӧ кывт!»

Дона Рӧдиналы сетны
Ассьыс вынсӧ быдӧн рад,
Мед пыр дзоридзалас олӧм,
Кыдзи тувсов кадӧ сад.

Налӧн уджыс ключӧн пуӧ
Эжва кузя кывтігчӧж.
Зіля, зіля дружнӧй войтыр
Вӧтлӧ, весалӧ моль бӧж.

1947 во.