КАТШАСИНА ВИДЗ

1.

«Лок ветлам эстчӧ,— корӧ Оля,— мый ме аддзылі...» И ми котӧртам шыльыд видз вывті, а сэсся вӧртор вуджам, и петам ытшкытӧминӧ. Джӧмдам, воськовтны ог лысьтӧй. Ми водзын катшасина помтӧм-дортӧм видз.

Мыйта кад коли, а ме мӧвпнам выльысь и выльысь вола сэтчӧ. И пыр на оз эскыссьы: овлӧ али мый татшӧм мичыс?.. И пыр на ог вермы воськов вӧчны, мед не дойдны кузь кок йылын катласьысь гырысь юра катшасинъяссӧ. Кӧть и тӧда нин: рытнас тайӧ видзсӧ ытшкасны...

«Аттьӧ тэныд, Оля, тайӧ видз вылас быд катшасинысь, аттьӧ»,— вояс пыр ыста лэбачӧн сёрмӧм мӧвпӧс сійӧ кадас. Но воас-ӧ?..

2.

Талун морт бӧрйис туй, кыті позяс мунны дыр-дыр да петны катшасина видз вылӧ.

Коркӧ таті визувтӧма ю, а сэсся кырӧма бокитіджык выль ворга, со и чужӧма тайӧ югыд виддзыс. И кадыс ӧні таті визувтӧ тыдавтӧм юӧн, и водз асылӧ позьӧ аддзыны сылысь пассӧ быд катшасин вылысь. И чукӧртны соддзад петысь шонді водзын дзирдалысь, ыркыд войтъяс. И казьтыштны юсӧ.

Ставсӧ тайӧс вежӧрас садьмӧдӧм бӧрын морт копыртчыліс... Сійӧ тӧдіс: кытчӧкӧ татчӧ, вӧвлӧм ю бокас, дзебӧма дед-бабсӧ. Но некутшӧм пас абу кольӧма весиг — мылькъяссӧ шыльӧдӧма кадыс. Но налӧн лов — катшасина видз — сӧстӧм да кыпыд...