ИВАН БУСЛАНОВ
Вӧлі олӧны гозъя. Зэв гӧлиникӧсь. Скӧт эз видзлыны. Толькӧ ӧти пи быдтӧны. Кӧм-паськӧм омӧль, керка омӧль. Кызь арӧсӧдз нин быдтісны, но нинӧм удж вылӧ сійӧ эз велавлы, абу тыр сюсь. Кызь арӧсӧдз быдтісны. Иванӧс босьтісны салдатӧ.
А сэк вӧлі кузь службаыс. Мукӧдсӧ лэдзлывлӧны отпускӧ, а сылы отпусксӧ эз сетлыны. Но дыртӧ служитӧм бӧрын сійӧс сарскӧй ӧдзӧс дорӧ дежуритны индісны, кӧть и абу тыр сюсь.
Йӧзыс быдӧн отпускӧ ветлӧны, а сійӧ и юасьӧ:
— Мый нӧ, ме вит во ола, служита, дай ӧні нин сарскӧй ӧдзӧссӧ видза. Неужели менӧ оз позь отпускӧ лэдзлыны, кӧть ӧти во джын кежлӧ? Менам пӧрысь мам-бать кольӧма. Колӧ видзӧдлыны найӧс, гажӧй бырӧма. Найӧ кӧнкӧ бӧрдӧны нин.
А сы вылын мукӧд сюсьджык салдатъясыс тешитчыштӧны, оз и артавны прамӧй бур салдатӧн, тешкодь туйӧ вӧдитӧны.
Сарыслӧн лакей ли, мый ли сэсся шуас:
— Час, ме юала сарыдлысь. Иван Бусланов вӧзйысьӧ гортас. Лэдзлыны отпускӧ позяс оз?
Лэдзисны сійӧс. Иван Буслановӧс. Быдӧн быттьӧ сералыштӧны сы вылӧ, казармаӧ локтіс да: Иван пӧ мӧдӧдчӧ отпускӧ мунны гортас.
— Мый нӧ тэ пондан керны сэтӧні, гортад мунан да?
— Мый кера? А ме муна да порсьясӧс велӧда. Ме порсьясӧс велӧдны верма, не толькӧ войтырӧс.
Сы вылын сералӧны быдӧн, и сарлы висьталісны: Иван Бусланов пӧ кӧсйӧ порсьясӧс гортас велӧдны...
Тешитчигмоз гижисны, мый порсьясӧс колӧ велӧдны сылы гортас, мед некод эз кут. Кутас кӧ Иван порсьясӧс корны, сетны колӧ, мед велӧдӧ. Бумага сетісны, печать пуктісны и быдӧн, кыдз следуйтӧ.
И муніс гортӧ. Воис сійӧ пӧрысь генерал ордӧ жӧ. А генераллӧн куим ныв вӧлі. Ямщикыд пыртӧдіс узьны. Пӧрысь генералыс сэтшӧм бура примитіс, пӧрччӧдісны, пызан сайӧ пуксьӧдіс и давай гӧститӧдны. А куим ныв пыді комнатаынӧсь, куим невеста. Иван сэтӧн гажмыштіс, ёна пондіс баквалитны, висьтасьӧ:
— Ме вот сідзикӧн служиті, генеральскӧй платтьӧа локта, генералын уджала, отпускӧ лэдзисны. Менам мам-батьӧй карын олӧны бура!
Генерал юалӧ:
— А тэ гӧтыра?
— Абу эськӧ да. Кӧсъя эськӧ гӧтрасьны, да мен невестаыд оз шогмы деревнясьыд. Мен некод вылӧ гӧтрасьныыд. Кыськӧ эськӧ сюрис кӧ, коліс нуӧдны татысь гортӧ, мам-бать дорӧ.
А нывъяс ӧдзӧс восьтӧмаӧсь, кыйкъялӧны, куим невеста. И ставыслы нин Иван глянитчис.
Ӧти шуӧ:
— Менӧ кӧ эськӧ босьтас, ме муна!
А мӧд шуӧ:
— Ме эськӧ муна жӧ да!
А коймӧдыс шуӧ:
— Менӧ на и босьтас! Ме тіянлы ог сет, босьтас кӧ!
Коркӧ-мыйкӧ дыр нин сёрнитісны, и бать, пӧрысь генерал, шуис:
— А менам невестаяс эмӧсь. Шогмасны кӧ, ме любӧйӧс сета. Ноко, юав, сӧгласитчасны оз.
Кыкыс горӧдісны:
— Ме муна.
А коймӧдыс шуӧ:
— А менӧ на босьтас.
Иван Бусланов и пондіс шуны:
— Ме тайӧ босьта, медічӧтсӧ. Сійӧ медъёна глянитчис.
Генерал ордын вежаун, гашкӧ, и кыкӧс нин оліс. Гӧтрасис нин, ӧтилаын нин олӧны медічӧт нылыскӧд. А мукӧдыслы, дерт, завидь. Медічӧтыс лои генеральша.
Сэсся и пондіс шуны:
— Аттӧ зонмӧ, ме ӧд гортӧ муна. Колӧ мен гортӧ ветлыны, мам-батьӧс видлыны.
Ичмонь шуӧ:
— Ме ог кольччы, ме тшӧтш тэкӧд муна.
А Иван Бусланов кытчӧ нуас? Керка лёк, кӧм ни паськӧм — нинӧм абу. Кытчӧ нуӧдас мам-бать дорӧ невестаӧс? Сійӧ и шуӧ:
— Ме ӧд ог и дыр ветлы. Ветла тӧлысь или кыкӧс. Ме бӧр тіян дорӧ локта татчӧ.
Кӧсйысяс локны бӧр. Невеста бӧрдӧ, но кольччис. Сылы зэв уна деньга сетісны. Тесьтыс сетіс, ичмоньыс сетіс деньга. Иван Бусланов, генералыд денежнӧй, озыр муніс сэтысь.
Ог тӧд сэсся, кымын станция муніс. Бара узьны пыртӧдісны. А сэні вӧлі кутшӧмкӧ дурацкӧй шайка. Сійӧс тойлісны:
— Эй, служивӧй, вай картіӧн ворсам, кужан кӧ.
— А кужышта, пӧжалуй, ворсам.
Сійӧс пуксьӧдісны, ворсісны, сылысь став деньгасӧ воисны, оз куж ворсныыс да. Сэсся и генеральскӧй платтьӧтӧ ворссис. Ставсӧ сылысь быдӧн воисны и асьныс мунісны сэсся. Петісны, пышйисны. А сійӧ коли ӧтпӧлӧса, паськӧмтӧм, и шуӧ кӧзяиныдлы:
— Вай мен кутшӧмкӧ паськӧм, и ме муна.
Ямскӧй вӧлӧн сійӧс оз нин нуны, лёк паськӧма, документыд абу, подӧн муніс.
Ог тӧд, дыр-ӧ сійӧ муніс. Гашкӧ и ылын на вӧлі, дыркодь муніс, коркӧ деревняад, гортад воис, лёк пупайкаа, лёк сапӧгшоя. Керкаыд закренитчӧма, пӧлӧстчӧма. Мам-батьыдлы шогыд да гӧреыд.
— Дурыдлы-йӧйыдлы оз ӧд ум-разумыд сюрлы, кӧть кытчӧ мӧдӧд. Йӧзыс тай локтасны прамӧй йӧзӧн, а миян йӧйсӧ нуліс, йӧйсӧ и вайис бӧр. Аттӧ дивӧ, кутшӧм морт!
А Иван шуӧ:
— Чӧвлы, чӧвлы, ме генерал вӧлі, меным коркӧ сарыд ыстас генеральскӧй платьӧ, менам сэтчӧ коли. Мем эз сет локтігад, а бӧрын ыстас.
— Но, виччысьлам, коді тэныд платтьӧ ыстас, — мам-бать шуӧны, — йӧзсьыс яндзим.
А Иван шуӧ:
— Меным порсьясӧс тшӧктіс велӧдны сарыд.
Сійӧ пондіс чукӧртны порсьясӧс, кодлӧн мыйта вӧлі. Гашкӧ, сё порсь чукӧртіс и пондіс найӧс велӧдны, ветлӧдлыны велӧдӧ:
— Ать-два, ать-два.
Сюмысысь вӧчис орс, сюмыс орсӧн кульӧ порсьясӧс. Порсьяс первойтӧ оз вӧлі кужны, ёна дойдаліс, нӧйтіс. Уна порсь и кулі. Уна кӧзяйка бӧрдӧны и пинялӧны, оз сетны, А сійӧ документ петкӧдлӧ, кодӧс тешитчисны сетісны салдатъясыс. Сэсся пыксьыныд оз лысьтны. Велӧдӧ порсьястӧ. Быд рыт вайӧдӧ, пӧра воас да шонді лэччандор. Деревня кузя порсь артель локтӧ, сійӧ — бӧрсяньыс, босьтӧма орс да: «ать-два, ать-два». Сійӧ найӧс вайӧ. Воас деревняӧ, «стой!» горӧдас, ставыс сярккылӧ сувтасны порсьясыд. «Разойдись!» — шуас. Ставыс сэсся гортас мунасны. Кӧзяйкаяс найӧс примитасны, вердӧны. Сідзи сійӧ велӧдас, гашкӧ, сё порсьӧс. Сэтшӧма мучитас.
Сэсся и коркӧ ичмоньыдлы адресыд сюрӧма дай шуӧ:
— Колӧ мужикӧс видлыны, мыйкӧ дыр эз понды локны. Тадзи эновтӧмӧн менӧ и эновтас.
Батьыслы висьталіс, мый мунӧ мужикӧс, Иван Буслановӧс, видлыны. Бать-мам мӧдӧдісны, чойяс уна деньга пуктісны. Подӧн эз лок, вӧлӧн вайисны, ямскӧй вӧлӧн.
Сэсся кутшӧм трактирын мужиксӧ картінад ворсӧдісны, сійӧ сэтчӧ узьны пырис. Узис сэтӧні дай юалӧ:
— Генерал эз татӧні узьлыв?
— Узьліс кутшӧмкӧ, абу тыр сюсь, платтьӧсӧ вузаліс татчӧ, генеральскӧй платтьӧсӧ.
— А ноко, петкӧдлы, — сылӧн сьӧлӧмыд и вӧрзис.
Кӧзяин вайис генеральскӧй платтьӧсӧ — мужикыдлӧн, Иванлӧн, платтьӧыс. Ичмонь шогӧ воис.
— Тайӧ он-ӧ вузалӧ меным? Вай вузав.
Но сійӧ донтӧм донысь, ичӧтик дон вылӧ сетіс ичмоньлы.
Бара коркӧ водзӧ муніс, деревняӧдзыс нин. Дыр-ӧ, регыд муніс, ог тӧд кымын лун. Иван деревняӧдзыд нин воис, деревняад юасьӧ, кӧні Иван Буслановлӧн керка, кӧні сійӧ олӧ.
Быдӧн висьталӧны, челядь босьтісны, нуӧдӧны: закривитчӧма лёк керка. Ӧшиньясыс жугласьӧма, пырныыс поскыс киссьӧма. Пырис, мамыс тӧкӧтьӧ сайӧдыштӧма телӧсӧ, сэтшӧм лёк паськӧма. Повзисны гозъя, мый нин, кутшӧм баруня воис.
Ичмонь юалӧ:
— Иван Бусланов тан олӧ?
— Тан, тан, матушка.
— А кӧн нӧ ачыс?
— Ачыс удж вылын, регыд воас, порсьясӧс велӧдӧ. Ӧшиньтіыс видзӧд, регыд воас.
Сійӧс шог босьтіс сэтшӧм ёна. Мӧд керкаас петіс дай бӧрдӧ. И видзӧдӧ — Иван воис порсьясӧн, ньылӧдӧма, сьӧд, няйт быдӧн. Мамыс сетіс тшак ва сёйны, пызан сайӧ пуксис. Мыйкӧ, кутшӧмкӧ ас пӧжалӧм няньтор да тшак ва бруткӧ-сёйӧ.
— Кутшӧмкӧ баруня воис татчӧ, висьтасис тай тэныд гӧтырӧн.
— Менам сійӧ и эм.
— Чӧв, — гозъя шуӧны, — сэтшӧм гӧтыр йӧйлы. Кутшӧмкӧ, гашкӧ, сарица да, гашкӧ, сарицаыс локтіс.
И Иван и шуӧ:
— Вайӧдлӧ мунӧ мӧд керкаысь, мед локтас.
Мӧдӧс вайӧдісны, пырис невестаыд, Иванлӧн пӧсьыс петӧма, тшак ва брунгӧ-сёйӧ.
— Вай пуксьы ме дорӧ сёйны.
— Ог кӧсйы.
Сэк кості батьыс-мамыс пывсян ломтісны.
Иван шуӧ:
— Ми петам пывсьыны. Мам, дӧрӧм-гач вай.
Мам и шуӧ:
— Мый нӧ сета, нинӧм абу, колӧ вӧлі кольны да талун мыськыны пывсян бӧр кежад. А миян сэсся абу.
— Но гашкӧ, менам гӧтырӧй вайис.
Гӧтырыслысь юасис, гӧтыр сэсся ноп босьтіс.
— Ме пета гӧтыркӧд пывсьыны, ӧтнам ог пет.
— Ой-ой, — найӧ шуӧны, — да йӧйыдлӧн век тай йӧй жӧ уджыс. Мый нӧ тайӧ такӧд? Талы кутшӧм тайӧ гӧтыр да пара? Тайӧ ӧд пышъяс бӧр.
Мӧд ноп босьтіс, да пывсьыны петісны. Пывсисны сэтӧні, мыссисны. Коркӧ-мыйкӧ Иван быдӧн дӧрӧм-гач вежис-пасьтӧдіс, генеральскӧй паськӧм пасьтӧдіс. Локтӧны кутчысьӧмӧн, вайӧдӧ ичмоньӧс.
— А збыль, гашкӧ, гӧтыр да. Вот тай кутшӧм!
Найӧ олісны, ог тӧд, дыр-ӧ, регыд сэтӧні. Пӧра мунны. Иванлӧн нин колис отпускыс. Мунісны тестьыс ордӧдз. Сэні бара олісны мыйкӧ дыра.
Дыр-ӧ олісны, ог тӧд. Сэки зэв чойясыс радлісны, мый сійӧ пӧрйӧг вӧлӧма. Ичмонь сэтчӧ кольччис, чойяс дорӧ, а Иван Бусланов муніс, кӧн служитіс.
Воис аслас карӧ, кӧн служитіс, пырис казармаӧ генеральскӧй платтьӧа. Видзӧдӧны — Иван Бусланов ачыс генералӧн локтіс. Быдӧн шапка лэптӧны, честь сетӧны Иванлы. А кодкӧ и тӧдысь на вӧлі, мый та вылын тешитчылісны коркӧ.
Сэсся сарлы висьталісны. Сар корис. И вот Иван пондіс шуны, ме пӧ вот порсьясӧс велӧді, дыр эг лок, опоздайті сы вӧсна.
Сералӧны сы вылӧ бара. Иван шуӧ:
— Ветла кӧть да вайӧда.
Сэсся мӧдӧдлісны.
Иван порсьястӧ вайис, стройӧн сувтӧдіс и петкӧдліс сарыслы. И колис сарыс сійӧс ас дорӧ.
