ЗАРНИ ЮБИЛЯРЛЫ

1

«Войвыв кодзув», донаӧй, Морӧс пытшкӧй шоналӧ, Киӧ босьта кор. Пи тэ коми кывйыслӧн, Коми сьыланкывйыслӧн Мыла, мича гор. Зарни юбилярӧйлы Ветымынӧд арӧснад Казьтыштны мый эм. Кымын мортлы ним сетін, Коми мусӧ нимӧдін, Нимӧдін и нэм.

2

Пемыд вой кодь олӧмас, Личкыліс кор полӧмыс, Чужис сьыланкыв. Кутшӧм повтӧм сьӧлӧма Коми зонмыс вӧлӧма, Аддзывлӧма кыв. Таланта жӧ чужлӧма, Мича кывйӧн кужлӧма Сьывны вӧрын, тан. Олӧмыс тай таляліс, Сёрджык муыс паляліс, Мыччис шонді бан. Аслас киӧ босьтысьнас, Куратовӧс восьтысьнас Журнал лоис, дерт, Первой коми сьылысьӧс Ылӧдз ӧні кылӧны, Ним сылӧн эз берд.

3

Ичӧт пи муртса лыддьысьны сяммӧ, Со «шӧвк тупыль кодь» «Кань» Илля Васьлысь Лыддьӧ сьӧлӧмсьыс, син водзад раммӧ. Мыйта любӧыс лыддьӧмсьыс аслыс! Гылыд серама Нёбдінса Виттор, Ӧні олӧны тэнад геройяс: Сюзь Матвей, Митипер, мича Тиюк, Тист Иван джуджыд Джиянса чояс. Тима Веньлӧн зіль дядь Трипан Васьыс Быттьӧ син водзад ю йылӧ катӧ. Эн пӧ мыжалӧй сыысь, мый артмис, Сьӧкыд олӧмыс вайӧдіс матӧ.

4

Нимъяс, нимъяс, Быд сайын морт олӧм. Сьӧлӧм дойяс, Дыр виччысян радлун. Эськӧ ставнытӧ Ним-вичнад колӧ Бурӧн сьӧлӧмсянь Казьтыштны талун. Сэк, кор Коми му Пальӧдіс ойбыр, Пемыдлуныскӧд Пырис кор венӧ, «Войвыв кодзулӧй», Сьӧлӧма войтыр Морӧс берданыс Быдтісны тэнӧ.

5

Выльтӧ панны и сьӧкыд, и нимкодь, Кадыс тшӧктӧ и сьӧлӧмыд корӧ. Тэныд бӧрйисны пилы моз нимтӧ, Сэсся петін тэ коми йӧз дорӧ. Лоин уналы донаӧн, асӧн, И бур войтырсӧ ышӧдін уджӧ. Лоин пармаяс туй индан пасӧн, Ыджыд туй вылӧ «Ордымсянь» вуджин.

6

Быдторйыс лоліс: Сьӧкыд кад воліс, Вешйывліс бӧр. Ветымын во нин Йӧз дорӧ воан Со, сьӧлӧмшӧр. Дыр овны тэныд! Югдӧд пыр нэмыд, Бурланьӧ ну. Кылас мед сьылӧм Шань коми кылӧн Ас чужан му. 1976, октябрь.
Гижысь: 
Гижӧд
Зарни юбилярлы
Жанр: 

lkejrlkelkrgner klrjnelknfrkl ekjnrjkenfrej

1