ЗАРНИ БӦЖА КАНЬ

Овлісны-вывлісны гозъя. Налӧн куим ныв вӧлі. Куим ныв быдтӧны. Воис тулыс, пуктысян кад. Мам пачтор ломтыштліс, вердыштіс найӧс и шуӧ:

— Талун сэсся петаламӧй пуктысьны. Пӧра нин. Град лэптыны пондам. Ставӧн петамӧй, бать и быдӧн.

Асьныс пӧрысьӧськодь нин вӧліны. А градйыс вӧлі матын вӧр дорын васӧдінын да бӧрӧздаяс колӧ вӧлі кодйыны град костас. Ставныс зыр босьтісны, петісны град бӧрӧздаӧ, бать и мам. А кузь вӧлі градйыс. Ӧтар помыс вӧр дорын, потшӧса, а мӧдарыс эськӧ и потшӧстӧм, гӧра йылын, но кузь вӧлі, гӧра кузяыс. Мам-бать вылынӧсьджык, нывъясыс улынӧсьджык дай абу ӧти бӧрӧздаын, ставныс аслыныс бӧрӧзда босьтісны. Медыджыд нылыс, Машенька, улынкодь нин, матын вӧлі потшӧс дорын, буракӧ, медся зіля копайтчис. Видзӧдӧ — да водзладорас бӧрӧзда кузяыс зарни бӧжа кань котӧртӧ. Видзӧдіс, дивӧ лои — зарни бӧжа кань. Зыртӧ шыбитіс и давай каньӧс вӧтӧдны. А кань ылӧдз пышйис. Котӧртыштас, котӧртыштас, пуксьылас бӧрӧздаӧ да нывлысь матысмӧм виччыштас. Ныв матысмас — бара водзӧ мунӧ. Тадзи муніс, муніс дай потшӧс костӧдыс петіс. Ныв кувыркнитчис-чеччыштіс потшӧс вывті. Бара каньӧс вӧтӧдӧ, вӧрӧ нин пырисны, а век вӧтӧдӧ. Мыйӧн вӧрӧ пырисны, каньыд кумельгасис да ошкӧн лоис и шуӧ:

— Вай пуксьы ме вылӧ.

— Ог ме лысьт, ме пола, тэ менӧ сёян.

— Он кӧ пуксьы, дерт, сёя, а пуксян кӧ, ме нуӧда гортӧ. Тэ пондан ме ордын овны. Ог ме тэнӧ сёй. Пуксьы да кутчысь ёнджыка, мед он усь.

Машенькалы нинӧм дыр думайтны. Мед оз сёй ошкыд, быть нин пуксьы сылы мыш вылӧ. Пуксис, да ошкыд и гӧнитӧдіс вӧрӧ.

Воисны, абу ёна ыджыд, сэтшӧм дзоляник керка, зэв лӧсьыд, краскаа вӧлі быдӧн вылысъясыс. Зэв мича керка. Ош шуӧ:

— Но, воин и ме дорӧ, Машенька. Вай сэсся пыр татчӧ дай овмӧдчы. Эн гажтӧмчы. А менам аслам керка эм, аслам чом. Сёй да ю, мый колӧ душаыдлы, кӧмав, пасьтав. Кужан кӧ вурсьыны, сэн машина эм, вур, мый аслыд колӧ.

Машенька сэтчӧ пырис, видзӧдліс, чӧлӧй сундук сулалӧ. Быдӧн сэтӧні мича тӧвар. Сійӧ, мый кӧсйис, аслыс сійӧс и вурис: платтьӧяс, ковтаяс, мый ачыс вӧлі новлӧ.

Дерт, эськӧ шогсьыштӧ думсьыс: кыдзкӧ оз-ӧ вермы татысь пышйыны.

Ош узис аслас местаын дай аскинас бара удж вылӧ муніс. Сэтчӧ жӧ град дорад и муніс.

А старик гозъялӧн ныв воши, Машенька. Корсисны, корсисны, вӧрӧд ветлӧдлӧны, горзӧны: «Ау, ау! Машенька, шыась!» Некод абу, слуку ни дуку. Бӧрдыштісны дай дугдісны корсьӧмысь. Талун бара колӧ пуктысьны. Петісны нин кык нывкӧд, град лэптӧны. Медшӧркостыс, Аннушка, медводзынджык лои, горулынджык, под улын, потшӧссяньыс матын сэсся вӧр. Видзӧдӧ да, град бӧрӧздаӧдыд зарни кань котӧртӧ. Аддзис — дивӧ лои. Зыртӧ бара шыбитіс и давай кань бӧрся вӧччыны. Кань пышйыштас, котӧртыштас неылӧдз дай пуксьылас, видзӧдлас Аннушка вылӧ. Аннушка матысмас, да бара водзӧ мунас. Ылӧдліс да ылӧдліс, сідзи потшӧс дорӧдзыд воисны дай петісны потшӧс костӧдыс. Вӧрӧдзыд нин пырисны дай, век сійӧ виччысьыштӧ, пуксьыштлас да, бара да. Мыйӧн вӧрад воисны, бара метальникасис, бара тумбыльтчис. Бара сэсся ош лоис и шуӧ:

— Но, Аннушка, сэсся мышку вылӧ пуксьы, дай ме ордӧ мунам.

— Ог, дядя Миша, ме лысьт тэ мыш вылӧ пуксьыны. Тэ сёян.

— Ог, эн пов. Вот он кӧ пуксьы, ме сёя тэнӧ. А пуксян кӧ, ме ордӧ мунам овны и олам ме ордын. Ог ме тэнӧ ӧбӧдит.

Мый сэсся керан? Кӧсйӧ горӧдны, а мам-бать ылынкодь нин колины. Оз нин, гашкӧ, кывны «аусӧ». Сы ылнаӧдз нин вӧтчис. Ош бара нуӧдіс аслас туйӧд, кытчӧ колӧ. Воис аслас керка дорӧ. И шуӧ:

— Татчӧ и пыран тэ. Воин ме ордӧ. Пыран да Машенькаыд тані. Ті олӧй. Мый колӧ, сёйӧй да юӧй, пуӧй да пӧжалӧй. Быдтор эм. Мый колӧ, сійӧ и вурӧ.

Аддзысисны кык чой. Бӧрдыштісны, любуйтчыштісны и пондісны сэтӧні овны.

Бара бать-мам кватитчисны, мӧд ныв нин абу. Ӧти ныв нин коли, медічӧтыс толькӧ. Шогсьыштісны, котравны кутісны. Вермӧны кӧть оз, котӧртӧны вӧрӧд ӧтарӧ-мӧдарӧ.

— Аннушка, Аннушка.

Аннушка некӧн абу. Сідзи и воши бара. Гашкӧ, эз и ужнайтны шогысла, сідзи и узисны пӧрысь гозъя. Но мый керан? Колӧ пуктысьныыд.

Талун бара колӧ петныыд. И ӧтик нылӧн нин петісны.

Но, а сійӧ ӧдйӧджык да ылӧдзджык наысь копайтіс бӧрӧздатӧ, медічӧт нылыс, Сашенькаыс.

Видзӧдӧ да, бара зарни бӧжа кань котӧртӧ. Видзӧдіс, видзӧдіс, да, зэв кань спокойнӧя пукалӧ.

— Час ме тайӧ кута.

Бара зыртӧ шыбитіс дай кань вылӧ шыбитчис, а кань водзысь да водзӧ, да водзысь да водзӧ котӧртӧ. Мыйӧн сійӧ коляс ылӧджык, кань пуксьылӧ да виччысьлӧ, бергӧдчывлӧ да видзӧдлыштӧ. Мыйӧн матысмас, бара кутны оз сюр, пышйӧ. Потшӧстӧ петіс, дай вӧрад пырис дай, ылӧдлӧ сійӧ. А ныв сы бӧрся вӧтчӧ да вӧтчӧ. Ылӧкодь нин вӧтчис.

А Сашенькалы бара ош быгыльтчис да шуӧ:

— Сашенька, мышку вылӧ пуксьы, да ме тэнӧ нуӧда гортӧ.

— Ог ме лысьт, тэ менӧ сёян.

— Ог сёй. А он кӧ пуксьы — сёя. Пуксян кӧ, ме нуа гортӧ. Быть пуксьы. Кутчысь крепыда, мед он усь.

Ош мыш вылӧ пуксис, гӧнас кутчысис, и сідзи жӧ, кыдзи мукӧдъяссӧ сэті и нуис ошкыд. Воис аслас керка дорӧ дай шуӧ:

— Но, сэсся тані и понданныд овны куим чой. Тані чойясыд тэнад.

Пырис — збыльысьӧн сэн чойясыс. Чойяс сійӧс кутлісны, окалісны. Дерт нин, думайтӧны, ми ставӧн лоим да кыдзкӧ-мыйкӧ, гашкӧ, тан овны ковмас ли, мый ли. А медічӧтыс медся вӧлі дошлӧй, сюсьджык кыдзкӧ.

И шуӧ:

— Неужели огӧй вермӧй татысь пышйыны? Коркӧ огӧ мӧй жӧ вермӧй петны? Ми пӧръялам оштӧ коркӧ.

Мыйтакӧ олыштісны, быдӧн кӧмасисны-пасьтасисны зэв бура. Сёйӧны-юӧны бура. Ош ваялӧ кыськӧ налы.

Коркӧ медічӧт нылыс и шуӧ:

— Дядя Миша, аски Машенькалӧн чужан лун. Колӧ нуны мам-батьлы гӧснеч. Найӧ виччысьӧны дай гажтӧмчӧны.

А мӧд шуӧ:

— Вай лӧсьӧдӧ да, мый пуктанныд, сійӧ и нуа. Пӧжасьӧй, пуӧй, а ме ветла кытчӧкӧ водла да шойччышта. Ящик эм, сэтчӧ пуктӧй дай.

Ладнӧ, ящик вайисны джодж шӧрӧ, пусисны, пӧжасисны да ящикӧ и Машенькаӧс, медыджыд чойтӧ, и пуксьӧдісны. Вылысас пукталісны няньяс, жаренӧйяс, юр вылас и быдӧн, и вевттисны.

Ош локтӧ.

— Но, гӧтов абу на?

Найӧ шуӧны:

— Гӧтов, гӧтов, вай босьт да ну. Толькӧ эн восьт. Зэв тыр лои да, восьтан кӧ, гылалас, усялас туй вылад. Дай тэ пӧдлавныыс он куж. Эн восьт.

— Но, ладнӧ. Ог.

Ӧдва вермис мыш вылад лэптыны Машенькаӧс ящикын.

— Мый бара татшӧм сьӧкыдсӧ мӧдӧдісны? Видзӧдла кӧ нин-а? — Мудзис ёна, сьӧкыд мышкыслы. — Час, татчӧ пу вылас, колода вылас пуктыла да видзӧдла, мый пуктісны.

А Машенька сэтӧні:

— Эн восьт, ме вӧд кыла и аддза. Оз позь восьтны.

— Но, медічӧт чойыс кутшӧм сюсь синма. Доза нин ылынкодь коли да век на висьталӧ: «Аддза да кыла да, кыла да аддза».

Оз и лысьт восьтныыд, мунас водзӧ. Водзӧ мунас. А мамыслӧн да батьыслӧн вӧлі кык пон. Мыйӧн на дорӧ матысмис, мам-бать керка дорас, понъясыд ош дуктӧ кылісны да зэв ёна пондісны увтны. Толькӧ кильчӧсӧ косявлӧны. Ош шыбитіс грымкылӧ кильчӧ выланыс ящиксӧ, повзис понъясысь дай шуӧ:

— Нывъясыд мӧдӧдісны гӧснеч.

Ачыс вӧрӧ котӧртіс.

Старик гозъя петісны, ящик пыртісны, восьтісны. Сэтӧні Машенька пукалӧ. Зэв налы долыд лои, рад, медыджыд нывныс воис да. Кыдзи найӧ олӧны, висьталіс бать-мамыслы, гашкӧ пӧ и найӧ воасны.

Мӧд лун коркӧ нин бара лои, и дыр мысьта ли, мый ли, бара медічӧт чойыс шуӧ:

— Дядя Миша, миян ӧд талун нин мӧд чойлӧн, Аннаыдлӧн нимлун, бать-мамлы колӧ гӧснеч нуны. Найӧ шогсьӧны, бӧрдӧны, гажтӧмчӧны да.

Сійӧ шуӧ:

— Нуа, лӧсьӧдӧй.

Найӧ бара пуисны, пӧжалісны быдторсӧ, мый вермисны, чӧскыда пуисны-пӧжалісны. Ящик вӧлі ошлӧн, кодлыськӧ вайлӧма кыськӧ. Ящик вайисны и Аннушка пуксис, медічӧт чойыс юр вылас тэчис быдсямасӧ. Улысас тӧвартӧ тэчис, вылысас гӧснечьястӧ тэчис, мый тӧрис.

— Эй, дядя Миша, менам гӧтов нин гӧснечыд, ну. Сійӧ: нуа.

Ӧдзӧс восьтіс, ныв отсыштіс сылы мыш вылас лэптыны: сьӧкыд.

— Мый бара татчӧ и тэчӧма? Кӧть эськӧ видзӧдлыны колӧ да. Ёна пуӧны-пӧжалӧны да, оз ӧд менӧ и гӧститӧдны. Кӧть эськӧ ӧтикӧс сёйны восьтлыны.

А сэтӧні Аннушка бара надзӧникӧн:

— Эн восьт, эн восьт. Ме кыла и аддза.

— Аттӧ кутшӧм медічӧт чойныс! Век на аддзӧ, мый ыллаӧ муні-а. Он лысьт восьтлыны, быть кыскы кыдзкӧ.

Сідзи жӧ бара ёна мудзис, но нуис. А понъяс, матысмис да, ош дуктӧ кылісны да, толькӧ и косялӧны стенсӧ, петӧны. Ош повзис да бара зыркнитіс кильчӧ вылӧ, ящик шыбитіс да вӧрӧ. Вӧрӧ бара пышйис, гортас муніс.

А старик гозъя гӧгӧрвоӧны нин. Петалісны, ящик пыртісны, восьтісны, ректісны. Аннушкаӧс сэтӧні кутлісны, окалісны, любитісны. Медічӧт чой коли.

— А воас, навернӧ, и сійӧ кыдзкӧ сэтысь, китритас. Сійӧ миян дорысь сюсьджык.

Ог тӧд, дыр-ӧ олісны, лун-мӧд-коймӧд. И коркӧ медічӧт чойыс бара шуӧ:

— Дядя Миша, талун ӧд ме нин имениница, месянь нин ӧд колӧ талун мам-батьыдлы нуны.

А сійӧ шуас:

— Лӧсьӧдӧй, да нуа.

Сійӧ пуыштіс, пӧжалыштіс, мыйкӧ лӧсьӧдыштіс.

— А ме, гашкӧ, ог ло керкаад да лӧсьӧда джоджӧ ящиктӧ, а тэ метӧг и босьт, эн виччысь менӧ.

— А тэ нӧ кытчӧ мунан?

— А ме сідз, гуляйтны, гашкӧ, петала да, тэ дыр он во.

Ош локтіс, но нывлӧн пуксьытӧм на, и шуӧ:

— Мыйкӧ кымӧра, да оз-ӧ зэр? Мед эськӧ тэ он жӧ кӧтась. Вай петав да пукышт кильчӧ дорад, оз-ӧ зэрмӧдчыны лӧсьӧдчы.

Ош петіс, кильчӧ дорын пукалӧ. Мӧдыд сӧвтіс ставсӧ, ачыс пуксис сэтчӧ и дзоляника восьса кольыштіс ящиксӧ, крепитіс, мед оз воссьы.

Ош нӧрӧвитыштіс, кӧнкӧ ветлӧдлыштӧ, зэрмӧм виччысьӧ. А дзоля нывлӧн вӧлі гыр, рочнас ступа. Нылыд водзджык нин сійӧс ӧтик платтьӧӧн пасьтӧдіс, гырсӧ, еджыд чышъянӧн чышъянӧдіс да крыша вылас и лэптіс.

Ош петкӧдӧ ящик, а нылыд крыша вылын быттьӧ, ачыс горӧдас ящиксянь:

— Эн бара восьт ящиктӧ, зэв тыр пуктӧма быдторсӧ да кисьталан. Локтан да, ме тэнӧ гӧститӧда нимлунъя гӧщенньӧӧн. Эн восьт. Ме ӧд кыла и аддза.

Сэсся сідзи пондіс ош нуны. Зэв сьӧкыд, гашкӧ, нин медыджыд ящикыс коли сылы. Мудзис дай шуӧ:

— Лоӧ пуксьывны да видлывны, кӧть ӧтитор мыйкӧ сёйыштны. Ог терпит, нинӧмӧн на эз гӧститӧдлыны да.

А ныв горӧдас:

— Эн восьт, эн восьт. Эн пукты, эн сёй нинӧм, оз позь. Ме ӧд кыла и аддза.

— Аттӧ, кутшӧм тайӧ! Видзӧд, мый ыллаын, да век на кылӧ дай аддзӧ. Кутшӧм бур сюсь ныв. Лоӧ ӧд быть нуны.

Куимысь ӧддзӧдчывліс пуктыныд. А ящиксьыд век шыасис нывкаыд и эз лысьт пуктыныыд. Сэсся воис. Бара понъясыд уськӧдчисны сы вылӧ. Ош ящиктӧ грым кильчӧ вылӧ шыбитіс.

— Восьтӧй, нывъясныд гӧснеч мӧдӧдісны.

Ачыс бара понъясысь пышйис вӧрӧ, а старик гозъя пыртісны, восьтісны — сэн медічӧт нывныс.

Сэсся кутісны овны зэв бура. Дерт, кӧнкӧ ӧнӧдз нин пуктысисны, колӧкӧ, быдмӧ нин.

Но, ош локтіс вӧрӧ, ас керка дорас. А ныв век сулалӧ крыша вылын. Ош шуӧ:

— Лэччы, лок, кӧсйин ӧд менӧ гӧститӧдны, давай гӧститӧд нимлунъя сёянъяснад.

Сійӧ чӧв олӧ.

— Лӧгасьӧма, унаысь кӧсйи восьтны да, унаысь дугӧдіс да скӧрмис ме вылӧ.

Ёнджыка нин кутіс корны:

— Лэччы, лок!

Мӧд оз шыась. Босьтіс кутшӧмкӧ бедь да сійӧн сэсся тувкис, а сійӧ пӧри да гуль-голь, гуль-голь сарай кузя усис, быгыльтчис, сарай вылысь усис. Ошлы как раз мыш вылас. Дерт, ош доймис ёна.

А нывъяс ӧні олӧны-вылӧны.