ЕМВАЛЬ ЙЫЛЫН


Татшӧм кос арсӧ, кутшӧм вӧлі 1959 воын, пӧрысь йӧз и то омӧля помнитӧны. Гожӧмбыд эз вӧвлы прамӧйджык зэр. Нюръяс, шоръяс — косьмисны унджыкыс.

Сыктывкар бердса да Эжва пӧлӧнса вӧръясысь зэв гежӧдлаысь позис аддзывны пув да тшак. Весиг турипув эз артмы тайӧ арнас, шонділӧн пӧсь югӧръясыс сотісны-косьтісны найӧс.

Ыджыд шор, коді визувтӧ Тур дачасянь некымын километр асыввылӧ, дзикӧдз косьмис. Пӧткаяслы да зверъяслы тайӧ местаяссьыс ковмис гожӧмнас вешйыны гырысьджык юяс дорӧ.

Тайӧ арнас аслам другкӧд меным удайтчис волыны 17-ӧд кварталӧ. Емваль ю йыв, кытчӧдз Слӧбӧда посёлоксянь колӧ восьлавны куим час гӧгӧр, сідз жӧ вӧлі дугдӧма визувтны, сӧмын пызан кузя гӧпъяс кольӧмаӧсь кытӧнсюрӧ.

Ылісянь на кылім каляяслысь гӧлӧсъяс. Найӧ вӧліны унаӧн. Лэбалісны ӧтарӧ-мӧдарӧ джынвыйӧ косьмӧм чукльӧдлысь ю кузя да частӧ уськӧдчывлісны гӧпъяслань.

Во дас нин ме ветлӧдла тайӧ местаясӧдыс, но каляясӧс татысь аддзи первойысь. Мый кыскис найӧс Емваль йылӧ? Ӧд Эжвасянь татчӧдз этша вылӧ дас кык километра, а матігӧгӧрын некутшӧм ю ни ты абу.

Мыйӧн матыстчим ю дорӧ, казялім татшӧмтор: быд посньыдик гӧптысь, кодъясӧс жар шонді абу на удитӧма дзикӧдз косьтыны, вирдыштлісны пань кузя сирпиян да налимъяс. Няйт гуранъясын туплясисны чери лыяс. Каляяс, тыдалӧ, уна лун нин чӧсмасьӧмаӧсь тані чӧскыд яйӧн.

Со вӧлӧм мыйла и воӧмаӧсь сьӧд вӧр шӧрӧ Эжва да Сыктыв юясса гӧсьтъяс. Коли гӧгӧрвотӧм ӧтитор: кыдз каляяс тӧдмалісны ю косьмӧмсӧ, коді юӧртіс налы та йылысь?


Гижӧд
Емваль йылын

lkejrlkelkrgner klrjnelknfrkl ekjnrjkenfrej

1