ДОМНА КАЛИКОВА

Нёль акта, ӧкмыс серпаса драма

 

ВОРСЫСЬЯС:

 

Каликова Домна Фёдоровна — шӧркодь тушаа, гӧгрӧсіник чужӧма, 23 арӧса ныв.

Наталья Ивановна — сылӧн мам, шӧркодь тушаа, ар 45-а.

Маегов Афанасий Андреевич — Ревкомса председатель, гӧрд командир, 26 арӧса.

Сергей — гӧрд партизан-разведчик, 27 арӧса.

Жеребцов Аким Петрович — Усть-Сысольскса купеч, 45 арӧса, неыджыд тошка, кызкодь морт.

Микол — сылӧн приказчик, 22 арӧса.

Ёгор — белогвардейскӧй салдат.

Латкин Степан Осипович — белобандит, вӧвлӧм вологодскӧй губернскӧй гласнӧй, ӧні асьсӧ нимтӧ Вологодскӧй губернияса начальникӧн, неыджыд ёсь тошка. Шӧркодь тушаа, неуна гӧрбылякодь, лысӧй, 32 арӧса.

Прокушев Александр Осипович — Вотчаса купеч пи, штабс-капитан, Латкинлӧн веськыд ки, шӧркодь тушаа, 25 арӧса.

Пыржев — белоофицер.

Белоофицер.

Фролов Вячеслав — белогвардеец, сьӧд морт.

Маруся — Усть-Сысольскса купечлӧн гӧтыр, но радейтӧ Латкинӧс... Кызіник, гӧгрӧс чужӧма, шӧркодь тушаа, зав мича да стройнӧй, 27 арӧса.

Поп.

Лакей — 40 арӧса.

Нывбаба — коммунистлӧн гӧтыр, 35 арӧса.

Коммунист — сылӧн верӧс, 38 арӧса.

Кулак ныв — 20 арӧса.

Арестантъяс, воинъяс, нывбабаяс, народ, ныв-зон.

Стӧрӧж — ар 50-а.

Действиеыс мунӧ 1919 во помын, а медбӧръя серпасыс — 1968 воын.

 

ПЕРВОЙ АКТ

ПЕРВОЙ СЕРПАС

 

Рыт. Авансцена вывті мунӧны Домна да Сергей.

 

ДОМНА.

Сергей, кӧть висьталін тэ меным:

Мый сэтшӧм муслуныс?

 

СЕРГЕЙ.

Пӧсь би.

Кор сійӧ ӧзъяс пытшкад тэнад.

Он здукӧн сійӧс сэтысь ви.

 

ДОМНА.

Кыдз кӧсъя радейтны! Тэ эскы.

Но некыдзи оз тырмы сям —

Пыр мыйкӧ менӧ водзӧ кыскӧ,

И морӧс пытшкысь шог оз ям.

 

СЕРГЕЙ.

Зэв вылі лэбалан.

 

ДОМНА.

Ме? Мый тэ!..

 

СЕРГЕЙ.

Да, Домна. Варыш колӧ тэн,

А сійӧ...

 

ДОМНА.

Сералан жӧ мыйкӧ!

Эн сӧр: оз лӧсяв сійӧ мен.

Мен колӧ лӧнь да прӧстӧй муслун —

Оз гора кыв, оз тыртӧм мич.

И сійӧ нэм чӧж мед эз куслыв,

Кыдз дзоридз гыысь тувсов видз.

 

СЕРГЕЙ.

Быд мортлӧн, Домна, думыс татшӧм,

И менам тэнад кодь жӧ мӧвп.

Но сӧмын... Шудлы юыс ватӧм,

И шудыс дзоридзӧн оз ӧвт.

 

ДОМНА.

Ой, муслун, муслун! Ыджыд муслун,

Кӧн ветлан тэ? Кӧн олан тэ?

Кӧн талялан тэ, кутшӧм ордым,

Кӧн косьтан ассьыд сьӧлӧмтӧ?

 

СЕРГЕЙ.

Оз косьты, — ветлӧ сэн, кӧн ёрӧ,

Дзирд койиг, шонді мортлысь син

И сьылӧ шоныд саридз дорын,

Мед сійӧс ыджыд шог эз ви.

Но воас, пармаысь оз повзьы,

И ваяс шудлысь ыджыд пай.

Сэк тан выль лов шы тэныд ловзяс,

И шондіасяс шонді сай...

 

(Енэж помас тыдовтчӧ ыджыд ломалан би югӧр.)

 

ДОМНА (индӧ биланьыс).

Сергей, тэ видзӧд: кӧнкӧ сотчӧ.

 

СЕРГЕЙ.

А кӧн оз ломав ӧні би?!

Му пасьта кывйыс сылӧн ӧвтчӧ,

Быд вожысь сійӧс аддзам ми.

 

ДОМНА.

И сотчӧ лов, и сотчӧ муыс!

Кор сӧмын шогысь мездмас морт?!

 

СЕРГЕЙ.

А тайӧс... Тайӧс тэ эн юав, —

А шенышт тышӧ варыш борд!

 

(Саялӧны сцена сайӧ.)

 

Занавес.

 

МӦД СЕРПАС.

 

Усть-Сысольсклӧн улича. Пыдіас, гылалӧм коръяса топольяс да кыдзьяс пӧвстын, — вит юра да джуджыд кӧлӧкӧльняа Степановскӧй собор. Веськыдвылын — партия Усть-Сысольскӧй укомлӧн балкона кык судта здание. Сы водзын пызан. Сэні Ревкомса да Укомса членъяс сеталӧны оружие да доброволецъясӧс гижалӧны партизанскӧй отрядӧ.

Ӧтарсянь и мӧдарсянь локтӧны гӧрд флагъясӧн военнӧй да штатскӧй йӧз. Военнӧйяс вооружитчӧмаӧсь, а мукӧдыс вооружайтчӧны. Йӧз пӧвстын кӧйялӧны купеч Жеребцов да сылӧн приказчик Микол. Балкон вылын — котыртчысь партизанскӧй отрядса командир, сійӧ жӧ Ревкомса председатель Афанасий Андреевич Маегов.

 

МАЕГОВ.

Дона чойяс да вокъяс,

Чужан муысь став йӧз.

Вӧрӧг ми вылӧ локтӧ.

Вайӧ ставлы ён грӧз.

Эжва ю бердӧ Латкин,

Кӧин-белобандит

Петіс, оружиеӧн зяткӧ, —

Гӧгӧр киссьӧ пӧсь вир.

 

НАРОД.

Кӧть английскӧй штык

Лэчыд и зэв ёсь,

Сійӧ некор дзик

Мезднымӧс оз босьт.

Тышӧ сувтам ми

Быдӧн: ныв и пи.

Збойлунным оз чот, —

Чегам враглысь борд!

 

МАЕГОВ.

Тышӧ сувт, народ,

Дорйы ассьыд мезд,

Сійӧс мед оз гарт

Озыръяслӧн вез.

Тышын повтӧмлун,

Мездлун вӧсна би.

Чужан му оз вун, —

Тышӧ, бать и пи!

 

ВОИНЪЯС (мужскӧй хор).

Вына миян сой,

Доръям ми выль строй.

Озыръяслӧн вез

Некор оз босьт мезд.

Кӧть и усям ми,

Но Сӧветскӧй власть,

Кыдз маяклӧн би,

Некор оз быр тась.

 

НАРОД.

Тӧдса уна во

Нартитӧм, нужда.

Некор тан оз ло

Латкинлӧн орда!

 

НЫВБАБАЯСЛӦН ХОР (воинъяслы).

Шудлун да бур туй

Ставӧн сиам ми.

Пуля мед оз туйд

Вир-яй тіянлысь.

Бура ветлыны.

Дона воинъяс.

Нырны-вӧтлыны

Врагӧс-кӧинӧс!

Дукыс тані мед

Сылӧн нэм эз кыв.

Вермӧм йылысь век

Сьывны сьыланкыв!

 

(Йӧз пӧвстысь тэрыба — ставнас ӧзйӧма тышӧ — петӧ Домна Каликова да локтӧ пызан дорӧ.)

 

ДОМНА.

Мезд вӧсна кыпӧдчӧ ён тышӧ став народ.

Код вермас лоны бокын сыысь, код?

Предатель, трус, изменник — омӧль гаг.

Ме сэтшӧмӧн эг чужлыв! Алӧй стяг

Ас чужан мулӧн корӧ ставӧс сувтны,

Салдатъяс стройӧ, медым мездлун кутны.

Ас киын кутны! Гижӧй: Каликова Домна.

Ме — вӧвлӧм питерскӧй работница и кора

Оружие, мед нӧйтны гадъяслысь пеж свора.

 

МАЕГОВ (чуймӧмӧн видзӧдӧ Домна вылӧ).

Тэ — коммунистка вернӧй, —

Враг дорӧ лӧгыд гыалӧ ён тӧлӧн.

Тэ аснад лэптан менсьым сьӧлӧм.

Но сетны жӧ оружие... Ог вермӧй.

 

ДОМНА.

Тӧварыш командир!

Кор йӧзлӧн киссьӧ вир,

Ог вермы тышысь сулавны ме бокын.

Ме кӧсъя дорйыны ас мулысь шуд и мезд

И кута тышкасьны ог лёка.

Винтовка колӧ мен.

 

МАЕГОВ.

Ме тэныд висьталі нин ставсӧ, и эн зіль.

Ог вермӧй сетны ми.

 

ДОМНА (народ дінӧ).

Ас чужан муса йӧз,

Удж вылын, тышын калитчӧм бур войтыр!

Кор Эжва пӧлӧн звермӧм вӧрӧг шӧйтӧ

Да гӧгӧр сылӧн грӧз,

Мезд вӧсна тышын колана-ӧ ме?

 

СЕРГЕЙ (йӧз пӧвстысь).

Быд штык сэн лоас коланаӧн век!

 

ДОМНА.

Став сьӧлӧм менам помтӧм биӧн пуӧ,

Мед дорйыны пеж врагысь чужан муӧс,

Сӧветскӧй власть и сылысь алӧй стяг —

Ас шуднымлысь священнӧй ставлы знамя,

Код мичмӧдӧ ас рӧмнас

И степь и яг,

И кора ме винтовка —

Оз сетны сійӧс мен.

 

СЕРГЕЙ (петӧ йӧз чукӧрысь).

Код повтӧм варышлы оружие оз сет?

Со маузер ме ассьым сета тэд,

А босьта ме винтовка.

 

ДОМНА (босьтӧ Сергейлысь мыччӧм маузерсӧ).

Сергей!

Тэн муӧдз копыртчыла ме, Сергей.

Ме копыртчыла тэн и сета кыв —

Пыр тайӧс новлӧдлыны бура.

Клянитча аслам юрӧн!

(Копыртчывлӧ Сергейлы, а сэсся став народ водзын сетӧ клятва).

Ме враглы паныд тышӧ пета

И сэні повтӧм лоа пыр:

Враг водзын мужество оз быр, —

Народлы таын клятва сета.

Но друг кӧ менам чужас полӧм,

Ог ло кӧ вӧляӧн ме ён,

Мед революциялӧн стрӧг закон

Сэк босьтас менсьым олӧм.

 

ХОР (повторяйтӧ бӧръя нёль строкасӧ).

 

ДОМНА.

Кызь куим арӧдз олі ме,

И корысь лямка кыски век,

Кор дас кык арсянь ветлі йӧзын.

Архангельскын ме лун и вой

Удж вылын песі ассьым сой, —

Купеч-кӧзяин розга вӧзйис.

Эз вичмы Питерын мен шуд,

Эз тырлыв Вяткаын нянь куд,

Пон пыдди Ярославльын олі.

Кӧть кытчӧ, кодарӧ эг мун,

Орёл кык юра личкис лун,

И менам сьӧлӧм гырдӧн лоліс.

Орёллӧн усис кыкнан юр,

Вын найӧс лэптыны оз сюр, —

Став выныс ӧні миян ордын.

Ми тышӧ петам ныв и зон,

И ставлӧн вӧля миян ён —

Оз чег — победнӧй лоас ордым!

 

МАЕГОВ.

Винтовка сэсся абу. Кодлы колӧ,

То верманныд ті босьтны

Пистонкаяс.

Та сьӧкыд кадӧ

Враг кузя лыйӧ любӧй кӧрт.

 

СЕРГЕЙ.

Кор пуӧ сьӧлӧмын ён тышӧ ыджыд би,

И черӧн венам врагӧс ми.

 

НАРОД.

Слава!

Збой партизанлы слава!

 

НЫВБАБАЯСЛӦН ХОР.

Тэн, повтӧм партизанлы слава!

Народлӧн воинъяслы слава!

 

НАРОД.

Слава! Слава! Слава!

 

МАЕГОВ (лэччӧ балкон вылысь да локтӧ Домна да Сергей дорӧ).

Мый колис тані шуны меным?

Отрядын, Домна, лоны тэныд.

Ревкомӧ пыр и босьт шынель,

И норасьӧм эз кыв мед пель.

(Домналы вывті нимкодь, — пырӧ Ревкомӧ.)

А тэн, Сергей,

Ме сета ассьым револьвер. (Мыччӧ.)

Тэ тайӧс новлӧдлы и видз,

Мед шоглун тэ дорӧ эз сидз.

 

СЕРГЕЙ (босьтӧ).

Ме тайӧс босьта, шуа: враг

Оз прӧйдит миян дінӧ шаг.

А друг кӧ мыччас ассьыс юр,

Сэн пузяс вирыс, кыдзи сур. (Сьылігтыр мунӧ.)

Мортлы овны сэки долыд,

Кодыр полӧмӧн оз вись.

Кыпыда сэк ветлӧ лолыс,

Тышын вермӧмыс век кись.

(Народ разӧдчӧ.)

А код полӧ, — лёка олӧ:

Луннас кувлӧ куим пӧв.

Кувны кӧ нин, ӧтчыд колӧ.

Сӧмын сідз, мед шызьӧ тӧв! (Саялӧ.)

 

МАЕГОВ (йӧз разӧдчӧм бӧрын ӧтнас).

Тэ, менам чужан му, отчизна,

Лӧз юяс, шувгысь джуджыд вӧр!

Тэ, югыд кыа — коммунизлӧн,

Народ тэ менам — сьӧлӧмшӧр!

Код шуас: мездыс татысь бырӧ,

Оз ло сӧветскӧйӧн ас му!

Код шуас: шудным миян кырӧ

Да коляс сӧмын пемыд ру!

Оз вермы некод тайӧс шуны, —

Законсӧ ывлаыс аз сет.

Пеж враглы вермӧмъяс не нуны, —

Тась ловъя юрӧн бӧр оз пет.

Тэ видзӧд, кутшӧм миян войтыр,

Мый мында наын збойлун би!

Юр миян некодлӧн оз ойбырт, —

Враг вылын вермӧм босьтам ми!

 

(Веськӧдчӧ пырны Ревкомӧ. Петкӧдчӧны Жеребцов да Микол. Жеребцов кыскылӧ пистолет да кӧсйылӧ Маеговӧс лыйны, но оз везъяв: Маегов саялӧ Ревком ӧдзӧс сайӧ.)

 

ЖЕРЕБЦОВ.

Тьфу!

Кор оз везит, то оз везит:

Эг вевъяв педздӧдны курок.

Сэк эськӧ водіс паразит,

Лёк пон моз вывлань лэптіс кок.

 

МИКОЛ.

Аким Петрович!..

 

ЖЕРЕБЦОВ.

Чӧв сэн ов!

Мый ыдждӧдлан сэн, кор оз ков?

Ме абу тэ кодь байбак Микол,

А нима купеч Жеребцов

И тӧда, кодыр мый мен вӧчны,

И корджык кодлысь босьтны лов.

 

МИКОЛ.

Эн шогсьы: коркӧ тэнад лыйтӧг

Кок лэптас сійӧ, кыдзи пон.

Ӧд Латкинлӧн сэн йӧзыс мыйта!..

Тэ ассьыд юртӧ видз тан, зон.

 

ЖЕРЕБЦОВ (гӧгӧр видзӧдіг, думайтчыштӧм бӧрын).

Тэ сюся видзӧдін?

 

МИКОЛ.

Эг узь жӧ!

 

ЖЕРЕБЦОВ.

Вӧв вылӧ пуксьы дзик жӧ пыр

Да тӧвзьы Емдінӧ. Мед сэні

Тэ вӧлін аски асывводз.

Кор воан, Латкинлы сэн висьтав,

Мый гӧрдъяс тані — ӧти содз,

И унджыкыслӧн — кыйсян пищаль.

 

МИКОЛ.

Мен колӧ вӧв.

 

ЖЕРЕБЦОВ.

Босьт миян Зотьлысь.

Том чань на сылӧн и зэв збой.

А юртӧ гӧрдъяс мед эз босьтны,

Туй вылад пурйысь ва эн кой.

 

МИКОЛ.

Эн шогсьы — ставыс лоас лючки:

Мен тӧдса тась быд нюр и яг.

Ми гӧрдъяс кузя сідзи кучкам,

Мый найӧ резсясны, кыдз чаг.

 

(Мунӧны. Регыд мысти тыдовтчӧ Домналӧн мамыс — Наталья Ивановна. Сійӧ бӧрдӧ, кияснас шлопкӧдӧ бокъясас.)

 

НАТАЛЬЯ ИВАНОВНА.

Аттӧ дивӧ.

Дивӧ жӧ нин тайӧ

Артмӧ менам нывкӧд!

Шу, кӧть эн тэ,

Тӧлк вылӧ оз вайӧд:

Аслас визьӧд кывтӧ.

Пырӧма йӧй юрас

Кутшӧмкӧ война да

Инасьны оз вермы:

Сідзикӧн и дурӧ, —

Краснӧйӧ пӧ пыра,

Таысь пӧ эн дӧзмы?

Кыдзи жӧ он дӧзмы?

Абу ӧмӧй мам ме?

Эг мӧй сійӧс быдты?

Ӧд война оз жалит, —

Код вылӧ надея

Ассьым мӧда кутны?

А вот сійӧ

Та йылысь оз думайт:

Сутки нин эз волы.

Краснӧйӧ, дерт, сійӧ

Сираліс нин юрсӧ,

Ветлӧ кӧнкӧ — долыд.

Сералӧ да ваксьӧ

Кӧнкӧ ӧні сійӧ,

А ме бӧрда.

Сьӧлӧм менам кылӧ,

Вошас менам нылӧй.

Та ен эрдӧ.

(Ревкомысь петӧ Маегов. Наталья Ивановна шыасьӧ сы дорӧ.)

Муса ёртӧй,

Гашкӧ, тані

Партизанас гижалӧны!

Вошті нылӧс.

Гашкӧ, тані

Руд шынельсӧ сеталӧны!

 

МАЕГОВ.

Тан, бур аньӧ, тан.

А мый нӧ?

 

НАТАЛЬЯ ИВАНОВНА.

Вошті нылӧс.

Лунтыр нин ме корся —

Кӧтӧді став бан,

А некыдзи оз сюр век.

Эн аддзыв сійӧс тэ?

Тэ, гашкӧ, тӧдан —

Каликова Домна?

 

МАЕГОВ.

Тэ сылӧн мам? Эн бӧрд —

Дзик ставыс лючки.

Бур ныв тэ быдтӧмыд —

Зэв повтӧм, кыдзи варыш.

 

НАТАЛЬЯ ИВАНОВНА.

Ті сійӧс тӧданныд, тӧварыш?

 

МАЕГОВ.

Ми сыкӧд тӧдмасимӧй тан,

И ӧні сійӧ «Ванька»-партизан.

 

НАТАЛЬЯ ИВАНОВНА.

Ме сідзикӧн и чайті!..

Быд лун ӧд вӧлі кайтӧ...

Мый вӧчис!..

Ойя жӧ да ойя!

Рӧзӧренньӧ:

Ӧд воштас ассьыс юр!

А гортын — нянь ни нур.

Кыдз кута овны ме?!

Ой, рӧзӧренньӧ,

Сё рӧзӧренньӧ! (Бӧрдӧ.)

 

МАЕГОВ.

Враг локтӧ миян вылӧ

И, ог кӧ вӧтлӧй, выныс сылӧн

Бӧр босьтас му и видз

И асьтӧ сідз оз видз, —

Тэн юрад сюяс сийӧс

И кыскав сійӧс.

А кодлы тайӧ муса?

И вот.

Ён тышӧ сувтӧ став народ.

 

НАТАЛЬЯ ИВАНОВНА.

А ме нӧ кыдзи, муса мортӧй?..

Ӧд сёйныд быд лун колӧ,

А гортын...

 

МАЕГОВ.

Эн шогсьы весьшӧрӧ, бур ань...

 

НАТАЛЬЯ ИВАНОВНА.

А гортын... Чӧв нин, шань!

Сэн весиг сов ни нянь —

Пыр лоас косӧн видзны пань.

 

МАЕГОВ.

Ми тэныд сетам сов и нянь. (Зепсьыс кыскӧ талонъяс.)

Та бумагаӧн мун продкомӧ

Да сэтысь норма босьт.

Продкомыс со нӧ, сійӧ домын.

Эн бӧрд. Мун, син доръястӧ косьт.

 

НАТАЛЬЯ ИВАНОВНА.

«Эн бӧрд. Мун, син доръястӧ косьт»,

Кор мунӧ эстшӧм кось!

А нылӧй?..

 

МАЕГОВ.

Босьт норматӧ и виччысь гортад.

 

НАТАЛЬЯ ИВАНОВНА.

Ой, сьӧлӧм менам кылӧ,

Вошас менам нылӧй!

 

МАЕГОВ.

Оз вош. Мун, виччысь гортад.

Аддзысьлытӧдз! (Мунӧ.)

 

НАТАЛЬЯ ИВАНОВНА (ӧтнас).

Нянь норма вылӧ вузалі ме нылӧс!

Да мый нӧ тайӧ? Ассьым нылӧс?!

Да эм-ӧ кӧнкӧ ен!

Ад гуын места оз ло мен!

 

(Кияснас бокъясас шлопкӧдіг да бӧрдіг, мунӧ. Регыд мысти Ревком сайысь тыдовтчӧ Сергей.)

 

СЕРГЕЙ.

Ме тайӧ уличасӧ нэм чӧжӧй ог вунӧд:

Тан менам чужис медводдза любовь.

Ас пармасянь Карпатӧдз ставсӧ муні.

Но некӧн тадз эз ӧзйыв менам лов.

Эз ӧзйыв ныв дінӧ, код эськӧ менсьым сьӧлӧм

Ас киас босьтіс пыр кежлӧ, кыдз тан.

О Домна, менам муслун, менам олӧм,

Тэ вӧсна сылӧ краснӧй партизан.

 

(Ревкомысь петӧ Домна — руд шынеля, пеля шапкаа, маузера, аддзӧ Сергейӧс да вӧчӧ сувтов. Сергей сійӧс оз аддзы: видзӧдӧ мӧдарӧ.)

 

ДОМНА.

Ме тайӧ уличасӧ нэм чӧжӧй ог вунӧд:

Тан чужис менам медводдза любовь.

Ас дженьыд нэмӧ кымын туй ме муні,

Но некӧн тадз эз ӧзйыв менам лов.

Эз ӧзйыв зон дінӧ, кор эськӧ менсьым сьӧлӧм

Ас киас босьтіс пыр кежлӧ, кыдз тан.

Сергей, тэ менам муслун, менам олӧм,

Тэ вӧсна сылӧ «Ванька»-партизан.

 

ӦТТШӦТШ (Сергей оз на аддзы Домнаӧс).

Ме тэнӧ радейта, кыдз шондіа лӧз енэж,

Кыдз ассьым шуд, кыдз ассьым чужан му.

Тэ нэмыд кежлӧ босьтін сывъяд менӧ

И морӧс пытшкӧ вайин мича шуд!

 

ДОМНА (чукӧстӧ Сергейӧс).

Сергей!

 

СЕРГЕЙ (бергӧдчӧ да котӧрӧн локтӧ Домна дорӧ).

Ой, Домна! (Окалӧ да кутлӧ.)

Тэ сетін сьӧлӧмӧйлы борд.

 

ДОМНА.

А тэ? Тэ сэтшӧм лӧсьыд морт!..

 

СЕРГЕЙ.

Эн ошкы жебыниксӧ, Домна.

 

ДОМНА.

Ме тэнсьыд бурлунтӧ дзик некодыр ог вунӧд, —

Ӧд фронт вылӧ ме муна...

Ми врагӧс венам! (Надзӧн чукӧртчӧ народ.)

 

СЕРГЕЙ.

Кыв шутӧг венам ми.

Шуд миянлысь оз мырддьы сылӧн ки.

 

ДОМНА.

А ӧні... Друг вот куті повны...

Сідз окота мен гортын овны!..

 

СЕРГЕЙ.

Тэ, Домна, мый?..

 

ДОМНА.

Мен лоис шог,

И сьӧлӧм тані гудрасьӧ быд ног.

 

СЕРГЕЙ.

Эк, нывка!.. Ме чайтлі, збыльысь повтӧм,

А кильчӧ помад воштӧмыд нин ловтӧ.

Ляб мортлы тышын вӧчны нинӧм, —

Мун гортад: гашкӧ сэні блинӧн

Бур мамыд чӧсмӧдлас, а ме...

Прӧщай! Ог эшты, — муна ме.

(Мунӧ сьылан горлань.)

 

НАРОД (сцена сайын).

Тэ кывзы, рабочӧй,

Тыш лыбис народнӧй.

Вай эновт тэ уджтӧ

Тыш нуӧдны мудзтӧг.

 

ДОМНА (ӧтнас).

Мезд вӧсна тышӧ сувтӧ став народ,

И стройыс ён — оз некор сійӧ пот.

Оз пот! (Вӧчӧ жестъяс, тӧд вылас усьӧ Сергей, бергӧдчӧ сылань.)

Сергей, эн вӧч тэ морӧс пытшкӧ дой, —

И менӧ виччысьӧ салдатскӧй строй.

Оз шенышт белӧй банда ассьыс борд, —

Ми дорам сылы нэмыс кежлӧ горт!

(Вӧтӧдӧ Сергейӧс, коді эз на вевъяв саявны. Сергей сувтӧдӧ да кутлӧ Домнаӧс.)

Ставкӧд ӧттшӧтш.

Повтӧг ми мунам.

Доръям Сӧветъяс

И ӧти моз кулам

Тышын на вӧсна!

 

(Домна да Сергей кӧсйӧны сувтны тышӧ мунысьяс стройӧ, но оз вевъявны — петкӧдчӧ Наталья Ивановна. Сійӧ аддзӧ Домнаӧс да уськӧдчӧ сы дінӧ. Киас — пызь тыра неыджыд мешӧк.)

 

НАТАЛЬЯ ИВАНОВНА (синваӧн бӧрдіг).

Тэ кӧсйин, Домна? Мый нӧ, мый нӧ!

Мун, мун. Тэ тышӧ мун.

Со сетісны мен, сетісны мен

Нянь — кӧкъямыс пунт.

Ме тэнӧ вузалі... Ой, Домна,

Ме ӧні сэтшӧм рад!?

Нянь вылӧ вежи тэнӧ, Домна,

Мед ставнас шызис ад.

Оз, сійӧ ӧні оз нин менӧ,

Оз примит, — некор оз:

Нянь вылӧ вузалі ме тэнӧ

Дзик кычи пиӧс моз.

Тэ кӧсйин, Домна? Мый нӧ, мый нӧ!

Мун, мун. Тэ тышӧ мун.

Со сетісны мен, сетісны мен

Нянь — кӧкъямыс пунт.

 

ДОМНА (уськӧдчӧ да кутлӧ мамсӧ).

Прӧстит тэ менӧ, муса мамӧй,

Прӧстит, прӧстит, прӧстит.

Эг вермы овны тан мӧд сямӧн, —

Мезд корӧ кар и сикт.

 

НАТАЛЬЯ ИВАНОВНА.

Дерт, найӧ пыксьӧны тэ вылӧ, —

Оз овны тэнадтӧг!

Эг кывлыв тышъяс вылысь нылӧс, —

Тыш мунліс нывъястӧг.

 

ДОМНА.

Сэк, мамӧй, кадыс вӧлі ӧти,

А ӧні сійӧ мӧд.

Тэ эскы, мамӧй, меным эскы

И менсьым сьӧлӧм тӧд.

Ог вермы сулавны ме бокын,

Кор мунӧ эстшӧм кось.

Ме тӧда, тэ он кӧсйы лёкӧс,

Но тыштӧг мезд он босьт.

 

НАТАЛЬЯ ИВАНОВНА.

Кристос мед тэкӧд! Ветлы, ветлы,

Ме сэсся кыв ог шу.

Ог куж сӧвет ме тэныд сетны, —

Мун. Вермӧм да бур шуд!

 

ДОМНА (кутлӧ да окалӧ мамсӧ).

Зэв ыджыд аттьӧ тэныд, мамӧй,

Зэв ыджыд аттьӧ тэн!

Нэм чӧжыд вӧлін менам прамӧй

И ӧні сэтшӧм тэ.

Ме тӧда, тышын абу кокни, —

Сэн шойччӧмыд оз сюр.

Но ассьым честьӧс ме ог уськӧд,

Ог янӧд ассьым юр.

 

СЕРГЕЙ.

Зэв ыджыд аттьӧ тэныд, мамӧй,

Зэв ыджыд аттьӧ тэн.

 

ДОМНА.

Нэм чӧжыд вӧлін менам прамӧй

 

ДОМНА И СЕРГЕЙ (ӧттшӧтш).

И ӧні сэтшӧм тэ.

(Наталья Ивановнаӧс кутлӧны, окалӧны и, кияснаныс ӧвтчиг, мунӧны, вӧтӧдӧны строй.)

Повтӧг ми мунам.

Доръям Сӧветъяс.

И ӧти моз кулам

Тышын на вӧсна!

 

НАТАЛЬЯ ИВАНОВНА (ӧтнас).

Ме тэнӧ вузалі, ой, Домна,

Ме ӧні сэтшӧм рад!..

Нянь вылӧ вежи тэнӧ, Домна,

Мед ставнас шызис ад.

Оз, сійӧ ӧні оз нин менӧ,

Оз примит — некор оз:

Нянь вылӧ вузалі ме тэнӧ

Дзик кычи пиӧс моз!

Тэ кӧсйин, Домна? Мый нӧ, мый нӧ!

Туй сеті — ветлы мун.

Со сетісны мен, сетісны мен

Нянь — кӧкъямыс пунт. (Усьӧ, а сэсся бӧрдӧ.)

 

Занавес.

 

МӦД АКТ

КОЙМӦД СЕРПАС

 

Враг тылын сиктса улича. Рыт. Шуйгавылын кильчӧ, веськыдвылын — белогвардейскӧй штаб. Сылӧн кильчӧыс петӧ сцена вылӧ жӧ, а кильчӧ таланяс — карта ӧдзӧс. Ывлаын бушков. Сы пыр тыдалӧны сцена сайысь потшӧс, льӧм пу, а водзысь — бара жӧ керкаяс.

Шуйгаладор керка сайысь, кывзысиг, петӧны Домна да Сергей. Найӧ сувтовкерӧны, гӧгӧр видзӧдӧны. Сцена сайын — нывбабаяслӧн бӧрдӧм да Прокушевлӧн гӧлӧс.

 

НЫВБАБАЛӦН ГӦЛӦС.

Ой, лэдзӧй, капитан. Ой, лэдзӧй:

Ӧд ньӧти абу мыжа.

Мӧд нывбабалӧн гӧлӧс.

Лэдзӧй, —

Дзик ставыс мыжтӧм йӧз.

 

ПРОКУШЕВЛӦН ГӦЛӦС.

Л-ланьтӧй! — шуӧма. Ті кылад?

А тэн мый колӧ? Н-на! (Кылӧ нагайкаӧн швучӧбтӧм.)

Став коммунистлы смерть!

 

ДОМНА.

Предатель Прокушевлӧн гӧлӧс.

 

СЕРГЕЙ.

Со талань локтӧны.

 

ДОМНА.

Тась колӧ дзебсьыны.

 

СЕРГЕЙ.

Со кильчӧ улас ӧдзӧс.

(Тэрыба пырӧны штаблы воча кильчӧ улӧ, а сэтысянь — посводз улас да ывлаас видзӧдӧны калькнитыштӧм ӧдзӧс пырыс. Сцена сайысь матысмӧ да гораммӧ арестуйтӧм коммунистъяслӧн сьылӧм, нывбабаяслӧн ойзӧм. Ворсӧ сьӧлӧм кырлӧдлана музыка. Сэсся арестуйтӧм коммунистъяс петӧны сцена вылӧ. Найӧс колльӧдӧны белогвардеецъяс. Коммунистъяс (сьылӧны спокойнӧя, мужественнӧя.)

Югыд Эжва дор,

Джуджыд нӧрыс йыв,

Пожӧм яг и пипу рас!

Кытчӧ сійӧ кадыс колис,

Шуд йылысь кор пӧтка долис

Мича гӧлӧснас!

Кытчӧ, кытчӧ кадыс колис,

Шуд йылысь кор пӧтка долис

Тайӧ му вылас!

Югыд Эжва дор,

Джуджыд нӧрыс йыв,

Пожӧм яг и пипу рас!

Колис сійӧ кадыс ылӧ,

Но ми юръяс лэптам вылӧ, —

Мӧд мед шогалас.

Кулам ми, но сьӧлӧм сьылӧ,

Сылӧн шыыс лэбӧ ылӧ

Ас бур вынйӧрнас!

 

ПРОКУШЕВ (вӧтӧдӧ сьылысь коммунистъясӧс).

Молчать! Кыланныд!

Молчать!

(Коммунистъяс мунӧны, сьылӧны водзӧ, сэсся саялӧны. Сцена сайын кылӧ нагайкалӧн швучьялӧм. Конвоиръяс пӧвстысь ӧти белогвардеец косӧ да шыбитӧ винтовкасӧ.)

 

БЕЛОГВАРДЕЕЦ.

Сьыланкывйыс сьӧлӧм шӧрӧдз

Сатшис, кыдзи пурт.

Ог, ог вермы! Пышъя вӧрӧ.

Лоа йӧзлы друг. (Чужйӧ винтовкасӧ бокӧ да пышйӧ керка сайӧ.)

 

(Домна да Сергей кӧсйылӧны кильчӧ увсьыс петны, но ӧти керкаысь кык белогвардеец кыскӧны ещӧ ӧти ӧтпӧлӧс дӧрӧма коммунистӧс. Бӧрвывтіыс, ойзіг, вӧтчӧ сылӧн гӧтырыс.)

 

БЕЛОГВАРДЕЕЦ (коммунистлы кучкӧ прикладнас сьылі тшуптас).

Вай восьлав, тэрмась!..

 

НЫВБАБА.

Аддзӧ енмыс,

Дзик сійӧ миян абу мыжа.

Ті лэдзӧй: шуд ме кевма нэмӧс.

Ті лэдзӧй — абу сійӧ мыжа.

 

БЕЛОГВАРДЕЕЦ (коммунист гӧтырлы).

Эн гартчы кок улын! Аль лудӧ

Пон яйыд тэнад! Сідзкӧ на! (Кучкӧ прикладнас, нывбаба усьӧ.)

Эн шызьӧд пель, кыдз киссьӧм гудӧк,

А то лыя, сӧтана! (Чужйӧ.)

 

КОММУНИСТ.

Ті талун лэбаланныд вылі,

Но воас кад — и чеганныд ті сьылі!

 

2-ӧд БЕЛОГВАРДЕЕЦ.

Тэ нӧшта грӧзитчан сэн, гад?!

Тӧд, кыдзи уджалӧ приклад!

 

(Кучкӧ. Коммунист сунтшиксьӧ сцена сайӧ. Сэтчӧ жӧ саялӧны белогвардеецъяс. Коммунистлӧн гӧтырыс чеччӧ бӧр да котӧртӧ верӧсыс бӧрся, ойзӧ.)

 

НЫВБАБА.

Нэмӧс кевма, ой, эн виӧй:

Сизим челядь батьтӧмсяс.

Сизим челядь.... Мыжтӧм сійӧ,

Эскӧй ті, бур салдатъяс!

(Саялӧ сцена сайӧ. Сценаыс недыр тыртӧм. Саяс, кыдз йӧлӧга, сьылӧ хор.)

 

ХОР.

Бӧрд тэ, Коми му,

Водзӧс сетны сувт!

Сувт тэ, Коми му,

Мездтӧ киад кут!

 

(Нывбаба, шӧйӧвошӧма, сцена сайысь локтӧ бӧр да горзӧ ӧшиньясӧ.)

 

НЫВБАБА.

Ой, бур войтыр! Кодкӧ кӧнкӧ

Эм кӧ ловъя, спаситӧй!

Верӧсӧс ӧд лэччӧдісны

Эжва йирӧ. Спаситӧй!

(Пырӧ Микол — выль белогвардейскӧй шынеля, папахаа. Сійӧ гажа. Нывбаба шыасьӧ сы дорӧ.)

Ой, бур мортӧй, эм кӧ перна,

Спасит менсьым верӧсӧс.

Сизим челядь... Эм кӧ перна,

Спасит. Кора. Сета мӧс.

 

МИКОЛ (вак-вакӧн сералӧ, а сэсся винтовкасӧ босьтӧ перевес вылӧ).

Ми сёйлім еджыд сьӧла яй,

Ми сёйлім дозмӧр, тар.

И мӧс яйӧ ог сьӧлалӧй, —

Ӧд пуны биыс жар.

(Шковӧбтӧ-лыйӧ. Нывбаба усьӧ да паськӧдӧ сывъяссӧ.)

Ха, ха, ха, ха, ха! (Локтӧ шой дорас.)

Тэ кевмин: «Спасит верӧсӧс»,

А коді сетас мӧс!

Ха, ха, ха, ха, ха!

 

(Нывбабалысь шойсӧ кыскӧ бокӧ да шатлаліг мунӧ. Калькнитӧм ӧдзӧс пырыс Домна мыччылӧ револьвер да кӧсйылӧ нин Миколлы педзгӧдны, но киӧдыс кутӧ Сергей.)

 

СЕРГЕЙ.

Эн лысьт! Тэ кытчӧ? Абу гортад.

Тадз кыкнаннымлӧн вошас юр. (Индӧ чуньнас.)

Тэ аддзан!

 

ДОМНА.

Аддза. Но ӧд мортыс...

 

СЕРГЕЙ.

Эз ло! Но тані тэ эн дур,

А видзӧд, кывзы, гарт ас пеляд,

Мый кылан. Мӧд ног шуд оз пет.

 

ДОМНА.

Сідз пуӧ сьӧлӧм! Сизим челядь!..

 

СЕРГЕЙ.

Но килы вӧля тэ эн сет.

 

(Сцена вывті штаблань мунӧны низь ку пася Латкин да штабс-капитан Прокушев.)

 

ЛАТКИН.

Штабс-капитан,

Ми пыр на пессям тані,

Лёк тайӧ йӧзыскӧд,

И кутам пессьыны ми дыр-ӧ?

Орлов нин босьтіс Яренск.

Да, Яренск.

И воӧ Ленаӧ. А ми?

Кор Усть-Сысольсклань вӧрзям ми

Да сэтчӧ пырам?

 

ПРОКУШЕВ.

Дзик ставыслы эм аслас кад.

Ті асьныд тӧданныд:

Мед водзӧ панны туй,

То первой колӧ сійӧс весавны,

А мӧд ног он ло рад.

 

ЛАТКИН.

Ме нем ог тӧд. И тӧдны мен оз ков:

Ме — Латкин.

Ме требуйта — не тані видзны жуй,

А водзӧ панны туй.

 

ПРОКУШЕВ.

И панам.

Код шуӧ, мый ог панӧй?

Но тан жӧ — большевизмлӧн поз.

Ог бырӧдӧй кӧ сійӧс,

Юр сюям сэк ми биӧ.

Лун-мӧд тась мунны оз позь. (Пырӧны штабӧ.)

 

ДОМНА.

Пеж Прокушев мый шуӧ?

 

СЕРГЕЙ.

Кор юыштан, сэк кывйыд тэрыб,

Но сылы колӧ на и борд.

Карпатъяс дорын шуліс ӧти ёрт,

Мый овлӧма пӧ Архимед

Да восьтӧма закон:

Му шарсӧ бергӧдны пӧ мед,

То мыджӧд колӧ ён.

 

ДОМНА (индӧ локтысьяс вылӧ).

Сергей!

 

СЕРГЕЙ.

Ме аддза, аддза.

Приказчик Жеребцовлӧн. Рыжӧй Микол.

Вот пежыд — сывъялӧма нылӧс! (Петкӧдчӧны Микол да ныв.)

 

МИКОЛ.

Улича кузя мунӧ ныв.

Аддзӧ кӧлӧб, восьтӧ сыв:

«Ой, тэ, кӧлӧб, кӧлӧбок.

Тэнӧ сёйны абу лёк:

Колӧ меным ёнмыны, —

Радейта ме зонманӧс».

А тэ менӧ радейтан-ӧ, он?..

Вай ме тэнӧ окышта.

 

НЫВ.

Чӧв! Улича шӧрас!

Мун, эн дур!

Друг кодкӧ аддзас —

Усяс юр. (Ныв оз сетчы, а Микол окалӧ мырдӧн.)

 

МИКОЛ.

Нывкӧд некор ме ог дур. —

Уджалӧ на менам юр.

Гӧтрася ме тэ вылӧ,

Лоан писар гӧтырӧн. (Чуткӧ бокас.)

 

НЫВ.

Ой!.. Тэ мӧй писарь?

 

МИКОЛ.

Дерт жӧ, абу пӧлӧс Кесар!

Помалі ме куим класс.

Рас.

Карын вузавлі ме квас,

Два-с.

А квасыд сійӧ сэтшӧмтор

Пыр зильгӧ зептад зарни гор.

 

НЫВ.

Оз ыргӧн?

Тэ лӧсьыда жӧ бырган!

Ха, ха, ха!

 

МИКОЛ.

Тэ он кӧ эскы, ме ог кор:

Аким Петрович Жеребцов

Тэн карын висьталас, мый збыль.

Тэ менӧ радейтан-ӧ, он?

 

НЫВ.

Гӧг вуж тан менам орас!

Вай эн нин сӧр, — ме кора.

Кӧть муртса жалит менӧ, зон.

 

МИКОЛ.

Ог вермы некыдз: сьӧлӧм пуӧ...

Дзик збыльысь ӧд ме шуа:

Тэ косьтан менсьым сьӧлӧмӧс.

Кӧть видлы татысь дӧрӧмӧс.

Ой, сідз тэ сэтчӧ сӧтыштін!..

Вай нӧшта ӧтчыд окышта.

 

(Микол кӧсйӧ окавны, но нылыс пышйӧ: Микол вӧтчӧ сы бӧрся. Посводз улысь петӧны Домна да Сергей.)

 

ДОМНА.

Быд йӧйлы колӧ муслун!

Кӧть эськӧ нывсьыс яндіс мед.

 

СЕРГЕЙ.

Дум вылас йӧйлы татшӧм мӧвп оз усьлыв,

Ӧд сійӧ яндзимсӧ оз тӧд.

 

(Белогвардейскӧй штабысь петӧ ӧти офицер, сувтӧ кильчӧ вылас да, куритчиг, пальӧдчӧ сэні, нимкодясьӧ ывланас. Штаблы воча кильчӧ улысь сійӧ аддзӧ Домнаӧс да Сергейӧс. Найӧ кутласьӧны да окасьӧны, вӧчӧны вид, мый быттьӧ сэні радейтчысь ныла-зонма. Офицер локтӧ на дінӧ.)

 

ОФИЦЕР.

Тан мыйся пара? Кильчӧ улын?!

Аль ті эн лыддьывлӧй приказ?

Аль колӧ кӧдзыд гидӧ нуны.

Мед пиньыд сэні вӧчис ляз?..

 

ДОМНА.

Не ӧні кӧ, кор радейтчыны?

Ӧд властьыс асланым — бӧр важ.

 

СЕРГЕЙ.

Не ӧні кӧ, кор радуйтчыны?

Кор сетны сьӧлӧмъяслы гаж?

 

ДОМНА.

Ми сідз нин тіралім, кор тані

Сӧветъяс вӧлісны.

 

СЕРГЕЙ.

Сэк пыр

Быд воськолын ми полім тані.

 

ДОМНА.

Дзик ад кодь вӧліс оландыр!

 

ОФИЦЕР.

Ті кодъяс лоанныд?

 

СЕРГЕЙ (мыччӧ бумага).

Со гижӧд.

Сэн висьталӧма, кодьяс ми.

 

(Офицер босьтӧ бумагасӧ да карманнӧй фонарик улын лыддьӧ. Сэк сылы Домна бытшкӧ балябӧжас, а Сергей отсалӧ помавнысӧ. Офицерлысь босьтӧны планшетсӧ, документъяссӧ, оружиесӧ, а шойсӧ кыскӧны посводз улӧ да петӧны кильчӧ улысь.)

 

ДОМНА (нерӧ офицерӧс).

«Ті кодъяс лоанныд?!»

 

СЕРГЕЙ (индӧ офицерлӧн шой вылӧ).

Со гижӧд.

И ставлы яснӧ, кодъяс ми. (Штаблань.)

И тіянкӧд тадз лоас ставкӧд.

 

ДОМНАКӦД ӦТТӦТШ.

Бӧр ассьыныд он нуӧй юр.

Важ стройлы сетӧма отставка,

Бӧр сувтны подулыс оз сюр!

 

(Сергей котӧрӧн мунӧ белогвардейскӧй штаб дорӧ да кывзысьӧ восьса форточка пырыс. Сэтчӧ жӧ локтӧ Домна.)

 

СЕРГЕЙ.

Тэ кылан, Домна?

 

ДОМНА.

Ставныс кодӧсь

И зульӧны сэн, быттьӧ сход.

 

СЕРГЕЙ.

Час!.. Латкин Прокушевӧс видӧ,

Тась мыйла пӧ эн лыйлы сброд?!

Став арестантыс, сідзкӧ, ловъя

И складын виччысьӧны мезд.

 

ДОМНА.

Мед сэні томаныс эз бовъяв,

Дзик пыр жӧ колӧ босьтны грезд.

 

СЕРГЕЙ (первой индӧ шуйгавыв, а сэсся веськыдвыв).

Отрядным пырас складъяс дорсянь,

А сетам сэтысянь сигнал.

Сэк Латкин арталӧмнас сорсяс

И сӧпнас сьӧмдас, кыдз шакал.

 

ДОМНА.

Тэ мунан кодарас?

 

СЕРГЕЙ (индӧ веськыдвыв).

Ме татчӧ.

Мед врагӧс ылӧдны. Ме сэн

Вӧр бердас эсчӧ гусьӧн лэчча

И кута резны, — морт оз вен.

 

ДОМНА.

Сергей!..

 

СЕРГЕЙ.

Эн пов: мен тайӧ тӧдса,

Ог вошты некор ассьым лов.

Ме дінӧ туйыс смертьлӧн пӧдса, —

Фронт вылын сёйи кызь пуд сов.

 

ДОМНА.

Сергей, тэ меным кутшӧм муса!

Тэ гӧгӧрвоны верман он?

Дась лэбны тэ дінӧ ме юсьӧн, —

Сергей, тэ тӧд: тэн абу дон!

 

СЕРГЕЙ.

Мый сыысь мен? Ме абу вуза, —

Сідз сета сьӧлӧм тэн и лов.

Ме тэнӧ нинӧмӧн ог удзӧд, —

Ме тэкӧд нинӧмысь ог пов.

 

ДОМНА.

Ме дась жӧ мунны, кӧть мед кытчӧ,

Кӧть сэтчӧ, ломалӧ кӧн ад.

 

СЕРГЕЙ.

Кор радейтан, сэк ставыс сетчӧ,

И овны му вылас зэв рад.

 

ДОМНА.

О радейтчӧм, тэ кутшӧм мича!

 

ӦТТШӦТШ.

Тэ сывдан лым и кӧдзыд йи.

Тэ сывъяд шонді югӧр видзан,

И сылысь резан югыд сі.

Но миян муслун чужис сэки,

Кор гӧгӧр бушков — сэн и тан,

И оз тыдав югыд светыс, —

Му резсьӧ вылӧ, кыдз фонтан.

Мед резсьӧ сійӧ, — миян муслун

Оз пемдыв некор, — ӧзъяс пыр.

Тыш биын чужӧмлы не кусны,

А гажӧдны век оландыр!

 

СЕРГЕЙ (кутлӧ да окалӧ Домнаӧс, а сэсся ӧвтӧ кинас).

Тэн шуд ме сиа!

 

ДОМНА.

Аслыд тожӧ!

Ло осторожнӧй, асьтӧ видз.

 

СЕРГЕЙ.

Эн пов: ог кеж ме шог туй вожӧ,

А кежа кӧ, ог прӧста сідз.

Но, аддзысьлытӧдз!

 

ДОМНА.

Аддзысьлытӧдз!

Удача сиа тэныд ме!

 

СЕРГЕЙ.

И сиа сійӧс аслыд сідз жӧ, —

Удача медым лоас век!

 

(Ӧта-мӧдныслы ӧвтыштӧны киясӧн и мунӧны. Домна — шуйгавыв, а Сергей — веськыдвыв. Пессьӧ лёк тӧв да гартӧ лымсӧ. Орлассьӧм кымӧръяс костӧд тыдовтчылӧны пӧртмасьысь кодзувъяс да югыд тӧлысь. Сценаыс недыр тыртӧм, а сэсся штаб кильчӧ вылӧ пальӧдчыны петӧ неуна гажмӧм Прокушев).

 

ПРОКУШЕВ (нимкодясиг ывланас).

Пурга, пурга!

Став олӧмыс — пурга.

И сэні венӧ сэтшӧм тӧвныр,

Код мунӧ, кыдзи ыджыд ураган,

И ва вылын он лысьты пыжӧ сӧвны.

И миян ураганлӧн выныс ён, —

Ӧд ми дор сулалӧ став Рытыв.

Оз кутчысь миян водзын ниптӧм пон, —

Сӧветъясӧс ми босьтімӧй

Кӧрт клещи кытшӧ.

Ми босьтім найӧс, пузувтам, и юр

Оз лэптыны нин некор, — морт оз ловзьӧд.

Сэк вӧлись миян олӧм лоас бур,

И керка пытшкӧ пырны шуд оз ловзьы.

(Веськыдвылын югнитӧ Сергейлӧн сигнальнӧй ракета. Прокушев паськӧдӧ синъяссӧ, чуймӧ.)

Мый лоӧ тайӧ?

Кыдз гӧгӧрвоны мен?

(Котӧртӧ улича шӧрӧ. Ракета кайӧ мӧдысь, коймӧдысь.)

Ракета?! Боевӧй сигнал?!

(Кыскӧ пистолетсӧ да куимысь лыйӧ вылӧ.)

Тревога!

(Штабысь котӧрӧн петалӧны белогвардеецъяс. Петӧ и Латкин.)

Ружье!

 

(Офицеръяс котӧртӧны асланыс салдатъяс дорӧ.)

 

ЛАТКИН.

Мый лоис друг?

 

ПРОКУШЕВ.

Дзуг делӧ, дзуг:

Сэн гӧрдъяс локтӧны, —

Ракета качӧ вылӧ.

 

ЛАТКИН.

Дзик пыр жӧ

Жар биӧн пӧдтыны!

 

(Чукӧртчӧны салдатъяс, офицеръяс.)

 

ПРОКУШЕВ (офицеръяслы).

Враг локтӧ тасянь. Колӧ пыр жӧ

Сикт помӧ мунны, зырны сэсь.

А тэныд жӧ, поручик Пыржев,

Мед кадтӧ коллявны не весь,

Салдатъяс босьтны — куим мортӧс,

Пыр мунны склад дорӧ да сэн

Рӧщӧт став коммунистлы сетны,

А бӧрас доложитны мен.

 

(Прокушевлы ставныс кӧзырнитӧны да мунӧны индӧм направлениеӧ. Прокушев тэрыба пыралӧ штабӧ. Пельпомъяс вылас чӧвтӧ шынель да револьверсӧ кыпӧдӧмӧн котӧртӧ веськыдвыв, наступайтанінлань, Латкин сулалӧ туй шӧрын — оз тӧд, мый вӧчны. Сэсся пыралӧ штабӧ, пасьталӧ низь ку пасьсӧ да петӧ бӧр. Сійӧ кӧсйылӧ мунны коммунистъясӧс лыйланінӧ, но казялӧ, мый куим салдат да офицер Пыржев котӧрӧн бӧрыньтчӧны, а на бӧрся вӧтчӧны гӧрдъяс да лыйлӧны, кыскӧ кобурасьыс пистолет да кӧин моз дзебсьӧ штаб картаӧ. Сцена вылын тыдовтчӧны куим белогвардеец, накӧд офицер Пыржев, а сэсся гӧрд командир Маегов, Домна, гӧрд салдатъяс, мездӧм коммунистъяс.)

 

МАЕГОВ (еджыдъясӧс вӧтӧдігӧн).

Он пышйы ылӧ! (Маузерысь лэдзӧ очередь. Куим белогвардеец усьӧны.)

 

ДОМНА.

Стерво чукӧр! (Тожӧ лэдзӧ очередь. Белоофицер Пыржев усьӧ.)

А-а, воис пом? И мӧдысь тӧд!..

Со налӧн штабыс. Самӧкурӧн

Сідз ӧвтӧ — дуксьыс тшук он пӧд.

 

(Кылӧ пулемётлӧн таргӧм шы.)

 

МАЕГОВ (зырӧдӧ штабӧ, а сэсся штаб кильчӧ вывсяньыс).

Ті, ёртъяс, мунӧй, мунӧй водзӧ.

Мед кырымысь оз пышйы зверь.

Победа абу на, эн коддзӧй, —

Мед тышын сьӧлӧм эз вӧв нэр!

 

(Ставӧн зырӧдӧны водзӧ, а Маегов, Домна да некымын гӧрд салдат пырӧны белогвардейскӧй штабӧ. Здук мысти найӧ петӧны бӧр. Кылӧ пулемётъяслӧн таргӧм, винтовкаясысь лыйсьӧм.)

 

ДОМНА.

Пон чукӧр! Пышйӧмны...

 

МАЕГОВ.

Но татысь

Оз мунны ылӧ. Некор оз!

Ог ворсӧй накӧд тані мачысь, —

Кор мунӧ тыш, то порок — кос.

 

ДОМНА (котӧртӧ улича шӧрӧ да видзӧдӧ бой мунанінлань).

Ёрт командир! Отрядным косӧ:

Враг личкӧ сэн...

 

МАЕГОВ (тожӧ котӧртӧ улича шӧрӧ).

Эн полӧй ті!..

 

(Белогвардейскӧй штабысь коммунист, кодлысь гӧтырсӧ лыйис Микол, петкӧдӧ станкӧвӧй пулемёт.)

 

КОММУНИСТ.

Мед кырныш чукӧр вирӧн восӧ,

Ми пулемётысь восьтам би!

 

МАЕГОВ.

Вот молодец! Пыр колӧ тадзи.

Мый аслад абу, враглысь босьт.

(Индӧ штаблы воча кильчӧ вылӧ.)

Со эстчӧ кайӧй. Бура раддзӧй, —

Мед кось кӧ вӧлі, прамӧй кось.

 

(Домна да коммунист кайӧны штаблы воча кильчӧ вылӧ да восьтӧны белогвардеецъяс кузя пулемётнӧй би.)

 

ДОМНА.

Кӧть вынным этшаджык, но венам, —

Зэв бура сёрнитӧ «Максим».

Коммунист (личкӧ гашетка вылӧ).

Лӧг лэдзны воис кад и меным, —

«Максим», быд пежлысь чышкы ним!

Пӧщада кӧинъяслы абу,

И сійӧ некодыр оз ло.

Мед миян шондіасяс кобув,

Мед татчӧ сэсся смерть оз во!

 

Занавес.

 

КОЙМӦД АКТ

НЕЛЬӦД СЕРПАС

 

Усть-Сысольск. Декорацияыс сэтшӧм жӧ, кутшӧм сійӧ вӧліс первой актса мӧд серпасын. Быд соборын, кылӧ, бовгӧны кӧлӧкӧлъяс. Улича вылӧ петӧмаӧсь зіб йыв спасъясӧн купечьяс да мещана. Найӧ встречайтӧны «губернятӧм губернатор» Степан Латкинӧс. Медся водзын купеч Жеребцов да поп. Попыс кутӧ аслас киын зарни крест. Орччӧн новлӧдлӧны сылы вежа ва тыра доз. Жеребцов вайӧ зарни поднос вылын символическӧй нянь-сов. Нянь кӧрыш вылас — Роч мулӧн царь кадся ичӧтик государственнӧй флаг.

 

ПОП.

Яко, сказал бог; «Будь день» — и стал день;

Сияйтӧ шонді честному люду, —

Очищен наш стольный Усть-Сысольск от дьявола —

Вступает освободитель.

Посланник бога и всея Руси,

Губернатор Вологодской губернии

Степан Иосифович Латкин.

(Петкӧдчӧны низь ку пася Латкин, Прокушев, налӧн свита, белогвардейскӧй салдатъяс, Микол киын знамя.)

Многая лета, многая лета

Степан Иосифович Латкинлы!

 

ХОР.

Многая лета, многая лета

Губернатор Степан Осипович Латкинлы!

 

ЛАТКИН.

Госпожаяс! Господа!

Ен тшӧктӧм серти бӧр ми воим

Рӧднӧй ас карӧ, Усть-Сысольскӧ.

Ен отсӧгӧн ми врагӧс лойим,

Эг вӧчӧй сӧмын нёльскӧб.

И миян доблестнӧй войска не сӧмын тані —

Сибирын, лунвылын и рытыввылын —

Дзик быдлаын победнӧй воськовъясӧн мунӧ.

 

ЧУКӦРТЧӦМЪЯС (кодсюрӧ чӧвтӧ пернапас).

Мед сетас ен,

Мед сетас ен!

 

ЛАТКИН.

Победа найӧ шедӧдасны. Да, кыв шутӧг.

Сӧветъясӧс ми путкыльтам. Сэк Русь

Бӧр лэптас вылӧ ассьыс куим рӧма знамя,

И сэсся сійӧ некор нин оз усь.

Ми абу ӧтнаным — Европа ставнас микӧд.

Цивилизация! Аль сійӧ абу вын?!

Америкаын Вильсон мыччӧ кисӧ, —

Сӧветъясысь ми колям сӧмын тшын.

Ас чужан муса войтыр, чойяс, вокъяс,

Пӧсь чолӧм тіянлы да овны ыджыд шуд!

Ас карӧ бӧр ми сьӧкыд туйӧн локтім,

Но сэсся енэжным оз пемдыв, оз ло руд!

 

(Гора аплодисментъяс. Йӧз чукӧрын ӧткымынъяс горзӧны: «Виват! Виват!». Латкинлысь топӧдлӧны кисӧ, кутлӧны да окалӧны асьсӧ, а сэсся качайтӧны: «Ура! Ура!». Качайтӧм бӧрын Жеребцов сылы сетӧ символическӧй нянь-сов.)

 

ЖЕРЕБЦОВ.

Зэв ыджыд аттьӧ тэн и муӧдз копыр,

Мый ассьыд вокъястӧ эн вунӧд, вайин мезд!

Кузь нэм тэн сиам ми! Мед тэнад котыр

Успехӧн водзӧ мездӧ сикт и грезд!

 

ХОР.

Кузь нэм тэд сиам ми! Мед тэнад котыр

Успехӧн водзӧ мездӧ сикт и грезд!

 

ЖЕРЕБЦОВ.

Тэн шуд и слава, вермӧм сиам ми!

Примит пӧдарок скромнӧйӧс тэ мисянь,

Мед лоас олӧм няньӧн-солӧн тыр,

Мед сӧвмӧ-ёнмӧ обновлённӧй Русь,

Мед бырӧ татысь большевизмӧн висьӧм!

 

ЛАТКИН (босьтӧ нянь-совсӧ).

Зэв ыджыд аттьӧ тіянлы, зэв ыджыд аттьӧ,

Мый донъяланныд менсьым скромнӧй удж.

Служита чужан мулы, кыдзи кужа,

И кута служитны да нуӧдны ён тыш,

Мед большевизмлысь бырӧдны тась вужъяс.

 

ХОР.

Слава! Степан Осипович Латкинлы слава!

Кузь нэм, бур шуд да слава!

(Латкин да сылӧн свитаыс, купечество да именитӧй йӧз пырӧны вӧвлӧм Ревкомӧ. А улича вылын пыр на горзӧны: Виват! Виват! Кузь нэм, бур шуд да слава! Степан Осипович Латкинлы слава!)

 

ВИТӦД СЕРПАС

 

Ыджыд зал. Пыдіас, стеклӧалӧм вежӧс сайын, озыра вевттьӧм пызанъяс. Латкин, сылӧн свитаыс, купечество, духовенство да именитӧй йӧз пируйтӧны.

Кыпыда ворсӧ музыка. Залын дамаяс, платье бӧжныс ӧвтыштчӧма йиртӧдзыс, вальсируйтӧны белогвардейскӧй кавалеръяскӧд. Медся долыда вальсируйтӧ Маруся.

 

МАРУСЯ (вальс шыяс улӧ).

Лӧнь Сыктыв дорын,

 

ОФИЦЕР.

Кӧн веж бадьяс.

Ӧттшӧтш.

Быд тулыс лэдзӧны веж кор,

 

МАРУСЯ.

Кӧн шӧпкӧдчӧны кыддза садъяс,

Ӧттшӧтш.

Выль олӧм ньӧти абу нор.

 

МАРУСЯ.

Ой, тэ, менам сьӧлӧмшӧрӧй,

Окышт менӧ, — корӧ лов.

 

ӦТТШӦТШ.

Сӧмын ӧні сьӧлӧм кылӧ,

Мый эм му вылын любовь!

 

МАРУСЯ.

Ми тэкӧд быдмим.

 

ОФИЦЕР.

Сыктыв дорын,

Зэв лӧсьыд кывтіс оландыр.

 

(Сайса вежӧсысь локтӧ Латкин, пуксьӧ водзвыв лӧсьӧдӧм креслӧӧ, сцена шуйгаладорӧ. Маруся вунӧдӧ офицерсӧ да дзирнясьӧ Латкин водзын.)

 

МАРУСЯ.

Кӧть шудным дзугсьыліс, тшук орліс.

 

ЛАТКИН.

Но ӧні сійӧ тась оз быр.

 

МАРУСЯ (Латкинлы).

Ой, тэ, менам сьӧлӧмшӧрӧй,

Окышт менӧ, — корӧ лов.

 

ЛАТКИН (сувтӧ да Марусякӧд ӧттшӧтш).

Сӧмын ӧні сьӧлӧм кылӧ.

Мый эм му вылын любовь!

 

(Поднос вылын вайӧны Латкинлы вина тыра бокалъяс. Латкин ӧтиӧс босьтӧ аслыс, а мӧдсӧ мыччӧ Марусялы.)

 

ЛАТКИН.

Маруся, юышт кыпыд васӧ, —

Тэ вӧсна сьӧлӧм шогсис дыр.

 

МАРУСЯ.

Зэв ыджыд аттьӧ, губернатор!

Ме тэнӧ виччыси жӧ пыр.

 

ЛАТКИН.

Ме вои бӧр и тась ог мун нин, —

Ӧд меным муса чужан му.

Оз пемдыв сэсся миян лунным,

Яр шондісӧ оз вевттьыв ру.

 

МАРУСЯ.

Ме вывті рад, збыль тадз кӧ лоӧ, —

Ӧд лоліс сьӧлӧмным — кыдз из.

 

ЛАТКИН.

Мужик мый властяс гӧгӧрвоӧ?!

 

МАРУСЯ.

Куш сӧмын лӧвтӧ: «Коммунизм»!

 

ЛАТКИН.

А олӧмыс жӧ — киссьӧм кӧті,

И пызан вылас — нянь ни сов.

 

МАРУСЯ.

А ми жӧ еджыд нянь век кӧтам,

Кӧть найӧ перйисны тан лов.

 

ЛАТКИН.

Маруся, менам югыд кодзув,

Тэ пыр на важ кодьыд. Вай ю.

 

МАРУСЯ (босьтӧ бокалсӧ да лэптӧ вылӧ).

Кор ставыс бур, вина оз коддзӧд.

Мед вӧльнӧй лоас Коми му! (Юӧ.)

 

ЛАТКИН.

Мен муса нывбаба, кор сійӧ

И ыджыд бушколын оз вош,

А садьсӧ кутӧ крепыд киын

И кужӧ веськӧдыштны горш.

Код тайӧ му вылын эз юлыв,

Аль коркӧ пӧстуйтлінныд ті?

Оз вермы некод тайӧс шуны,

Честь вӧчам Бахуслы и ми. (Бокалсӧ лэптӧ вылӧ.)

Сідз вӧчӧма нин ачыс енмыс:

Кӧн Бахус, сэні шуд и гаж;

И дорвыв сэки сьывсьӧ тэныд, —

Пыр югыд сэки енэжтас. (Юӧ.)

 

МАРУСЯ.

Кӧн Бахус, сэні югыд тулыс,

Сэні йӧзлӧн радлун и любовь.

И гысӧ нуӧ ытсьӧм юлысь

Став йӧзлӧн кыптӧм, бордъя лов.

 

ЛАТКИН (вылӧ кыпӧдӧ тыртӧм бокалсӧ).

Мед олас Бахус, коді йӧзлысь

Быд висьӧм бурдӧдӧ и шог,

И вештӧ юр весьтысь ён грӧзлун,

И олӧм гажӧдӧ быд ног!

 

МАРУСЯ.

Мед олас миян ыджыд муслун,

Пӧсь чувствояслӧн ытсьӧм ю!

 

ЛАТКИН.

Мед олас нывбабалӧн пӧсьлун,

Мед некор пӧрысьлун оз су!

 

(Пырӧ мужскӧй паськӧмӧ вӧччӧм да неыджыд уска Домна.)

 

ДОМНА (Латкинлы).

Лэдз, господин начальник,

Мен висьтавны.

 

ЛАТКИН.

Да, да.

 

ДОМНА.

Ме ӧні ывла вылысь дзик,

И карын пыр на беспорядок:

Общественнӧй кооперативысь

Кӧть новлӧмны нин пӧшти ставсӧ,

Нёль ӧшинь жуглалӧмны бара

Да нуӧмны тӧвар зэв уна.

Ме аддзылі ас синмӧн ачым.

 

ЛАТКИН.

Тӧвар? Общественнӧй кооперативысь?

 

ДОМНА.

Да, да.

Ме аддзылі ас синмӧн ачым.

 

ЛАТКИН.

А коді тэ?

 

ДОМНА.

Иван Титов —

Тшук сійӧ, пароходад тэныд код,

Архангельскад кор мунін,

Кыз чемодантӧ пыртіс.

 

ЛАТКИН (видзӧдӧ Домна вылӧ, зільӧ уськӧдны тӧд вылас).

Ах, да. Тэн аттьӧ! Меным сэк

Тэ бурӧс вӧчин. Ыджыд аттьӧ! (Прокушевлы.)

Штабс-капитан! (Локтӧ Прокушев.)

Тэ кывлін?

 

ПРОКУШЕВ.

Мый?

 

ЛАТКИН.

Босьт карандаш да гиж.

 

(Лакей вайӧ ичӧтик гӧгрӧс пызан да улӧс. Прокушев пуксьӧ Латкинлы воча да гижӧ, а Латкин диктуйтӧ.)

«Всякое хищение имущества — частного, общественного и казённого (бывшего советского) будет рассматриваться кек воровство и грабёж. Посему виновные будут рассматриваться со всею строгостью законного русского государства».

Гижин эн?

 

ПРОКУШЕВ.

Гижи. Да.

 

ЛАТКИН.

Гиж водзӧ:

«Незаконно взятое в последние дни имущество: продукты, масло, чай, сахар и прочее и товары — кожа, мануфактура и другие предметы первой необходимости из складов бывших советских учреждений и организаций немедленно должно быть возвращено по принадлежности».

Гижин эн?

 

ПРОКУШЕВ.

Гижи. Да.

 

ЛАТКИН.

Гиж водзӧ:

«Мною предприняты меры к восстановлению всех правителаственных и общественных учреждений в городе, работавших до советского владычества».

И гиж ещӧ:

«Все бывшие ответственные работники советских учреждений, находящиеся в городе, должны немедленно явиться ко мне».

Гижин эн?

 

ПРОКУШЕВ.

Гижи. Да.

 

ЛАТКИН.

Подпись — «Начальник Вологодской губернии С. Латкин» *.

* Кавычкаясӧ босьтӧма Латкинлысь подлиннӧй приказ (Ф. Щ.).

Гижсис эз?

 

ПРОКУШЕВ.

Да, Эм. Гӧтов.

Со кырымалӧй.

 

ЛАТКИН (босьтӧ да кырымалӧ).

Сет шарикограф вылӧ, мед сэні

Дзик пыр жӧ лэдзасны лист сё.

А сэсся ӧшӧдлӧй быд стенӧ,

Мед бӧрас норасьӧм эз ло. (Прокушев сетӧ приказсӧ печатайтны.)

Код гусясьӧ, ог награждайтӧй,

А веськалас кӧ — рельӧ! (Кост.)

Да, кыдз водзӧ мунӧ наступайтӧм!

 

ПРОКУШЕВ.

Тась, матысь, весалім быд пельӧс

И босьтім Лӧзым. Мунам вадзӧ.

Отряд оз сувт.

 

ЛАТКИН.

Зэв бур! Вай тэрмась, кыдзи позьӧ,

А то капут.

Мог — аски Визингаӧ воны.

 

ПРОКУШЕВ.

Ми зілям, пуктам вын.

 

ЛАТКИН (зепсьыс кыскӧ да Прокушевлы сетӧ бумага).

Со донесенье. Лыддьы сійӧс

И сэсся бура тӧд,

Мый Маегов сэн тэныд сиӧ, —

Том нывка тані гӧрд.

Тэ кылан? Каликова Домна —

Разведчица зэв сюсь.

 

ПРОКУШЕВ.

Оз зільны медым сэні ёна, —

Ме тӧда Домнасӧ, ог узь.

Ми сійӧс кутам, — сета индӧд, —

И лоас сылы пом.

Ми гӧрдъяс вынйӧрысь ог виньдӧй, —

Оз личав миян фронт.

Ме сэтчӧ ачым муна пыр жӧ...

 

ЛАТКИН.

Зэв лӧсьыд. Вывті бур!

Ми тэнӧ та вӧсна ог мыждӧй...

 

ПРОКУШЕВ.

Дыр Маегов оз дур!

Ми аски кучкам, босьтам Паджга,

А сэсся сэні Ыб.

И водзӧ — Визингаӧ чажгам...

 

ЛАТКИН.

Зэв бур! Эн колляв рыт.

 

ПРОКУШЕВ (щолкнитӧ каблукъяснас).

Эм сӧвны вӧв вылӧ. Ме сиа

Тэн вермӧм тан и шуд! (Мунӧ.)

 

ЛАТКИН (кольӧмъяслы).

Ті кывлінныд, кыдз миян

Удж мунӧ! Морт оз кут!..

 

ЖЕРЕБЦОВ ДА МУКӦД.

Мед сетас ен,

Мед сетас ен!

 

МАРУСЯ (петӧ йӧктыны).

Усть-Сысольскӧй улича, улича.

Доли-шели, доли-шели.

По-городски улича.

 

СТАВӦН.

Сэтчӧ мича ныв волӧ, ныв волӧ.

(Домна локтӧ Маруся дорӧ, босьтӧ киӧдыс да йӧктӧ тшӧтш.)

Доли-шели, доли-шели.

Ныв дорас и зон волӧ.

 

МАРУСЯ.

Волас, синнас гӧрыштас, гӧрыштас.

Доли шели, доли-шели.

 

ДОМНА.

Чорыда и гӧрыштас.

 

СТАВӦН.

Нылыс шуӧ зонмыслы:

 

МАРУСЯ.

Сьӧлӧмшӧр, —

 

СТАВӦН.

Доли-шели, доли-шели, —

 

МАРУСЯ (Латкинлы).

Мелі синъяснад он гӧр.

 

СТАВӦН.

Тэнӧ сідз нин радейтӧ, радейтӧ.

Доли-шели, доли-шели.

Тэнӧ сідз нин радейтӧ.

 

МАРУСЯ (Латкинлы).

Тэнӧ сідз нин радейта, радейта.

Доли-шели, доли-шели,

Сідз нин пӧся радейта.

 

(Домна петӧ озыра вевттьӧм пызанъяса вежӧссӧ мыйкӧ сэтысь босьтӧ да сёйӧ, а сэсся шкафысь кватитӧ кутшӧмкӧ бумагаяс да утёвтӧ-мунӧ.)

 

ЖЕРЕБЦОВ.

Мария Петровна, зэв лӧсьыд!

Тэ сьылан, кыдзи соловей.

Сідз быд движенье кужан вӧчны,

Мый орӧ видзӧдіг син вей.

 

ЛАТКИН.

Тэ, Маруся, кыдз Геката,

Код аснас койӧ тӧлысь мич,

Кор сэні карнанӧн ва катӧ

Да сэтысь талялӧ веж видз.

Геката, Геката, Геката,

Восьт меным ассьыд шоныд сыв!

Зэв визув ва вывті ме ката,

И тэнад сывйын мудз ог кыв.

Геката, Геката, Геката,

Эн кӧдзӧд мен тэ шоныд сыв!

 

МАРУСЯ (кутыштлӧ Латкинӧс, окыштӧ да бара петӧ йӧктыны).

Зон-зон, мича нывъяс,

Зон-зон, муса нывъяс

Купайтчисны.

Сэн вӧлі тшӧтш накӧд

Зэв лӧсьыд Геката, —

Прӧзевайтісны.

Сӧдз ваас тюль-пырас,

А купайтчӧм бӧрас

Прӧстудитчӧма.

Тюль-тюль ваас пырас,

А купайтчӧм бӧрас

Прӧстудитчӧма.

 

(Сывъяссӧ паськӧдӧ да нӧшта на збойджыка петӧ йӧктыны. Пансьӧ ыджыд хореографическӧй дивертисмент. Йӧктігчӧжыс лакей ваялӧ Латкинлы вина. Юӧ сійӧс Латкин, глӧтайтӧ и Маруся, коді ассьыс став мичлунсӧ Латкинлы и петкӧдлӧ. Помас ворсӧны вальс.)

 

МАРУСЯ.

Зэв ыджыд страстьӧн морӧс пуӧ,

И шонді рӧмӧн ворсӧ вир.

Оз, тайӧ гажсӧ морт оз гуав, —

И морт оз пемдӧд лунлысь дзирд.

Ой, тэ, менам сьӧлӧмшӧрӧй,

Окышт менӧ, — корӧ лов.

Сӧмын ӧні сьӧлӧм кылӧ,

Мый эм му вылын любов!

 

СТАВӦН.

Сӧмын ӧні сьӧлӧм кылӧ,

Мый эм му вылын любов!

 

(Сцена сайын, Латкинлӧн кабинетын, кылӧ взрыв. Маруся повзьӧ да усьӧ, а Латкин сулалӧ шӧйӧвошӧмӧн — оз тӧд, мый вӧчны. Сэсся веськӧдчӧ сэтчӧ, кӧн вӧліс взрывыс, но ӧдзӧс дорын паныдасьӧ лакей.)

 

ЛАКЕЙ.

Ме муртса ловъя. Сідзи сетіс!..

Но век жӧ кулӧмысь эг пов:

Ме сійӧ комнатаӧ петі,

Кӧні тіян спальняныд, и со

Бумага лэбзьӧма — мен сюрис.

Сэн гижсьӧ: «Латкин, тэ эн пов:

Зэв бура лэбзяс тэнад юрыд.

Пӧсь чолӧм тэн!

Иван Титов».

 

ЛАТКИН.

Ме эски, кодыр донесенье

Мен вайисны, мый збыльысь ныв

Тан кӧнкӧ шӧйтӧ, корсьӧ менӧ,

А со код дасьтылӧма взрыв!

Титовӧс корсьны, кутны сійӧс.

И татчӧ вайӧдны дзик пыр.

Ме сійӧс виа аслам киӧн,

Мед менам сьӧлӧм лоас тыр!

 

Занавес.

 

КВАЙТӦД СЕРПАС.

 

Декорация пӧшти сэтшӧм жӧ, кутшӧм вӧлі водзвывса серпасын. Ыджыд зал, сэні сулалӧ кузь пызан да письменнӧй стол, кодӧс пуктӧма «Т» сямаӧн.

Кабинетын Латкин ӧтнас. Сійӧ низь ку пася, шапкатӧм, лукйысьӧ пызан йӧрас да видзӧдӧ ӧшиньясӧ — думайтӧ, колис-ӧ кад пышйыны.

 

ЛАТКИН.

Орловӧс вийӧма. Став коляс сылӧн,

Кыдз кӧзяинтӧм овмӧсын ыж стад,

Бӧр пышйӧ Эжва бокысь Мезень вылӧ,

И Прокушевлӧн бӧрыньтчӧ отряд.

О тэ, фортуна! Кыдзи ворсны верман

Йӧз олӧм вылын! Ме — паяц.

Ме — шут, и йӧзлы гылыд серам, —

Дзик векняммис военнӧй менам плац. (Кост.)

Эз, эз! Тась Кельтма пыр ме Пермӧ муна,

Сибирӧ, кӧні адмирал Колчак.

Код шуас, мый сэн эрдыс абу уна?

Код шуас, мый оз бӧрыньтчы сэн враг?

Ми сійӧс нырыштам, бӧр воам татчӧ

Да выльысь лэптам куим рӧма флаг,

И сэсся сійӧ нэмсӧ тані ӧвтчас

И нэмсӧ гажӧдас веж сывъя коми яг.

 

(Пырӧ Микол, а сы бӧрся — шогӧ вӧйӧм, нор чужӧма Маруся. Маруся сувтӧ ӧдзӧс дорас, копыртӧ юрсӧ, — полӧ воськовтны водзӧ.)

 

МИКОЛ.

Вашбродь!

Штабс-капитан мен тшӧктіс висьтавны,

Мый карӧс сійӧ колис.

 

ЛАТКИН (паськӧдӧ синъяссӧ).

Кыдз колис?

 

МИКОЛ.

Пышйис тась и колис.

 

ЛАТКИН.

А имущество?

 

МИКОЛ.

Ог тӧд. Вай тэрмась. (Котӧрӧн петӧ.)

 

ЛАТКИН.

Вот рӧк!

И лолыштнытӧ кадсӧ тэн оз сет.

(Видзӧдӧ ӧшинь пыр.)

Быд уличӧд отряд галопӧн мунӧ.

 

МАРУСЯ.

А мен мый вӧчны тан? Ой, дзикӧдз воши!

 

ЛАТКИН (казялӧ Марусяӧс).

Ах, тэ?.. Ах, тэн!

(Аддзӧ лакейлысь фуфайкасӧ да нетшыштӧ тувйысь.)

На, пасьтав: тӧвзям Усть-Куломӧ.

(Маруся тэрыба пасьталӧ. Латкин кватитӧ сійӧс ки пӧлӧдыс да пышйӧны.)

Ми татчӧ воам ещӧ бӧр!

 

(Сценаыс недыр тыртӧм, а сэсся корӧсьӧн пырӧ лакей.)

 

ЛАКЕЙ.

Но, слава богу: весасис тась барин.

Кад воис сылысь... Кок туй мед эз вӧв! (Чышкалӧ)

Дзонь кык вежалун оліс Сыктывкарын,

Но век жӧ еджыд вӧв вылӧ эз сӧв.

И туйыс сылӧн оттӧммас на водзӧ:

Народыс сувтӧ паныд, кыдз стена.

А сійӧ — багатыр, код личкыштас кимӧддзӧн —

И Латкин ратьысь кольӧ... Дубыд ва.

 

(Чышкалӧмсӧ помалӧ да кӧсйӧ петны, но пырӧны Домна да Сергей.)

 

ДОМНА.

Кӧн Латкин-барин? Пышйис кытчӧ?

 

ЛАКЕЙ.

Эн юась весьшӧрӧ — оз сюр:

Дзонь куим вӧла доддьӧ сӧвтчис

Да Эжва катыд нуис юр.

И кок туйсӧ тась чышкалі нин ме,

Эз тӧдчы некор мед...

Зэв лӧсьыд дзодзӧг вӧлӧм, бур,

Мед усяс сылӧн юр!

Тан оліс, гажӧдчис, пыр юис...

 

СЕРГЕЙ.

И?...

 

ЛАКЕЙ.

Фуфайкаӧс тшӧтш нуис.

И пет кӧть ӧні ывлаад тэ мыйӧн.

Мед морыс сійӧс лыйӧ!

 

(Домна да Сергей сералӧны нюклясьӧмӧн.)

 

ДОМНА.

Ха, ха!.. Ой, кула. Дзикӧдз кула ме.

Но, кыдз нӧ татӧні он серав?

Лакейлысь барин нуӧ кышан,

Фуфайкашой — сё ротӧн дасысь кышӧм!

 

ЛАКЕЙ.

Кӧть керенка мед шыбитіс, но эз,

А додь тыр кыскис сьӧрсьыс.

И мед. Оз ёнмы сылӧн орӧм вез, —

Не петны сылы некор Эжва йывсьыс!

 

СЕРГЕЙ.

Тэ прав. Оз пышйы миян киысь,

Кӧть зільӧ ёна.

 

ДОМНА.

Миян лӧг

Бок сылысь шонтӧ жарджыка на биысь, —

Ми лэдзам сылысь гос и тшӧг!

 

СЕРГЕЙ.

И миян Коми му свободнӧй лоӧ.

 

ДОМНА.

Сэк ӧзъяс шудлӧн шонді

Дзик быдлаын. И сійӧ часыс воӧ.

Вын миян — морт оз конды!

 

(Чукӧртчӧны йӧз.)

 

ЙӦЗ.

Талун долыдпырысь сьывсьӧ,

Быттьӧ бордъя миян лов.

Мездлун воис Сыктыв йывсянь, —

Сӧмын радлы, сӧмын ов.

Слава тіянлы, бур пиян, —

Мездінныд ті чужан кар.

Тіянлы ми кузь нэм сиам.

Тыртны сиам ми сё ар!

 

(Пырӧ Маегов.)

 

МАЕГОВ.

Водз радлыны, бур ёртъяс, —

Эз помась на ён тыш.

Кӧть Сыктывдінӧс босьтім,

Но враглӧн ёсь на гыж.

Враг Эжва катыд тӧвзис, —

Сэн еджыдъяслӧн поз.

Мед налӧн вын эз ловзьы,

То колӧ бушков моз

Пыр мунны водзӧ, нӧйтны,

Не сетны шойччан здук.

Сэк вӧлись дугдас шӧйтны

Пеж кӧинъяслӧн дук.

Бур ёртъяс, водзӧ, бойӧ,

Мед ӧзйӧ сылӧн би

Да мича югӧр койӧ, —

Тыш нуны чужим ми!

 

СТАВӦН (лэптӧны оружиеяс).

Бур ёртъяс, водзӧ, бойӧ, —

Тыш нуны чужим ми!

 

Занавес.

 

НЁЛЬӦД АКТ

СИЗИМӦД СЕРПАС

 

Войся вӧр. Паськыд чиръясӧн усьӧ лым. Сцена шӧрын мыльк. Сайтіыс сійӧс кытшалӧ сцена вылӧ петысь туй. Мыльк йылын, паськыд лапъяса коз улын, засадаын пукалӧны Микол да мӧд белогвардеец Ёгор. Бӧръяыс юыштӧма ёнджыка, пуктӧма винтовкасӧ пидзӧс вылас да вугралӧ, а Микол, неуна довъяліг, ветлӧдлӧ ӧтарӧ-мӧдарӧ да видзӧдӧ. Сылы дышӧдӧ кыйӧдчыны да летӧ другсӧ.

 

МИКОЛ.

Эй, шкорган сэн! Эн шкоргы:

Тан колӧ син да син. (Бара летӧ.)

Эн узь! Тадз кытчӧ шогмас!

Эн кывлы тэ важ висьт?

 

ЁГОР (тільӧ синъяссӧ).

Мун вешйы сэсь, эн гӧлчит!

Сет узьны, — торкин вӧт.

 

МИКОЛ.

Ого! Став сьӧлӧм вӧрзис,

Мый вӧтнад лоан пӧт?

Тэ кылан?

 

ЁГОР.

Мый?

 

МИКОЛ.

Да кык тув вый!

Со локтӧ доддя вӧла.

 

ЁГОР (чеччӧ да видзӧдӧ, но нинӧм оз аддзы да Миколлы мыччӧ самӧкур тыра фляга).

На, глӧтнит лучше — юрад мунас,

А сэн эн сӧр — он кый!..

 

(Микол сёльӧдыштӧ, восьтӧ да юӧ, а сэсся флягасӧ сетӧ бӧр.)

 

МИКОЛ.

Зэв чӧскыд! Босьт да ачыд шонтысь,

А то войыс кузь.

Со менсьым ки-кокӧс нин ёнтӧ...

Ю, но тэ эн узь.

 

(Юӧ и салдат. Кыкнанныс гажмӧны. Микол пуксьӧ да унмовсьӧ, а другыс видзӧдӧ туй вылӧ да кывзысьӧ. Друг сійӧ мыйкӧ кылӧ.)

 

ЁГОР (летӧ Миколӧс).

Эй, Микол! Збыльысь локтӧ вӧла.

Вай чеччышт, эстчӧ, кут.

 

МИКОЛ (тэрыба чеччӧ да видзӧдӧ, а сэсся чеччыштӧ мыльксайса туй вылӧ).

Эй, тпрусёнь *, бурситӧ эн дӧлӧд,

Эн рӧдты сэн, а сувт!

* Тпрусёнь — вӧв.

 

ГӦЛӦС.

Мый колӧ тэныд? Тпру-у.

 

МИКОЛ.

Эм пропуск? Документ?

 

ГӦЛӦС.

Фу, кыдзи самӧкурӧн пӧдтӧ!

Мый документсьыс тэд?

 

МИКОЛ.

Приказ. Тэ коді? Кытчӧ мунан?

 

ГӦЛӦС.

А водзын кутшӧм сикт?

Ме Аныбӧ. Ме — Нестерова.

 

МИКОЛ.

Ог тӧд. Тэ докажит.

 

ГӦЛӦС.

Со гижӧд. Аддзан? Лыддьы сэтысь.

 

МИКОЛ (другыслы).

Эй, Ёгор!

 

ЁГОР.

Катӧд сэсь!

 

МИКОЛ (катӧдӧ, а нылыс — Домна).

Код тайӧ гижӧдсӧ тэн сетіс?

 

ДОМНА.

Код? Цвикин.

 

ЁГОР.

Сӧран весь!

 

МИКОЛ (лыддьӧ гижӧдсӧ, а Ёгор югдӧдӧ фонарикӧн).

«УДОСТОВЕРЕНИЕ»

Сие дано гражданке села Аныб, Усть-Куломской волости, Усть-Сысольского уезда, Вологодской губернии Нестеровой Агрофене Петровне в подтверждение того, что ей действительно разрешен выезд к родственникам из Аныба в Подъельск и обратно.

Начальник гарнизона — Цвикин».

 

ЁГОР.

Зэв сюся гижӧма, но век жӧ

Тан лӧжнӧй кырымпас.

 

ДОМНА.

Ті йӧйминныд? Эн сӧрӧй, кежӧй!

То рака сералас.

 

МИКОЛ (пӧнар югӧрнас веськӧдӧ Домна чужӧмлань).

А тэ случайнӧ Усть-Сысольскын

Сы лунӧ, кор Ревком

Отряд сэн котыртіс... но, партизанскӧй...

Эн гӧрдъяс пӧвстын вӧв?

 

ДОМНА (тшук повзьыштлӧ, но асьсӧ бӧр босьтӧ киас).

Тэ мый? Дзик код?

Эн лӧсьӧдлы вай сэні!

Эг ветлыв ме нэм чӧж

Подъельскысь водзӧджык.

И мыйла?

 

МИКОЛ.

Кык тув выйла!

А клятвасӧ нӧ коді сэні сетіс,

Мед еджыдъясӧс нӧйтны?

Он ылӧд менӧ! Тӧді тэнӧ, стерва:

Тэ — Каликова Домна, партизанка.

Тэ ӧні миян кырымысь он мын!

А ноко восьлав!

(Домналы йӧткыштӧ сьылі тшуптас, но оз веськав да усьӧ. Сэк кості Домна кучкӧ Ёгорлы винтовкаас. Сійӧ усьӧ жӧ. Домна кӧсйӧ сійӧс кватитны, но чеччӧ Микол да сійӧс уськӧдӧ. Домна перйӧ пистолет, но оз вевъяв лыйнысӧ — вачкӧны киас. Кӧсйӧ кватитны бӧр, но киыс оз судз. Сэк сійӧс топӧдӧны му бердӧ, кӧртавлӧны да кыскӧны доддьӧ.)

Он сэсся киысь мын,

Тэн петкӧдлам ми тшын!

 

Занавес.

 

КӦКЪЯМЫСӦД СЕРПАС

 

Кӧдзыд сарай. Пельӧсъясас восьса пазъясӧдыс пырыштӧма лым. Стенъясыс гыӧртӧмаӧсь. Стен дорын — джынвыйӧ пасьтӧм, чужӧмыс да яйыс нӧйтӧмысла уналаті лӧз — ӧтнас сулалӧ Домна.

 

ДОМНА.

Кӧн вынйӧр, сэні мезд,

Кӧн вынйӧр, сэні гаж.

Ме нӧшта тӧрыт лэбалі, кыдз гулю,

Да корси мича дзоридзьяс ас мулы,

А талун му выв лёкыслӧн кузнеч

Мен дорис кандалаяс, юрлы — меч.

Ой, пӧръясян тэ, рӧк,

Ой, пӧръясян тэ, рӧк!

Тэ кӧсйылан дзик ставлы югыд тулыс

И войяс коллявны зэв шоныд, небыд улыс,

Но бӧрас видзӧдлам, а сэн

Дзик нинӧм абу, — гыӧртӧма стен.

Кӧн вынйӧр, сэні мезд,

Кӧн вынйӧр, сэні гаж.

Ме нӧшта тӧрыт лэбалі, кыдз гулю,

Да корси мича дзоридз аслам мулы,

А талун му выв лёкыслӧн кузнеч

Мен дорис кандалаяс, юрлы — меч.

 

(Йӧжгыльтчӧ пельӧсӧ да унмовсьӧ. Сэк аддзӧ вӧт, кӧн локтӧ сы дорӧ мамыс — Наталья Ивановна.)

 

НАТАЛЬЯ ИВАНОВНА.

Ме вои, Домна, вои. Мый нӧ тэкӧд?

Тэ корин менӧ сідз!

 

ДОМНА (кутлӧ мамсӧ да топӧдчӧ сы дорӧ).

Эн пиняв, мам: ме кынма.

Ме тані изӧрми нин дзикӧдз.

 

НАТАЛЬЯ ИВАНОВНА (шебралӧ сукманнас).

О господи!.. Ме тэныд шулі...

 

ДОМНА.

Ми сэки мездім Усть-Сысольск

Да Эжва катыд тӧвзим водзӧ,

Мед Латкин мӧдысь эз нин босьт,

Мед сылы кучкыны дон шоддзӧн.

 

НАТАЛЬЯ ИВАНОВНА.

И кучкинныд?

 

ДОМНА.

Оз вунӧд дыр,

Оз вунӧд сійӧ ассьыс Нёбдін.

И Важкурьяын мус и гырк

Ми пыркӧдім. Нэм кутас тӧдны!

Став вынӧн гадӧс нӧйтім ми,

Быд сиктын свинеч шерӧн койим.

Эз тірав тышын миян ки.

 

НАТАЛЬЯ ИВАНОВНА.

А ӧні?

 

ДОМНА.

Со мый мекӧд лоис!

 

НАТАЛЬЯ ИВАНОВНА.

Оз тыдав яяд дойтӧмин,

И йӧжгыльвидзан тыртӧм кумын,

Кор сотӧ кӧдзыдыс, кыдзи би.

 

ДОМНА.

Тэ шебрав менӧ: куті кувны.

 

НАТАЛЬЯ ИВАНОВНА (бара шебралӧ пӧланас).

Код мыжа?

 

ДОМНА.

Ачым. Сӧмын ме:

Эг видзчысь: тыдалӧ, зэв мудзи.

А мудзан — тӧлкыд вошӧ сэк, —

Лёк йӧзлысь велӧдӧмсӧ кывзі.

 

НАТАЛЬЯ ИВАНОВНА.

А найӧ... Дерт жӧ, быдӧн дась

Пыр индыны тэн сійӧ туйсӧ,

Кӧн горшныс кӧинъяслӧн пась,

Кӧн доддяд смертьыс ачыс сюйсьӧ.

 

ДОМНА.

И сюйсис. Ӧні меным пом:

Оз кӧдзыдыс кӧ — менӧ виас,

Вир-яйсьым вӧчас няйт и шом

Палачлӧн, Латкинлӧн пеж киыс.

 

НАТАЛЬЯ ИВАНОВНА.

Эг шулы-ӧ ме: тэ, кыдз чаль,

Сэн чеган!

 

ДОМНА.

Шебрав: босьтӧ йирмӧг.

 

НАТАЛЬЯ ИВАНОВНА.

Ме тэныд пӧрчча ассьым шаль... (пӧрччӧ да шебралӧ).

Нэм ковмас гырддза помтӧ йирны!

А сійӧ матын да он босьт,

Он сійӧс некор сэтысь судзӧд.

И тышкась сэсся, нуӧд кось,

Мед лыйсьӧм горысь тэ эн удзав!

 

ДОМНА.

Кӧть кула ме, но мездмас му,

И сылы ӧзъяс мича кыа

Да сэтшӧм мича — друг он шу,

Он висьтав медся югыд шыӧн.

Сэк лоӧ дружба и любов,

Выль горӧн юргас йӧзлӧн уджыс,

И мортлӧн сьывны кутас лов,

И нэмыс кежлӧ вошӧ мудзыс.

(Видзӧдӧ гӧгӧр. Син водзас чужӧ збыльысь мича кыа и сылы паныд локтӧ Сергей, а мамыс вошӧ.)

Сергей, сэк лоан-ӧ тэ сэн?

И коркӧ казьтыштан-ӧ менӧ?

 

СЕРГЕЙ (кутлӧ Домнаӧс).

Тэ — югыд шонді югӧр мен, —

Дзик некодыр ог вунӧд тэнӧ.

 

ДОМНА.

Сергей, тэ быть, тэ быть сэн ло!

Вай таті весьтас сэтчӧ мунам.

Тэ видзӧд, кутшӧм мича лог,

И дзоридзыс сэн кутшӧм уна!

Ме наысь кыа тэн венок,

Ой, кутшӧм лоас сійӧ мича!

Со нетшышті ме василёк, —

Ӧд морӧсын ме муслун видза.

(Домна кӧсйӧ воськовтны водзӧ, но зурасьӧ Сергейлӧн винтовкаӧ. Сэк садьмӧ да казялӧ, мый ставыс — нимкодь вӧт, а винтовкаыс пыдди юрнас зуралӧ кӧдзыд стенсӧ. Сійӧ чеччӧ да шонтысьыштӧ упражняйтчӧмӧн. Сэсся мӧвпалӧ.)

Ой, кутшӧм вӧліс нимкодь вӧт!

Дась сійӧс аддзыны ме помтӧг.

А мам эз пинясь, ни эз бӧрд, —

Кыдз гортын, менӧ шальнас шонтіс.

И воліс ме дінӧ Сергей,

О, кутшӧм кывъяс сійӧ шуис!

Оз повзьӧд ӧні менӧ смерть, —

Кӧть сійӧс дасьтӧ мен вир юысь!

(Неыджыд кост).

А тэ, Сергей, тэ быть сэн ло!

Ӧд сійӧ нэмлы сиим олӧм.

Мед шуштӧм кадыс бӧр эз во.

Ми тышкасим — эг тӧдӧй полӧм.

И кытчӧдз ловъя, пыр на, век

Став вынӧс тышкасьны ме зэвта.

И враглы месянь кыв оз пет,

Кӧть ӧшӧдасны тайӧ вевтӧ.

Кӧть торйӧн шедӧдласны яй,

Но месянь колантор оз босьтны.

Ме кӧсъя вӧльнӧй, шуда край,

Ог кырныш бордлысь шуштӧм востым!

 

(Ывлаын гольсмунӧ томан, воссьӧ ӧдзӧс. Пырӧны Латкин да Прокушев, а ӧдзӧс дорын ӧтарӧ-мӧдарӧ ветлӧдлӧ часӧвӧй.)

 

ПРОКУШЕВ (Латкинлы индӧ Домнаӧс).

Со тайӧ нылыс, кыдз ті аддзад,

И лоӧ Ванька-партизаннас.

А збыль вылас жӧ сійӧ — Каликова Домна.

Ме сійӧс тӧдлі коркӧ Усть-Сысольскын,

Кор земотделын курьераліс сійӧ.

Кӧть тӧдса морт, а висьтавны оз кӧсйы,

Код локтіс миян тылӧ сыкӧд тшӧтш.

 

ЛАТКИН.

Лёк тӧдса, сідзкӧ, тэнад, оз кӧ висьтав,

Оз кӧсйы кӧ ас тӧдсаяслы бурӧс.

Но аддза ме сы чужӧм серти тан,

Мый талун сылӧн бурӧс вӧзйӧ бан.

Ӧд сідзи. Домна? (Домна чӧв олӧ.)

Тэ на овны кӧсъян

Да кутӧдны ас сертиыд бур жӧник,

Код ас кодьыд жӧ мича, збой да том.

(Домна нинӧм оз шу.)

Мый олан чӧв — он висьтав кыв ни джын?

Аль тэныд тані кажитчӧ зэв ёна?

 

ДОМНА (едкӧя, но асьсӧ кутӧмӧн).

Кыдз оз? Зэв ыджыд аттьӧ, Латкин-барин!

Тэн муӧдз копыр сы вӧсна, мый ме

Тэ отсӧгӧн тан аддзи аслым места

Тшук ыркӧдчыштны. (Индӧ ывлаӧ.)

Кутшӧм ӧд сэн жар!

Декабрьскӧй шондіыс сэн сідз и сотӧ!

 

ЛАТКИН.

Оз кажитчы? Хе, хе! А чӧв олігад любӧ?

Ог шашкиӧн ми ворсӧй, кор война!..

 

ПРОКУШЕВ.

Мед вӧліс тэнад олӧмын век гожӧм,

То вом пытшкад оз ков тэн видзны ва.

 

ЛАТКИН.

Да, да. А калькнит вомтӧ мелі нюмӧн

Да висьтав ставсӧ.

 

ПРОКУШЕВ.

Сэк лоас гӧгӧр бур.

 

ЛАТКИН.

Сэк татысь лэдзам, сетам тэныд олӧм,

И дзоньвидзаӧн новлӧдлы тэ юр. (Домна нинӧм оз шу).

 

ПРОКУШЕВ.

Мый кӧсйӧ тіян Маеговныд сэні?

И ас бӧрсяыс вайӧ кымын штык?

И коді личнӧ тэнӧ ыстіс татчӧ

И сувтӧдіс тэ водзӧ кутшӧм мог?

 

ЛАТКИН.

Да, да. Код ылӧдліс? Код личнӧ ыстіс татчӧ?

 

ДОМНА.

Код ыстіс? Лӧглунӧй —

Став сьӧлӧм сыӧн тыр;

Народ и чужан муӧй, биын коді сотчӧ,

И помтӧм месть, код кувтӧдзӧй оз быр!

 

ЛАТКИН.

Герой, герой!

Тэ меным кажитчыны кутін.

«Месть», «помтӧм месть да лӧглун»?! Кодъяс дінӧ?

Месть на дінӧ, тан кодьяс чужан му

Став вынӧн дорйӧны,

Эз кабыртны мед сійӧс большевикъяс!

 

ДОМНА (лӧга, ыджыд биӧн).

Месть на дінӧ, тан кодъяс чужан му

Быд ногыс грабитӧны, кисьтӧны пӧсь вир

Английскӧй штыкъясӧн народлысь, —

Народлӧн став предатель дорӧ месть! —

Со коді ыстіс менӧ тіян дорӧ,

Мед пармаыс эз бӧрд тан ыджыд горӧн.

Ті здӧвӧльӧсь?

 

ПРОКУШЕВ.

Народлӧн став предатель дорӧ месть?

Тӧд, сідзкӧ, курва!

(Кулакнас сетӧ тшӧка лыас. Домна усьӧ. Сійӧс нӧйтӧ нагайкаӧн.)

 

ЛАТКИН.

Сідз тэнӧ раммӧдам, мый лоан, кыдзи шӧвк!

 

(Домна пуксьӧ джоджас, но нинӧм оз шу, — видзӧдӧ гордӧя.)

 

ПРОКУШЕВ.

Эз тырмы тэныд?

 

ЛАТКИН.

Виччысьӧ на со!

 

ПРОКУШЕВ (петкӧдлӧ нагайкасӧ).

Эн шогсьы: лоан пӧт.

 

ЛАТКИН.

Гуманностьлы тэ висьтав аттьӧ!

 

ПРОКУШЕВ.

Не сійӧ кӧ, эз гӧлчит эськӧ дыр.

 

ДОМНА (Прокушевлы).

Ха, ха!

Ме чайті, бариныд зэв бура тэнӧ вердӧ,

Мый сылы служитан, кыдз вернӧй пон.

А вӧлӧмкӧ, — ха, ха! — быд сыр нин тэнад бӧрдӧ, —

«Гуманностьнад» эн калькнит менсьым вом.

Предательлы эз кывзысь тшӧтш и вирӧй —

Эз чепӧссьы, кӧть плеть помад и кӧрт

И вынтӧмлуныд вӧсна скӧрлун тэнӧ йирӧ, —

Ха, ха! — Ме серала тэ вылын, а тэ бӧрд!

Бӧрд, омӧль гаг, да усьлась, кыдзи кӧин,

Код ветлӧ ыджыд туйяс вылын — тшыг.

Позорӧ тэ и тан ас юрнад вӧйин, —

Эз вичмы и оз вичмы тэныд нинӧм,

Кӧть пессян — кӧин вомад шлапсьӧ быг!

 

ПРОКУШЕВ (бара чужъялӧ да нӧйтӧ).

Тэ ланьтан он?!

 

ЛАТКИН.

Судьяӧ тані тэнӧ ми эг пуктӧй.

 

ПРОКУШЕВ.

И миянӧс эн судит — лоас весь.

 

ЛАТКИН.

Тэн эм на кад, мед уджӧдыштны юртӧ

Да мӧвпыштны. Тэн пӧльза лоас сэсь.

Тэ тайӧс кылан?

Тэ миянлы кӧ краснӧйяслысь ключ

Кӧн сійӧ, висьталан, то овны кутан бура.

Сэк смертьыс юрад косаӧн оз судз.

Тэ гӧгӧрвоин? Кывзам.

 

ДОМНА.

Ха, ха!

Ме серамӧйла кула, Латкин-барин.

Кыдз аддза, тэнад юрын абу вем,

А нитш да нинӧмтор оз вежӧрт

А вежӧртіс кӧ, гӧгӧрвоин тэ,

Мый смертьыс ӧні кыйӧдӧ куш тэнӧ.

Тэ ворсін — ворссин ассьыд скон!

 

ЛАТКИН.

Тэ кулан!

 

ДОМНА.

А тэ вечнӧ ов!..

Оз чуж та му вылӧ пеж тіян мӧвплӧн петас!

 

ЛАТКИН.

А тіян сэн!

 

ДОМНА.

Бур кӧйдыс и оз кув, —

Му вылын сійӧ озыр плодъяс сетас.

Со, барин, тэныд краснӧйяслӧн ключ,

А мукӧд ключ тэн некодыр оз ло.

Ми найӧс ставӧн крепыд киын кутам,

Мед восьтыны народлы долыд лун.

И восьтам: тышӧ сувтіс став народ.

 

ЛАТКИН да Прокушев (сьӧрсьӧн-бӧрсьӧн).

Народ? Ха, ха, ха, ха!

 

ДОМНА.

Да, став народ.

 

ЛАТКИН.

Зэв интереснӧ! Кутшӧм нӧ народ?

Код нинкӧма? Кыз шабура да лазъя?

Кузь кыд да идзас рачвыв сёйӧ код?

 

ПРОКУШЕВ.

Да турун пӧвстысь корсьӧ тӧрмӧм азъяс?

 

ЛАТКИН.

Ха, ха, ха, ха! Тэ ыджыд оптимист!

Но оптимизмыд сынӧд вылын тэнад.

И та вӧсна тэ кулан, антихрист,

И морт оз казьтыв шоныд кывйӧн тэнӧ.

Код чужис уявны, то лэбавны оз куж, —

Мужиклы тан властительӧн не лоны:

Тась нетшыштам ми большевизмлысь вуж,

И петасыслы коръясӧдз не воны!

 

ДОМНА.

Эн вунӧд, барин, ассьыд кок ув му, —

Мед кула ме, но уджӧй кутас овны.

Код чужис уявны, то лэбавны оз куж, —

Бандитлы тан властительӧн не лоны!

Быд туй кузя тэн паныд локтӧ смерть

И бандаыдлы ӧттшӧтш. Мый тэн сины?

Не пӧдтыны тэн некор йӧзлысь мезд

И коммунизмлысь петасъяс не вины!

 

ЛАТКИН.

Фанатик!

 

ПРОКУШЕВ.

Помавны. Мый ноксян?!

 

ЛАТКИН (чужъялӧ Домнаӧс).

Быд понлы — понлӧн смерть!

(Ӧвтыштӧ кинас да мунӧны. Домна кулӧма нисьӧ ловъя куйлӧ. Сэсся сійӧ кыпӧдчӧ гырддза пом йылас да лэптӧ кулаксӧ.)

 

ДОМНА.

Не вины коммунизмӧс тіянлы, не вины!

Да! Сійӧ чужас миян вирысь.

Мед олас коммунизм!

 

Занавес.

 

ӦКМЫСӦД СЕРПАС

 

Кодзула, кӧдзыд вой. Усьӧ китша.

Гӧра бокын будка. Сылӧн ӧдзӧсыс петӧ сцена вылӧ. Будка сайын потшӧс. Сэн ӧшалӧ киссьӧм ыж ку эшкын.

Ю вылысь, посни козъяс дорті, морӧссьыс дойсӧ ки пӧвнас кутіг, а мӧд кинас, мед эз усь, кытчӧ сюрӧ кутчысьліг, вынсӧ пӧшти дзикӧдз нин воштӧма да шатлаліг кайӧ ранитчӧм Домна. Сылӧн киясыс и морӧсыс — ставыс вир.

 

ДОМНА.

Ой, понъяс!.. Сёйисны дзик ульӧн.

Палачьяслӧн эз дрӧгнит ки!..

Эз кывзысь век жӧ, налы пуля, —

Кӧть петіс морӧсӧд, эз ви... (Кост.)

Ме дыр-ӧ садьтӧг куйлі сэні?

Ог помнит. Но лов садьмис бӧр...

Бур эськӧ пышйыны мен ӧні,

Да кытчӧ? Лым улын став вӧр.

 

(Воӧ будка дорӧ. Сэн, мед эз усь, пельпомнас нёровтчӧ стен дорас да таркнитӧ ӧдзӧсӧ.)

 

СТӦРӦЖ (пытшкӧссяньыс).

Код ветлӧ сэні войшӧр войын?

 

ДОМНА.

Лэдз шонтысьны. То кула ме.

 

СТӦРӦЖ (восьтӧ ӧдзӧс да аддзӧ вирӧсь морӧса Домнаӧс).

О господи! Мый тэкӧд лоис?

Вир пытшкын ставнад! Коді тэ?

 

ДОМНА.

Ме Мылдінысь... Ог вермы сэсся...

Лэдз, эм кӧ места, шоныд сет.

 

СТӦРӦЖ.

Кыдз рӧкыс войтыр вылас пессьӧ!

Пыр. (Босьтӧ да кутыштӧ Домнаӧс.)

Пельшарӧс ме корла тэд.

 

ДОМНА (пыригас).

Оз ков: ме сытӧг, ачым бурда, —

Случайнӧй пуля инмис тшук.

 

СТӦРӦЖ.

Кыдз оз, кор вирыд шорӧн чургӧ?!

Пась чӧвтла ме и ветла здук.

(Пырӧны будкаӧ. Сцена вылын некод абу. Кӧнкӧ сиктын кылӧ сӧмын код юра белогвардеецлӧн сьылӧм.)

Белогвардеецлӧн гӧлӧс.

Коль не любишь ты, Маруся,

Я решу без лишних слов:

Из нагана застрелюся,

И ты увидишь мою кровь.

 

СТӦРӦЖ (пасясьӧма да, кизясиг, петӧ будкаысь, ладитӧ шапкасӧ да мӧвпалӧ).

«Ме Мылдінысь»... Оз чайтсьы меным, —

Оз сёрнит мылдінсаяс ног.

Гӧрд партизанка. Вот и сёнын

Шковсетісны: эн шенав борд! (Кост.)

А, гашкӧ, збыльысь сюрис мыжтӧг, —

Ӧд шальнӧй пуляыд дзик йӧй...

А ӧні, коньӧр, сідзи ружтӧ!..

Мен сійӧ жаль, кӧть бокӧвӧй...

Кӧть код эз вӧв, а сӧвесть корӧ,

Мед сетны отсӧг. Пырысь пыр

Ме ветла сиктӧ, пельшӧр дорӧ,

А то кулас — оз ов дыр.

 

(Мунӧ. Сценаыс недыр тыртӧм, а сэсся воссьӧ будкаӧ ӧдзӧс да тыдовтчӧ Домна. Сійӧ кутчысьӧма ӧдзӧс вугъяс — муртса сулалӧ.)

 

ДОМНА (стӧрӧжлы).

Оз ков. Ме кора тэнӧ, дядя:

Ме ачым бурда, пельшартӧг... (Гӧгӧр видзӧдӧ.)

Зэв сёрӧн менам восьӧм садям, —

Со локтӧ... пищаляяскӧд.

 

(Усьӧ тагӧс вылас, садьтӧмсьӧ. Локтӧны стӧрӧж да винтовкаа куим белогвардеец, на лыдын Вячеслав Фролов.)

 

СТӦРӦЖ (индӧ Домна вылӧ).

Со... Дивӧыд, мый вӧчӧ! Гурйыв

Та войӧ ӧдзӧс восьтӧма!

Кыдз тыдалӧ, то сійӧс вир йыв...

Ён дойсьыс жарыс босьтӧма.

Зэв ёна ранитчӧма сійӧ, —

Бур нӧшта — веськалінныд ті,

Мед лазаретӧ катны сійӧс,

А пельшарыс оз сюр, кӧть ви...

Ті видлӧй, гашкӧ, важӧн кын нин,

Ӧд войыс кутшӧм кӧдзыд, сэзь!

 

ФРОЛОВ.

Эн пов: оз другӧн сійӧ кынмы, —

Том мортлӧн вирыс збой и пӧсь.

(Копыртчӧ садьтӧм Домна весьтӧ да видзӧдӧ.)

Тэ тӧдан, коді тані куйлӧ?

 

СТӦРӦЖ (повзьӧ).

Ме?..

 

ФРОЛОВ.

Партизанка — карса ныв.

Ми сӧмын на сэн сійӧс лыйлім,

А со кӧн паськӧдӧма сыв!

Но век на лолалӧ пеж лолыд —

Пыр ещӧ ловъя сійӧ тан.

Но ӧні лоас сылы долыд, —

Ми сылы тані петкӧдлам! (Салдатъяслы.)

А ноко босьтӧй, кыскӧй эстчӧ

Да домӧй потшӧс пельӧсас,

Мед ёна кияснас оз ӧвтчы, —

Ми сылы пукталам пудпас!

 

(Садьтӧм Домнаӧс кыскӧны, кӧрталӧны потшӧс пельӧсӧ, чегъялӧны чуньяссӧ да муджгылялӧны-песлалӧны сойяссӧ.)

 

ДОМНА (петалӧ садяс).

Оз кӧдзав, зверьяс, менам вирӧй,

Кыдз знамя, сійӧ ӧзъяс пыр

И вермӧм висьталас став мирлы, —

Сэк татысь мездлуныс оз быр!

 

(Сылы бытшкӧны морӧсас. Домна пыр кежлӧ копыртӧ юрсӧ. Стӧрӧж тайӧ зверствосьыс йӧймӧ, кватитӧ потшӧссьыс ыжку эшкынсӧ, шыбитӧ вылысас вылын гӧнӧн да котралӧ ӧтарӧ-мӧдарӧ, а сэсся пуксьӧ потшӧс вылас да сьылӧ).

 

СТӦРӦЖ.

Куті ме жар-птицаӧс,

Куті ме жар-птицаӧс,

Югдіс керка сьӧр.

Пырис сійӧ шондіӧн,

Пырис югыд шондіӧн

И оз пет нин бӧр.

Йӧрті сійӧс садокӧ,

Йӧрті ме кӧрт садокӧ,

Шобді сёйӧ сэн.

Куті ме жар-птицаӧс.

Куті ме жар-птицаӧс.

Сетіс меным ен.

(Белогвардеецъяс сералӧны — налы тешкодь. Стӧрӧжлы жӧ дзик веськодь налӧн серамыс. Здук кежлӧ сійӧ ланьтлӧ, видзӧдӧ ӧти точкаӧ, а сэсся кыпыда сералӧ ӧтнас ачыс.)

Ха, ха, ха, ха, ха,

Ха, ха, ха, ха, ха,

ха, ха, ха, ха, ха!..

Сетіс меным ен!..

(Пауза. Белогвардеецъяс мунӧны, а стӧрӧж зумыштчӧ, пукалӧ дзик чӧв, сэсся кыпӧдӧ юрсӧ да горзӧ белогвардеецъяслы.)

Стой! Эй, сувтлӧй!

Стой! Эй, сувтлӧй:

Пӧжар!

Стой! Эй, сувтлӧй:

Пӧжар!

(Сылы воча некод оз шыась.)

Некоді оз сувт,

Некоді оз лок, —

Сотчи ме.

Некоді оз сувт,

Некоді оз лок, —

Сотчи ме.

Сотчи ме.

Ой, сотчи ме.

Сотчи ме.

Дзикӧдз сотчи ме!

Дзикӧдз сотчи ме!

 

(Усьӧ лымъяс да нӧйтӧ ки-коксӧ, бӧрдӧ.)

 

Занавес.

 

ЭПИЛОГ

 

Парк. Сцена пыдіын, дзик шӧрас, зымвидзӧ памятник. Сійӧс кытшалӧма бӧра пуклӧсъясӧн да цвет клумбаясӧн. Гранитнӧй монумент вылын — Домналӧн бронзӧвӧй фигура. Сійӧ, быттьӧ ловъя, киас оружие кутіг, мунӧ штыкӧвӧй атакаӧ. А вылын тыдалӧны башеннӧй кранъяс, кыптӧм да кыптысь заводъяслӧн корпусъяс, нефтевышкаяс, уна судта мича олан керкаяс.

Памятник дорӧ, морӧс тырыс орденъяса да медальяса, локтӧ Сергей. Сійӧ зэв нин пӧрысь — ус-тошкыс и юрсиыс дзорӧсь, но пыр на збодер.

 

СЕРГЕЙ.

Сы кадсянь ваыс визувтіс зэв уна

И сьӧлӧм вывті муніс унатор.

Но некодыр, дзик некодыр ог вунӧд

Ме татчӧ волыны, кӧть юрсиӧй и дзор.

Пыр менӧ татчӧ кыскӧ ыджыд вынӧн

Ас ёртлӧн дона образыс, — ӧд ме

Пыр муні сыкӧд ӧттшӧтш, ӧти туйӧд,

И ӧта-мӧдӧс радейтім ми век.

И радейтӧмыс некодыр оз куслыв —

Пыр югыд, кыдзи шонді югӧр вей.

Тэ кылан, Домна? Кылан, менам муслун?

Мый тэныд тані висьталӧ Сергей?

Ми радейтім — дум вӧліс миян мича,

Кыдз тувсов кыа, кыдзи мырпом цвет.

Став бурсӧ вӧлі сьӧлӧм бердын видзам,

И мӧвплы сійӧ чусмыны эз сет.

Эз сет! Тэ видзӧд — ставыс лои збыльӧн, —

Тэ аддзан он, кыдз вежсис Коми му?

Сэн кыптісны заводъяс — ставыс сьылӧ, —

Важ лёкыс бырис, кыдзи асъя ру.

И ставыс тайӧ — миян уджлӧн дзоридз,

Зэв ыджыд нимкодь, аддзывлытӧм шуд.

Став йӧзлӧн талун радлӧ вӧльнӧй морӧс

И сьыланкывйӧн ошкӧ чужан му.

 

(Кылӧ том йӧзлӧн сьылӧм.)

 

ТОМ ЙӦЗ (сцена сайын).

Шонді кыптӧма зэв вылӧ,

Сійӧ мича, югыд, яр.

Миян сьӧлӧм ставлӧн сьылӧ, —

Дзоридзалӧ сикт и кар.

(Сьылӧмыс ылыстчӧ.)

 

СЕРГЕЙ.

Да, чужан му, код вӧльнӧй, вына бордъя,

И восьтіс югыд Тӧлысь вылӧдз туй.

И Марсӧдз кыпӧдчис, вселеннӧй сводъяс, —

Став мойдсӧ пӧртӧ збыльӧ, — мӧвп эз кув.

Эз кув! И сійӧ некодыр оз кувлыв —

Пыр лэбӧ водзӧ, кыдзи метеор,

Да вайӧ помтӧм радлун миян мулы,

Мед сійӧ некор, некор эз ло дзор.

И тэ он кувлы, Домна, — пыр сэн ловъя:

Народ эз вунӧд тэнсьыд югыд ним.

Кӧть мыйта сэні кӧдзыд тӧв оз пожъяв,

Но некор тэнад бронзаыд оз сім!

 

ТОМ ЙӦЗ (бӧр матысмӧ сьылӧмыс, а сэсся и ставӧн петӧны сцена вылӧ).

Му шар вылын абу места,

Миян моз кӧн олӧ морт.

Чужан муным — кыдз невеста, —

Сійӧ миян вын и борд.

Вермам лэбавны ми вылі,

Помны ю и зырны креж.

Миян вымпел — Тӧлысь вылын,

Мичмӧдӧ сэн Тӧлысь эж.

Тайӧ вынсӧ сетіс Ленин,

Сылӧн партия, народ.

Слава тэн, великӧй Ленин,

Слава тэн, сӧветскӧй морт!

Слава, партия, тэн сьылам,

Слава тэн, сӧветскӧй морт!

 

Занавес и пом.

 

Июль 1954 — февраль 1966 вояс.

Микунь — Сыктывкар.

 

Гижӧд
Домна Каликова

lkejrlkelkrgner klrjnelknfrkl ekjnrjkenfrej