ДОМНА


Енэж лӧзалӧ,
Чуксалӧ овны.
Тулыс виччысиг
Вугралӧ ю...
Враглӧн штык водзын
Восьлалӧ Домна,
Тэнӧ радейтысь ныв,
Коми му.

Паськыд енэж,
Он аддзы мӧй, коді
Тэлань бӧръяысь
Лэптӧма юр!
Мыйла,
Мыйла он сет сылы бордъяс,
Медым враг киӧ
Нылыд эз сюр?

Эжва, садьмы,
Веж гыяснад сайӧд — 
Сылы восьлавны
Эз нин коль дыр.
Он кӧ, — 
Варччывны сӧдз югыд ваад
Сэсся некор нин сійӧ оз пыр.

Коми му,
Оз ло дивӧ тэд кывны
Мирнӧй лунъясӧ ыдждӧдлан гор.
Врагъяс син водзын
Кыв шутӧг кувны
Тэ вӧсна — 
Ёна сьӧкыдджыктор.

Огӧ вунӧдӧй
Домналысь подвиг — 
Миян сьӧлӧмын кузь сылӧн нэм.
Сыысь шуда,
Мый пи ме народлӧн,
Татшӧм ныв кодлӧн вӧлі да эм.