АСЪЯ КЫА ВОДЗ ЛЭБАЛӦ
Асъя кыа, кыа водз лэбалӧ, Рытъя кыа, кыа сёр лэбалӧ. Увсянь пыжа-пыжаяс катӧны, Вывсянь пыжа-пыжаяс кывтӧны. Пыжын пукалысьяс — мича нывъяс, Сынысь-бӧжалысьяс — бурлак зонъяс. Ылӧдз зэв, ылӧдз зэв юргӧ кылӧ Нывъяс-зонъяслӧн гажаа сьылӧм. Тайӧ тувсовъя гажаник рытнас Ветлӧ берегті том нывка ӧтнас. Ветлӧ берегті бӧрӧ да водзӧ, Некод оз локыл нылыслы воча. Кокас тюпель — бок вылас талялӧ, Юрас чышъян — чышъянсӧ вошталӧ, Ачыс гусьӧн-гусьӧникӧн бӧрдӧ, Муса зонлы шуд да бур туй вордӧ. Тюпель, чышъян — тайӧ дона козин — Сетліс зонмыс гортысь петӧм водзын. Кодыр сетіс нывлы козин тайӧ, Кӧсйысис тай босьтны верӧс сайӧ. Нывлы гажтӧм овны муса зонтӧг, Лун и вой сы вӧсна сьӧлӧм ёнтӧ, Виччысьӧ пыр милӧйыслысь локтӧм... Милӧйыссӧ збыльысь, вӧлӧм, локтӧ. Сувтіс берег дорӧ уна йӧзкӧд, Нылыд весиг ас синлы оз эскы: Пыжысь петіс, кыркӧтш йылӧ кайӧ, Том ичмоньӧс зонмыс сьӧрсьыс вайӧ. Том ичмоньӧс зонмыс вайӧ сьӧрсьыс, Том ичмонькӧд локтӧ свадьба-кӧлысь. Нылыс сэки ыджыд горӧн бӧрддзис, Кокысь тюпель, юрысь чышъян пӧрччис, Эжва юӧ дзӧвгис йӧз син водзын Пӧръяч жӧникыслысь дона козин. Медым козиныскӧд Эжва юыс Нывлысь шогсӧ ылӧ-ылӧ нуас. Асъя кыа, кыа водз лэбалӧ, Рытъя кыа, кыа сёр лэбалӧ.
Гижӧд
Асъя кыа водз лэбалӧ
Жанр: 

lkejrlkelkrgner klrjnelknfrkl ekjnrjkenfrej