АСКИ


Николай Васильевич Пипуныров, овмӧсӧн веськӧдлысь, чеччис талун водз. Кымынӧд лун нин кӧсйӧ мӧвпыштлыны совхозлӧн аскиа лун йылысь, ӧтитор да мӧдтор кабалаӧ пасйыштны, но пыр мыйкӧ падмӧдӧ. То районысь люзьгӧны-локтӧны совхозӧ комиссия бӧрся комиссия, то выль керкаяс лэптанінӧ лоӧ кежавны, то Агропром век на важ моз быдсяма бумаганас пӧдтӧ...

Но талун быть нин босьтчас удж бердӧ. Чӧрту ставнысӧ. Тайӧ здукӧ триньӧбтіс телефон.

— Пӧсь чолӧм! — шыасис му бурмӧдысьяслӧн веськӧдлысь Игушев. — Ме Гаръя му кузяыд. Колӧ актсӧ кырымавны. Коймӧдысь нин шыльӧдім-мольӧдім.

— Волӧй дай, телепит кӧ...

— Здук мысти петам, — нимкодя чӧвтіс Игушев.

— Сё лешак! Бара лунсӧ дзугасны. А мый вӧчан! Бур мутӧгыд водзӧ ни бӧрӧ.

Бара зилькнитіс телефон.

— Неминуча суис миянӧс, Николай Васильевич, — шыасис Гула Яг отделениеӧн веськӧдлысь Мишарин.

— Мый нӧ лои?

— Карталӧн йиркыс уси. Дас куканьӧс лямӧдіс.

— Тіян пыр кыткӧ резьдӧма, — дӧзмӧм гӧлӧсӧн вочавидзис директор. — Пажын бӧрын кежала. Мыжа кӧ, лӧсьӧд ассьыд юртӧ.

А плешас пӧсь чепӧсйис. Дас душыд абу серам.

Пипуныровлысь мӧвпъяссӧ торкис главнӧй агроном Дзизганова. Ӧдзӧс дорсяньыс на мӧдіс элясьны:

— Картупель пуктыны петісны, а вит агрегатысь куимыс люги-леги. Управляющӧйыс ыстысьӧ инженеръяс вылӧ. А найӧ — запчасть пӧ абу. Юрыд бергӧдчас мыжасӧ корсигад.

— Сёрнитла инженеръяскӧд. Топӧдла найӧс...

Корліс главнӧй инженерӧс, часӧн-джынйӧн сэтчӧ воши, сэсся планёрка нуӧдіс — бара час лэбзис, профкомса юралыськӧд собрание кузя баитісны, сэсся мелиораторъяс воисны, сэсся...

Вӧлі сёр рыт, кор Пипуныров петіс контораысь.

— Бара на луныс дзугсис, — ышловзис Николай Васильевич. — Кор нин план бердас босьтча-а? Аски?

Асывсяньыс триньӧбтіс телефон.

— Кывза, — усьӧм гӧлӧсӧн шуис Николай Васильевич да вештіс бокӧ ассьыс плансӧ.


Гижӧд
Аски
Жанр: 

lkejrlkelkrgner klrjnelknfrkl ekjnrjkenfrej