АНТИВИРУС


— Но, интернетад пырин, Василий Семёнович? — юаліс Сергей Попов, оперативнӧй дежурнӧйлӧн отсасьысь.

— Пыри, — кынӧм увсӧ гыжйыштӧмӧн очсыштіс Семен Вась.

— Но и кыдзи?

— А зэв лӧсьыд. Быдтор позьӧ аддзыны, мый окота. Кутшӧм кино кӧсъян, сійӧ и видзӧд, любӧй книга верман лыддьыны, пукав монитор водзад да сӧмын синтӧ путкыляв. Но ӧтитор лёк.

— Мый нӧ?

— Вирусыс уна шаркйысьӧ. Вежонӧн компьютерӧй тырис тайӧ лёк заразанас.

— Антивирус колӧ ньӧбны.

— Ме и ньӧби. Сюрсӧн-джынйӧн шыбиті, сюйи компьютерӧ. А сійӧ тшыг пон моз кыдзи тай уськӧдчис вирусъястӧ корсявны. Дзик коммерческӧй больничаын бурдӧдчӧм кодь лои. Налы ӧд мед сӧмын сьӧм кульыштны куйлысьыдлысь, пыр выль и выль висьӧмъяс аддзалӧны. Сідзи и антивирусыс. Лун корсьысьӧ, вежон, мӧдӧс, коймӧдӧс. Тадзи куим вежон чӧж гудйысис, дас сюрс саяс вирус кодкӧ грексьыс аддзис, и век на помыс оз тыдав. Сэки ме, кӧнешнӧй делӧ, шыаси тӧдысь йӧз дорӧ, ачым ӧд компьютеръясыдкӧд дзик на неважӧн тӧдмаси. Вот и юалі, мый, мися, тайӧ менам антивирусыс йӧйталӧ? Меным и вочавидзисны, мый паныдасьлӧны гежӧдика абу тыр вежӧра программаяс. Вермас лоны, мый тэныд пӧ буретш сэтшӧмыс и веськалӧма. Найӧ дугдывлытӧг корсьӧны и корсьӧны вирусъяссӧ, и тайӧ некор оз помасьлы, медбӧрын асьныс заразитчӧны, нёрпалӧны, дзикӧдз висьмӧны да кулӧны. Ме сэсся, кӧнешнӧй делӧ, и кусӧді тайӧ абу ёна прӧсуж антивирустӧ. А инструкцияас гижӧма, мый ӧти программанас позьӧ кык компьютерын пӧльзуйтчыны. Ме и вӧзйи аслам пилы, сійӧ карын олӧ, сюйлы, мися, аслад компьютерад, колӧкӧ, тэнад артмас. Кӧрӧбкаас дисксӧ да инструкциясӧ пукті да сеті Юля моньӧлы, мед лэччӧдас. Сійӧ и нуис тайӧ антивирустӧ мам дорас, сватья ордӧ быттьӧ.

Некымын лун мысти детина звӧнитӧ карсянь:

— Диктуйт меным парольсӧ, сытӧг антивирусыд оз пыр компьютерас.

— Ме жӧ Юляыдлы сетлі кӧрӧбнас и инструкциянас, сэні и парольыс.

— Да сійӧ меным куш дисксӧ вайис.

— Сідзкӧ гортас мамыс ордӧ колис, звӧнитлы тьӧщаыдлы.

Недыр мысти сватья нин меным триньӧдчӧ:

— Антивирусыдлысь зять корӧ инструкциясӧ. А менам сійӧ абу. Сэсся мый вӧчны?

— Да ме жӧ кӧрӧбканас и ставнас Юлялы сеті, мед карӧ лэччӧдас.

— А Юля куш дисксӧ и босьтіс, кӧрӧбкаыс пӧ зэв ыджыд да сылы оз ков. А меным сыысь дзик жӧ нинӧм, туплясьӧ сӧмын да мешайтчӧ, ме пачӧ и дзумги.

— Инструкциянас и пом сотін?!

— Да. Ме ӧд эг тӧд.

— А сэсся парольтӧ ми огӧ тӧдӧй. Сэні инструкцияас кызь знака парольыс вӧлі. Ӧні сійӧ дисктӧ сӧмын шыбитны, парольтӧгыд сыӧн вӧдитчыны он вермы.

— О, Господи! Мый нӧ сэсся вӧчны? Выльӧс ковмас ньӧбны. Дона-ӧ нӧ?

— Сюрс саяс.

— Вот ий…

Та бӧрын сватья магазинысь ньӧбӧма выль антивирус.

Кутшӧмкӧ кад кольӧм мысти мог суис да карӧ лэччылі, детина дорӧ пыралі:

— Выль антивирустӧ компьютерад сюйин?

— Да.

— Вай, сідзкӧ, меным, ме аслым тшӧтш пыртӧда.

Сійӧ восьтіс тумбочкасӧ, кыскис сэтысь антивируслысь дисксӧ, а сыкӧд тшӧтш кык инструкция. И важсӧ, и выльсӧ. Ӧтлаын и куйлісны. Со ӧд кыдзи овлӧ.


Гижысь: 
Гижӧд
Антивирус
Жанр: 

lkejrlkelkrgner klrjnelknfrkl ekjnrjkenfrej