ТЭНЫД КОРСЯ МЕ ДЗОРИДЗ


Ворсӧ Эжва лӧз гыӧн,
Небыд тӧлыс зэв лӧнь.
Югыд ывлаыс кыӧ
Мича мӧвпъясысь вӧнь.
Колип сьылӧм шы улын
Мунам берегӧд ми.
Олӧ морӧсын тулыс,
Ыджыд муслунлӧн би.

Тэныд корся ме дзоридз,
Коді кыа кодь гӧрд.
Менӧ дінад тэ дорин,
Тэтӧг места ог тӧд!

Мыйла сёрнитны уна?
Гӧгӧрвоам ми сідз.
Кытчӧ олӧмыс мунӧ,
Шуд сэн — дзоридза видз.
Ми ог кыссьӧй йӧз бӧрын,
Сетчӧ миянлы удж.
Ставыс бур миян йӧрын,
Норлун милань оз вудж.

Тэныд корся ме дзоридз,
Коді кыа кодь гӧрд.
Менӧ дінад тэ дорин,
Тэтӧг места ог тӧд!

1962 во.