* * *

Тима, дерт нин, пӧрысь,
Арлыдсӧ нин воштӧм.
Морт жӧ! Тима бӧрысь
Вӧтчы мукӧд тоштӧм!

Мыйкӧ излас нэмсӧ,
Бользьӧ-кывбӧритӧ,
Абусӧ и эмсӧ
Ӧтилаӧ йитӧ.

Кытчӧ сійӧ пуксяс,
Куль кӧ кыскӧ сэтсьӧ!
Дінас том йӧз шуксяс,
Сы дінӧ пӧ петсьӧ.

Тима бызгас-бызгас,
А кор мыйкӧ вашкас,
Серамӧн зон брызгас,
Ачыс сӧмын кашкас.

Ныв кӧ сэті мунас,
Воськов регыд содтас,
Асьсӧ, югыдлунӧс,
Быдсӧ яндзим сотас.

Коді тӧдас, сӧрӧ
Мый сэн пеж вом тайӧ;
Енногаяс шӧрӧ
Сійӧс, дерт, он вайӧ.

Изки! Оласногӧн
Зэв шань эськӧ ачыс;
Оз мун йӧзӧ могӧн,
Пыр нин ломтӧм пачыс.

Абу бара йӧртӧд
Сылӧн жугйӧн тыртӧм;
Быдсӧ иган, кӧртӧд —
Сьӧмыс пӧ тай быртӧм.

Оз тӧд кӧні кабак,
Чуньлыскысь пӧ юӧ
Кывтас; оз ю табак,
Ныр-вом ляксьӧ, шуӧ.

Мый весьшӧрӧ шуны,
Оз бара куж Тима
Пӧръявны ни гуны —
Медся на бур нима!

Сы ордысь на нэмӧн
Омӧль эз вӧв петӧм;
Лякны мортӧс немӧн —
Да куль шмонькыв сетӧм.

1864. Сыктывдін.