ТАЙӦ ВӦЛІ СӦДЗЬЮ ВОЖЫН
(Мойдкыв)

Сійӧ тӧвнас, эз на вун ӧд,
Сапкис лымйыс лунысь лунӧ,
Коді сӧмын эз и тунав:
Нянь да вотӧс лоӧ уна.

Кыдз и вӧр-ваыслы колӧ,
Тӧв бӧрсяыс тулыс волӧ.

Саридз пасьта ытва вӧлі,
Ямис ньӧжйӧника, чӧла.

Сэсся мича Сӧдзью вожын
Пуксис шоныд гажа гожӧм.

* * *
Пожӧм сирлысь кургов кӧрсӧ
Ягын апаліс сэн Вӧрса.
Васа болскӧдчис сэн нюрын.
Зыкӧн олісны... Мый бурыс?

Вӧрса Васа вылӧ горзӧ:
«Мыйла ныран мырпом корсӧ?
Нюйтӧсь бӧжнад тыас сунав,
Ваыс, майбыр, тырмӧ уна».

«Чардби тэныд кос рой тошкад!» —
Васа воча сылы пошкӧ.

* * *
Кыкӧн вензьӧны кӧ, пӧвстас
Сюйсян — ыджыдджык би ӧзтан.
Вензьысьяслы шогыд вылӧ
Гыма кымӧр найӧс кылӧ.

Скӧрйывсьыд кӧ мыйкӧ вӧчан,
Неминуча суас стӧча.
Биа ньӧвнас чардби лыйӧ,
Конда пуӧ инмӧ сійӧ.

Оз ков сюмӧд ни тай сартас,
Биыс ӧзйӧ, тӧлыс гартас...

* * *
Мыйыс сӧмын тан оз вӧчсьы:
Биысь пышйӧ ручыс кӧчкӧд.
Йӧра ошкӧд, быттьӧ вокъяс, —
Сідз и печласьӧны кокъяс.

* * *
Сотчисны и гутъяс, номъяс,
Чишкасисны медся ёнъяс...
Мыжтӧм-гректӧм кывтӧм пемӧс
Муртса дзикӧдз эз во немӧ.

Век жӧ бурыс лёксӧ вермӧ,
Со нин вӧляникысь зэрмӧ...
 
Кытчӧ сӧмын вошис Васа?
Чишкасьӧма жӧ пӧ, паса.
Вӧрса тӧвзьӧма зэв ылӧ,
Ӧдва котшӧс дукыс кылӧ.

Вӧр-ватӧ кӧ юкны мӧдан,
Либӧ сотчан, либӧ пӧдан.
Бур му вылас овны зыкӧн —
Чегны олӧмыслысь пыкӧд.

Няньӧн-солӧн юксьӧ коді,
Шуда мӧвпъясӧн пыр водӧ.