РУЧ ДА ТУРИ

Руч да тури гӧститчыны кутісны. Сват да сваття найӧ вӧлі шусьӧны. Руч шуӧ:

— Ме туриӧс кора гӧститны!

— Волы, пӧжалуйста, ме ордӧ гӧститныыд. Ме виччыся тэнӧ важӧн нин. Талун нӧкъя рач вӧчи. Волы, да пукалам ӧтилаын.

Тури сӧгласитчис:

— Вола, сваття, коран да, ог и кӧсйы шванитчыны. Шванитчӧмын абу делӧыс. Ме локта, дай пукалам ӧтлаын.

Локтіс тури руч ордӧ. Руч вайис паськыд скӧвӧрӧда, вӧчӧма зэв вӧсньыдика, пуктӧма нӧк, пӧжалӧма. Зэв эськӧ и чӧскыд, да, тури «клён-клён-клён» кокыштӧ, а ньылыштныыс оз сюр: нырыд кузь сылӧн. А руч паськыд кывнас кыкысь-куимысь мавтыштіс, и абу нин нӧкйыд, бырӧма. А турилы сэтшӧм лои ӧбиднӧ да думайтӧ:

— Вот, корис да, татшӧма менӧ и гӧститӧдіс. Час, гашкӧ, ме на слӧйма асьсӧ гӧститӧдны. Пукыштіс дай шуӧ:

— Час ме муна сэсся гортӧ. Сваття, волы ме ордӧ. Ме понда виччысьны.

А руч шуӧ:

— Вола.

Ачыс думайтӧ:

— Тэнӧ гӧститӧді да ӧд ӧтарӧ ог ну, дерт, дерт, жӧ вола!

Тури лӧсьӧдіс кузь, джуджыд кувшин, пуктіс сэтчӧ ма, пызан вылас сувтӧдіс. Руч локтӧ, тури здоровайтчӧ:

Милости просим, сваття, пуксьы пызан дорас матӧджык!

Локтіс.

— Пукся, дерт, локті нин да.

— Сёй, со менам ма вайӧма. Старайтчышт.

Руч кувшин дорсӧ мавтыштӧ да мавтыштӧ кывнас, а тури юрсӧ сюйлас, кыскас вом тырыс, ньылыштас да бара. Быдӧн ачыс нёняліс матӧ. А руч дорсӧ нюліс-нюліс, сідзик и нинӧм чӧскыд кӧрсӧ эз кывлы, сӧмын кывйыс юммыштліс. Вот сэсся прӧщайтчыны кутісны. Кыкнанныс ёна зэв кланяйтчӧны, мӧда-мӧдыслы пасибӧ висьталӧны.

Вот и сідзи и торъялісны сэсся. Ӧні, гашкӧ, оз и волывлыны, лӧгасисны сэсся сы бӧрын.