НАЛЬК


Сьӧкыд висьтавны, корджык эськӧ Гӧней Васьыс тайӧ нальксӧ аслыс сиавліс. Гашкӧ, первой воас на продавечалігӧн, аслас чаль чуньлы щӧті моль кыскавны-лотшкӧдны. Быд моль — кӧпейка либӧ дас кӧпейка. Ӧтилысь да мӧдлысь — шайтъяс ӧксясны.

А, гашкӧ, сёрӧнджык нин, кор винаӧн вузасьны заводитліс. Зэв лышкыда сэки сетавліс дозъяссӧ уджйӧзӧн шоммӧм юра мужикъяслы. Босьтасны ӧтиӧс, а Вась аслас гуся кабалаӧ куимӧс гижас. Мынтысигас мукӧдыс эськӧ и туркнитчылас, та мында пӧ эг босьтлы, но вывті ёна эз вензьыны, друг да мӧдысь оз сет уджйӧзнас.

Татшӧм гусясьӧмсӧ регыд казялісны да пӧльыштісны Васьӧс прилавок сайысь, но эз ёна бокӧ. Кладовщикӧн индісны прӧдукта видзан складӧ. Быдса во эз шырась, видзӧдіс, кыті слабджык, кытысь сэсся позьӧ унджык тшепыштны. Печенньӧ ящик сӧмын гусяліс. Аддзис ӧтчыд — ящик пельӧсас крысаяс ки тӧрмӧн розь вӧчӧмаӧсь. Ёна нин ветлӧдлӧмаӧсь, гӧнныс быдсӧн кольӧма, но унасӧ абу на новлӧмны. Вась ректіс печенньӧсӧ сэті жӧ розьӧдыс да нуис гортас. Сэсся комиссия корис сельпоысь, локтӧй пӧ видзӧдлӧй, крысаяс ящик печенньӧ новлӧмны, гашкӧ, спишитанныд. Комиссия видзӧдліс: да, налӧн пӧ делӧ! Сельпо предыс нырсӧ на матӧдліс розь дорас. Крыса дук пӧ и эм, спишитны ковмас.

Сэсся накладнӧйяснас пондіс ворсӧдны том вузасьысьяссӧ. Налӧн растрата, Васьлы прибыль. Тадзи и ветлӧдліс сійӧ аслас сиалӧм нальк пыр, кытчӧдз ачыс жӧ и эз шед.

Коркӧ ӧтчыд, ӧшыбкаӧн ли мый ли, сельпоӧ водка вайисны куим пӧв унджык, мыйта корлӧмаӧсь. Предыс шуӧ, примитлы пӧ, ӧти стен дор тэнад дзик тыртӧм, мед сэтчӧ пыртласны.

— А меным ӧд мый, тӧварыс штучнӧй, примитны-лэдзны нинӧм оз сулав.

Быдса куим рад тэчисны ящикъяссӧ, дзик нин йиртӧдзыс кыпӧдалісны водка чипассӧ. Мед, шуӧны, сёйны оз кор, запасыд сійӧ абу омӧль.

— А тэ эн балуйт, — шуис Васьлы предыс, — ме тӧда, тэ он ю, а корысьыс дӧзмӧдчыны пондас быд лун. Ачыд тӧдан, кутшӧм ӧні партияыслӧн политикаыс. Стрӧг ӧні ставыс сы серти.

Гӧней Вась збыльысь эз ю. Карактерыс коднас йӧй, да дзик сы вӧсна. Полӧ сійӧ вина босьтны вомас, лёк полӧмӧн полӧ. Пырас складас да ылісянь видзӧдӧ водка чипас вылас. Кор матыстчылас сы дорӧ вӧрысь джодж плакаяс вывтіыс, чипасыс тожӧ вӧрзьылас-шатовтчылас. Шаткӧй тай делӧыс, — думайтӧ Вась, — колӧ видзчысьӧмӧнджык...

Бура уна колис кадыс водкасӧ пыртӧмсянь, а Гӧней Васьлы ун ни олӧм. Век син водзас водка ящик чипасыс. Пӧрас кӧ, — думайтӧ, — ок и мичаа жӧ пӧрас, музыкаӧн, уна жӧ водка киссяс да пакталас, мыйта добра вошас. Та вылнасянь? Вылысджык радъяссьыс ни ӧти дзонь сулея оз коль. Колӧ эськӧ предсӧ матӧджык сэтчӧ вайӧдлыны, мед аддзылас. Колӧ кыдзкӧ петкӧдлыны, мый ставыс тайӧ вермас пӧрны, но оз пӧр. Со кыдзи колӧ. Мед сӧмын мӧдлаӧ водкасӧ эз нуны-а.

Аскинас предыс ачыс воис складас, корны эз ков.

— Колӧ ӧд мыйкӧ йӧзыслы шыбитыштны выль во кежлас, — шуӧ.

— А мый шыбитан? Свежӧй чериыс эм неуна, садлы да больничалы шуӧма. Индийскӧй чай эм, мыйтаӧн воас. А тані, волы татчӧ, кофе на эм. Тайӧс, гашкӧ, ог и лэдзӧй, ас костаным. А?

— А мый нин татысь петкӧдлан йӧзыслы, нагӧрнитчасны сӧмын.

— Таті бара-й ӧкуратнӧ ветлӧдлы, кань моз. Джоджыс вӧрӧ, а водкасӧ джуджыда тэчӧма.

Пред муніс. Но вот, ӧні пӧрадок. Сэсся ставыс, кыдз тай шуласны, дело техники. Вась прамӧя нин кутчысис аслас планӧ. Первой артыштіс, уна-ӧ жугалас, кор грымгысяс тайӧ стендорса чипасыс, уна-ӧ бак ли канистра ковмас.

Рытнас, сёрнас нин, кор йӧзыс водісны узьны, Гӧней Вась вайис гортсьыс кык лемень бак да бензинӧн дуксьӧдтӧм канистраяс. Зептас дзоляник мӧлӧт. Первой сылы колӧ лэдзавны вылыс кык радсьыс ящикъяссӧ. Джоджсяньыс вылӧдз оз судз, да пызан вайис, сы дорӧ улӧс сувтӧдіс. Таті лэччыны-кайны пондас ящикъяснас.

Лэдзаліс. Ӧні заводитіс тонькӧдны ичӧт мӧлӧтнас сулея юръясӧ да водкасӧ кисьтавны бакъясас. Но эз быдӧнлысь юрсӧ жуглы. Мукӧдыслы пыдӧсас точнитас. Оз ӧд, — думайтӧ, — ставыслӧн ӧтилаті жугав. Кодкӧ быттьӧ сулаліс кӧ ӧдзӧс дорас, ывлаас, кыліс, кыдзи тінькмунӧ-жугалӧ сулеяыс, а сэсся буль-буль-буль.

Кор ставыс эштіс, тыра дозъяссӧ матӧдіс ӧдзӧсланьыс. Найӧс думыштіс нуны бӧрыннас даддьӧн. А ӧні колӧ на бӧр кыпӧдавны жуглӧм стеклӧ тыра ящикъяссӧ местаас, сы бӧрын меститны бакъяссӧ да бӧр волыны татчӧ. Но сэки нин складас пыравны оз ков. Стенас, код бокӧ тэчӧма ящикъяссӧ, эмӧсь вӧсньыдик зор тӧрмӧн потасъяс. Кольӧ сӧмын йӧткыштны да аслыс весасьны ӧдйӧджык. Асывнас Вась пырас складӧ, а сэні... Ӧдйӧджык пред дорӧ. Локтӧй пӧ волӧй, видзӧдлӧй, мый менам лоӧма. Но ӧні Вась медводдзаысь на рытсяньыс пукалӧ да куритчӧ. Кутшӧм эськӧ думъяс сылӧн жуӧны-бергалӧны юрас? Оз, нальк пезьдӧм йылысь сійӧ оз думайт. Кӧнкӧ, гашкӧ, зэв нин пыдын визьнитлас юр вемас татшӧм мӧвпыс. Сійӧ думайтӧ: кыдзи бурджык вузавлыны гусялӧм водкасӧ. «А мыйла колӧ вузавны? Ме тайӧ водка вылас керка кыпӧда, пятистенка сарайӧн». Татшӧм думъяссьыс Вась весиг папироссӧ помӧдз вунӧдіс куритны. Шыбитіс кусӧм помсӧ да кутчысис ящикъяссӧ кыпӧдавны. Босьтас, катас, пуктас. Ичӧтджык тушаыс, да вылыс радас ящикъяссӧ эз и вермы помӧдзыс йӧткавны.

Со и кыпӧдіс медбӧръя ящиксӧ. Кокниа ветлӧдлӧ, полӧ ас вылас пӧрӧмысь. Улӧссӧ нуис местаас. Локтіс пызанысла. Паськӧдіс сывсӧ да кутчысис ӧтар-мӧдар помас. Мышнас вӧлі да ящикъяслысь надзӧник пӧрны мӧдӧмсӧ эз казяв. Пызаннас кык воськов на вевъяліс вӧчны, сэтчӧ и личкис сійӧс. Кутшӧм музыка сьыліс-ворсіс, кор киссисны ящикъясыс!..


Гижӧд
Нальк
Жанр: 

lkejrlkelkrgner klrjnelknfrkl ekjnrjkenfrej

1