* * *

Ме ог видзӧд ылі море сайӧ,
Кытӧні мӧд тӧвъяс и мӧд гы.
Ме сир дукӧн ӧвтысь вӧрӧ кая,
Кӧн электропилаяслӧн шы.

Тані менам первойысь вын садьмис,
Удж вылын мед ки эз мунлыв лич.
Тайӧ вӧрысь первойӧн ме аддзи
Аслам мулысь мырпом коръя мич.

Нинӧмтор, мый овлывлӧ зэв сьӧкыд,
Кымӧрӧн кор ветлӧны лӧдз-ном.
Весьлунсӧ ме некодыр ог тӧкӧд.
Уджала — и сьӧлӧмӧй век том.

Лэдза ме ас киясӧн веж зарни,
Медым чужан муным вӧліс ён.
Коммунизмӧ восьлалысь ударнӧй
Шусьӧ миян мирнӧй батальон.

1959 во.