КЛАССНӦЙ ШОПЕР


— Миян начальникным коркӧ велалас оз, бара-й, машинанас ветлӧдлынысӧ-а? — юрсӧ катлӧдлыштіс Попов Сергей, кор аддзис ӧшинь пырыс РОВД-са начальник Горскийлӧн отдел дорысь «Жигульнас» вӧрзьӧмсӧ.

— Да тэ нӧ мый? Ӧнітӧ сійӧ класснӧй шопер нин! — пыр жӧ сюртчис сёрниӧ оперативнӧй дежурнӧй Семен Вась.

— Класснӧй шопер?!

— Да, аддзылін кӧ тэ, кыдзи сійӧ водзті руль саяд кимӧститчыліс! Пуксьы лӧсьыда да кывзышт.

Семен Вась кисьтіс стӧканӧ чай, содтіс песок, тэрмасьтӧг гудралыштіс да заводитіс:

— Менам коркӧ вӧлі важиник «ГАЗ-69», сідзи гожӧмнад восьсӧн и журъялі сы вылын, тенттӧг и пом. А сэки ӧд быд предприятиелы гожӧмнад сетлісны план зорӧдавны мыйкӧ мында тонна турун. И вот мунім видз вылад менам «ГАЗ-69»-ӧн, и Горский тшӧтш, сэки сійӧ вӧлі следственнӧй отделениеса начальникӧн. Эжва вомӧн поскыд эз на вӧв да паромӧн вуджӧдчисны. Но метӧ лӧсьыда вуджӧді ӧтарӧсӧ. Лунтыр, кӧнешнӧй делӧ, куртім-чӧвтім. Воис рыт. Бара сӧлім машинаӧ став чукӧрӧн кодзувкотъяс моз, воим берег дорӧ, виччысям паром. И сэки Горскийлы дум вылас уси, мый часісӧ вунӧдӧма бадь вылӧ, кытчӧ ӧшӧдліс уджавнысӧ заводитігас. «Вайлы, — шуӧ меным, — машинатӧ да ме журкнитла бӧр-водз». «А рулитнытӧ сямман?» «Ӧбижайтан! Кутшӧм мужик нӧ машинаӧн ветлыны оз куж?!» «Но, босьтлы, сӧмын менам тормозыс абу, эн вунӧд!» «Аха», — вочавидзис, и тшын-бус лэбис бӧр видз вылӧ. Паром локтіс, ми вуджим ю вомӧн, пӧпутнӧй машинаӧн воӧдчим отдел дорӧдз. И вот, понятнӧй делӧ, пукала да виччыся ме Горскийӧс. Час коли, кык, а сійӧ абу и абу. Видзӧда часі вылӧ да майшася. Регыд автобусъясыд дугдасны нин Пасаёляд ветлыны, сэки меным подӧн ковмас шлопкыны аэропорт да шойна дорті. Дзикӧдз дӧзми, пыри дежуркаӧ и дежурнӧйлы шуи: «Звӧнитасны кӧ вуджӧдчанінсянь да висьталасны, мый паром вывсянь машина Эжваӧ суныштіс, эн эскы! Тайӧ шмонитӧны». А ачым бӧръя автобуснад гортӧ журӧді.

Менам мунӧм бӧрын, пӧнятнӧй делӧ, регыд и звӧнитасны дежуркаӧ, мый машина паром вывсянь Эжваӧ сунгысис. Дежурнӧйыд, дерт, талы оз эскы. Коркӧ сэсся Горский кутюпи кодь ва локтас отделӧ, ачыс скӧрсьыс скӧр. Кыдзкӧ тай тросъяс йитлӧмӧн кыскӧмаӧсь жӧ бӧр менсьым машинатӧ васьыд-а. Та бӧрын Горский ды-ыр эз сӧвлы руль саяд.

Но кывнад мозолитчынытӧ Горскийыд кужӧ да карьернӧй пос кузяыд надзӧникӧн каттьысис РОВД-са начальникӧдз. Гӧтырыс пилитӧ лун и вой, тшӧктӧ аслыс машина ньӧбны. Кытчӧ воштысян? Быть велӧдчы. И вот отделӧ выль УАЗик воис. Сы вылын Горский ӧтчыд ачыс миянлысь опергруппа нуӧдіс Кушашорӧ, мыйкӧ тай сэні вӧлі кузь киаяс пакӧститчыштӧмаӧсь да. Ме тшӧтш жӧ накӧд кайлі. Миянӧс сиктад колис уджавны, виччысьлӧй, пӧ, ачыс кытчӧкӧ шурӧдіс-муніс машинанад и вошис. Рыт матыстчыны кутіс. Ми сэні ӧти жуликӧс кутім, сельсӧветын пукалам да виччысям.

А Горский, вӧлӧмкӧ, мунӧма велӧдчигмозыд вӧр кыскалан туйӧд, вӧчӧма зэв ыджыд кытшов, лэччӧма трасса кузя бӧр Веждінӧдз да бара кайӧма Кушашорад. Воис да ми УАЗиксӧ эгӧ тӧдӧй, дзик шогмытӧм. Быттьӧ джуджыд няйт гуранӧ дзоньнас кранӧн нарӧсьнӧ дзумгылӧмаӧсь да недыр сэні видзыштӧм бӧрын лэптӧмаӧсь. Но, сӧлім, жуликӧс бӧрас пуксьӧдім кык опер костӧ. Руль сайын Горский, сыкӧд орччӧн ме.

Мӧдӧдчим Веждінлань. А сэні буретш ӧти участок вылын туй вӧчысьяс вӧлі уджалӧны. Мыйӧн сэтчӧдз воим, то найӧ бригаданас сувтісны туй шӧрас, потшисны миянлысь мунанінсӧ, оз лэдзны машинатӧ. Ӧтнам ме формаа, мукӧдыс гражданскӧй паськӧмаӧсь вӧліны. Ковмис меным и петны рабочӧйяс дорад. Кӧнешнӧй делӧ, интересуйтча, мый лои, мыйла миянӧс сувтӧдӧны, туй оз сетны?

И ӧти матыстчис ме дорӧ, тшук, бригадирыс, да зэв скӧра шуалӧ:

— Капитан ёрт, висьталӧй асланыд шоперлы, мед первой велӧдчас ветлыны полигон вылын, а сы бӧрын вӧлисти нин трасса вылӧ петас!

Вӧлӧмкӧ, Горскийыд на дорті гиля-голя мунігас путкыльтӧма гудрон бӧчкасӧ, чегъялӧма зыръяссӧ да нӧшта кутшӧмсюрӧ инструмент.

Ковмис меным извиняйтчыны бригада водзас да шуны, мый тайӧ некытчӧ шогмытӧм шопертӧ ми аски жӧ вӧтлам удж вывсьыс, мед ушымгайтчас, кытчӧ гажыс.

Сэкся кад сертиыд кӧ босьтны, то ӧні Горскийыд дзик нин класснӧй шопер.


Гижысь: 
Гижӧд
Класснӧй шопер
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1