ИЗКИ ДА ПЕТУК
Олісны-вылісны старик гозъя. Найӧлӧн вӧлі ӧти ныв да ӧти пи. Кодыр старикъяс кулісны, соча-вокалы коли толькӧ керка.
Вокыдлӧн кутіс кынӧмыс сюмавны, и сійӧ ыстыс сочсӧ гӧбӧчас нянь корсьны. Соч пырас гӧбӧчӧ, корсяс и аддзас баксялӧм корка, а мусьыс аддзас, мый сэтчӧ петӧ мыйкӧ ёсь йыла, турун кодь. Соч нянь коркатӧ петкӧдас, и найӧ сійӧс зэв чӧскыда сёясны.
Аскинас вок бара ыстӧ сочсӧ гӧбӧчӧ нянь корсьны. Соч пырас, корсяс-корсяс и аддзас бара баксялӧм корка, а быдмысь ёсь йылаыд быдмӧма нин весь кузя. Сочыд коркатӧ петкӧдас, и сійӧс бара зэв чӧскыда сёясны.
Коймӧд луннас вокыд бара ыстӧ сочсӧ гӧбӧчӧ нянь корсьны. Соч пырас, корсяс-корсяс, и аддзас нянь корка, а быдмысьыд быдмӧма джоджӧдзыс нин.
Сэсся быдмысьыд джоджсӧ розьӧдас и зэв ӧдйӧ кутас быдмыны. А сійӧ вӧлӧма капуста мач быдмӧ. Быдмас-быдмас и пӧтӧлӧксӧ розьӧдас, и зэв джуджыд лоӧ. Сэсся вок кутас кайны йылас, каяс и мач пытшсьыс аддзас изки. Изкитӧ босьтас, лэччӧдас и пуктас кывтас, а сійӧ изкиыд вӧлӧма ачыс изысь. Найӧ кутасны изны и регыдикӧн озырмасны.
Ӧтикысь найӧлӧн изкиыд вошӧ. Вок мунас корсьны. Мунас-мунас, и сылы паныдасяс петук. Петукыд и юалас:
— Кытчӧ мунан?
Вокыд шуас:
— Изки корсьны.
Петукыд шуӧ:
— Менӧ тшӧтш босьт.
Вокыд босьтас, и мӧдӧдчасны. Найӧлы паныдасяс руч. Петукыд шуас:
— Ручӧй, ручӧй, ме пытшкӧ пыр!
Руч пырас. Найӧлы паныдасяс сэсся кӧин. Петук шуас:
— Кӧинӧй, кӧинӧй, ме пытшкӧ пыр!
Кӧин пырас. Мунасны-мунасны, и паныдасяс найӧлы ош. Петук шуас:
— Ошкӧй, ошкӧй, ме пытшкӧ пыр!
Ош пырас и мунасны найӧ водзӧ. Сэсся найӧ воасны керка дінӧ. Петук шуас:
— Тэ мун грездас, кор да сёй, да эн гусясь!
Вок мунас, а петук пос улас пырас и горӧдас:
— Кикирукку! Дядьӧ, изкитӧ вай!
Дядьӧ шуӧ уджалысьлы:
— Пет, изки корысьсӧ ваӧ сюй да поньтав!
Уджалысь петас, петукӧс кутас, ваӧ сюяс и поньталас изъясӧн. Петук из костіыс юрсӧ чургӧдас и став васӧ юас, и ачыс петас. Петас да пос улас мунас, и горӧдас:
— Кикирукку! Дядьӧ, изкитӧ вай!
Дядьӧ шувас уджалысьлы:
— Пет, изки корысьсӧ рынышӧ сюй да ӧзты!
Уджалысь петас, петукӧс босьтас и рынышӧ сюяс, идзасӧн вевттяс и ӧзтас. Петук рыныш шӧрас сувтас, кок пӧв йылас бергавны кутас и ваӧн киськавны бисӧ. Би сідзи и кусас. Петук рынышысь петас, дядьӧ пос улӧ пырас и горӧдас:
— Кикирукку! Дядьӧ, изкитӧ вай!
Дядьӧ шуӧ:
— Пет, изки корысьсӧ гидӧ сюй ыжъяс дінӧ!
Уджалысь петас, петукӧс сюяс гидӧ. Петук сувтас пельӧсӧ и шуас:
— Ме пытшкысь, ручӧ, пет!
Руч петас и став ыжсӧ джагӧдас. Уджалысь петас видзӧдлыны, а сэтысь руч петӧ, и ручыд пышъяс давйӧ. Петукыд мунас пос улас и горӧдас:
— Кикирукку! Дядьӧ, изкитӧ вай!
Дядьӧ шуӧ:
— Пет, изки корысьсӧ йӧрт карта вылӧ, мӧсъяс дінӧ!
Уджалысь петас, петукӧс йӧртас, а петук сувтас пельӧсас и шуас:
— Кӧинӧ, ме пытшкысь пет!
Кӧин петас и став мӧссӧ джагӧдас. Уджалысь петас мӧс видлыны, и став мӧскыс кулӧма. Кӧиныд петас да пышъяс давйӧ. Петук мунас дядьӧ пос улӧ и горӧдас:
— Кикирукку! Дядьӧ, изкитӧ вай!
Дядьӧ шуӧ:
— Пет, йӧрт изки корысьсӧ гидняӧ!
Уджалысь петас, петукӧс йӧртас, а петук сувтас пельӧсӧ и шуас:
— Ошкӧ, ме пытшкысь пет!
Ош петас и став вӧвсӧ джагӧдас. Уджалысь петас вӧв видлыны, а сэтысь петӧ ош. Ошкыд пышъяс давйӧ, а петук мунас пос улӧ и горӧдас:
— Кикирукку! Дядьӧ, изкитӧ вай!
Дядьӧ шуӧ:
— Пет, вай татчӧ изки корысьсӧ, ме сійӧс сёя.
Уджалысь петас, петукӧс ваяс, а дядьӧ сійӧс курччывтӧг ньылыштас (дядьӧыд горш вӧлӧма). Олас дядьӧ и петас сітасьны. Петук юрсӧ чургӧдас и горӧдас:
— Кикирукку! Дядьӧ, изкитӧ вай!
Дядьӧ шуас уджалысьлы:
— Ветлы, вай паськыд чер и керышт юрсӧ петукыслысь!
Уджалысь ваяс чер и керыштас, но петукыдлы оз инмы, а инмас дядьӧлы задъяс, и дядьӧлӧн задйыс орӧ. Дядьӧыд шуӧ:
— Мӧдарсяньыс керышт!
Уджалысь керыштас и дядьӧлы бара задъяс инмас, и дядьӧыд кулӧ. Петук петас и шуас уджалысьлы:
— Мый тэ изкинас керан, лутшӧ меным вай, а тэныд став олӧмыс кольӧ!
Уджалысь изки сетас, петук керка вевт вылас каяс и горӧдас:
— Кикирукку! Изкиыдла лок! — и вошӧ.
Вок локтас, изкитӧ босьтас, гортас нуас, и ещӧ ёна озырмасны. И ӧні олӧны-вылӧны.
