ДЗИРДАЛЫСЬ ФОНТАН ДОРЫН
Тайӧ бӧръя мича арся рытнас театр водзын дзирдалысь фонтан дінӧ чукӧрмис торйӧн нин уна йӧз. Алӧйгӧрд шондіыс пыр ӧдйӧджык нёрис увлань да кумач рӧмӧн мавтіс кытчӧкӧ тэрмасьтӧг шлывгысь баля юра кымӧръясӧс. Вӧлі дзик гожся моз шоныд да лӧнь. Но гожся кодь шоныд рытыс, дерт жӧ, эз вермы пӧръявны фонтан дорӧ чукӧртчӧм войтырӧс.
Ставӧн гӧгӧрвоисны, мый лун-мӧд, гашкӧ, лоӧ на мича. А сэсся ылі йиа саридзсянь ыркнитас кӧдзыд вой тӧв да ваяс аскӧдыс зумыш, руд кымӧръяс да югъялысь лым чиръяс. И став ловъя лолыс гӧгӧр турдыны кутас. Оз нин кольны сэсся фонтан дорын пукалысьяс. Коді нӧ вермас йирмӧг босьтысь вой тӧв улын пукавны лабич вылын? Гашкӧ нӧ, сӧмын радейтчысьяс. Да и то недыр. Сэсся ӧд и ачыс фонтаныс тулысӧдз куслӧ.
Тайӧс бара жӧ нин тӧдіс ачыс фонтаныс. Тӧдіс, мый тулысӧдз сэсся сылы ковмас ланьтлыны-кувлыны. Та вӧсна сійӧ тайӧ рытнас торйӧн нин мича рӧмъясӧн сявкъяліс-дзирдаліс. Ичӧтик розьясысь петысь вӧсньыдик ва сюръяяс качлісны вылӧ-вылӧ, ворсӧдчисны раминик тӧв улын лӧз и гӧрд, турунвиж и кольквиж рӧмъясӧн, а сэсся бӧр усьлісны мулань, мед вын-эбӧс чӧжыштӧм бӧрын нӧшта на вылӧджык качӧдчывны.
Фонтаныс быттьӧ дыр тӧвся узьӧм водзвылын зілис бӧръяысь гажӧдыштны чукӧртчӧм йӧзсӧ, кодъяс пукалісны орчча лабичьяс вылын да фонтанӧн нимкодясигмоз тэрмасьтӧг варовитісны ас костаныс.
Олӧмаяс казьтылісны кольӧм вояссӧ, сійӧс, мый со бара ӧти шоныд да мича гожӧм прӧйдитіс. И код тӧдас, дыр-ӧ нин налы колис овны тайӧ шонді улас. Но пыр матынджык сійӧ здукыс, кодӧс тӧд вылӧ уськӧдігмоз топавлӧ сьӧлӧмыд. Ӧд сэтшӧм гажа мувывса олӧмыс да сэтшӧм ӧдйӧ да тӧдлытӧг сійӧ кольӧ. И шог овлӧ таысь сьӧлӧм вылын.
Томъяс гусьӧникмоз кутчысьлісны ӧта-мӧдныскӧд да шӧпкӧдчисны сы йылысь, мый олӧмыс налӧн водзын на, мый чайтӧмъяс серти ставыс лоӧ бур, мый аскиыс ваяс налы помтӧм шудлун. Ӧд томъяслӧн морӧсаныс помтӧм вын-эбӧсыс да сэтшӧм гораа да шудаа тіпкӧны сьӧлӧмъясныс. И быттьӧ аслыныслы шуда олӧм кевмигмоз кадысь кадӧ шыблалісны фонтанӧ посни ыргӧн деньга.
А ичӧтик лёльӧ-больӧяс бать-мамыслӧн тӧждысян синъяс улын гажаа чилзігтырйи котралісны-ризъялісны фонтан гӧгӧр. Налы немтор йылысь на вӧлі тӧждысьны-майшасьны. Тайӧ ичӧтикъясыс этша на мый тӧдісны олӧм йывсьыс да олісны сӧмын талунъя лунӧн. Найӧ нимкодясисны фонтаннас, вылӧ качлысь дзирдалысь ва сюръяяснас да эз весиг кужлыны чайтны, мый сійӧ регыд кусас тулысӧдзыс.
Ачыс фонтаныс мича да гажа гожся лунъяссӧ казьтылігмоз да йӧзсӧ гажӧдігмоз дугдывтӧг ворсӧдчис ва сюръяяснас. Сійӧ ӧні казьтыліс, кыдзи торйӧн нин гажа вӧлі фонтан дорас гожся лунъясӧ, кор татысь водз асывсянь сёр рытӧдз эз быравлыны йӧзыс. Ставлы окота вӧлі пукалыштны фонтан дорын да пальӧдчыштны пӧдан жарсьыс сысянь локтысь ыркыд ва войтъясӧн.
А кутшӧм кыпыд сэки вӧлі челядьлы, кодъяс нарошнӧ волывлісны татчӧ купайтчыны да быдса часъясӧн резсисны фонтанысь петысь ванас, сералісны, горзісны, котралігмоз вӧтлысисны ӧта-мӧд бӧрсяыс.
Сӧмын сёр рытъясын разӧдчылісны татысь йӧзыс, кор фонтаныс эз нин сэтшӧма дзирдав да лӧньыштлывліс недыр кежлӧ вой улас. Но и сэки эз дзикӧдз тыртӧммывлыны лабичьясыс. Фонтан гӧгӧрсӧ гажӧдліс том йӧзлӧн гитара улӧ негораа сьылӧмыс. И весиг асъя войясын на тані пукавлісны радейтчысьяс. Сӧмын шонді петӧм бӧрас лӧньлывліс гӧгӧр. Кӧть эськӧ сэки шонділӧн медводдза югӧръяс улын фонтаныс дзирдаліс торйӧн нин мича югӧръясӧн. Но гежӧд коді аддзывліс сылысь тайӧ асъя мичлунсӧ. И сылы сэк весиг гажтӧм лолывліс.
Но сэсся вочасӧн садьмывлісны уличаяс. Бара фонтан гӧгӧрын лабичьяс тырлывлісны йӧзӧн. Бара фонтан гажӧдлывліс тані пукалысьясӧс аслас ворсӧдчӧмӧн. Ӧтияслӧн татчӧ пуксьылӧм бӧрын личавліс сьӧлӧм дойыс. Мӧдъяслӧн кыптыліс лолыс водзӧ вылӧ ыджыд эскӧмӧн видзӧдігмоз. Коймӧдъяслы долыд вӧлі видзаасьны фонтаныскӧд да сэсся тайӧ долыдлунсӧ найӧ нулісны асланыс гортаныс.
А ӧні мый. Фонтан оліс бӧръя лунъяс. Сійӧ бӧръя лунъяс гажӧдіс йӧзсӧ. Ачыс нимкодясис сійӧн, мый сэтшӧм коланаӧн вӧлі йӧзыслы кузь гожӧм чӧж. Сэк жӧ шог да гажтӧм босьтліс, мый со бара кузь тӧв кежлӧ лоӧ ланьтыштлыны, унмовсьлыны. Кутшӧм лоас сійӧ локтан тулысыс да гожӧмыс, код тӧдас. Ӧні ӧд здук-мӧд нин сӧмын сылы колис гажъявнысӧ. Таысь торйӧн нин шог вӧлі фонтаныслы. Кӧть эськӧ сійӧ зілис дзебны тайӧ шоглунсӧ да венны сійӧс аслас ворсӧмнас гожся моз мича бӧръя рытнас. Мый сэсся вӧчан, шуӧма кӧ кувлыны тулысӧдзыс. Тадзи ӧд сыкӧд унаысь нин вӧвлі. И унаысь сійӧ бӧр ловзьыліс. Но, дерт, олӧмыд абу помтӧм. Коркӧ и сылы, гашкӧ, лоӧ кусны. Но мед эськӧ эз на медбӧръяысь аддзыв гожӧмсӧ, шондіувса мичсӧ, мед эськӧ уна тулыс да гожӧм на волас гажӧдчысь фонтанлы да йӧзӧс гажӧдысьлы.
