ГЕНЯЛӦН ВӦТ


Гортас школаысь мунігӧн Геня Неверов шыасис другыс дінӧ:

— Вить, а Вить... Войдӧр, тӧдӧмысь, лӧсьыдджык вӧлі олӧмыд?

— Эн сӧр.

— Сэки эз ков велӧдчыны, лун-лун позис иславны либӧ купайтчыны. Майбыр, овлӧмаӧсь жӧ...

Спорӧ воисны другъяс. Витя весиг Геняӧс осёлӧн нимтіс. Геня кӧть осёлтӧ некор эз аддзыв, а чорыда скӧрмис, кулакъяснас мӧдіс ӧвтчыны. Гашкӧ, и косьӧ воисны, но Витя удитіс пышйыны гортас.

Рытнас Геня дыр лыддьысис, урокъяссӧ весиг эз велӧд. Водіс, а унмовсьны оз вермы, лӧгыс петӧ другыс вылӧ.

Коркӧ сэсся унмовсис жӧ. Унмовсис дай вӧтасьны кутіс. Сійӧ вӧт йывсьыс сулалӧ висьтавны.

...Быттьӧ асыв нин. Чеччис Геня Неверов, пуксис сёйны, а мамыс выя булки пыдди пызан вылӧ кыдъя нянь пуктӧма. Сэтшӧм чӧскыдтӧм, горштӧ кырлӧ. Йӧв стӧкан пыдди шома ырӧш тшӧктӧны юны. Кутіс пасьтасьны да чуймис: выль пальто местаас ӧшаліс лёк пасьшой. И портфельыс некӧн абу, ковмис дӧра сумкаӧн корысь моз школаӧ мунны.

Ывлаӧ петӧм бӧрын детина эз тӧд ассьыс карсӧ. Уна судта каменнӧй керкаяс пыдди сулалісны посньыдик пу керкаяс. Туйыс няйт да гуранӧсь, ӧдва верман вуджны. Оз тыдавны заводъяслӧн да мастерскӧйяслӧн джуджыд трубаясыс. Йӧзыс лёк паськӧмаӧсь, чужӧмъяс вылас налӧн гажтӧмлун да шог.

Кӧсйис автобусӧ пуксьыны, но уличаяс вылысь став машинаясыс кытчӧкӧ вошӧмаӧсь. Вель дыр ковмис шлёпиктыны подӧн, пӧсяліс быдсӧн кузь пасьнад. Медбӧрын воис школа дорӧ. Кӧсйис нин пырны ӧдйӧджык, дерт, кӧнкӧ, сёрмис урок вылад. Но мый тайӧ? Туйсӧ сылы потшис кузь юрсиа поп, шевгӧдіс кияссӧ, оз лэдз пырныс:

— Весась тась, кычипи! Кытчӧ пыран, зырым бедь! Озыръяслӧн челядьыс сӧмын тані велӧдчӧны, тіянлы и грамотатӧг овсяс.

Геня попысь сэтшӧма повзис, оз тӧд, кодарӧ пышйыны. Жаявтӧдзыс котӧртіс. Сэсся век жӧ радлыны кутіс: «Сідзкӧ, оз ков велӧдчыны, гуляйтны позяс мыйта колӧ. Урокъясӧс ӧд эг велӧд, бара эськӧ и «двойка» пуктісны. Час, кино вылӧ пырала».

Локтіс кинотеатр местаӧ, а сэні вичко сулалӧ, манакъяс печикысь ворсӧны ӧшинь улас. Детина дивуйтчис, дивуйтчис да магазинӧ мӧдӧдчис, кӧлач кӧсйис ньӧбны, а то кыдъя няньсьыд ӧні на шугрӧдлӧ. Пырис да бара чуймис: том ныв пыдди стойка сайын сулаліс кыз кынӧма мужичӧй. Синъясыс дзирдалӧны, сідз вот и пӧръялас. «Купеч ӧмӧй? И кытысь сійӧ лои?» — думыштіс Геня, сэсся полігтырйи мыччис деньгасӧ да корис ӧти кӧлач. Вузасьысь видзӧдліс ыргӧн пятак вылӧ, сэсся шыбитіс сійӧс пач сайӧ.

— Тайӧ сӧветскӧй деньга, мем колӧ николаевскӧй, медым сарӧс сэтчӧ рисуйтӧма.

— Абу менам сэтшӧмыс, — нормис тшыг детина, а ачыс видзӧдӧ банйӧм кӧлачьяс да тугъя кампетъяс вылӧ, и дуль ваыс муртса оз пет.

— Кӧсъян кӧ кӧлач сёйны, уджавны пыр. Кутан меным отсасьны.

Тшыг кынӧма детинкалы быть ковмис сӧгласитчыны: кӧлач-кампетыд ӧд лёка чӧскыд. Геня уджалӧ лун... уджалӧ мӧдӧс... Водз асывсянь сёр рытӧдз: пес поткӧдлӧ, ва ваялӧ, мыськасьӧ, чышкысьӧ, сьӧкыд мешӧкъяс кыскалӧ. Лунтырнад сэтчӧдз мудзас, кывсӧ шуны дыш. Коймӧд луннас детина унмовсис удж вылас. Купеч скӧрмис, пӧрччис пражаа тасмасӧ да нӧйтны кутіс. «Милицияӧ норася. Ой, мездӧй, бур йӧз!» А кыз рушкуа купеч кучкалӧ и кучкалӧ. Сэсся тай детина вермис жӧ кыдзкӧ пышйыны. Чӧскыд кӧлачӧн да тугъя кампетӧн эз и удайтчы чӧсмасьны.

Локтіс гортас, а сёйны нинӧм. «Час кӧть телевизор дорын пукышта, вунӧдла, гашкӧ, сёйӧм йывсьыс». Но телевизорыс керкаысь вошӧма и радио оз кыв. А электричество пыдди комнатаас ломтысьӧ сартаса би. И книгаяс оз тыдавны. Дыр мысти тай сюри кутшӧмкӧ псалтыр, но Геня нинӧм сэтысь эз гӧгӧрво, шыпасъяссӧ пӧшти вунӧдӧма. Гижны ни лыддьысьны тӧлкӧн оз сяммы. Да и сартаса биыд синъястӧ курӧдӧ.

Ӧбиднӧ лои детинкалы. «Мыйсяма тайӧ олӧм? Москваӧ пышъя. Витя ветліс сэтчӧ батьыскӧд да ӧні на ошйысьӧ. Ог кӧсйы овны татшӧм гажтӧм карын». Пасьталіс киссьӧм пасьсӧ, зептас сюйис кыдъя няньтор, мӧдӧдчис аэропортӧ. Но сэні бара жӧ некутшӧм самолётъяс оз тыдавны. Сӧмын гӧгӧр няйт гуранъяс. И мича вокзалыс абу.

«Поездӧн ӧмӧй ковмас мунны?» Вель дыр восьлаліс кӧрт туй станциялань. Ывлаын пемыд да гажтӧм. Эз этшаысь нин усьлы, пасьыс кӧтасис, няйтчис, кынӧмыс сюмалӧ, бӧрдны окота. И гортсаясыс жальӧсь, юасьтӧг-висьтасьтӧг пышйис, колӧкӧ, шогсьӧмысла мамыс висьмас. Кӧть нин эськӧ бӧр бергӧдчыны, но вывті окота видзӧдлыны гажа Москватӧ.

Вель ылӧдз нин муніс, а станция абу и абу. Гӧгӧр шувгӧ сьӧд вӧр, войся сюзьяс повзьӧдчӧны. Кӧсйис кӧрт туй вылас кежны, но и сійӧс эз аддзы. Шуштӧм лои Генялы, кутіс шлюпкыны-бӧрдны. Курыд синвасӧ ньылалӧ да водзӧ кыссьӧ. «Воши... Збыльысь тай воши», ӧтилаӧ кежалас — вӧр, мӧдлаӧ вуджас — нюр паныдасьӧ. Сэсся мыйкӧ трачмуні и детинкалы паныд петіс руд кӧин, пиньяснас гурчкӧ, синъясас би ӧзйӧ.

Геня чуравтӧдзыс повзис. Заводитіс пышйыны. Кӧиныд — сы бӧрся, вот-вот суӧдас, кватитас лэчыд пиньяснас.

— Ма-м-ӧ-ӧ! Ой, мезды-ы-ы!

— Геня, мый тэкӧд? Эн-ӧ нин висьмы? — тайӧ мамыслӧн гӧлӧсыс. Кӧть и тӧдіс, а оз лысьт восьтыны синъяссӧ.

— Дона пи, мыйысь нӧ повзин? Гӧгӧр пӧсялӧмыд.

— Ог, ог, ог... Ог кӧсйы овны, кыдзи войдӧр овлӧмаӧсь, — нормӧм гӧлӧсӧн шыасис Геня, сэсся дыр малаліс боксӧ, быттьӧ кӧсйис видзӧдлыны, лӧзӧдіс эз яйыс купеч нӧйтӧмысь.

Пуксис крӧвать вылас да гӧгӧр мӧдіс видзӧдны. Комнатаын сӧстӧм да гажа. Биыс сэтшӧм югыд — синъястӧ ёрӧ. Сёрнитӧ радио. Батьыс пукалӧ телевизор дорын. Студентка чойыс ныр улын книга чукӧр, кызӧсь-кызӧсь. Пызан помын тарелка вылын тыдалӧ преник-кампет, выя булки.

— Гашкӧ, стӧкан йӧв юан, а то сёйтӧг водін. Вӧтасин али мый, пиук?

Детинка висьталіс лёк вӧт йывсьыс. Кор помаліс, чойыс дыр сераліс, а батьыс шуис:

— Вот и колӧ радейтны ӧнія олӧмтӧ, а тэ «двойкаясӧн» тырӧмыд.

Генялы син улас уси портфельыс. Босьтіс сійӧс, перйис тетрадьяс да заводитіс вӧчны урокъяс. Талун сійӧ дзик на первойысь татшӧм зілясӧ велӧдчис.


Гижӧд
Генялӧн вӧт
Жанр: 

lkejrlkelkrgner klrjnelknfrkl ekjnrjkenfrej

1