ВОДЗКЫВ ПЫДДИ


Менсьым кывбурӧс кӧ лыддьыны
Тэныд сюрӧ кад,
Тӧд, мый тэнӧ пукта пыдди ме,
Тӧдмасьны век рад.

Чужан муын йитӧ миянӧс
Уна ӧткодьтор.
Ылі туйын тэ кӧ, сиа ме,
Матысмас мед горт.

Мамным потан дорын баййӧдліс:
«Ло жӧ ён да сюсь,
Став шог-печальыс мед саялас,
Дона сӧкӧл, узь».

Муртса сувтім ми ас кок вылӧ — 
Кыскис ывла выв.
Мамӧ сёйны вӧлі горзывлӧ,
Быттьӧ он и кыв.

Сэсся кынтыліс и пӧсьӧдліс
Война кадся удж,
Кыдзи вокъяс моз ми лӧсявлім,
Висьтавны он куж.

Тані эзысь рӧма тулысӧ
Тӧдмалім любов,
Тані ёртъяскӧд, кыдз шуласны,
Сёйим кык пуд сов.

Кыдзи бать да мам оз бӧрйыны,
Сідз — и чужан му.
Некор — ӧні либӧ бӧрвылын — 
Войвылысь ог мун.