ВИТ ЧОЯ-ВОКА

Важӧн оліс-выліс гозъя. Налӧн вӧлі нёль пи да ӧти ныв. Мамыс-батьыс куліны. Мамсӧ пачводз улас дзебисны. Батьыс кулі, изки улас дзебисны. Сэсся найӧ мӧдӧдчисны туйӧ. Мунісны, эзысь кыдз локтіс. Ме пӧ татчӧ, муса сочӧй, муса вокъяс, кая, шуис ыджыд вок. Сійӧ сэтчӧ кайис. Эзысьтӧ лэдзис-лэдзис, лэччыны кутіс, шӧр выяс воис, сэсся сибдіс. Сэсся горзісны-горзісны, сэсся сійӧс колясны. Мунасны водзӧ. Зарни кыдз локтас. Мӧд вок кутас шуны: ме пӧ татчӧ кайла, зарнисӧ лэдзышта. Ичӧт вокъяс да соч шуасны:

— Эн кай, сибдан.

Бара налы ыджыдджык вок шуас: ме пӧ вӧд абу ыджыд вокыд кодь, ме пӧ ур кодь топыд, пытш кодь чож. Сійӧ сэсся каяс, зарни лэдзас-лэдзас, лэччыны кутас да бара сибдас. Сэсся бара горзасны-горзасны да колясны. Мунасны-мунасны, жемчуг кыдз локтас. Каяс коймӧд вокыд, жемчуг лэдзас-лэдзас, лэччыны кутас, шӧр выяс лэччас, сибдас. Сэсся колясны соча-вока кыкӧн. Сэсся мунасны-мунасны, воас вӧв кок туй.

— Ме тась, муса сочӧй, юа.

— Эн ю, вӧлӧ пӧран, менӧ чужъялан.

Ичӧт вок кывзас, оз ю. Сэсся бара мунасны да мунасны, мӧс кок туй локтас. Бара кутас вокыс шуны:

— Ме тась, муса сочӧй, юа.

— Эн ю, мӧсӧ пӧран, да менӧ люкалан.

Сэсся мунасны да мунасны, да порсь кок туй локтас. Бара ичӧт вок шуас:

— Ме тась юа.

— Эн ю, порсьӧ пӧран, да менӧ ытшкан (ныръялан).

Сэсся бара мунасны да мунасны, да меж кок туй воас. Ичӧт воклы зэв нин юны кутіс ковны. Оз нин сочлысь юав да юас, да зарниа сюра межӧ пӧрас. Сэсся водзӧ мунасны, да зэв ыджыд, зэв бур керка воас. Ичӧт соч межкӧд пырасны посводзас, тшан улӧ пуксясны. Сэсся ичӧт соч сьывны кутас:

Дзули-вели, сар пиянъясӧй!

Тійӧ вӧд кар дзольнад дзоллясянныд

Да сизим кар вывті мунӧ.

Шӧвк мачнад мачасянныд,

Да сизим вичко вывті мунӧ.

Менам вӧд нёль вок вӧлі,

Ӧти вок эз коль:

Ӧти вок менам эзысь кыддзӧ сибді,

Мӧд вок менам зарни кыддзӧ сибдіс,

Коймӧд вок менам жемчуг кыддзӧ сибдіс,

Нёльӧд вок менам зарниа сюра межӧ пӧрис.

Сар пиянъяс дзоллясянінысь, мачасянінысь дугдісны, мича сьыланкыв кутісны кывзыны. Оз тӧдны: коді, кытӧн татшӧм мичаа сьылӧ. Ас костаныс шуасны:

— Вайӧ ми тайӧ сьылысьсӧ корсямӧ: кодлы сюрӧ, сылы гӧтыр лоӧ.

Корсясны-корсясны — оз сюр. Мӧд вой бара кутас ныв сьывны. Бара корсясны-корсясны — оз сюр. Коймӧд войнас ичӧт вокыслы и сюрас. Сэсся найӧ гӧтрасясны нывкӧд и овмӧдчасны, а межӧс шобді йӧртӧд дорӧ йӧртасны.